“Enero 2–8. Mateo 1; Lucas 1: ‘Maaramid Koma Kaniak Kas iti Saom’” Umaykayo, Sumurot Kaniak—Para iti Primary: Baro a Tulag 2023 (2022)
“Enero 2–8. Mateo 1; Lucas 1,” Umaykayo, Sumurot Kaniak—Para iti Primary: 2023
Enero 2–8
Mateo 1; Lucas 1
“Maaramid koma Kaniak kas iti Saom”
Rugian babaen ti panangbasa iti Mateo 1 ken Lucas 1. Ti Umaykayo, Sumurot Kaniak—Para kadagiti Indibidual ken Pamilia makatulong kenka tapno maawatam dagitoy a kapitulo, ken daytoy a balabala ti makaited kenka kadagiti kapanunotan iti panangisuro. No kasapulam ti nayon a tulong iti panangisuro kadagiti in-inaudi nga ubbing, kitaen iti “Panangipaay iti Kasapulan dagiti In-inaudi nga Ubbing” iti rugi ti daytoy a resource.
Yawis ti Panagbibinninglay
Kiddawen kadagiti ubbing nga agtugaw iti pasirkulo, ket kalpasanna saludsodem iti maysa nga ubing a mangibinglay iti maysa a banag a nasursurona manipud kadagiti nasantuan a kasuratan. Mangitulid dayta nga ubing iti bola wenno mangitudo iti sabali pay nga ubing iti sirkulo, a bagina met ti mangibinglay.
Isuro ti Doktrina: In-inaudi nga Ubbing
Impakaammo dagiti anghel ti pannakayanak ni Jesus.
Sinarungkaran ti anghel ti tunggal maysa kada Maria ken Jose a nangipakaammo iti pannakayanak ni Jesucristo. Makatulong dagitoy a padas kadagiti ubbing a mangkita no kasano ti kapateg ti pannakayanak ni Cristo.
Dagiti Mabalin nga Aktibidad
-
Awisem dagiti nagannak ti maysa nga ubing nga umay iti klase a nakakawes iti bado a kas kada Maria ken Jose. Kiddawem kadakuada a mangibinglay kadagiti padasda kas naisurat iti Mateo 1:18–25 ken Lucas 1:26–38.
-
Isaritam ti estoria dagiti anghel a nagparang kada Maria ken Jose, kas naisurat kadagitoy a bersikulo. (Kitaen met iti “Kapitulo 2: Ni Maria ken ti Anghel” ken “Kapitulo 4: Ni Jose ken ti Anghel” Dagiti Estoria iti Baro a Tulag, 8–9,12, wenno dagiti maitutop a video iti ChurchofJesusChrist.org.) Mabalinmo nga ipakita ti ladawan iti balabala ita a lawas iti Umaykayo, Sumurot Kaniak—Para kadagiti Indibidual ken Pamilia. Awisem dagiti ubbing a mangulit kadagitoy nga estoria kenka.
-
Awisem dagiti ubbing a mangidrowing kadagiti estoria a masarakan iti Mateo 1:18–25 ken Lucas 1:26–38.
Ti Panangiwaragawag, ni John Scott
Sungbatan ti Nailangitan nga Ama dagiti kararagko.
Nalabit a nagkarkararag da Zacarias ken Elisabet iti uneg ti adu a tawen tapno maadaandda iti maysa nga anak. Iti kamaudiananna sinungbatan ti Nailangitan nga Ama dagiti kararagda babaen ti panangtedna kadakuada iti maysa nga anak a lalaki, ni Juan Bautista. Kasano a mausarmo daytoy nga estoria a pangisuro kadagiti ubbing a sungbatan ti Nailangitan nga Ama dagiti kararag?
Dagiti Mabalin nga Aktibidad
-
Iti bukodmo a balikas, isaritam ti estoria manipud iti Lucas 1:5–20, 57–63. Mabalin a kayatmo nga uliten ti estoria iti sumagmamano a gundaway. Dutokam dagiti ubbing a mangyakem kadagiti parte ni Zacarias, ni Elisabet, ken ti anghel ket yakem ti estoria. Yunay-unay dagiti balikas ti anghel ken ni Zacarias: “Nagngegan dagiti kararagmo” (Lucas 1:13). Ibinglaymo ti maysa a padas a nakangngegan ti Nailangitan nga Ama iti kararagmo.
