“Abril 10–16. Mateo 15–17; Marcos 7–9: ‘Sika ti Cristo,’” Umaykayo, Sumurot Kaniak—Para iti Primary: Baro a Tulag 2023 (2022)
“Abril 10–16. Mateo 15–17; Marcos 7–9,” Umaykayo, Sumurot Kaniak—Para iti Primary: 2023
Ti Panagbalbaliw-langa, ni Carl Heinrich Bloch
Abril 10–16
Mateo 15–17; Marcos 7–9
“Sika ti Cristo”
No utobem ti Mateo 15–17 ken Marcos 7–9, ikasom dagiti naespirituan a parikna a makatulong kenka a mangammo no ania ti kasapulan dagiti ubbing iti klasem.
Yawis ti Panagbibinninglay
Awisem dagiti ubbing a mangibinglay no apay nga agyamanda kadagiti lider iti Simbaan, agraman ti propeta ken dagiti apostol ken lokal a lider. Ania ti nangngegantayo nga insuroda itay nabiit?
Isuro ti Doktrina: In-inaudi nga Ubbing
Makagun-odak iti pammaneknek a ni Jesucristo ti Anak ti Dios.
Ibilangmo no kasano a mausarmo iti pammaneknek ni Pedro ken ti sungbat ni Jesus a mangisuro kadagiti ubbing no ania ti pammaneknek ken mangparegta kadakuada a maaddaan iti bukodda a pammaneknek.
Dagiti Mabalin nga Aktibidad
-
Kiddawen kadagiti ubbing a dumngeg no ania ti kinuna ni Pedro bayat ti panangbasam iti Mateo 16:15–17. (Kitaen met ti “Kapitulo 32: Paneknekan ni Pedro ni Cristo,” Dagiti Estoria iti Baro a Tulag, 76–77, wenno ti maitutop a video iti ChurchofJesusChrist.org.) Ilawlawag a pampaneknekan ni Pedro ti maipapan ken ni Jesucristo. Basaem manen dagiti bersikulo. (Wenno ipabuyam mnen ti video.) Daytoy a kanito kiddawem kadagiti ubbing a dumngeg no asino ti nangibaga ken ni Pedro a ni Jesucristo ti Anak ti Dios.
-
Paneknekam ti maipapan ken ni Jesucristo, ket ilawlawlag no kasano a naawatmo daytoy. Awisem dagiti ubbing a maaddaan iti bukodda a pammaneknek manipud iti Nailangitan nga Ama.
Mangted ni Jesucristo kadagiti propeta ken apostol kadagiti tulbek ti priesthood a mangidaulo Iti Simbaanna.
Indilig ti Mangisalakan ti paltiing iti maysa a bato ken ti turay ti priesthood kadagiti tulbek. Kasano a mausarmo dagitoy a panangidilig tapno matulongan dagiti ubbing a maaddaan iti pammati kadagiti mangidaulo iti Simbaanna?
Dagiti Mabalin nga Aktibidad
-
Mangipakita kadagiti ubbing iti maysa a bato bayat ti panangibasam iti Mateo 16:18 kadakuada. Ulitem kadakuada ti ragup ti balikas nga “iti daytoy a bato bangonekto ti simbaanko,” a mangnaynayon kadagiti tignay a maigiddan kadagiti balikas. Ilawlawag a nabangon ti Simbaan iti ”bato” ti paltiing.
-
Ipakitam kadagiti ubbing ti sumagmamano a tulbek, ken saludsodem no ania ti pangusarantayo kadagiti tulbek. Ilawlawag nga inawat ni Pedro ken dagiti dadduma pay nga Apostol dagiti tulbek ti priesthood manipud ken ni Jesus. Dagitoy a tulbek ti “manglukat” kadagiti bendision para kadatayo ken manglukat iti dalan nga agturong iti langit. Kas pagarigan, palugodannatayo dagiti tulbek ti priesthood nga agpabuniag ken umawat iti sakramento. Ikkam dagiti ubbing kadagiti papel a sinantulbek, ket pagsuratem ida iti sumagmamano a bendision a “luktan“ dagiti tulbek ti priesthood.
