Agdayawtayo Koma Kenkuana, ni Dana Mario Wood

Enero 9–15

Mateo 2; Lucas 2

Immaykami Agdaydayaw Kenkuana

Napateg nga annak ti Nailangitan nga Ama dagiti ubbing a sursuruam. Idawatmo Kenkuana a tulongannaka bayat ti panagkalikagummo a mangisuro kadakuada manipud kadagiti nasantuan a kasuratan. Maiwanwannaka kadagiti pagbatayan a nasken a yunay-unaymo ken makaparegta kenka kadagiti kapanunotan iti aktibidad a mangtulongto kadagiti annakna.

Yawis ti Panagbibinninglay

Kiddawem kadagiti ubbing a mangibaga kenka no ania ti ammoda maipanggep ti panakayanak ni Cristo. Ania dagiti paggugustoda a paset ti estoria?

Isuro ti Doktrina: In-inaudi nga Ubbing

Lucas 2:1–14

Nayanak ni Jesus.

Pinanawan ni Jesus ti pagtaenganna iti denna ti Nailangitan nga Ama tapno mayanak iti daga tapno iti kasta Isu ti agbalin a Mangisalakantayo. Kasano a matulongam dagiti ubbing a manglagip iti estoria maipapan ti pannakayanak ni Cristo?

Dagiti Mabalin nga Aktibidad

• Bayat ti panangbasam iti estoria maipapan ti pannakayanak ni Cristo, awisem dagiti ubbing a mangyakem iti estoria mismo, wenno usarem ti panid ti aktibidad iti daytoy a lawas a mangrebyu iti estoria. (Kitaen met iti “Kapitulo 5: Nayanak ni Jesucristo,” Dagiti Estoria iti Baro a Tulag, 13–15, wenno ti maitutop a video iti ChurchofJesusChrist.org.)

• No addaanka iti maysa, mangitugotka iti maysa a Belen ket awisem dagiti ubbing a mangurnos kadagiti pedaso iti maitutop a lugar bayat ti panangisaritam kadakuada ti estoria maipapan ti pannakayanak ni Jesucristo. Mabalinmo pay nga ipakita ti ladawan ti Belen (kitaen, kas pagarigan, ti balabala ita a lawas iti Umaykayo, Sumurot Kaniak—Para Kadagiti Indibidual ken Pamilia). Itudom dagiti nadumaduma a tao iti Belen, ken awisem dagiti ubbing nga ibinglayda no ania ti ammoda maipanggep iti tunggal tao.

• Aggigiddan a kantaenyo dagiti paggugusto a kanta dagiti ubbing maipanggep iti pannakayanak ni Jesus. No aramidenyo, agsapul kadagiti gundaway a pangiburayam iti pammaneknekmo maipapan iti Mangisalakan. Awisem dagiti ubbing a mangibinglay no apay nga ay-ayatenda ni Jesus.

Mateo 2:1–12

Makaitedak kadagiti nasayaat a sagut ken ni Jesus.

Nangted dagiti Masirib a Lallaki kadagiti sagut a balitok, insienso, ken mirra ken ni Jesus. Kasano a mausarmo daytoy nga estoria a mangisuro kadagiti ubbing a mabalinda ti mangted kadagiti sagut ken ni Jesus—sagsagut a kas iti ayat, serbisio, ken panagtungpal?

Dagiti Mabalin nga Aktibidad

• Mangipakitaka iti maysa a ladawan dagiti Masirib a Lallaki bayat ti panangrebyum iti estoriada, a masarakan iti Mateo 2:1–12, kadagiti ubbing. Mabalinmo nga ipakita ti ladawan Wise Men Present Gifts (ChurchofJesusChrist.org).

• Mangbungon kadagiti ladawan wenno banag a mangibagi kadagiti sagut a maitedtayo ken ni Jesus. Awisem dagiti ubbing a mangtulong kenka a manglukat kadagiti sagut, ket paglilinnawagan no kasano a maitedtayo dagitoy a sagut iti Mangisalakan.

