Marso 6–12

Mateo 9–10; Marcos 5; Lucas 9

“Dagitoy Sangapulo-ket-dua nga Imbaon ni Jesus”

Bayat ti panangbasam iti Mateo 9–10; Marcos 5; ken Lucas 9, makaawatkanto kadagiti parikna manipud iti Espiritu Santo. Dagitoy a parikna, agraman iti Umaykayo, Sumurot Kaniak—Para Kadagiti Indibidual ken Pamilia ken daytoy a balabala, ket makatulong kenka nga agsagana a mangisuro.

Yawis ti Panagbibinninglay

Awisem dagiti ubbing a mangibinglay ti maysa a banag nga inaramidda tapno makatulong iti maysa a tao itoy a lawas. Ania ti inaramid ti Mangisalakan a mangtulong iti dadduma?

Isuro ti Doktrina: In-inaudi nga Ubbing

Mateo 9:18–30; Marcos 5:22–43

Adda pannakabalin ni Jesus a mangagas kaniak.

Inulit nga impakita ti Mangisalakan ti pannakabalinna a mangagas kadagiti adda pammatina Kenkuana. Mabalinmo a tulongan dagiti ubbing a sursuruam a mangbukel iti pammatida iti pangagas a bilegna.

Dagiti Mabalin nga Aktibidad

• Isaritam kadagiti ubbing ti estoria maipapan iti anak a babai ni Jairo (kitaen iti Marcos 5:22–23, 35–43). Iti maitutop a punto iti estoria, basaen dagiti balikas ni Jesus a “Kunak kenka, bumangonka”” (bersikulo 41), ket awisem dagiti ubbing a tumakder. Tulongam dagiti ubbing a makaawat nga addaa pannakabalin ni Jesus a mangangas kadagiti tao ken mangted kadatayo iti agnanayon a biag.

• Ipakitam ti maysa a ladawan ti pakaammuan iti Mateo 9:20–22 bayat ti panagbasam kadagitoy a bersikulo. Tulongam dagiti ubbing a mangyulo iti ragup ti balikas a “Ti pammatim pinaimbagnaka” (bersikulo 22). Tapno maaramid daytoy, mabalinmo nga idutok iti tunggal ubing ti maysa a balikas ket kalpasanna paisaom kadagiti ubbing dagiti balikasda iti naurnos iti sumagmamano a gundaway. Kasano nga impakita ti babai nga adda pammatina ken ni Jesucristo? Ania ti maaramidtayo tapno maipakitatayo nga adda pammatitayo ken ni Jesucristo?

• Kiddawem kadagiti ubbing a mangikidem kadagiti matada ket dumngegda kabayatan ti panagbasam manipud iti Mateo 9:27–30. No basaem maipapan ken ni Jesus a mangag-agas kadagiti bulsek a lallaki, awisem dagiti ubbing nga agmulagatda. Awisem dagiti ubbing a mangisarita maipapan no kasano ti riknada no inagasan ni Jesus ida.

• Usarem ti panid ti aktibidad iti daytoy a lawas tapno matulongan dagiti ubbing a masursuruan iti estoria ti Mangialakan a mangpagpagungar iti anak a babai ni Jairo manipud iti patay.

Agtalek iti Apo, ni Liz Lemon Swindle

Mateo 10:1–10

Inawagan ni Jesus dagiti Sangapulo-ket-dua nga Apostol ken inikkanna ida iti pannakabalin a mangaramid iti trabahona.

Ammo kadi dagiti ubbing a sursuruam nga addaantayo kadagiti Sangapulo-ket-dua nga Apostol iti agdama? Kasano a mausarmo dagitoy a bersikulo a mangisuro kadakuada maipapan iti kinapateg dagiti agdama nga Apostol ken no ania ti nakaawaganda nga aramiden?

