Disiembre 26–Enero 1

Responsabletayo para iti Bukodtayo a Panagsursuro

Bayat iti panangbasam kadagiti nasantuan a kasuratan iti daytoy a balabala, isurat dagiti ania man a naespirituan nga impresion a maawatmo. Madlawmonto nga addaan ti tunggal balabala iti daytoy a pagbasaan iti aktibidad para kadagiti in-inaudi nga ubbing ken in-inauna nga ubbing, ngem mabalinmo met nga ibagay ti ania man nga aktibidad para iti klaseyo.

Yawis ti Panagbibinninglay

Iti rugi ti tunggal klase, mangtedka kadagiti ubbing kadagiti gundaway a mangibinglay iti ania man a masursuroda maipapan iti ebanghelio. Kas pagarigan, ita a lawas mabalinmo nga awisen ida a mangibinglay iti paggugustoda nga estoria maipapan ken ni Jesucristo.

Isuro ti Doktrina: In-inaudi nga Ubbing

Kayat ni Jesuscristo a surotek Isuna.

Mabasamto ken dagiti ubbing ti adu nga estoria manipud iti biag ni Jesucristo iti daytoy a tawen. Tulongam dagiti ubbing a maawatanda a ti rason nga ad-adalentayo dagitoy nga estoria ket tapno masurottayo a nasaysayaat ti naan-anay a pagwadan ni Jesuscristo.

Dagiti Mabalin nga Aktibidad

• Isaritam kadagiti ubbing maipapan iti awis ti Mangisalakan a,”Surotendak,” a masarakan iti Lucas 4:18–22. Agaramid iti aktibidad a pagtignayan ti maysa nga ubing ken kalpasanna ibagana kadagiti dadduma pay nga ubbing ti, “Surotendak.” Awisem dagiti dadduma pay nga ubbing nga ulitenda daytoy a tignay.

• Mangipakita kadagiti ladawan dagiti tao a sumursurot iti Mangisalakan iti nadumaduma a wagas, agpada a kabayatan ti mortal a panagministrona ken iti aldawtayo. Masarakam dagiti ladawan iti Libro ti Arte ti Ebanghelio wenno kadagiti magasin ti Simbaan. Mabalin met nga ipabuyam ti video a “Light the World” (ChurchofJesusChrist.org). Pailasinmo kadagiti ubbing no kasano ti panangsurot dagiti tao ti Mangisalakan.

• Tulongam dagiti ubbing nga agpanunot kadagiti banag nga ar-aramidenda tapno masurot ti Mangisalakan. Ti panangkanta iti “Seek the Lord Early,” (Children’s Songbook, 108) makaited kadakuada iti sumagmamano a kapanunotan. Bay-am ida a mangidrowing kadagiti ladawan ti bagbagida a mangar-aramid kadagitoy a banag.

Makagun-od dagiti ubbing iti bukodda a pammaneknek maipapan kadagiti kinapudno a mainaig iti nasantuan a kasuratan.

Pudno dagiti nasantuan a kasuratan.

Makagun-od dagiti ubbing iti pammaneknek a pudno dagiti nasantuan a kasuratan sakbay a kabaelanda ti mangbasa kadagitoy. Bayat ti panagadalmo kadagiti nasantuan a kasuratan a kaduam dagiti ubbing ita a tawen, mabalin a tulongam ida a mangammo para iti bagbagida a pudno dagiti nasantuan a kasuratan.

Dagiti Mabalin nga Aktibidad

• Awisem dagiti ubbing a mangisarita maipapan kadagiti paggugustoda a sagut a naawatda para iti panagkasangayda wenno sabsabali pay a pasken. Mangitugot ti nabungon a sagut a kopia dagiti nasantuan a kasuratan, palubosam ti maysa nga ubing a manglukat iti daytoy, ken paneknekam a dagiti nasantuan a kasuratan ti sagut kadatayo manipud iti Nailangitan nga Ama.

• Ipakitam kadagiti ubbing ti sumagmamano a libro a naglaon kadagiti parparbo nga estoria, ket saludsodem kadakuada maipanggep kadagiti paggugustoda nga estoria. Ipakitam kadakuada dagiti nasantuan a kasuratan, ken paneknekam a dagiti nasantuan a kasuratan ket aglaon iti balikas ti Dios para kadatayo. Isaritada maipapan kadagiti tao a pudno a nagbiag ken dagiti banag a pudno a napasamak.

