“Pebrero 27–Marso 5. Mateo 8; Marcos 2–4; Lucas 7: ‘Ti Pammatim Pinaimbagnaka’” Umaykayo, Sumurot Kaniak—Para iti Primary: Baro a Tulag 2023 (2022)
“Pebrero 27–Marso 5. Mateo 8; Marcos 2–4; Lucas 7,” Umaykayo, Sumurot Kaniak—Para iti Primary: 2023
Pebrero 27–Marso 5
Mateo 8; Marcos 2–4; Lucas 7
“Pinaimbagnaka ti Pammatim”
Bayat ti panangbasam iti Mateo 8; Marcos 2–4; ken Lucas 7 titi daytoy a lawas, panunotem ti maipapan kadagiti ubbing nga isursurom. Agkararag a paregtennakanto ti Espiritu Santo kadagiti kapanunotan a amngtulongto kenka a mangtakuat kadagiti kinapudno kadagitoy a kapitulo.
Yawis ti Panagbibinninglay
Kiddawen kadagiti ubbing a mangibinglay iti maysa nga estoria maipapan ken Jesus nga agar-aramid iti maysa a milagro (kitaen iti listaan dagiti milagro iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Mabalinmo pay nga ipakita dagiti mainaig a ladawan (kitaen iti Libro ti Arte ti Ebanghelio, num. 40).
Isuro ti Doktrina: In-inaudi nga Ubbing
Adda bileg ni Jesus nga agaramid kadagiti milagro.
Kabayatan ti panangbasam maipapan kadagiti milagro ti Mangisalakan maipapan iti panagagas, panunotem no ania dagiti milagro a maibinglay. Kasano a matulongam dagiti ubbing a sursuruam a maawatanda ti akem ti pammati kadagiti milagro nga inaramid ni Jesus?
Dagiti Mabalin nga Aktibidad
-
Ibinglay ti pakaammuan maipapan iti lalaki a di makagunay manipud ti Marcos 2:1–12. Para iti tulong, kitaen iti “Kapitulo 23: Ti Lalaki a Saan a Makapagna” (iti Dagiti Estoria iti Baro a Tulag, 57–58, wenno ti maitutop a video iti ChurchofJesusChrist.org). Ilawlawag kadagiti ubbing a saan a makapagna ti lalaki a di makagunay. Tulongam ida a mangbigbig a daytoy a lalaki pinaimbag ti Mangisalakan.
-
Awisem dagiti ubbing nga agsarita maipapan iti panawen idi nagsakitda. Isaritam ti maysa kadagiti pakaammuan ni Jesus a mangag-agas, kas iti Mateo 8:1–4, 5–13, 14–15; Marcos 3:1–5; Lucas 7:11–16. Pagsisinnublatem dagiti ubbing a mangisarita iti estoria iti bukodda a balikas. Paneknekam a ti bileg ni Jesus mabalinnatayo nga agasan, bendisionan, ken liwliwaen.
Maipakitak ti ayat kadagti dadduma a tao kas iti inaramid ni Jesus.
Impakita ni Jesus ti naindaklan nga ayat babaen iti panagagas iti masakit ken marigatan. Utobem no kasano a masuruam dagiti ubbing a mangipakita iti kaasi kadagiti tao nga agkasapulan.
Dagiti Mabalin nga Aktibidad
-
Pumili iti maysa wenno ad-adu pay a pakaammuan ni Jesus a mangipakpakita iti ayat iti maysa a tao nga agkasapulan, kasi kadagiti adda iti Mateo 8:1–4, 5–13, 14–15; Marcos 2:1–12; 3:1–5; Lucas 7:11–16. (Kitaen met iti video a “Widow of Nain” iti ChurchofJesusChrist.org.) Mangibinglay iti maysa a panawen idi impakita ti maysa a tao ti ayat kenka iti panawen ti panagkasapulan ken kasano ti nariknam. Awisem dagiti ubbing a mangibinglay kadagiti padasda.