Dagiti Mabalin nga Aktibidad

• Gupgopen ti Mateo 10:1–10 iti simple a balikas. Ilawlawag nga awagan ni Jesus dagiti Apostol a mangtulong Kenkuana a mangbangon iti Simbaanna. Pabilangmo kadagiti ubbing dagiti Apostol iti ladawan a Ni Cristo a Mangor-orden kadagiti Apostol (Libro ti Arte ti Ebanghelio, num. 38) ken iti maysa a ladawan ti agdama a Korum dagiti Sangapulo-ket-dua nga Apostol (kitaen iti ChurchofJesusChrist.org wenno ti isyu ti sapasap a komperensia ti Liahona). Ilawlawag nga addaantayo iti Sangapulo-ket-dua nga Apostol iti agdama, kas met iti panawen ni Jesus. Ibinglaymo ti pammaneknekmo maipapan kadagiti Apostol ti Apo ken ti maysa a banag a naisuro kadakuada itay nabiit.

• Ilemmengmo dagiti ladawan dagiti Apostol iti kabaruanan nga aldaw iti lawlaw ti siled (para kadagiti ladawan, kitaen ti maysa ng isyu ti nabiit pay a sapasap a komperensia ti Liahona). Awisem dagiti ubbing a mangsarak kadagiti ladawan, ket isaritam bassit kadakuada ti maipapan iti tunggal Apostol (kitaen iti “Meet Today’s Prophets and Apostles” iti ChurchofJesusChrist.org).

• Awisem ti maysa nga ubing a mangitag-ay iti maysa a ladawan ti Umuna a Panguluen ken ti maysa a ladawan ti Korum dagiti Sangapulo-ket-dua nga Apostol. Kiddawem iti ubing a mangiturong iti dadduma pay nga ubbing iti lawlaw ti siled agingga iti maysa a ladawan ni Jesus. Paneknekam nga iturongdatayo dagiti propeta ken apostol ken ni Jesucristo.

Isuro ti Doktrina: In-inauna nga Ubbing

Mateo 9:18–30; Marcos 5:22–43

Adda pannakabalin ni Jesus a mangagas kaniak.

Ti panangbasa kadagiti pakaammuan ti Manigsalakan a mangag-agas kadagiti tao ket makatulong kadagiti ubbing a sursuruam a mangbukel iti pammatida Kenkuana. Kasano a matulongan ida dagitoy a pakaammuan a makarikna iti panangngaasi ken ayatna?

Dagiti Mabalin nga Aktibidad

• Aggigiddan a basaen dagiti pakaammuan ni Jesus a mangag-agas kadagiti tao a masarakan iti Mateo 9:20–22, 27–30 ken Marcos 5:22–23, 35–43 (wenno ipaktam dagiti video a “Jesus Heals a Woman of Faith” ken “Jesus Raises the Daughter of Jairus” iti ChurchofJesusChrist.org). Kasano nga impakita dagiti tao kadagitoy nga estoria ti pammatida ken ni Jesucristo? Ania ti masursurotayo maipapan iti Mangisalakan manipud kadagitoy nga estoria?

• Awisem dagiti ubbing a mangibinglay kadagiti padasda idi immawatda wenno ti maysa a tao nga am-ammoda iti bendision ti priesthood para iti pannakaagas ti masakit. Kasano a naagasan wenno nabendisonanda? Ilawlawag a no dadduma saan a pagayatan ti Apo ti maysa a namilagruan a pannakaagas, ngem mabendisionannatayo pay laeng iti ayat ken panangliwliwana.

Mateo 10:1–10

Maisuro kaniak dagiti Sangapulo-ket-dua nga Apostol maipapan ken ni Jesus.

Kasano a ti panangsursuro maipapan kadagiti Sangapulo-ket-dua nga Apostol iti aldaw ni Cristo ket makatulong kadagiti ubbing a makaawat a nasaysayaat iti no ania ti ar-aramiden dagiti Sangapulo-ket-dua nga Apostol iti agdama?

Dagiti Mabalin nga Aktibidad

• Ipakitam dagiti ladawan dagiti Apostol iti panawen ni Jesus ken iti aldawtayo (kitaen iti Ni Cristo a Mangor-orden kadagiti Apostol, [Libro ti Arte ti Ebanghelio, num. 38, ken ti nabiit pay nga isyu ti komperensia ti Liahona). Idawat kadagiti ubbing a mangbasa iti Mateo 10:7 tapno ammuen no ania ti ar-aramiden dagiti Apostol (kitaen met iti Lucas 9:1–2, 6; Doktrina ken Katulagan 107:23).

