Enero 16–22

Juan 1

Nasarakanmi ti Mesias

Bayat ti panangbasam iti Juan 1, isuratmo dagiti naespirituan nga impresion a maawatmo. Ti balabala ita a lawas iti Umaykayo, Sumurot Kaniak—Para kadagiti Indibidual ken Pamilya makatulong kenka a mangadal iti daytoy a kapitulo. Dagiti sumaganad a naisingasing nga aktibidad ti makaited kenka kadagiti kapanunotan maipapan iti no kasano a matulongam dagiti ubbing a masursuruan kadagiti pagbatayan iti Juan 1. Mabalin nga ibagay dagiti aktibidad para kadagiti in-inauna nga ubbing, no tarigagayan, para kadagiti in-inaudi nga ubbing.

Yawis ti Panagbibinninglay

Tapno matulongan dagiti ubbing a mangibinglay no ania ti ammoda maipanggep ken Jesus, mabalinmo ti mangipakita kadagiti ladawanna a mangipatpatungpal iti sumagmamano kadagiti akemna a nailadawan iti Juan 1 (kas iti panagparsua iti daga wenno panangisuro iti ebanghelio). Awisem dagiti ubbing a mangiladawan no ania ti mapaspasamak kadagiti ladawan.

Isuro ti Doktrina: In-inaudi nga Ubbing

Juan 1:1–2

Nagnaed ni Jesus iti sidong ti Nailangitan nga Ama sakbay ti pannakayanakna.

Insuro ni Juan a nagnaed ni Jesucristo iti sidong ti Dios sakbay ti panagbiagna iti daga. Nagnaedtayo met iti sidong ti Dios sakbay a nayanaktayo (kitaen iti “Ti Kaamaan: Maysa a Waragawag ti Lubong,” ChurchofJesusChrist.org). Kasano a maisuromto dagiti ubbing iti daytoy a kinapudno?

Dagiti Mabalin nga Aktibidad

• Ilawlawag a “ti Verbo” iti Juan 1:1 maitudo ken ni Jesus. Basaem iti napigsa ti bersikulo, ken kiddawen kadagiti ubbing a mangisao iti “Jesus” tunggal basaem “ti Verbo.” Ipakitam ti ilustrasion a napauluan iti “Premortal Life” (ChurchofJesusChrist.org; kitaen met iti Behold Your Little Ones [2008], 15). Ilawlawag a nagnaed ni Jesucristo iti sidong ti Nailangitan nga Ama sakbay nga immay Isuna iti daga.

• Umadaw kadagiti resources kas kadagitoy tapno isuro kadagiti ubbing maipapan iti biagtayo iti sidong ti Dios sakbay nga immaytayo iti daga: “Pakauna: Ti Plano ti Nailangitan nga Amatayo” (iti Dagiti Estoria iti Daan a Tulag, 1–5, ChurchofJesusChrist.org) wenno “Biag sakbay Daytoy a Biag” iti Pangiwanwan iti Nasantuan a Kasuratan (scriptures.ChurchofJesusChrist.org).

• Mangawis iti nagannak a mangitugot iti maysa a maladaga iti klase. Saludsodem kadagiti ubbing no sadino ti nagnaedan ti espiritu daytoy a maladaga sakbay ti pannakayanakna. Palagipam dagiti ubbing a naminsan idi a maladagada, ken paneknekam a nagnaedda pay iti langit iti denna ti Nailangitan nga Ama kas espiritu nga annak sakbay a nayanakda.

Juan 1:3

Pinarsua ni Jesus ti amin a banag.

Ti pannakaammo maipanggep iti akem ni Jesucristo kas Namarsua mabalin a makatulong kadakuada a mangipapigsa iti panagraemda Kenkuana.

Dagiti Mabalin nga Aktibidad

• Basaem ti Juan 1:3 kadagiti ubbing, ken ipakitam ti ladawan manipud iti balabala iti daytoy a lawas iti Umaykayo, Surmurot Kaniak—Para Kadagiti Indibidual ken Pamilia. Tulongam dagiti ubbing a mangyulo iti ragup ti balikas ”inaramid ni [Jesucristo] ti amin a banag.”