-
Mangipakita iti maysa a ladawan ti Presidente ti Simbaan, ket iburaymo ti pammaneknekmo nga isu ti agiggem iti amin a tulbek ti priesthood ita nga agdama, kas met laeng iti inaramid idi ni Pedro.
Dagiti tulbek ti priesthood ti turay a mangiturong iti pannakausar ti priesthood.
Makaaramid kadagiti milagro ti pammatik.
No basaem ti kari ni Jesus a ti pammati maipada iti maysa a bukel ti mustasa a mabalin a manggaraw iti maysa a bantay, ania dagiti impresion a maawatmo maipapan kadagiti ubbing a sursuruam?
Dagiti Mabalin nga Aktibidad
-
Basaem ti Mateo 17:19–20 kadagiti ubbing. Awisem dagiti ubbing nga agsisinnublat nga agdrowing iti dadakkel a bantay ken babassit a bukel iti pisarra. Ilawlawag a maipada dagiti bantay kadagiti banag a narigat nga aramidentayo. Ania dagiti sumagmamano a banag a marikna a kasla bantay kadatayo? Usarem daytoy a panid iti aktibidad ita a lawas tapno matulongan dagiti ubbing a mangpanunot no kasano a makatulong ti pammati kadakuada nga agaramid kadagiti banag a kayat ti Dios nga aramidenda.
-
Ikabil ti ladawan ti maysa a bantay iti maysa a bangir ti siled. Kiddawen kadagiti ubbing a manginagan iti sumagmamano a banag a mabalinda nga aramiden tapno magun-odda ti napigpigsa a pammati ken ni Jesucristo. Bay-an ti tunggal ubing a mangisingasing iti maysa a banag a yakarna ti bantay iti asideg iti sabali a bangir ti siled. Basaem ti Mateo 17:19–20, ket paneknekam ti maipapan iti bileg ti pammati iti biagmo.
-
Aggigiddan nga agkansion iti maysa a kanta maipapan iti pammati, kas iti “Pammati” (Children’s Songbook, 96–97). Ikkam dagiti ubbing iti maysa a bukel a yawidda. Awisem ida a mangimula iti bukel ket ikabil daytoy iti maysa a lugar a mabantayanda daytoy a dumakkel tapno makatulong a mangipalagip kadakuada a maaddaan iti pammati iti Nailangitan nga Ama ken ni Jesucristo.
Isuro ti Doktrina: In-inauna nga Ubbing
Umay ti pammaneknek maipapan ken ni Jesucristo babaen ti paltiing.
Kasano a makatulong kadagiti ubbing ti pammaneknek ni Pedro iti Mateo 16:13–17 bayat ti panangbukelda kadagiti pammaneknekda?
Dagiti Mabalin nga Aktibidad
-
Saludsodem kadagiti ubbing no ania ti makunada no adda agsaludsod kadakuada iti, “Asino ni Jesus?” Awisem dagiti ubbing a mangbasa iti Mateo 16:13–17 tapno ammuen no kasano a sinungbatan ni Pedro dayta a saludsod. Kasano a nagun-odna ti pammaneknekna maipapan ken ni Jesus? Ania ti mabalin nga aramidentayo a mangpapigsa kadagiti pammaneknektayo?
-
Tulongam dagiti ubbing a mangidilig iti wagas ti pakaammuantayo kadagiti naespirituan a kinapudno kadagiti wagas a pakaammuantayo kadagiti dadduma pay a kinapudno. Kas pagarigan, kasano a maammuantayo no kasano ti katayag ti maysa a tao wenno no ania ti kasasaad ti tiempo? Kasano nga ammotayo a ni Jesus ti Anak ti Dios? Ibagam kadagiti ubbing no kasano nga impaneknek kenka ti Espiritu Santo maipapan iti Mangisalakan.
-
Paneknekam ti maipapan ken ni Jesucristo, ket karitem dagiti ubbing a manggun-od wenno mangpapigsa iti bukodda a pammaneknek.
Ti Simbaan ni Jesucristo ket idauluan dagiti agiggem kadagiti tulbek ti priesthood.
