“Enero 23–29. Mateo 3; Marcos 1; Lucas 3: ‘Isaganayo ti Dalan ti Apo’” Umaykayo, Sumurot Kaniak—Para iti Primary: 2023 (2022)
“Enero 23–29. Mateo 3; Marcos 1; Lucas 3,” Umaykayo, Sumurot Kaniak—Para iti Primary: 2023
Ti stained-glass a tawa iti Templo ti Nauvoo Illinois, ni Tom Holdman
Enero 23–29
Mateo 3; Marcos 1; Lucas 3
“Isaganayo ti Dalan ti Apo”
Bayat ti panangbasam maipanggep ken ni Juan Bautista ken ti panagbuniag ni Jesucristo, isuratmo ti ania man a naespirituan nga impresion a maawatmo. Ti Umaykayo, Sumurot Kaniak—Para kadagiti Indibidual ken Pamilia makatulong kenka a makaawat kadagitoy nasantuan a kasuratan, ken makatulongto kenka a mangsuporta iti panagsursuro nga ar-aramiden dagiti ubbing iti pagtaengan.
Yawis ti Panagbibinninglay
Tapno maikkan iti gundaway dagiti ubbing a mangibinglay no ania ti nasursurodan, mangipakita iti maysa a ladawan ni Jesus a mabumbuniagan. Awisem ida a mangibaga kenka no ania ti mapaspasamak iti ladawan ken no kasano ti riknada maipapan iti pannakabuniag.
Isuro ti Doktrina: In-inaudi nga Ubbing
Makapagbuniagak kas ken ni Jesus.
Kasano a mausarmo ti pakaammuan ti panagbuniag ni Jesus a mangtulong kadagiti ubbing nga agsagana a mabuniagan?
Dagiti Mabalin nga Aktibidad
-
Gupgopem ti estoria maipapan iti panagbuniag ti Mangisalakan (kitaen iti Mateo 3:13–17; kitaen met iti “Kapitulo 10: Mabuniagan ni Jesus,” iti Dagiti Estoria iti Baro a Tulag, 26–29, wenno ti maitutop a video iti ChurchofJesusChrist.org). Ilawlawag a nabuniagan ni Jesus babaen ti panangirarem ti maysa a tao nga addaan iti turay ti priesthood. Mamin-adu nga ulitem ti estoria ken awisem dagiti ubbing a mangibinglay kadagiti malagipda a detalye.
-
Mangipakitaka iti ladawan ni Jesus a mabumbuniagan ken panid ti aktibidad iti daytoy a lawas. Paitudom kadagiti ubbing dagiti pagpapadaan ti dua a ladawan. Ipakitam ti maysa a ladawan ni Jesucristo a mabumbuniagan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia.)
-
Irebyum dagiti kari nga aramidento dagiti ubbing inton mabuniaganda (kitaen iti Mosiah 18:8–10; Doktrina ken Katulagan 20:37; Gospel Topics, “Baptism,” topics.ChurchofJesusChrist.org). Saludsodem kadakuada no ania kadagitoy a banag ti ar-aramidendan.
-
Awisem ti maysa a miembro ti bishopric nga agsarita maipanggep iti interbyu iti panagbuniag a maaramidto kadkuada sakbay a mabuniaganda.
-
Aggigiddan nga agkansion iti maysa a kanta maipapan iti panagbuniag kas iti “Baptism” (Children’s Songbook, 100–101). Ibilangmo ti panangidawat iti maysa nga ubing a mangidaulo iti dadduma pay nga ubbing bayat ti panagkantada.
Matuladtayo ti pagwadan ni Jesus babaen ti panagpabuniag.
Tulongannak ti Espiritu Santo.
Kas mainayon iti panagsagana para iti panagbuniag, agsagsagana met dagiti ubbing nga umawat iti sagut ti Espiritu Santo. Kasano a matulongam ida?