• Awisem dagiti ubbing a mangisurat iti pisarra ti nagnagan ti adu a sigud nga Apostol agingga a kabaelanda a malagip. Kalpasanna idawat kadakuada a mangilista iti adu a sibibiag nga Apostol agingga a kabaelanda a malagip. Paidiligmo kadakuada dagiti listaanda iti Mateo 10:2–4 ken iti nabiit pay nga isyu ti komperensia ti Liahona. Mabalinyo pay ti agay-ayam iti parisparis a pangiparisan dagiti ubbing ti tunggal nagan ti sibibiag nga Apostol iti ladawanna. Masarakan dagiti ladawan iti ChurchofJesusChrist.org.

• Sumagmamano nga aldaw sakbay ti klase, awisem ti sumagmamano nga ubbing nga umay a nakasagana a mangibinglay iti maysa nga estoria nga insarita ti maysa kadagiti sibibiag nga Apostol (kitaen dagiti isyu ti Liahona para kadagiti kapanunotan). Kasano nga inusar dayta nga Apostol ti estoria a mangparegta kadatayo nga agbalin a kas iti Mangisalakan?

• Mangibinglay iti suamgmamano a pagarigan ti pammaneknek dagiti kabaruanan nga Apostol ni Cristo kadagiti ubbing (kitaen dagiti nabiit pay a mensahe ti sapasap a komperensia wenno “Ti Sibibiag a Cristo: Ti Pammaneknek dagiti Apostol” [ChurchofJesusChrist.org]).

• Tulongam dagiti ubbing a mangyulo ken makaawat iti Pagannurotan ti Pammati 1:6.

Lucas 9:23–25

Agkasapulan iti sakripisio ti panangsurot ken ni Jesucristo.

Kasano a matulongam dagiti ubbing a makaawat no ania ti kayat a sawen ti “mangpukaw” iti biagda no surotenda ti Mangisalakan ?

Dagiti Mabalin nga Aktibidad

• Isaritam kadagiti ubbing maipapan iti maysa a panawen idi insukom ti maysa a banag tapno makagun-odka iti maysa a banag a nasaysayaat. Awisem dagiti ubbing a mangibinglay kadagiti bukodda a pagwadan. Kalpasanna aggigiddan a basaen ti Lucas 9:23–25. Ilawlawag a kayat ni Jesus nga agtallugodtayo a mangisuko iti ania man a banag tapno sumurot Kenkuana. Idinto a mabalin a saanna nga idawat kadatayo a literal nga isukotayo ti biagtayo, ania ti idawatna nga itedtayo? (Kitaen iti Patarus ni Joseph Smith, Mateo 16:26 [in Mateo 16:24, footnote e]).

• Mangisurat iti sumagmamano a kababalin iti panid ti papel ken dagiti kasungani dagita a kababalin iti sabali pay a panid ti papel (kas iti ayat ken kinaimot, pakumbaba ken pannakkel, ken dadduma pay). Isurat dagiti balikas nga isalakan ken pukawen kas paulo iti pisarra, ket awisem dagiti ubbing a mangurnos kadagiti kababalin iti baba dagiti maitutop a paulo. Ikkam dagiti ubbing iti gundaway a mangutob kadagiti kababalin a kas ken ni Cristo iti pisarra ken mangpili iti maysa a padur-asenda a naan-anay.

Yallukoy ti Panagsursuro iti Pagtaengan

Awisem dagiti ubbing a mangusar iti panid ti aktibidad ita a lawas tapno isuro kadagiti pamiliada maipapan iti panangagas ni Jesus iti anak a babai ni Jairo.

Panangpadur-as iti Panangisurotayo

Yallukoy ti panagraem. Tulongam dagiti ubbing a makaawat a ti napateg nga aspekto ti panagraem ket ti panangpanunot maipapan iti Nailangitan nga Ama ken ni Jesucristo. Mabalinmo a palagipan dagiti ubbing nga agbalin a managraem babaen ti siuulimek a panangkanta wenno panangdayyeng iti maysa a kanta wenno panangi-display iti maysa a ladawan ni Jesus.