Dika Ikondena, ni Eva Koleva Timothy

Abril 24–30

Juan 7–10

“Siak ti Naimbag a Pastor”

Bayat ti panangbasam ti Juan 7–10, panunotem dagiti ubbing a sursuruam. Adu kadagiti kapanunotan para iti in-inauna nga ubbing iti daytoy a balabala ti mabalin pay nga ibagay para kadagiti in-inaudi nga ubbing, wenno vice versa.

Yawis ti Panagbibinninglay

Palagipan dagiti ubbing iti maysa a banag nga inyawismo kadakuada nga aramidenda iti immun-una nga adalen. Idawat kadakuada a mangibinglay no ania ti inaramidda nga agtignay iti awis.

Isuro ti Doktrina: In-inaudi nga Ubbing

Juan 7:14–17

Ti panagtungpal kadagiti bilin ti mangtulongto kaniak a mangammo a pudno dagitoy.

Insuro ni Jesus a makagun-odtayo iti pammaneknek maipapan kadagiti kinapudno nga imburayna no agtungpaltayo kadagitoy. Ti kappia a mariknatayo no tungpalentayo dagiti bilin ket makatulong kadatayo a mangammo a pudno dagitoy. Ibilangmo no kasano a maisurom dagiti ubbing iti daytoy a kinapudno.

Dagiti Mabalin nga Aktibidad

• Gupgopem ti Juan 7:17 kadagiti balikas a maawatanto dagiti ubbing. Tulongam ida a mangammo a ti panangtungpal kadagiti bilin ti mangtulong kadatayo a makarikna nga as-asidegtayo ken ni Jesucristo. Kas pagarigan, mabalinyo ti aggigiddan nga agkansion iti maysa a kanta kas iti “Keep the Commandments” wenno “Choose the Right Way” (Children’s Songbook, 146–47, 160–61). Kiddawem kadagiti ubbing a dumngeg iti no kasano a mabendisionantayonto no tungpalentayo dagiti bilin.

• Ibinglaymo ti maysa a padas idi nagun-omo ti pammaneknekmo a naggapu iti Dios ti maysa a bilin gapu ta tinungpalmo dayta a bilin, kas iti panagbayad iti apagkapullo wenno panangpakawan ti maysa a tao a natangsit. Awisem dagiti ubbing a mangpanunot iti maysa a padasda idi nangtungpalda iti maysa a bilin. Kiddawem kadakuada a mangibinglay no ania ti nariknada idi nagtungpalda.

• Awisem dagiti ubbing nga agdrowing kadagiti ladawan ti bagbagida nga agtungtungpal iti maysa a bilin. (Tulongam ida a mangpanunot kadagiti pagarigan.) Awisem ida a mangibinglay kadagiti ladawanda iti tunggal maysa ket pagsasaritaan maipapan iti ragsak a magun-odda iti panangtungpal iti dayta a bilin.

Juan 8:29

Tinungpal ni Jesus ti Amana.

Kanayon nga inaramid ni Jesuscristo dagiti banag a makaay-ayo iti Amana iti Langit. Kasano a matulongam dagiti ubbing a mangsapul kadagiti wagas a pakasurotanda iti pagwadanna.

Dagiti Mabalin nga Aktibidad

• Tulongam dagiti ubbing a mangulit iti no ania ti kinuna ni Jesus maipapan iti Nailangitan nga Ama iti Juan 8:29: “Kanayon nga aramidek dagiti banag a makaay-ayo kenkuana.” Kiddawem kadakuada a mangibinglay kadagiti banag nga inaramid ni Jesus a nangparagsak iti Nailangitan nga Ama. Ipakitam kadakuada ti sumagmamano a ladawan manipud iti Libro ti Arte ti Ebanghelio a mangted kadakuada kadagiti kapanunotan.