• Tulungam ti tunggal ubing nga agdrowing wenno mangisurat iti listaan dagiti sagut a maitedda ken ni Jesus, kas iti “panagbalin a nasayaat a gayyem” wenno “panagkararag.” Awisem dagiti ubbing a mangibinglay iti listaanda iti klase ken pumili iti maysa a “sagut” nga iteddanto ken ni Jesus ita nga aldaw.

Lucas 2:40–52

Ubing idi ni Jesus a kas kaniak.

Ti panagsursuro maipanggep iti panagubing ti Mangisalakan mabalin a makatulong kadagiti ubbing a sursuruam a makiuman Kenkuana. Kiddawen kadagiti ubbing no ania ti masursuroda manipud kadagitoy a bersikulo no kasano a makapagbalinda a kas ken ni Jesus ita.

Dagiti Mabalin nga Aktibidad

• Awisem ti maysa kadagiti agtutubo iti ward a bumisita iti klase ket mangibinglay ti estoria maipapan ken ni Jesus a mangisursuro iti templo idi maysa nga agtutubo Isuna.

• Nasapsapa a kiddawen iti sumagmamano nga ubbing a mangitugot kadagiti retratoda idi maladagada tapno ibinglayda. Saludsodem kadakuada no kasano a dimmakkelda. Mangibinglay iti sumagmamano a wagas a dimmakkelan ni Jesus (kitaen iti Lucas 2:40, 52). Makipagkanta kadagiti ubbing iti “Jesus Once Was a Little Child” (Children’s Songbook, 55) wenno sabali pay a kanta maipanggep iti Mangisalakan.

• Basaem ti Lucas 2:52, ken ilawlawagmo no ania ti kaipapanan ti “kinasirib” ken “kinatayag”. Mabalinmo a kiddawen kadagiti ubbing nga agaramid kadagiti tignay a mangipakita no ania ti kayat a sawen ti dimmakkel iti kinasirib ken gundaway iti Dios ken iti dadduma a tao. Kas pagarigan, mabalinda a yakem ti panagbasa iti maysa a libro wenno panangtulong ti maysa a tao nga agkasapulan.

Isuro ti Doktrina: In-inauna nga Ubbing

Lucas 2:1–21; Mateo 2:1–12

Impadto dagiti nagkauna a propeta ti pannakayanak ti Mangisalakan.

Pinaspasungadan dagiti propeta ken mamatpati ti panakayannak ken mision ti Mangisalakan iti adu a siglo. Ti pannakaawat iti daytoy a kinapudno ti makatulong kadagiti ubbing a manggun-od iti naun-uneg a panangbigbig iti pateg iti biag ken mision ti Mangisalakan.

Dagiti Mabalin nga Aktibidad

• Kidawem kadagiti ubbing a mangisarita maipangggep kadagiti banag a paspasungadanda, a kas iti panagkasangay wenno fiesta opisial. Pagbasaem dagiti ubbing iti Helaman 14:2–5 a mangsapul iti maysa a banag a paspasungadan dagiti propeta.

• Aggigiddankayo a mangbasa iti sumagmamano a padto iti pannakayanak ti Mangisalakan (kitaen iti Isaias 7:14; 9:6; 1 Nephi 11:18; Helaman 14:5). Tulongam dagiti ubbing a mangilista kadagiti detalye a linaon dagitoy a padto ken sapulen ti pannakaipatungpalda iti Lucas 2:1–21 ken Mateo 2:1–12.

• Awisem dagiti ubbing a mangidrowing iti ladawan ti maysa a banag manipud iti Mateo 2:1–12 or Lucas 2:1–21 ken ibinglayda no apay a pagyamananda a nayanak ni Jesus.

Ni Simeon nga Agdaydayaw iti Ubing a ni Jesus, ni Greg K. Olsen

Lucas 2:40, 52

Ni Jesus dimmakkel “iti kinasirib ken kinatayag, ken iti gundaway iti Dios ken iti tao.”

