“Marso 27–Abril 2. Mateo 14; Marcos 6; Juan 5–6: ‘Dikayo Agbuteng’” Umaykayo, Sumurot Kaniak—Para iti Primary: Baro a Tulag 2023 (2022)
“Marso 27–Abril 2. Mateo 14; Marcos 6; Juan 5–6,” Umaykayo, Sumurot Kaniak—Para iti Primary: 2023
Marso 27–Abril 2
Mateo 14; Marcos 6; Juan 5–6
“Dikayo Agbuteng”
Bayat ti panagsaganam a mangisuro manipud iti Mateo 14; Marcos 6; ken Juan 5–6, sapulem dagiti mensahe a mainaig iti biag dagiti ubbing a sursuruam. Ania iti panagkunam a makatulongto kadakuada a makaawat kadagitoy a mensahe? Mabalin a mangted kenka daytoy a balabala iti sumagmamano a kapanunotan.
Yawis ti Panagbibinninglay
Mangipakita iti ladawan ni Jesus a magmagna iti rabaw ti danum (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia wenno Libro ti Arte ti Ebanghelio, num. 43), ket kiddawen kadagiti ubbing a mangibinglay no ania ti ammoda maipapan iti estoria.
Isuro ti Doktrina: In-inaudi nga Ubbing
Ammo ni Jesucristo no ania ti kasapulak ket matulongannak.
Utobem ti pakaammuan ni Jesus a mangag-agas iti lalaki iti pagdigusan ti Betesda. Kasano a matulongam dagiti ubbing a makitada no ania ti isuro ti estoria maipapan iti kinaasi, ayat, ken dadduma a kababalin ni Cristo?
Dagiti Mabalin nga Aktibidad
-
Usarem ti ladawan a Ni Cristo a Mangag-agas iti Masakit iti Betesda (Libro ti Arte ti Ebanghelio, num. 42) tapno mangisarita kadagiti ubbing iti estoria iti Juan 5:1–9. Wenno mangipabuya iti video “Jesus Heals a Man on the Sabbath” (ChurchofJesusChrist.org). Kiddawen kadagiti ubbing a mangipapan nga isuda dagiti tao nga inagasan ni Jesus. Ania koma ti nariknada idi inagasan ida ni Jesus?
-
Kiddawem kadagiti ubbing a manginagan iti sumagmamano a banag a narigat para kadakuada wenno makapaliday kadakuada. Isaritam kadakuada maipapan iti maysa a panawen iti biagmo idi immawatka iti tulong manipud ti Mangisalakan bayat ti nakaro a pannubok. Paneknekam nga ammo ni Jesus maipapan iti amin a problematayo ket kayatna ti tumulong kadatayo.
Surotek ti pagwadan ni Jesus no naasiak kadagiti dadduma.
Maysa a wagas a nangipakitaan ni Jesus iti ayatna ket ti panangpakanna kadagiti pasurotna idi nabisinda. Kasano a matulongam dagiti ubbing a masursuroda ti panangserbi kadagiti dadduma kas iti inaramid ni Jesus?
Dagiti Mabalin nga Aktibidad
-
Ipakitam kadagiti ubbing ti maysa a basket ken sumagmamano a tinapay bayat ti panangisaritam iti estoria iti Mateo 14:13–21. Ilawlawag a nupay pinadas ni Jesus ti mangsarak iti maysa a lugar a makapagmaymaysa, kayat dagiti tao ti umasideg Kenkuana. Ibinglaymo ti nabati pay ti estoria kadagiti ubbing, ket kiddawem kadakuada a dumngeg iti inaramid ni Jesus a mangipakita iti kinaasi ken ayat para kadakuada.
