ubbing iti klase iti Primary

Panangusar iti Umaykayo, Sumurot Kaniak—Para iti Primary

Panagsagana a Mangisuro iti Primary

Ti bukod ken sangapamiliaan a panagadal iti pagtaengan ti nasken a sentro a pagsursuruan iti ebanghelio. Pudno daytoy para kenka ken para kadagiti ubbing a sursuruam. Bayat ti panagsaganam a mangisuro, rugiam babaen ti kaadda dagiti bukodmo a padas kadagiti nasantuan a kasuratan. Mapasamakto ti kapatgan a panagsaganam bayat ti panagbiagmo iti ebanghelio, panagsukisokmo kadagiti nasantuan a kasuratan, ken panagkalikagummo a manggun-od iti inspirasion ti Espiritu Santo.

TiUmaykayo, Sumurot Kaniak—Para kadagiti Indibidual ken Pamilia maysa a napateg a paset ti agpada a bukod a panagadalmo ken panagsaganam a mangisuro. Makatulongto kenka daytoy a manggun-od iti naun-uneg a pannakaawat kadagiti pagbatayan iti doktrina a masarakan kadagiti nasantuan a kasuratan. TiUmaykayo, Sumurot Kaniak—Para iti Primary mangipaayto kadagiti aktibidad para iti adu a nasantuan a kasuratan ken estoria a pangawisan kadagiti ubbing a mangadal iti pagtaengan kabayatan ti lawas.

Bayat ti panagsaganam, umayto kenka dagiti kapanunotan ken impresion maipapan kadagiti ubbing a sursuruam. Umawatkanto kadagiti nalawag a pannakaammo ken pannakaawat [insights] maipapan iti no kasano a mangbendisionto iti biagda dagiti pagbatayan iti nasantuan a kasuratan. Maiwanwankanto a mangparegta kadakuada a mangtakuat kadagita a pagbatayan bayat ti panagsursuroda manipud kadagiti nasantuan a kasuratan para iti bagbagida ken kadua dagiti pamiliada.

babai nga agad-adal kadagiti nasantuan a kasuratan

Dagiti Kapanunotan iti Panangisuro

Bayat ti panagsaganam a mangisuro, mabalin a magun-odmo ti nayon a pammaregta babaen ti panagsukisok kadagiti balabala iti panangisuro iti daytoy a resource. Saanmo a panunoten dagitoy a kapanunotan a kas nagsasaruno nga addang a pangiturong no di ketdi kas singsingasing tapno mangpataud iti bukodmo nga inspirasion. Am-ammom dagitoy nga ubbing, ken maam-ammomto ida a nasaysayaat pay bayat iti panakipulapolmo kadakuada iti klase. Am-ammo met ida ti Apo, paregtaennakanto kadagiti kasayaatan a wagas a pangisuruam ken pangbendisionam kadakuada.

Adu ti dadduma pay a resources ti adda a magun-od nga usarem bayat ti panagsaganam, agraman kadagiti kapanunotan iti Umaykayo, Sumurot Kaniak—Para kadagiti Indibidual ken Pamilia ken dagiti magasin ti Simbaan. Para iti ad-adu pay nga impormasion maipapan kadagitoy ken dadduma pay a resources, kitaen iti “Dagiti Nainayon a Resources para iti Panangisuro kadagiti Ubbing” iti daytoy a resource.

Dagiti Sumagmamano a Banag a Laglagipen

• Tunggal kanito a makipagkitaka kadagiti ubbing, ibilangmo dagiti wagas a pakatulongam kadakuada a mangrikna iti ayat ti Nailangitan nga Ama ken ni Jesucristo ken mangbigbig iti impluensia ti Espiritu Santo.

• Addaan dagiti nagannak ti kangrunaan a responsibilidad a mangisuro kadagiti annakda. Kas maysa a mannursuro, addaanka iti napateg a responsibilidad a mangsuporta, mangparegta, ken mangpasayaat iti panangisuro iti ebanghelio iti pagtaengan. Agbalinka a managrikna kadagiti ubbing a dagiti nagannak kadakuada ket saan a mangisursuro iti ebanghelio iti pagtaenganda. Iramanmo ti amin nga ubbing kadagiti panaglilinnawag iti ebanghelio, ania man dagiti kasasaadda iti pagtaengan.

• Nasayaat ti panangulit. Nasamsamay ti panagsursuro dagiti ubbing iti kinapudno ti ebanghelio no maulit a maisuro dagitoy a kinapudno babaen iti nadumaduma nga aktibidad. No maammuam a nasamay ti maysa nga aktibidad iti panagsursuro para kadagiti ubbing, ibilangmo ti panangulit iti daytoy, nangnangruna no mangisursuroka kadagiti in-inaudi nga ubbing. Mabalin pay nga irebyum ti maysa nga aktibidad manipud iti kallabes nga adalen.

• Kayat ti Nailangitan nga Ama nga agballigika kas maysa a mannursuro. Impaayannaka iti adu a resources a makatulong kenka, a pakairamanan dagiti teacher council meeting. Kadagitoy a miting mabalinmo ti makiinnuman kadagiti dadduma pay a mannursuro maipapan kadagiti karit a pakaipasanguam. Mabalinmo pay nga ilawlawag ken usaren dagiti pagbatayan iti panangisuro a kas ken ni Cristo.

• No mangisursuroka kadagiti in-inaudi nga ubbing ken agkasapulanka iti nayon a tulong, kitaen iti “Panangipaay kadagiti Kasapulan dagiti In-inaudi nga Ubbing” iti daytoy a resource.

Iraman daytoy a resource dagiti balabala [outline] iti panangisuro para iti tunggal lawas ti tawen. Kadagiti Domingo no saan a maangay ti Primary gapu iti sapasap a komperensia, komperensia ti stake wenno ania man a dadduma pay a gapu, maallukoy dagiti pamilia a mangituloy iti panagbasa iti Baro a Tulag iti pagtaengan a maibatay iti iskediul a nabalabala iti Umaykayo, Sumurot Kaniak—Para kadagiti Indibidual ken Pamilia. Saanka a madanagan maipapan kadagiti adalen a nalibtawam; isurom ti naituding a linawas a balabala.