Kas ken ni Jesus, addaan dagiti ubbing a sursuruam iti napateg a mision a sagsaganaan. Ania ti masursuroda manipud iti pagwadan ni Jesus?

Dagiti Mabalin nga Aktibidad

• Bayat ti panangbasam iti Lucas 2:40, 52, ibagam kadagiti ubbing a dumngegda kadagiti banag nga inaramid ni Jesus. Awisem dagiti ubbing a mangibinglay kadagiti wagas a nagdakkelanda manipud pay idi babassitda. Iburaymo ti bukodmo a padas iti panagsursuro iti ebanghelio nga in-inut. Iburaymo ti pammaneknekmo maipapan iti Mangisalakan.

• Mangileppas kadagiti aktibidad a magiladawan kadagiti ragup ti balikas iti Lucas 2:40, 52. Kas pagarigan, mabalinmo a rukoden ti katayag iti tunggal ubing (“Ni Jesus dimmakkel iti … kinatayag”) wenno paibinglay kadakuada ti paggugustoda a nasantuan a kasuratan (“napapigsa iti espiritu”). Tulongam dagiti ubbing a mangiisurat kadagiti wagas a pagdakkelanda ket ibinglayda dagitoy iti pamiliada.

• Kalpasan ti panangrebyu iti Lucas 2:40, 52, awisem dagiti ubbing a mangibinglay no ania ti langa ni Jesus idi katawenna isuda. Kasano ngata a trinatona ti inana? Dagiti kakabsatna?

Lucas 2:41–52

Matuladko ti pagwadan ni Jesus.

Uray kas maysa nga agtutubo, nangisursuro ni Jesus iti ebanghelio iti templo. Kapadana, addaan dagiti ubbing iti klasem iti adu a maisuro kadagiti adda iti aglawlawda.

Dagiti Mabalin nga Aktibidad

• Awisem ti maysa nga ubing nga umay a nakasagana a manggupgop iti estoria iti Lucas 2:41–52. Tapno matulongan dagiti ubbing a maawatanda ti estoria, isurom no ania ti kaipapanan ti “aramiden ti Ama” (bersikulo 49). Kas pagarigan, mabalinmo nga isarita kadagiti ubbing no ania ti ar-aramidem wenno dagiti nagannak kenka para iti maysa a trabaho. Ania ti trabaho wenno “aramid” ni Jose, ti naindagaan nga ama ni Jesus? (kitaen iti Mateo 13:55). Ania ti aramid ti Nailangitan nga Amana? (kitaen iti Lucas 2:46–49; kitaen met iti Moises 1:39).

• Kagiddan dagiti ubbing, basaen ti Lucas 2:46–49, ket saludsodem ti, “Kasano nga inaramid ni Jesus ti ‘aramiden ti Amana’?” Tulongam dagiti ubbing a mangilista wenno mangidrowing iti pisarra dagiti wagas a pakatulonganda a mangaramid met iti aramiden ti Nailangitan nga Ama.

• Tapno matulongan dagiti ubbing a mangpapigsa iti panagtalekda a, kas ken ni ubing a Jesus, makaisuroda iti ebanghelio, tulongam ida nga agsanay ti panangisuro ti tunggal maysa iti maysa a pagbatayan manipud iti Para iti Pigsa dagiti Agtutubo.

Yallukoy ti Panagsursuro iti Pagtaengan

Awisem dagiti ubbing a mangisuro iti pamiliada iti maysa a banag a nasursuroda maipanggep iti panakayanak ni Jesucristo.

Panangpadur-as iti Panangisurotayo

Managusisa dagiti ubbing ken agsursuroda iti adu a wagas. Magustuan dagiti ubbing ti agsursuro babaen kadagiti baro ken nadumaduma a padas. Usarem dagiti aktibidad a mangtulong kadakuada nga aggunay, mangusar iti amin a panagriknada, agsukisok, ken agpadas kadagiti baro a banag. (Kitaen iti Panangisuro iti Wagas ti Mangisalakan, 25–26.)