Dagiti Mabalin nga Aktibidad
-
Usarem ti Mateo 3:11,16 a mangisuro kadagiti ubbing a bimmaba ti Espiritu Santo ken ni Jesus idi nabuniagan Isuna (nagparang ti maysa a kalapati a kas tanda a mangipakita a napasamak daytoy). Ipakitam ti ladawan Ti Sagut ti Espiritu Santo (Libro ti Arte ti Ebanghelio, blg.105), ken ilawlawagmo a maawattayo ti sagut ti Espiritu Santo no makumpirmaantayo.
-
Mangitugot iti maysa a kahon a naglaon kadagiti banag a kas iti maysa a ladawan ni Jesus, maysa a makapagin-awa nga ules, ken maysa a kompas wenno mapa. Awisem dagiti ubbing a pumili ti maysa nga aytem, ken pailawlawag kadakuada no kasano a mangibagi ti tunggal maysa iti wagas a pakatulongan kadatayo ti Espiritu Santo—Isu ti mangipaneknek ken ni Jesus, (kitaen iti Juan 15:26), mangliwliwa kadatayo (kitaen iti Juan 14:26) ken mangipakita kadatayo iti umno a dalan (kitaen iti 2 Nephi 32:5).
-
Ibinglaymo dagiti bukodmo a padas iti panangawat iti tulong a nagapu iti Espiritu Santo.
-
Awisem dagiti ubbing a dumngeg kadagiti wagas a pakatulongan kadatayo ti Espiritu Santo bayat ti panagkansionda iti kanta maipapan kenkuana, kas iti “The Holy Ghost” (Children’s Songbook, 105).
Isuro ti Doktrina: In-inauna nga Ubbing
Nabendisionannak dagiti ordinansa ti Aaronic Priesthood.
Iggem ni Juan Bautista ti Aaronic Priesthood, isu a ti panagbasa maipapan kenkuana iti Mateo 3 ti maysa a napintas a gundaway a panangisuro kadagiti ubbing maipapan iti Aaronic Priesthood. Tulongam ida a mangbigbig kadagiti bendision ken bileg nga umay kadatayo babaen daytoy a priesthood.
Dagiti Mabalin nga Aktibidad
-
Awisem dagiti ubbing nga agaramid iti listaan dagiti pagrebbengan ti Aaronic Priesthood, nga us-usaren ti Doktrina ken Katulagan 20:46, 58–60; 84:111. Kiddawen kadagiti ubbing a mangsapul iti Mateo 3 dagiti pagwadan ni Juan a mangipatpatungpal kadagitoy a pagrebbengan. Kasano a maawistayo amin dagiti dadduma nga umasideg ken ni Cristo, kas iti inaramid ni Juan?
-
I-display ti sumagmamano a ladawan dagiti Aaronic Priesthood holder a mangan-annong kadagiti ordinansa ti panagbuniag ken ti sakramento (kitaen iti Libro ti Arte ti Ebanghelio, dagiti num. 103–4, 107–8). Ilawlawag no kasano nga isagananatayo dagitoy nga ordinansa nga umawat ken ni Jesucristo ken dagiti bendision ti Pannubbotna.
-
Aggigiddan a mangbasa iti Doktrina ken Katulagan 13:1, ken paneknekan nga insubli ni Juan Bautista ti Aaronic Priesthood ken ni Joseph Smith. Kiddawen kadagiti ubbing no kasano a nabendisionanda gapu ta naisubli ti Aaronic Priesthood.
Mateo 3:13–17; Macos 1:1–11; Lucas 3:2–18
Matungpalko dagiti katulagak iti panagbuniag.
Ti panangsursuro maipapan iti pakaammuan ti panagbuniag ni Jesus mangted iti nasayaat a gundaway a mangtulong kadagiti ubbing a mangrebyu kadagiti katulaganda iti panagbuniag ken agkumitda manen iti panangtungpal kadagitoy.