-
Ipabuyam ti video a “Gordon Hinckley:Lessons I Learned as a Boy” wenno “The Coat” (ChurchofJesusChrist.org). Kasano a sinurot dagiti ubbing kadagitoy a video ti pagwadan ni Jesus? Awisem dagiti ubbing a mangibinglay iti dadduma pay a situasion no adda maysa a tao a mabalin nga agkasapulan. Ania ti maaramidtayo a makatulong kadakuada?
-
Agkansion iti maysa a kanta maipapan iti ayat ken kinaasi iti dadduma, kas iti “Kindness Begins with Me” (Children’s Songbook, 145).
Manipud iti Panagbuteng agingga iti Pammati, ni Howard Lyon
No mabuteng wenno agpeggadak, matulongannak ni Jesus a makarikna iti talna.
Ti pakaammuan maipapan ken ni Jesus a mangpatpatalna iti bagyo ket makatulong kadagiti ubbing a mangammo a maikkanna ida iti talna no mariknada ti agbuteng.
Dagiti Mabalin nga Aktibidad
-
Tulongam dagiti ubbing a mangipapan nga addada iti bapor bayat ti panangbasam iti Marcos 4:35–41. (Kitaen met iti “Kapitulo 21: Bilinen ni Jesus dagiti Angin ken Dalluyon,” iti Dagiti Estoria iti Baro a Tulag, 53, wenno ti maitutop a video iti ChurchofJesusChrist.org.) Pailadawan kadagiti ubbing no ania ti mariknada no addada koma sadiay. Kaano a nagbuteng dagiti ubbing? Kasano a nagun-odda ti liwliwa?
-
Awisem dagiti ubbing nga agaramidda kadagiti uni ti maysa a bagyo ket agsardeng no adda mangisao iti “Agtalnaka.” Paneknekam a kas iti panangisangbay ni Jesus iti talna kadatayo no adda bagyo iti ruar, maisangbayna kadatayo ti talna iti puspusotayo no madi ti riknatayo iti kaunggantayo.
-
Suruam dagiti ubbing kadagiti tignay a maigiddan iti maikatlo a berso ti “Tell Me the Stories of Jesus” (Children’s Songbook, 57), ken aggigiddan a kantaen ti berso bayat ti panagaramid kadagiti tignay.
Isuro ti Doktrina: In-inauna nga Ubbing
Makaaramid ni Jesus kadagiti milagro iti biagko no adda pammatik Kenkuana.
Nagaramid ni Jesus kadagiti adu a milagro kabayatan ti panagministrona ditoy a biag. Kasano a matulongam dagiti ubbing a mangammo a mapasamak dagiti milagro ita?
Dagiti Mabalin nga Aktibidad
-
Kiddawen kadagiti ubbing a mangala iti maysa kadagiti sumaganad a milagro tapno basaen ken idrowingda: Mateo 8:1–4, 5–13, 14–15; Marcos 2:1–12; 3:1–5; Lucas 7:11–16. Pailawlawagmo kadagiti ubbing dagiti drowingda iti klase. Ania ti masursurotayo maipapan ken ni Jesus manipud kadagitoy nga estoria?
-
Kiddawen kadagiti ubbing a mangyakem no kasano ti riknada no masakit, naliday, mabuteng, wenno agdanagda. Kasano a matulongannatayo ni Jesus no adda kadatayo dagitoy a rikna? Paneknekam a makatulong ni Jesus kadagiti ubbing iti amin kadagitoy a situasion.
-
Awisem dagiti ubbing a mangibinglay kadagiti padasda idi immawatda wenno ti maysa a tao nga am-ammoda iti bendision ti priesthood. Kasano a naagasan wenno nabendisonan dayta a tao?
Ay-ayatennatayo ni Jesus no agbasoltayo ken kayatna a tulongannatayo nga agbabawitayo.
Dagiti pakaammuan iti Marcos 2:15–17 ken Lucas 7:36–50 ket makatulong kadagiti ubbing a makaawat nga ay-ayatennatayo ni Jesucristo uray no agbasoltayo. Kayatna a tulongannatayo nga agbabawi ken umasideg Kenkuana.