• Saludsodem kadagiti ubbing no ania dagiti makaparagsak kadakuada. Awisem ti maysa a nagannak ti maysa kadagiti ubbing tapno mangibinglay iti maysa a padas idi nagaramid ti ubing iti maysa a banag a makaay-ayo, wenno nangparagsak iti nagannak. Ania ti mabalin nga aramidentayo a mangparagsak iti Nailangitan nga Ama? Awisem dagiti ubbing a mangidrowing iti ladawan ti bagbagida a mangar-aramid kadagita nga aktibidad a yawidda ken mangipalagip kadakuada.

Juan 10:1–16

Am-ammo ken ay-ayatennak ni Jesus.

Makatulong kadagiti ubbing ti pangngarig maipapan iti naimbag a pastor tapno maawatanda nga ay-ayaten ida ni Jesus ken ammona no asinoda.

Dagiti Mabalin nga Aktibidad

• Ikkam dagiti ubbing kadagiti ladawan a mangibagi iti maysa a banag iti pangngarig maipapan iti naimbag a pastor, kas iti karnero, maysa a pastor, wenno maysa a lobo. Pumili iti sumagmamano a bersikulo manipud iti Juan 10:1–16 tapno ibasa kadagiti ubbing, ken kiddawem kadakuada a mangitag-ay kadagiti ladawanda no mangngegda a binasam maipapan kadagiti banag iti ladawanda. Tulongam dagiti ubbing a mangpanunot kadagiti wagas a kasla maysa ni Jesus a pastor kadatayo. Ibinglaymo ti pammaneknekmo nga ay-ayatennatayo ti Mangisalakan ken iwanwannatayo nga agsubli Kenkuana.

• Ipakitam ti ladawan ni Jesus ken dagiti kordero iti balabala iti daytoy a lawas iti Umaykayo, Sumurot Kaniak—Para dagiti Indibidual ken Pamilia. Kasano nga ammotayo nga ay-ayaten ni Jesus dagiti kordero? Kasano a maibagatayo nga ay-ayaten dagiti kordero ni Jesus? Kasano a maipakitatayo ken ni Jesus nga ay-ayatentayo Isuna?

Isuro ti Doktrina: In-inauna nga Ubbing

Juan 7:14–17

Ti panagtungpal kadagiti bilin ti mangtulongto kaniak a mangammo a pudno dagitoy.

Mabalin nga addaanka ken dagiti ubbing a sursuruam kadagiti padas iti panagbiag a mayannurot kadagiti kinapudno ti ebanghelio ken panagsursuro a pudno dagitoy. Kasano a mapapigsaka babaen kadagita a padas bayat ti panangisurom?

Dagiti Mabalin nga Aktibidad

• Isurat ti tunggal bersikulo ti Juan 7:14–17 iti nadumaduma a panid ti papel, ket ipakitam dagitoy iti saan a napagsasaganad nga urnos. Kiddawen kadagiti ubbing nga urnosenda dagitoy iti umno nga urnos ket kitaen iti Juan 7:14–17 tapno makita no husto dagitoy. Awisem dagiti ubbing nga agsisinada iti kada paris ken ibinglayda ti pannakaawatda iti tunggal bersikulo iti kaparehada. Kasano a nakatulong kadakuada ti panagtungpal kadagiti bilin ti Dios a nangammo a pudno dagiti bilin?

• Mangibinglay kadagiti pagarigan manipud kadagiti nasantuan a kasuratan a mangipakita no kasano nabendisionan dagiti tao babaen iti panagbiagda kadagiti kinapudno ti ebanghelio, kas ken ni Daniel (kitaen iti Daniel 6) wenno ni Elisabet (kitaen iti Lucas 1:5–14). Ania dagiti bendision a naited kadatayo gapu iti panagtungpal kadagiti bilin?