Dagiti Mabalin nga Aktibidad
-
Awisem dagiti ubbing nga agsisinublat iti panangbasa kadagiti bersikulo manipud iti Marcos 1:1–11. Ilawlawag no apay a kayat ti Nailangitan nga Ama nga agpabuniagtayo? Apay a nabuniagan ni Jesus, nupay dina kasapulan ti madalusan manipud iti basol? Tulongam dagiti ubbing a mangsapul kadagiti sungbat iti daytoy a saludsod iti Mateo 3:13–15 ken 2 Nephi 31:6–7.
-
Irebyum dagiti katulagan nga inaramid dagiti ubbing iti panagbuniag, a masarakan iti Mosiah 18:8–10 ken Doktrina ken Katulagan 20:37. Awisem dagiti ubbing a mangisurat kadagitoy a reperensia iti panid ti aktibidad iti daytoy a lawas.
-
Isaganam ti sumagmamano a sagpaparis dagiti kard nga addaan kadagiti maiparis a ragup ti balikas wenno dagiti ladawan a mangibagi kadagiti katulagantayo iti panagbuniag. Ikabil a nakapakleb dagiti kard. Awisem dagiti ubbing nga agsisinnublat a mangbaliktad iti dua a kard iti maminsan, a mangsapsapul iti maysa nga agparis. Kalpasan a naaramid ti panagparis, mangawis kadagiti ubbing a mangibinglay kadagiti wagas a nakaipatungpalan dayta a katulagan.
-
Ibinglay no kasano a nabendisionannaka ti panagtungpalmo kadagiti katulagam iti panagbuniag.
Matarabaynak ti Espiritu Santo.
Masursurol dagiti ubbing no kasano ti mangilasin ken mangsurot ti pannarabay ti Espiritu Santo. Tulongam ida a makaawat a ti panagtungpal kadagiti katulaganda iti panagbuniag ti makatulongto kadakuada nga agbalin a maikari nga umawat iti pannarabayna.
Dagiti Mabalin nga Aktibidad
-
Kiddawem iti tunggal ubing a mangbasa iti maysa kadagiti sumaganad a nasantuan a kasuratan ken mangilawlawag no kasano a makisao ti Espiritu Santo kadatayo: Helaman 5:30; Doktrina ken Katulagan 6:23; 8:2–3; 11:12–13.
-
Kiddawem iti maysa nga ubing a mangbasa iti Mateo 3:11. Kasano a maipada iti apuy ti Espiritu Santo? Kas pagarigan, makaliwliwa ti apuy, ken mangted iti lawag a mangiwanwan kadatayo (kitaen iti Juan 15:26; 2 Nephi 32:5).
-
Kidaawen kadagiti ubbing a mangikidem ti matada ken mangingato kadagiti imada. Kalpasanna silalag-an nga igisigisda dagiti dakulapda ti maysa a dutdot wenno sinulid. Awisem ida a mangibaga kenka no mariknada daytoy. Ania ti isuro daytoy nga aktibidad maipanggep iti panangbigbig kadagiti parikna ti Espiritu Santo?
-
Awisem dagiti ubbing a mangibinglay kadagiti padasda idi adda kadakuada ti Espiritu Santo. Apay a ti panangtungpal kadagiti katulagan ket makatulong kadatayo a maaddaan iti panarabay iti Espiritu Santo?
Yallukoy ti Panagsursuro iti Pagtaengan
Allukoyem ti tunggal ubbing nga agsaludsod kadagiti nagannak kadakuada wenno dadduma pay a miembro ti pamilia, wenno gagayyem maipanggep iti panagbuniagda.
Panangpadur-as iti Panangisurotayo
Ikarigatam a manggun-od iti bukodmo a pammaregta. Dimo panunoten a pangiturong dagitoy a balabala a nasken a surotem bayat ti panangisurom. Ngem ketdi, usarem dagitoy a kas kapanunotan a mangpapigsa iti bukodmo a pammaregta bayat ti panangutobmo iti kasapulan dagiti ubbing a sursuruam. (Kitaen iti Panangisuro iti Wagas ti Mangisalakan, 7.)