Dagiti Mabalin nga Aktibidad
-
Isurat ti Kasano ti rikna ni Jesus maipapan iti basol? ken Kasano ti rikna ni Jesus maipapan kadatayo no agbasoltayo? iti pisarra. Awisem dagiti ubbing nga agpanunot maipapan kadagtoy a saludsod bayat ti aggigiddan a panagbasada iti Marcos 2:15–17 ken kalpasanna ibinglayda dagiti sungbatda. (Mabalin nga aggigiddan a basaenyo ti “Agsingsingir iti Buis” iti Pangiwanwan iti Nasantuan a Kasuratan[scriptures. ChurchofJesusChrist.org].) Apay a napateg a maammuan nga ay-ayatennatayo ni Jesus, nupay saantayo a perpekto? Kasano a matulongannatayo ti pannakaammo iti daytoy no kasapulantayo ti agbabawi?
-
Sumagmamano nga aldaw sakbay ti klase, awisem ti maysa kadagiti ubbing ken maysa a miembro ti pamilia nga umay iti klase a nakasagana a mangibinglay iti pakaammuan iti Lucas 7:36–50. Mabalinda ti agdrowing kadagiti ladawan a mangiladawan kadagiti paset ti estoria nga ipakita iti klase Paglilinnawagan kadagiti ubbing no ania ti mabalin a kayat ti Apo a masursurotayo manipud iti daytoy nga estoria.
No mabuteng wenno agpeggadak, matulongannak ni Jesus a makarikna iti talna.
Kasapulan a maammuan dagiti ubbing a maikkan ida ti Mangisalakan iti talna no maipasangoda kadagiti pakarikutan ti biag—ita ken iti masakbayan.
Dagiti Mabalin nga Aktibidad
-
Kiddawem iti maysa kadagiti ubbing a mangusar iti Marcos 4:35–41 ken ti ladawan Ni Jesus a Mangpatpatalna iti Bagyo (Libro ti Arte ti Ebanghelio, num. 40) tapno mangisarita iti estoria ni Jesus a mangpatpatalna iti bagyo. Pailadawan kadagiti ubbing no ania ti mariknada no addada koma idi sadiay.
-
Awisem dagiti ubbing a mangibinglay kadagiti padasda idi nariknada ti talna kalpasan ti panagkararagda para iti tulong. Ipalagip kadakuada a naggapu daytoy a talna manipud iti Mangisalakan.
-
Ikkan ti tunggal ubing iti sinan ulep a papel, ket paisuratmo kadakuada ditoy ti mabalin a pannubok ti maysa a tao. Ipanyo amin dagiti sinan-ulep iti pisara, agingga a makaluban ti ladawan ti Mangisalakan. Awisem ti maysa nga ubing a mangikkat iti maysa kadagiti sinan-ulep ket mangisingasing kadagiti wagas a makatulong iti maysa a tao nga addaan iti dayta a pannubok tapno makasarak iti talna. No maikkat ti amin a sinan-ulep, paneknekam maipapan iti bileg ti Mangisalakan a mangpatpatalna kadagiti bagyo iti biagtayo.
Yallukoy ti Panagsursuro iti Pagtaengan
Tulongam dagiti ubbing a mangisurat iti aramid ti panagserbi nga aramidendanto para iti maysa a tao iti daytoy a lawas.
Panangpadur-as iti Panangisurotayo
Naregta dagiti ubbing. No dadduma mabalin a mariknam a ti enerhia dagiti ubbing ket maysa a pakasingaan iti panagsursuro. Ngem mapapigsam dagiti aktibo a kababalinda babaen iti panangawis kadakuada a mangyakem iti maysa nga estoria wenno mangaramid kadagiti garaw a maitunos kadagiti pasamak iti maysa a kanta wenno nasantuan a kasuratan. (Kitaen iti Panangisuro iti Wagas ti Mangisalakan, 25.)