“Mayo 1–7. Lucas12–17; Juan 11: ‘Makipagrag-okayo Kaniak; gapu ta Nabirokak ti Napukaw a Karnerok’” Umaykayo, Sumurot Kaniak—Para iti Primary: Baro a Tulag 2023 (2022)
“Mayo 1–7. Lucas12–17; Juan 11,” Umaykayo, Sumurot Kaniak—Para iti Primary: 2023
Ti Nayaw-awan nga Anak,, ni Liz Lemon Swindle
Mayo 1–7
Lucas 12–17; Juan 11
“Makipagrag-okayo Kaniak; gapu ta Nabirokak ti Napukaw a Karnerok”
Nainkararagan a basaem ti Lucas 12–17 ken Juan 11, nga agsapsapul no kasano a makatulongka kadagiti ubbing a sursuruam a makaawat kadagiti kinapudno kadagitoy a kapitulo ken mariknada ti ayat ti Nailangitan nga Ama.
Yawis ti Panagbibinninglay
Ipalagip kadagiti ubbing ti sumagmamano kadagiti pangngarig ken estoria a masarakan iti Lucas 12–17 ken Juan 11, ken awisem ida a mangibinglay no ania ti ammoda ken maipapan kadagitoy nga estoria.
Isuro ti Doktrina: In-inaudi nga Ubbing
Kayat ti Nailangitan nga Ama ang agsubli ti amin nga annakna Kenkuana.
Panunotem maipapan kadagiti ubbing iti klasem, agraman dagiti mabalin a saan a masansan a dumardar-ay. Kasano a matulongam ida a makarikna iti ayat ti Nailangitan nga Ama? Kasano a maparegtam dagiti dadduma nga ubbing a tulongandaka a mangtulong kadakuada a siaayat?
Dagiti Mabalin nga Aktibidad
-
Ikkam ti maysa nga ubing iti sensilio, ikkam ti maysa pay nga ubing iti ladawan ti maysa a karnero, ken ikkam ti maysa pay nga ubing iti ladawan ti nayaw-awan nga anak (kitaen iti ChurchofJesusChrist.org wenno ti panid ti aktibiad iti daytoy a lawas). Isalaysay maipapan iti tallo a pangngarig a masarakan iti Lucas 15 ken awisem dagiti ubbing a mangitag-ay iti sensilio wenno ladawanda no dakamatem daytoy. Mabalinmo nga awisen dagiti ubbing a mangulit a mangisarita kadagiti pangngarig iti tunggal maysa iti bukodda a balikas.
-
Kiddawem kadagiti ubbing a mangibinglay iti maysa a panawen idi napukawda iti maysa a banag. Kasano a nasarakanda daytoy? Ilawlawag a mabalin a naespirituan a mapukaw dagiti tao no saanda a sumurot iti nailangitan nga Ama. Paneknekan a kayat ti Dios nga umasideg Kenkuana dagiti tao a napukaw, ken matulongantayo ida.
-
Awisem dagiti ubbing a mangpanunot iti dadduma nga ubbing a saan nga um-umay iti Primary. Tulongam ida nga agkolor wenno agsurat iti note a mangaw-awis kadagitoy nga ubbing a dumar-ay iti Primary wenno aktibidad iti Primary. Kasano a matulongantayo pay dagitoy nga ubbing a makarikna iti ayat ti Nailangitan nga Ama para kadakuada?
Maipakitak ti ayatko para iti Nailangitan nga Ama babaen ti panagyamanko kadagiti bendisionko.
Kasano a makaallukoy kadagiti ubbing ti estoria dagiti sangapulo nga agkukutel tapno agbalinda a managyaman?
Dagiti Mabalin nga Aktibidad
-
Isaritam ti estoria maipapan kadagiti sangapulo nga agkukutel a pinaimbag ni Jesus. Ipakitam ti ladawan a masarakan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket awisem dagiti ubbing nga agbilangda iti sangapulo kadagiti ramayda. Kalpasanna paibabam kadakuada dagiti siam a ramayda tapno mangipakita iti maysa nga agkukutel a nagyaman ken ni Jesus. Tulongam dagiti ubbing a mangpanunot iti maysa a tao a mabalinda a pagyamanan gapu iti naasi ken nakatulong nga aramid.
-
Awisem ti tunggal ubing a mangyakem iti maysa a banag a pagyamananna, ken papugtuan iti dadduma pay nga ubbing no ania daytoy. Kiddawem kadagiti ubbing a mangibinglay kadagiti wagas a pangipakitaantayo iti panagyamantayo iti Nailangitan nga Ama para kadagiti bendisiontayo.
Mamatitayo a ni Jesus ti Anak ti Dios.
Imbaga ni Marta, a kabsat ni Lazaro, ken ni Jesus: “Patiek a sika ti Cristo, ti Anak ti Dios” (Juan 11:27). Ti estoria maipapan kada Maria, Marta, ken Lazaro ket mabalin a mangpapigsa iti pammaneknek dagiti ubbing maipapan ken ni Jesucristo.
