Maysa a Pagtuladan para iti Panangisuro

Iti daytoy a resource, masarakamto ti sumaganad a tallo nga addang a pagtuladan a naulit iti tunggal balabala: yawis ti panagbibinninglay, isuro ti doktrina, ken yallukoy ti panagsursuro iti pagtaengan. Iti adu a kasasaad, bayat ti panangisurom, mabalin a pagsusukoten dagiti elemento daytoy a pagtuladan wenno aramiden iti sabali nga urnos. Kas pagarigan, ibilangmo a ti panangbinglay ti maysa a gundaway a mangisuro iti doktrina, ken ti panangisuro iti doktrina nasken a mangiraman kadagiti awis a mangibinglay. Kasta met, a ti panangyallukoy iti panangisuro iti pagtaengan mabalin a mapasamak iti unos ti panaglilinnawag iti klase. Ipalubos a gagangay a mapasamak daytoy a pannakabalbaliw, babaen ti panangsurot kadagiti parikna ti Espiritu tapno maipaay dagiti kasapulan dagiti ubbing a sursuruam.

Yawis ti Panagbibinninglay

Kas paset ti tunggal klase, awisem dagiti ubbing a mangibinglay iti riknada, nalawag a pannakaammo ken pannakaawatda wenno insights, ken padpadasda maipapan kadagiti pagbatayan nga isursurom. Mabalin a mairaman kadagiti komentoda dagiti padasda iti panagsursuro iti pagtaengan. Mabalinmo pay nga irebyu no ania ti nasursuroda iti kallabes a lawas ken saludsodem no kasano nga inimpluensiaan daytoy ti biagda.

Isuro ti Doktrina

TiUmaykayo, Sumurot Kaniak—Para kadagiti Indibidual ken Pamilia makatulong kenka a nasaysayaat a maawatam ti doktrina nga isuromto kadagiti ubbing. Ibilangmo no ania kadagiti bersikulo iti nasantuan a kasuratan, adaw, padas, saludsod, ken dadduma pay a resources a maibinglaymo tapno matulongan dagiti ubbing a makasursuro ken agtignay a mayannurot kadagiti pagbatayan ti ebanghelio a sursuruenda. Tulongam ida a mangbigbig iti impluensia ti Espiritu Santo bayat ti panagpaneknekna iti kinapudno. Agsapulka kadagiti manangpartuat ken naparegta a wagas a makatulong kadakuada nga aggagar maipapan iti no ania ti masursuroda.

Para kadagiti kapanunotan maipapan iti no kasano ti agusar iti musika a mangisuro iti doktrina, kitaen dagiti benneg a “Panangusar iti Musika a Mangisuro iti Doktrina” ken “Panangtulong kadagiti Ubbing nga Agsursuro ken Manglagip kadagiti Kanta iti Primary ken Himno” iti apendiks daytoy a manual.

Yallukoy ti Panagsursuro iti Pagtaengan

Gapu ta ti pagtaengan ti sentro a pagsursuruan iti ebanghelio, maysa kadagiti panggepmo kas maysa a mannursuro iti Primary ket ti panangyallukoy iti panagsursuro iti pagtaengan. Kasano a matulongam dagiti ubbing a mangibinglay kadagiti pamiliada no ania ti nasursuroda iti klase? Kasano a maallukoymo dagiti ubbing ken dagiti nagannakda nga agtultuloy nga agsursuro manipud iti Baro a Tulag iti pagtaengan?