Ti panagadal iti Mateo 16:15–19 mabalin a mangpatibker iti pammati dagiti ubbing a Ti Simbaan ni Jesucristo dagiti Santo iti Ud-udina nga Aldaw ket maysa a pannakaisubli ti isu met laeng a Simbaan nga impasdek ni Jesus idi nagnaed Isuna iti daga.
Dagiti Mabalin nga Aktibidad
-
Isurat ti Mateo 16:19 iti pisarra, a mangibati iti sumagmamano a balikas, agraman ti balikas a “tulbek.” Idawat kadagiti ubbing dagiti awan a balikas.
-
Ipabuya ti video a “Where Are the Keys?” (ChurchofJesusChrist.org), wenno irebyu ti “Keys of the Priesthood” iti Pangiwanwan iti Nasantuan a Kasuratan (scriptures.ChurchofJesusChrist.org). Ania dagiti tulbek ti priesthood? Kasano a maipada dagiti tulbek ti priesthood kadagiti pudno a tulbek?
-
Tulongam dagiti ubbing a mangilista iti pisarra iti sumagmamano a tao nga addaan kadagiti tulbek ti priesthood. “Dagiti Tulbek ti Priesthood” iti Pangiwanwan iti Nasantuan a Kasuratan (scriptures.ChurchofJesusChrist.org) addaan iti listaan a makatulong kadakuada. Awisem ti maysa a tao iti wardmo nga agiggem kadagiti tulbek ti priesthood tapno agsarita iti klase no apay a napateg dagitoy a tulbek.
-
Ilemmeng ti sumagmamano a tulbek (wenno ladawan dagiti tulbek) iti lawlaw ti siled, ken awisem dagiti ubbing a mangsapul kadagitoy. Kalpasan a masarakan ti tunggal tulbek, tulongam dagiti ubbing a mangpanunot kadagiti bendision a sagrapentayo gapu kadagiti tulbek ti priesthood (kas pagarigan, dagiti agnanayon a pamilia, panagbuniag, ken ti sakramento).
Ni Jesucristo ti Anak ti Dios.
Iladawan dagitoy a bersikulo ti maysa kadagiti sumagmamano a panawen kadagiti nasantuan a kasuratan idi nangngegan ti timek ti Dios Ama a mangipampaneknek maipapan iti Ay-yatenna nga Anak. Ti panagadal iti daytoy a pakaammuan a kadagiti ubbing ti makatulong a mangbukel iti pammatida ken ni Jesucristo.
Dagiti Mabalin nga Aktibidad
-
Awisem dagiti ubbing a mangidrowing kadagiti ladawan ti pasamak, a masarakan iti Mateo 17:1–9. Kiddawem kadakuada a mangilawlawag kadagiti ladawanda iti tunggal maysa. (Kitaen iti “Kapitulo 33: Panagparang iti Dayag: Ti Panagbalbaliw-langa,” iti Dagiti Estoria iti Baro a Tulag, 78–79, wenno ti maitutop a video iti ChurchofJesusChrist.org.)
-
Mangted kadagiti ubbing iti oras nga agutob no ania ti isuro kadakuada ti pakaammuan iti Mateo 17:1–9 maipapan ken ni Jesucristo. Awisem ida a mangisurat kadagiti kapanunotanda iti pisarra. Awisem ti sumagmamano nga ubbing a mangibinglay no kasano nga ammoda a ni Jesucristo ti Anak ti Dios.
Yallukoy ti Panagsursuro iti Pagtaengan
Awisem dagiti ubbing a mangsaludsod kadagiti nagannakda wenno dadduma pay a miembro ti pamiliada no kasano a nagun-odda dagiti pammaneknekda maipapan ken ni Jesucristo.
Panangpadur-as iti Panangisurotayo
Agusar iti musika. Makatulong dagiti kanta ti Primary ken himno kadagiti ubbing iti amin nga edad tapno maawatan ken malagipda dagiti kinapudno ti ebanghelio. Ti panagkanta ti mangpatalinaed pay nga aktibo dagiti ubbing a makiraman iti panagsursuro. (Kitaen iti Panangisuro iti Wagas ti Mangisalakan, 22.)