• Mangibinglay kadagiti mensahe a masarakan iti 2 Timoteo 3:15 ken Moroni 10:3–5, a mangtultulong kadagiti ubbing a mangulit iti sumagmamano a ragup ti balikas. Tulongam ida a makaawat a mabalinda a maammuan dagiti nasantuan a kasuratan para iti bagbagida.

• Ilemmeng ti maysa a ladawan ti Mangisalakan, ken ikkam dagiti ubbing iti pamugtuan a makatulong kadakuada a mangsapul iti daytoy. Tulongam dagiti ubbing a makaawat no kasano a ti panangsukisok kadagiti nasantuan a kasuratan ket makatulong kadatayo a mangam-ammo ken ni Jesucristo. Pagsisinnublatem dagiti ubbing a mangilemmeng iti ladawan ken mangted kadagiti pamugtuan iti dadduma pay nga ubbing.

• Aggigiddan nga agkansion iti maysa a kanta maipapan iti panagsursuro iti ebanghelio, kas iti “Search, Ponder, and Pray” (Children’s Songbook, 109), ken tulongam daagiti ubbing nga agramid kadagiti tignay a maigiddan kadagiti balikas. Mangibinglay kadagiti ubbing iti maysa wenno dua kadagiti paggugustom a nasantuan a kasuratan, ken ibagam kadakuada no kasano a naammuam a pudno dagiti nasantuan a kasuratan. No addaan dagiti ubbing iti paggugustoda a nasantuan a kasuratan wenno estoria iti nasantuan a kasuratan, awisem ida a mangibinglay.

Isuro ti Doktrina: In-inauna nga Ubbing

Kayat ni Jesucristo nga agsursuroak ti maipapan Kenkuana ken sumurotak Kenkuana.

Panunotem no kasano a naam-ammom ni Jesucristo. Ania ti maaramidmo a makatulong kadagiti ubbing a mangsursuro maipapan ken sumurot Kenkuana?

Dagiti Mabalin nga Aktibidad

• Awisem dagiti ubbing nga agsarita maipanggep iti maysa a nasinged a gayyem nga am-ammoda ken iladawanda no kasano a nagbalin a gayyem daytoy a tao. Basaen ken ilawlawag ti Juan 5:39 ken Juan 14:15 tapno mangsapul kadagiti wagas a pakariknaantayo nga asidegtayo ken ni Jesus. Kiddawen kadagiti ubbing a mangibinglay kadagiti panawen idi nariknada nga asidegda Kenkuana.

• Kuyogem ti klasem nga agpagpagna iti lawlaw ti balay a pagmimitingan. Awisem dagiti ubbing a mangingato kadagiti imada no iti pannagnada makakitada iti maysa a banag a mangipalagip kadakuada iti maysa a wagas a pakasurotanda iti Mangisalakan (kas iti puente a pagbuniagan wenno maysa a ladawan).

• Makipagkansion kadagiti ubbing iti maysa a kanta maipapan iti panagsurot ken ni Jesucristo, kas iti “Come, Follow Me” (Children’s Songbook,, no. 116). Awisem dagiti ubbing a mangibinglay kadagiti panawen idi sinurotda ti pagwadan ti Mangisalakan.

Makapagadalak kadagiti nasantuan a kasuratan para iti bagik.

Bayat ti panagibasam kadagiti nasantuan a kasuratan kadua dagiti ubbing ken panangdamagmo kadakuada kadagiti saludsod, mapabilegmo iti panagtalekda a makasursuroda manipud kadagiti nasantuan a kasuratan ken masarakanda dagiti napateg a gameng ti pannakaammo.

Dagiti Mabalin nga Aktibidad

• Aggigiddan a basaen iti napigsa ti Juan 5:39 ken Dagiti Aramid 17:10–11, ken damagem kadagiti ubbing no ania ti masursuroda maipanggep no kasano ti agadal kadagiti nasantuan a kasuratan.

• Pumilika iti sumagmamano a simple, nabileg a nasantuan a kasuratan manipud iti Baro a Tulag, isuratmo iti tunggal maysa iti piraso ti papel, ken ilemmengmo dagiti papel. Mangaramidka kadagiti pamugtuan a mangiturong kadagiti ubbing iti “panangbirok iti gameng” iti uneg ti klase wenno iti uneg ti pasdek ti simbaan a mangsarak kadagitoy a nasantuan a kasuratan. Kalpasan a nasarakanda ti tunggal nasantuan a kasuratan, ilawlawagmo no ania ti kaipapanan dagiti nasantuan a kasuratan ken no apay a maysa a gameng daytoy.