• Ipakitam kadagiti ubbing ti ladawan ti maysa kadagiti pinarsua ti Apo. Pailadawanmo kenkuana daytoy iti dadduma pay nga ubbing, ket papugtuam kadakuada no ania ti mailadladawan.

• Idawatmo iti tunggal ubing a manginagan iti maysa a banag a pinarsua ni Jesucristo. Tulongam dagiti ubbing a mangpanunot kadagiti wagas a mabalin a pangaywananda iti daga ken iti dadduma pay a pinarsua ti Apo.

Pinarsua ni Jesucristo ti lubong ken ti amin a banag ditoy.

Juan 1:35–51

Maawisko dagiti dadduma nga umasideg ken ni Jesucristo ken agsursuro iti maipanggep Kenkuana.

Ti Juan 1 naglaon kadagiti pakaammuan dagiti disipulo a nangawis kadagiti tao nga ”umay ken mangkita” a ni Jesus isu ti Anak ti Dios. Mabalin a tuladen uray dagiti babassit nga ubbing daytoy a pagwadan.

Dagiti Mabalin nga Aktibidad

• Iladawanmo no kasano a naammuan ni Andres ti maipanggep ken ni Jesus, ket isaritam no kasano nga insuro met ni Andres ni Pedro (kitaen iti Juan 1:35–42). Ibinglay no kasano a naammuam ti maipanggep iti Simbaan, wenno mangawis iti maysa a baro a miembro a mangibinglay no kasano a naammuanna ti maipanggep iti Simbaan.

• Ibinglay ti estoria ni Felipe a mangaw-awis ken ni Natanael nga “umay ken mangkita” (Juan 1:43–51). Ilemmeng ti maysa a ladawan ni Jesus iti maysa a kahon, ken mangawis iti maysa nga ubing nga ”umay ken mangkita” iti daytoy ken kalpasanna ibagana kadagiti dadduma pay nga ubbing no ania ti nakitana.

• Pakoloran kadagiti ubbing ti panid ti aktibidad iti daytoy a lawas, ken allukoyem ida a mangusar iti daytoy a mangawis iti maysa a tao a mangsursuro iti maipanggep ken ni Jesus.

• Kiddawem iti maysa nga ubing a mangisarita maipanggep iti maysa a panawen idi nangibinglay iti maysa a banag, kas iti maysa nga ay-ayam wenno sagut, iti maysa a tao. Kasano a makaibinglaytayo iti ebanghelio? Isarita ti estoria maipapan iti maysa nga ubing a nangibinglay iti ebanghelio iti maysa a gayyem, kas iti “A Friend and a Missionary,” Friend, Hulio 2018, 12–13; Liahona, Hulio 2018, 70–71.

Isuro ti Doktrina: In-inauna nga Ubbing

Juan 1:1–5

Nagnaed n Jesuscristo iti denna ti Nailangitan nga Ama sakbay ti pannakayanakna.

Uray sakbay a nayanak Isuna, inakem ni Jesucristo dagiti napateg nga papelna iti plano ni Nailangitan nga Ama. Bayat ti panangbasam iti Juan 1:1–5, ania ti makaawis iti riknam maipanggep iti aramid ni Cristo iti biag sakbay ti yaay iti daga?

Dagiti Mabalin nga Aktibidad

• Saludsodem kadagiti ubbing no ammoda ti ania man a banag maipanggep ti inaramid ni Jesus sakbay a panakayanakna. Awisem ida a mangsapul kadagiti sungbat iti Juan 1:1–5. Mabalin a makatulong a sapulen iti Patarus ni Joseph Smith, Juan 1:1–5 (iti Bible appendix).

• (Kitaen iti “Pakauna: Ti Plano ti Nailangitan nga Amatayo” (iti Dagiti Estoria iti Baro a Tulag, 1–5, wenno ti maitutop a video iti ChurchofJesusChrist.org). Saludsodem kadagiti ubbing no ania ti nasursuroda maipanggep ken ni Jesucristo.

