Ni Jesus a nakaiggem iti ubing

Maysaka a Mannursuro dagiti Ubbing

Inawagannaka ti Dios a mangisuro kadagiti annakna iti wagas ti Mangisalakan. Nai-set apartka iti daytoy a takem babaen iti turay ti nasantuan a priesthoodna. Uray no awananka iti padas a kas mannursuro, no agbiagka a maikari, agkararag iti inaldaw, ken agadal kadagiti nasantuan a kasuratan, ikkannakanto ti Nailangitan nga Ama iti impluensia ken bileg ti Espiritu Santo nga agballigi (kitaen iti 2 Nephi 33:1).

Dagidiay naitalek kenka nga aywanam ket annak ti Nailangitan nga Ama, ken ammona no ania ti kasapulanda ken no kasano ti kasayaatan a makatulong kadakuada. No nainkararagan nga agkalikagumka a maaddaan iti impluensia ti Espiritu Santo, tarabayennakanto ti Dios bayat ti panagsaganam ken bayat ti panangisurom. Ipalgaknanto kenka no ania ti nasken nga isaom ken no ania ti nasken nga aramidem (kitaen iti 2 Nephi 32:5).

Saanmo iti kaano man tagibassiten ti kabaelan ti maysa nga ubing tapno maawatanna ti ebanghelio. Iti amin nga aspekto ti biagda, dagitoy napapateg nga ubbing ket kanayon a mangsagsagepsep iti impormasion, mangbukbukel ken mangpappapino kadagiti kapanunotanda, ken mangar-aramid ken mangibingbinglay kadagiti takuat. Nangnangruna a pudno daytoy iti ebanghelio, agsipud ta nakasagana ken aggagar dagiti ubbing a masursuruan kadagiti simple a kinapudno daytoy. Napigsa ken natarnaw ti pammatida kadagiti naespirituan a banag, ken maysa a gundaway iti panagsursuro ti tunggal kanito. Situtulokda nga agtignay a mayannurot iti no ania ti nasursuroda, uray no saan pay a naan-anay ti pannakaawatda. Kastoy ti nasken a panangawattayo amin iti ebanghelio. Kas iti insuro ti Mangisalakan: “Uray siasino a saan nga umawatto iti pagarian ti Dios a kas ti maysa nga ubing ket saanto a sumrek kenkuana” (Lucas 18:17).

Ti takem [calling] a mangisuro kadagiti ubbing ket maysa a sagrado a panagtalek, ken gagangay a marikna ti talipupos no dadduma. Ngem laglagipem nga inawagannaka ti Nailangitan nga Amam, ken tulongannakanto. Daytoy ti aramid ti Apo, ken bayat ti panagserbim “iti amin a pusom, kabaelam, panunotmo ken pigsam” (Doktrina ken Katulagan 4:2), padur-asennanto dagiti kabaelam, sagutmo, ken talentom, ken ti serbisiom ti mangbendisionto iti biag dagiti ubbing a sursuruam.