• Mangibinglay iti sumagmamano a nasantuan a kasuratan ken ipalawagmo no apay a napnuan kaipapanan kenka dagitoy. Kas maysa a klase, agaramidka iti listaan dagiti napapateg a nasantuan a kasuratan a masarakan dagiti ubbing iti Baro a Tulag ita a tawen—iti pagtaengan wenno kabayatan ti Primary.

• Maaddaan iti panaglilinnawag kadagiti ubbing maipanggep iti no apay a no dadduma narigat ti agbasa kadagiti nasantuan a kasuratan. Kiddawem kadagiti ubbing a mangibinglay iti balakad iti tunggal maysa maipapan iti panagadal kadagiti nasantuan a kasuratan. Kiddawem pay kadakuada a mangibinglay kadagiti ania man a positibo a padasda kadagiti nasantuan a kasuratan.

• Tulongam dagiti ubbing nga agaramid iti simple a kalendario a mabalinda nga usaren a pangmarkaan a no kasano ti kasansan ti panagbasada kadagiti nasantuan a kasuratan. Dagitoy a kalendario ti mabalin a mangipalagip kadakuada iti inaldaw a panagbasada kadagiti nasantuan a kasuratan.

Kasapulak iti bukodko a pammaneknek.

Kasapulanto dagiti ubbing a sursuruam ti bukodda a pammaneknek maipapan iti Nailangitan nga Ama ken ni Jesucristo. Ania ti mabalin nga aramidem a mangparegta kadakuada iti panagsursuroda iti kinapudno para iti bagbagida?

Dagiti Mabalin nga Aktibidad

• Ibinglay ti estoria maipapan kadagiti sangapulo a babbalasang (kitaen iti Mateo 25:1–13; kitaen met iti “Kapitulo 47: Dagiti Sangapulo a Babbalasang,” iti Dagiti Estoria iti Baro a Tulag, 118–20, wenno ti maitutop a video iti ChurchofJesusChrist.org). Saludsodem kadagiti ubbing ti kastoy: Kasano a maipada dagiti pammaneknektayo kadagiti pagsilawan? Apay a napateg nga addaantayo iti bukodtayo a pammaneknek?

• Ilawlawag no ania ti maaramidtayo a mangpapigsa kadagiti pammaneknektayo. Para kadagiti kapanunotan, awisem dagiti ubbing a mangsukisok iti Juan 7:17 ken Moroni 10:3–5. Awisem ida a mangibinglay kadagiti banag nga ammoda a pudno.

• Idawatmo kadagiti ubbing a tulongandaka a mangsurat kadagiti pangbangon a bloke [blocks] kadagiti kinapudno a mangbukel kadagiti pammaneknektayo (kitaen iti Gospel Topics, “Testimony,” topics.ChurchofJesusChrist.org). Pausar kadagiti ubbing dagiti blokoe [blocks] tapno mangbangon iti maysa a pasdek a mangibagbagi iti maysa a pammaneknek.

Yallukoy ti Panagsursuro iti Pagtaengan

Kasano a maallukoymo dagiti ubbing ken dagiti nagannakda nga agsursuro manipud iti Baro a Tulag iti pagtaengan? Kas pagarigan, mabalinmo nga awisen dagiti ubbing a mangyulo ti maysa kadagiti nasantuan a kasuratan nga inlawlawagmo iti klase (makatulong no pagsisinaen dagiti nasantuan a kasuratan iti ababa a ragragup ti balikas) ken mangibinglay dagiti bersikulo kadagiti pamiliada.

Panangpadur-as iti Panangisurotayo

Ibagaymo dagiti aktibidad para iti tawen ken kabaelan dagiti ubbing nga sursuruam. Kasapulan dagiti in-inaudi nga ubbing dagiti detaliado a pannakailawlawag ken masursuruan manipud iti nadumaduma a pamay-an ti panangisuro. Bayat ti panag-mature dagiti ubbing, ad-adu ken mabalin a nasaysayaat pay ti panangibinglayda kadagiti kapanunotanda. Mangted kadakuada iti gundaway nga agibinglay, agpaneknek, ken makiraman. Mangted ti tulong no kasapulan. (Kitaen iti Panangisuro iti Wagas ti Mangisalakan,, 25–26.)