Panangipaay kadagiti Kasapulan dagiti Ubbing nga Addaan iti Pagkurangan

Responsable dagiti lider iti Primary a mangisuro ti ebanghelio ni Jesucristo iti amin nga ubbing, agraman kadagidiay addaan kadagiti pagkurangan. Iti Primary, nasken a maawat, maay-ayat, mataraonan, ken mairaman ti tunggal ubing. Iti daytoy a kasasaad nalaklaka para iti amin nga ubbing a maawatanda ti ayat ti Nailangitan nga Amatayo ken ni Jesucristo ken marikna ken mabigbigda ti impluensia ti Espiritu Santo. Makatulong kenka dagiti sumaganad a kapanunotan a mangipaay kadagiti kasapulan dagiti ubbing nga addaan iti pagkurangan.

• Ammuem ti maipapan kadagiti naisangayan a kasapulan ti ubing. Ti kasayaatan a wagas a panangaramid iti daytoy ket ti pannakisarita kadagiti nagannak wenno dagiti agay-aywan iti ubing. Ammuem no kasano ti kasayaatan a pakasursuruan ti ubing ken no ania dagiti kasayaatan a pamay-an a kangrunaan a makatulong. Mabalinmo met ti makiinnuman iti dadduma pay a lider ken mannursuro iti Primary nga addaan kadagiti padas ken nalawag a pannakaammo ken pannakaawat (insights) nga ibinglay.

• Mangparnuay iti napintas ken makaay-ayo nga aglawlaw a pakariknaan ti tunggal ubing a natalged ken maipatpateg. Ammuem dagiti nagan ti amin nga ubbing iti klasem, ken tulongam ida a makarikna a maawat, maayat, ken maibilangda. Masansan a madillaw dagiti ubbing nga addaan iti pagkurangan, isu a mangsapulka kadagiti gundaway a pangdayawam kadakuada kadagiti nasayaat a kababalinda.

• Agaramid kadagiti panagbalbaliw tapno mabalin a makiraman ti tunggal maysa. Mabalin a maaramid kadagiti aktibidad dagiti babassit a panagbalbaliw tapno maipanamnama a makasursuro ti amin nga ubbing, agraman dagidiay addaan kadagiti pisikal a limitasion wenno addaan kadagiti pagrigatan nga agsursuro. Kas pagarigan, no isingasing ti maysa nga aktibidad a mangipakita iti ladawan, mabalinmo ti agkansion iti adda pakainaiganna a kanta a mangiraman kadagiti ubbing nga addaan iti pagkurangan iti panagkita.

• Mangipasdek iti agtultuloy a nakaugalian a maar-aramid ken urnos iti siled ti klase. Maysa a wagas tapno maaramid daytoy ket ti panangaramid iti poster a nakaisuratan iti iskediul ti klase a mangbalabala no kasano ti panagtultuloyto ti klase. Mabalin nga iraman iti iskediulmo dagiti panagkararag, oras ti panangisuro, ken oras ti aktibidad. Makatulong daytoy a mangpakapsut iti rikna ti panagduadua, a mabalin a mangnayon iti panagdanag iti sumagmamano nga ubbing.

• Usarem dagiti pagilasinan iti panagkita [visual cues]. Dagiti ubbing nga addaan iti pagkurangan nga agsursuro wenno dagiti addaan iti parikut iti ugali ket mabalin a mairanudda manipud kadagiti pagilasinan iti panagkita [visual cues], kas kadagiti ladawan a mangipakita kadagiti maitutop a tignay kas iti panangingato iti imada sakbay ti panangsungbat iti maysa a saludsod.

• Maawatan no apay a mapasamak dagiti mapangkarit nga ugali. Agsursuro maipapan kadagiti pagkurangan wenno kasasaad a makaimpluensia iti maysa nga ubing nga agtignay iti saan a maitutop. Ikasom a naimbag no ania ti mapaspasamak no adda rumsua a parikut iti ugali. Sikakararag nga ibilangmo no kasano a balbaliwam ti kasasaad tapno nasaysayaat a matulongam ti ubing.