-
Usarem ti “We Bow Our Heads” (Children’s Songbook, 25) wenno sabali pay a kanta a mangisuro kadagiti ubbing no kasano ti agkararag. Tunggal kanito a kantaen dagiti ubbing dagiti balikas nga “agkararag,” wenno “kararag,” awisem ida nga agdumog ken agdalikepkep.
-
Kiddawem iti tunggal ubing nga agaramid kadagiti tignay a mangibagi iti maysa a banag a mabalinna nga ikararagan. Papugtuam iti dadduma pay nga ubbing no ania ti mangibagi kadagiti tignay. Masarakanda dagiti kapanunotan iti panid ti aktibidad iti daytoy a lawas.
Ni Jesucristo isu ti Anak ti Dios.
Ni Jesus isu ti Anak ti Nailangitan nga Ama ken ni Maria. Ania iti maaramidmo a makatulong kadagiti ubbing a masursuruan iti ad-adu pay maipanggep Kenkuana?
Dagiti Mabalin nga Aktibidad
-
Ibagam kadagiti ubbing nga imbaga ti anghel ken ni Maria a maawagan ti maladagana iti Anak ti Dios (kitaen iti Lucas 1:35). Tulongam dagiti ubbing a mangulit iti ragup ti balikas a “Ni Jesucristo Isu ti Anak ti Dios.” Tulongam dagiti ubbing a makaawat no siasino dagiti nagannak ni Jesus babaen ti panangawis kadakuada a mangidrowing kadagiti ladawan dagiti bukodda a nagannak. Bayat ti panangaramidda iti daytoy, ibagam kadakuada nga addaan met ni Jesus iti nagannak—ni Maria ken ti Nailangitan nga Ama. Mainayon pay, nakiddaw ken ni Jose a salakniban ken aywananna ni Jesus bayat ti panagbiagna iti daga.
-
Iburaymo ti pammaneknekmo a gapu ta Anak ti Dios ni Jesus, mabalinna ti matay para kadagiti basoltayo ket agbiag manen. Mangipakita kadagiti ladawan ti Pannakailansa iti Krus ken Panagungar ni Jesus (kitaen iti Libro ti Arte ti Ebanghelio, blg. 57, 59).
Isuro ti Doktrina: In-inauna nga Ubbing
Iti Dios awan ti imposible.
Posible ti pannakayanak da Jesus ken Juan Bautista laeng babaen ti bileg ti Dios. Ti panangammo maipapan kadagiti milagro ket mabalin a mangpapigsa iti pammati dagiti ubbing nga adda bileg ti Dios a makaaramid kadagiti milagro iti biagda.
Dagiti Mabalin nga Aktibidad
-
Bayat ti panangrebyum ken dagiti ubbing iti Mateo 1:18–25 ken Lucas 1:5–37, saludsodem kadagiti ubbing ti kas iti “Ania ti masaom no sika koma ni Maria?” wenno “Kasano ti mariknam no sika koma ni Zacarias?”
-
Iti simple a balikas, isaritam dagiti estoria a nailadawan iti Mateo 1:18–25 ken Lucas 1:5–37. Kiddawem kadagiti ubbing a mangingato kadagiti imada no mangngeganda ti maysa a banag a mabalin a kasla imposible no awan ti bileg ti Dios. Ania ti dadduma pay nga estoria a mabalin nga ibinglay dagiti ubbing a nagaramidan ti Dios iti maysa a banag a kasla imposible?
-
Tulongam dagiti ubbing a mangyulo iti Lucas 1:37. Tapno maaramid daytoy, mabalinmo nga isurat ti bersikulo iti pisarra ken awisem dagiti ubbing a mangisao iti daytoy iti sumagmamano a gundaway. Kalpasan ti tunggal gundaway, pugasem ti maysa a balikas.