• Sumagmamano nga aldaw sakbay ti klase, awisem ti maysa kadagiti ubbing a mangisurat maipapan iti maysa a panawen idi nakagun-od isuna iti pammaneknek iti maysa a bilin babaen ti panagbiagna iti daytoy. Kabayatan ti klase, paibinglay iti ubing no ania ti insuratna.

Juan 8:31–36

Maaramidnak a nawaya ti kinapudno.

Ipagarup ti sumagmamano a tattao a mangiget kadakuada ti panagbiag iti ebanghelio. Kasano a mausarmo ti Juan 8:31–36 a mangtulong kadagiti ubbing a makaawat a talaga a mangwaywaya kadatayo ti panagbiag iti ebanghelio?

Dagiti Mabalin nga Aktibidad

• Awisem dagiti ubbing a mangbasa iti Juan 8:31–36 ken mangibinglay no ania iti panagkunada ti kaipapanan ti agbalin nga adipen ti basol. Kasano a matulongannatayo nga agbalin a nawaya dagiti pannursuro ni Jesus?

• Mangipakita iti maysa a kandado a mangibagi iti basol ken maysa a tulbek a mangibagi no kasano a mapagbalinnatayo a nawaya dagiti kinapudno ti ebanghelio. Kas pagarigan, ti pannakaammo maipanggep iti Pannubot ti Mangisalakan ket makaited kadatayo iti wayawaya nga agbabawi ken mapakawan iti basbasoltayo. Wenno ti pannakaammo maipapan iti Word of Wisdom ket makaited kadatayo iti wayawaya a mangliklik kadagiti pannakairuam.

Insuro ni Jesus, “Ti kinapudno wayawayaannakayto” (Juan 8:32).

Juan 10:1–18

Kas maysa a pastor ni Jesus kadatayo.

Bayat ti panagadalmo iti pangngarig maipapan iti naimbag a pastor, sarakem dagiti kinapudno nga isursuro daytoy maipapan iti pakainaigantayo iti Mangisalakan. Kasano a mabendisionanto dagiti ubbing iti panakaammo kadagitoy a kinapudno?

Dagiti Mabalin nga Aktibidad

• Isurat ti naimbag a pastor ken makitangtangdan iti pisarra. Ilawlawag a ti maysa a makitangtangdan ket maysa a tao a matangdanan nga agtrabaho para iti kuarta. Kiddawen kadagiti ubbing a mangilista kadagiti paggigiddiatan a masarakan iti Juan 10:1–18 iti nagbaetan ti naimbag a pastor ken ti makitangtangdan. Apay a kayatmo a suroten ti naimbag a pastor imbes a ti makitangtangdan? Kasano a kas maysa a pastor ni Jesus kadatayo?

• Agdrowing wenno mangipakita iti ladawan ti maysa a ruangan. Aggigiddan a mangbasa iti Juan 10:7–9, ken saludsoden kadagiti ubbing no kasano a kasla maysa a ruangan ni Jesus. Segun iti bersikulo 9, ania dagiti bendision nga umay kadagiti “sumrek“ iti ruangan? Kasano a sumrektayo ti ruangan nga impaay ni Jesucristo kadatayo?

Yallukoy ti Panagsursuro iti Pagtaengan

Tulongam dagiti ubbing a mangpanunot ti maysa a bilin a mabalinda a tungpalen a naan-anay. Kiddawem kadakuada a mangpadas a tungpalen dayta a bilin iti umay a lawas.

Panangpadur-as iti Panangisurotayo

Agdamag kadagiti naparegta a saludsod. Agdamag kadagiti saludsod a mangawis kadagiti ubbing a sursuruam nga aglabes iti panagireport kadagiti kinapudno. Imbes, allukoyem ida a mangibinglay kadagiti pamaneknekda maipapan kadagiti kinapudno ti ebanghelio. Kas pagarigan, no ilawlawagmo dagiti bilin, mabalinmo a paibinglay kadagiti ubbing no kasano a nabendisionanda gapu iti panagtungpalda kadagiti bilin.