-
Kiddawen kadagiti ubbing a mangibinglay kadagiti wagas a nakapagbalinan a naasi ti maysa a tao kadakuada. Kalpasanna tulongam ida a mangpanunot kadagiti banag a mabalinda nga aramiden iti daytoy a lawas tapno agbalinda a naasi iti dadduma. Iti tunggal sungbat nga itedda, mangidrowing iti maysa a tinapay wenno ikan iti pisarra. Ibagam kadagiti ubbing a no aramidenda dagitoy a banag, sursurotenda ti pagwadan ni Jesus idi pinakanna dagiti mabisin a lima a ribu a tattao.
Makatulong kaniak ti pammati ken ni Jesucristo a saanak nga agbuteng.
Impakita ni Pedro ti dakkel a pammati idi nagna isuna iti rabaw ti danum nga agturong ken ni Jesus. Ania dagiti adalen a mabalin a para kadagiti ubbing iti daytoy nga estoria?
Dagiti Mabalin nga Aktibidad
-
Ipakitam ti ladawan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia (kitaen met iti Libro ti Arte ti Ebanghelio, num. 43) bayat ti panangisaritam iti estoria manipud iti Mateo 14:22–33 iti bukodmo a balikas. Ibilangmo ti panangusar iti panid ti aktibidad iti daytoy a lawas a makatulong kadagiti ubbing a mangisarita iti estoria kenka. Mabalinmo pay ti mangitugot iti bassit a malukong ti danum ken awisem dagiti ubbing nga agpammarang a “magmagna” dagiti ramayda a bumallasiw iti rabaw ti danum.
-
Ipabuya ti video a “Wherefore Didst Thou Doubt?” (ChurchofJesusChrist.org), ket saludsodem kadagiti ubbing no apay a nagbuteng ni Pedro. Kalpasanna kiddawen kadakuada a mangisarita maipapan kadagiti panawen a nagbutengda ket ibinglayda no ania ti nangtulong kadakuada. Tulongam ida a mangkita a ti pammati ken ni Jesucristo ti mangtulong kadakuada a mangparmek iti buteng.
Isuro ti Doktrina: In-inauna nga Ubbing
Isuro kaniak ni Jesucristo maipapan iti Nailangitan nga Ama.
Kasano a dagiti pannursuro ni Jesus maipapan Iti Amana ket makatulong kadagiti ubbing nga agsursuro maipapan iti Nailangitan nga Ama?
Dagiti Mabalin nga Aktibidad
-
Mangaramidka iti dua nga asmang ti pagpaparisen a kard nga addaan iti naisurat a balikas nga inusar ni Jesus a mangisuro maipapan iti Nailangitan nga Ama iti Juan 5, kas iti ayat, biag, ken aramid (kitaen iti Juan 5:20, 26, 36). Ikabil a nakapakleb dagiti kard, ket kiddawen kadagiti ubbing a mangsapul kadagiti agpaparis babaen iti panangbalantik iti dua a kard iti sagpaminsan. Iti tunggal maaramid ti panagparis, basaem ti bersikulo a naglaon iti balikas, ken saludsodem kadagiti ubbing no ania ti isuro kadatayo ti balikas maipapan iti Nailangitan nga Ama.
-
Pabasa kadagiti ubbing ti Juan 5:30 ket kalpasanna paileppas daytoy a binatog: “Diak sapulen ti nakemko, ngem …” Kasano nga inaramid ni Jesucristo ti pagayatan ti Nailangitan nga Amana? Kasano a maaramidtayo ti pagayatan ti Nailangitan nga Ama?
Namilagruan a pinakan ni Jesus ti lima ribu a tattao ti lima a tinapay ken dua nga ikan.
Dagiti babassit a datonko ti makaaramid iti pakaidumaan.
Maysa nga ubing a lalaki ti nangipaay iti tinapay ken ikan nga inusar ni Jesus a nangpakan iti lima ribu. Kasano a matulonganyo dagiti ubbing a sursuruam a mangkita no kasano a makatulongda iti aramid ti Apo?