• Sumagmamano nga aldaw a nasapsapa, awisem ti sumagmamano nga ubbing nga umay iti klase a nakasagana a mangipakita wenno mangiladawan iti maysa a banag a pinartuatda. Ipakitam dagiti ladawan ti sumagmamano a pinarsua ti Apo, ken usarem ti Juan 1:3 a mangilawlawag a pinarsua ni Jesus ti daga ken ti amin a banag ditoy.

Juan 1:4–9

Ni Jesucristo ti silawko.

Makatulong ti simbolismo ti silaw kadagiti ubbing a makaawat iti Mangisalakan ken iti ebangheliona. Kasano a maparegtam dagiti ubbing nga agsapul iti silaw ti Mangisalakan no kasla nasipnget ti lubong?

Dagiti Mabalin nga Aktibidad

• Awisem dagiti ubbing a mangbasa iti Salmo 27:1; Juan 1:4–9; Mosiah 16:9; ken Doktrina ken Katulagan 39:1–2, nga agsapsapul kadagiti ragup ti balikas a pagpapadadaan dagitoy nasantuan a kasuratan. Kasano a mayarig ni Jesucristo iti maysa a silaw?

• Mangipakitaka iti maysa a ladawan ti Mangisalakan ken iti sumagmamano a banag a mangted iti silaw, a kas iti maysa a flashlight. Kasano a mayarig ni Jesucristo kadagitoy a banag? Kasano a maibinglaytayo ti silawna kas kadagiti dadduma? Aggigiddan a mangkanta iti “The Lord Is My Light” (Hymns, no. 89) wenno sabali pay a kanta maipapan iti silaw ti ebanghelio.

• Saludsodem kadagiti ubbing no ania ti aramidenda no addada iti kasipngetan ken agbubutengda. Paneknekam a mabalinda a kanayon ti umasideg iti Mangisalakan no mabutengda.

Juan 1:35–51

Kas maysa a pasurot ni Jesucristo, maawisko ti dadduma a sumurotda Kenkuana.

Ibilangmo no kasano a mausarmo dagiti pagarigan iti Juan 1:35–51 a mangallukoy kadagiti ubbing a mangawis kadagiti dadduma nga agsursuro maipanggep iti Mangisalakan.

Dagiti Mabalin nga Aktibidad

• Tulongam dagiti ubbing a mangsukisok iti Juan 1:35–51 a mangsapul kadagiti banag a kinuna dagiti tao a mangawis iti dadduma nga agsursuro maipanggep iti Mangisalakan. Pagsanayem ida no ania ti mabalinda nga isao a mangawis iti maysa a gayyem nga agsursuro maipanggep Kenkuana.

• Kiddawen kadagiti ubbing a mangusar iti panid ti aktibidad iti daytoy a lawas a mangaramid iti maysa nga awis a mabalinda nga usaren a mangawis iti maysa a gayyem wenno miembro ti pamilia nga agsursuro iti ad-adu pay maipanggep ken ni Jesucristo.

• Ikkam dagiti ubbing iti gundaway a mangisarita iti klase maipanggep iti maysa a banag nga ipatpategda. Tulongam dagiti ubbing a mangkita no kasano a maipada ti panangibinglay iti ebanghelio iti panangibinglay iti dadduma pay a banag nga ipatpategtayo, buyaen ti video “Good Things to Share” on ChurchofJesusChrist.org).

Yallukoy ti Panagsursuro iti Pagtaengan

Allukoyem dagiti ubbing a mangawis iti maysa a tao nga ay-ayatenda tapno agsursuro iti ad-adu pay maipanggep ken ni Jesucristo.

Panangpadur-as iti Panangisurotayo

Usarem dagiti tulong a ladawan [visual aids]. Mangsapul kadagiti wagas a pangtulongan kadagiti ubbing a mangiladawan iti panunotda no ania ti masursuroda kadagiti nasantuan a kasuratan. Mabalinmo nga aramiden daytoy iti arte ti ebanghelio, kadagiti drowing, video, puppet, wenno skit.