Mateo 1:21–25; Lucas 1:30–35, 46–47
Ni Jesucristo isu ti Anak ti Dios.
Ni Jesus isu ti Anak ti Nailangitan nga Ama ken ni Maria. Kasano a matulongam dagiti ubbing a masursuruan iti daytoy a kinapudno.
Dagiti Mabalin nga Aktibidad
-
Kiddawen kadagiti ubbing a mangbasa iti Lucas 1:30–35, a mangsapsapul kadagiti sungbat kadagitoy a saludsod: “Asino ti ina ni Jesus?” ken “Asino ti Ama ni Jesus?” Tulongam ida a makaawat a ni Jesucristo laeng ti tao nga addaan iti mortal nga ina, ni Maria, ken imortal nga Ama, ti Nailangitan nga Ama (kitaen met iti 1 Nephi 11:18–21).
-
Bayat ti panagbasam kadagitoy a bersikulo, awisem dagiti ubbing a mangsukisok kadagiti nagan wenno pangawag ken ni Jesucristo. Ania ti kayat a sawen dagitoy a nagan, ken ania ti isuroda kadatayo maipapan ken ni Jesus?
-
Ibinglaymo ti pammaneknekmo maipapan ken ni Jesucristo, ken awisem dagiti ubbing nga ibinglayda met ti pammaneknekda.
Denggen ken sungbatan ti Nailangitan nga Ama dagiti kararagko.
Sungbatan ti Dios dagiti kararag ngem saan a kanayon iti wagas a mabalin a namnamaentayo. Kasano a mausarmo ti pakaammuan maipapan kada Zacarias ken Elisabet a mangisuro kadagiti ubbing iti daytoy a kinapudno?
Dagiti Mabalin nga Aktibidad
-
Kiddawen kadagiti ubbing no ania koma ti isaoda iti maysa a tao a nagkararag para iti maysa a bendision ngem dina pay naawat daytoy. Awisem ida a mangpanunot maipapan iti daytoy a saludsod bayat ti aggigiddan a panagbasada iti Lucas 1:5–25, 57–66. (Kitaen met iti “Kapitulo 1: Da Elisabet ken Zacarias” ken “Kapitulo 3: Mayanak ni Juan Bautista,” Dagiti Estoria iti Baro a Tulag, 6–7, 10–11, wenno dagiti maitutop a video iti ChurchofJesusChrist.org.) Ania ti mabalin nga ibaga da Zacarias ken Elisabet iti maysa a tao a nakarikna a saan a nasungbatan ti kararagda?
-
Isapsapam nga awisem ti sumagmamano nga ubbing a mangibinglay kadagiti padas idi nasungbatan ti Nailangitan nga Amatayo dagiti kararagda. Ibinglaymo ti maysa a panawen a nakariknaam a nasungbatan dagiti kararagmo iti saan a ninamnama a wagas.
-
Awisem dagiti ubbing a mangidrowing iti ladawan iti maysa a panawen idi sinungbatan ti Nailangitan nga Ama ti maysa a kararag—nangnangruna ti maysa a bukodda. Paibinglaymo kadakuada dagiti drowingda iti klase.
Yallukoy ti Panagsursuro iti Pagtaengan
Awisem dagiti ubbing a mangibinglay iti pamiliada iti ania man a ladawan nga indrowingda kabayatan ti klase. Allukoyem ida a mangidawat kadagiti miembro ti pamiliada a mangibinglay kadagiti panawen idi sinungbatan ti Dios dagiti kararagda.
Panangpadur-as iti Panangisurotayo
Tulongam dagiti babassit nga ubbing a makasursuro manipud kadagiti nasantuan a kasuratan. Tapno matulongan dagiti babassit nga ubbing a masursuruan kadagiti nasantuan a kasuratan, agpokuska iti maysa a bersikulo iti nasantuan a kasuratan wenno uray maysa laeng a kangrunaan a ragup ti balikas. Mabalinmo nga awisen dagiti ubbing a tumakder wenno ingato dagiti imada no mangngeganda dayta a balikas wenno ragup ti balikas. (Kitaen iti Panangisuro iti Wagas ti Mangisalakan, 21.)