Dagiti Mabalin nga Aktibidad
-
Tulongam dagiti ubbing a mangipapan no kasano ti kadakkel ti ummong dagiti lima a ribu a tao. Ania koma ti kayarigan ti mangpakan iti kasdiay a kaadu a tattao iti lima a tinapay ken dua nga ikan?
-
Awisem ti maysa nga ubing a mangisarita iti estoria maipapan iti panangpakan iti lima a ribu iti bukodna a balikas. Yunay-unay a ti ubing a lalaki a nagipaay iti tinapay ken ikan ti inusar ti Apo a mangaramid iti daytoy a milagro. Kasano a makapagbalintayo a kas iti ubing a lalaki a nailadawan iti Juan 6:9? Awisem dagiti ubbing a mangidrowing iti tinapay ken ikan iti papel ket isuratda kadagitoy ti sumagmamano a banag a maitedda iti Apo a makatulong iti aramidna.
-
Mangted kadagiti ubbing ti bassit a puzzle tapno kumpletuen. Ania ti mapasamak no mapukaw ti maysa kadagiti pedaso ti puzzle? Ilawlawag a maipada ti tunggal maysa kadatayo iti maysa a pedaso iti puzzle—napategtayo amin, ket kasapulantayo ti tunggal maysa. Tulongam dagiti ubbing a manginagan kadagiti gapu a napategda kadagiti pamiliada, iti klaseda iti Primary, iti pamilia ti Apo, ken iti dadduma pay a grupo.
Makatulong kaniak ti pammati ken ni Jesucristo a saanak nga agbuteng.
Ti pammati ken buteng ket addaan iti napateg nga akem iti estoria maipapan kada Jesus ken Pedro a magmagna iti rabaw ti baybay. Ania ti masursuro dagiti ubbing manipud iti daytoy nga estoria?
Dagiti Mabalin nga Aktibidad
-
Ipakitam kadagiti ubbing ti maysa a ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia (kitaen met iti Libro ti Arte ti Ebanghelio, num. 43). Kiddawen kadagiti ubbing a mangsapul kadagiti ragup ti balikas iti Mateo 14:22–33 a mangilawlawag iti ladawan.
-
Kiddawen kadagiti ubbing a mangsapul kadagiti tanda ti pammati ken tanda ti buteng bayat ti panangbasada iti Mateo 14:22–33. Mabalin pay nga ipabuyam ti video a “Wherefore Didst Thou Doubt?” (ChurchofJesusChrist.org). Ania ti kayat a sawen ti maaddaan iti pammati ken ni Jesucristo? Tulongam dagiti ubbing a mangpanunot kadagiti panawen idi tinulongan ti pammatida a mangparmek iti butengda.
-
Kiddawen kadagiti ubbing a mangipapan nga addada ken adda kamerada idi nagna da Jesus ken Pedro iti rabaw ti baybay. Ania a kanito ti pilienda a mangala iti ladawan ken apay? Isingasing a sukisokenda iti Mateo 14:22–33 para kadagiti kapanunotan. Awisem ida a mangidrowing iti maysa a ladawan ti kanito a pinilida, mangibinglay kadagiti ladawanda, ken ilawlawag no apay a pinilida dayta a kanito.
Yallukoy ti Panagsursuro iti Pagtaengan
No naileppas dagiti ubbing ti panid iti aktibidad iti daytoy a lawas, awisem ida a mangusar iti daytoy a mangisuro kadagiti pamiliada no ania ti nasursuroda iti klase. Wenno ikkaam ida iti maysa a kopia ti panid a mangkumpleto a kaduada ti pamiliada iti pagtaengan.
Panangpadur-as iti Panangisurotayo
Yawis ti Panagbibinninglay Saludsoden kadagiti ubbing maipapan kadagiti kapanunotan, rikna, ken padasda. Mammuamto a masansan nga addaanda iti simple ngem nauneg a pannakaawat ken pannakaammo.