Dagiti Mabalin nga Aktibidad
-
Gupgopem ti estoria ni Jesus a mangpagpagungar ken ni Lazaro manipud kadagiti natay (kitaen met iti “Kapitulo 43: Isubli ni Jesus ti Biag ni Lazaro,” Dagiti Estoria iti Baro a Tulag, 107–9, wenno ti maitutop a video iti ChurchofJesusChrist.org). Ipakita kadagiti ubbing ti maysa a nagango a sanga ken maysa a nabiag a mula, ket saludsodem kadakuada no ania ditoy ti natay ken no ania ditoy ti sibibiag. Iburaymo ti pammaneknekmo a gapu iti pannakabalin ni Jesucristo, agungarto dagiti tao a pimmusayen ket agbiagda iti agnanayon.
-
Tulongam dagiti ubbing a mangyulo iti ragup ti balikas a kinuna ni Jesus ken ni Marta: “Siak ti panagungar, ken ti biag” (Juan 11:25). Ilawlawag a gapu iti Panagungar ti Mangisalakan, makitatayonto manen dagiti ay-ayatentayo a pimmusayen.
Isuro ti Doktrina: In-inauna nga Ubbing
Matulongak ni Jesus a mangsapul kadagiti napukaw a karnerona.
Ammotayo amin ti maysa a tao nga iti sumagmamano a wagas maipada iti napukaw a karnero, ti napukaw a sensilio, wenno ti nayaw-awan nga anak kadagiti pangngarig ti Mangisalakan. Ibilang no kasano a maparegtam dagiti ubbing a tumulong kadagitoy a tattao babaen iti ayat.
Dagiti Mabalin nga Aktibidad
-
Tudingam ti tunggal ubing a mangbasa iti pangngarig ti napukaw a karnero wenno ti pangngarig ti napukaw a sensilio, a masarakan iti Lucas 15:1–10, ken ibinglayda no ania ti nasursuroda.
-
Isurat dagitoy a nagan iti pisarra: ama, inauna nga anak, ken inaudi nga anak. Ipabuyam ti video a “The Prodigal Son” (ChurchofJesusChrist.org) ket pagsardengen daytoy iti sagpaminsan tapno maisurat dagiti ubbing iti pisarra ti sumagmamano a rikna dagiti tao a nailista. Kasano ti rikna ti Nailangitan nga Ama ken ni Jesucristo kadagiti nagbasol?
-
Kiddawem iti maysa nga ubing a rummuar iti siled bayat ti panagilemmeng dagiti dadduma pay nga ubbing iti sensilio wenno papel a sinan-karnero. Pagsubliem ti ubing ken pasapulmo ti sensilio wenno ti sinan-karnero. Ania dagiti sumagmamano a wagas a pakariknaan dagiti tao a “napukaw” maipada iti sensilio wenno iti karnero? Awisem dagiti ubbing a mangisingasing kadagiti wagas a pakatulonganda kadakuada. Makipagkanta kadagiti ubbing iti mainaig a kanta, kas iti “Dear to the Heart of the Shepherd,”Hymns, no.221, ket paneknekam ti rag-o a sumangbay no agsubli dagiti tao iti Dios.
-
Ilawlawag nga inusar ni Jesus ti napukaw a karnero, ti napukaw a sensilio, ken ti napukaw nga anak a mangibagi kadagiti “napukaw” a tao gapu ta awan kadakuada dagiti bendision ti ebanghelio. Awisem dagiti ubbing a mangpanunot kadagiti tao nga am-ammoda nga awanan kadagitoy a bendision iti biagda. Ania ti maaramidanda a makatulong kadagitoy a tao tapno mariknada ti ayat ti Nailangitan nga Ama para kadakuada?
Nadungngo a Pastor, ni Yongsung Kim
Maipakitak ti ayatko para iti Nailangitan nga Ama babaen ti panagyamanko kadagiti bendisionko.
Ti estoria dagiti sangapulo nga agkukutel ket mabalin a nasayaat a wagas a pakaparegtaan dagiti ubbing a mangyebkas iti panagyamanda iti Nailangitan nga Ama kadagiti bendisionda.
Dagiti Mabalin nga Aktibidad
-
Aggigiddan a mangbasa iti pakaammuan maipapan kadagiti sangapulo nga agkukutel. Kasano a nabendisionan ti nagyaman nga agkukutel gapu iti panagyamanna? Apay a napateg nga agyamantayo iti Dios kadagiti bendisiontayo?
-
Awisem dagiti ubbing a mangilista kadagiti banag a pagyamyamananda a mangrugi iti tunggal letra ti naganda.
-
Kiddawen kadagiti ubbing a mangaramid iti ababa a surat iti panagyaman iti Nailangitan nga Ama para kadagiti bendision nga it-itedna kadakuada. Mabalinda nga ibitin ti ababa a surat iti abay ti katreda tapno mangipalagip kadakuada a mangipeksa iti panagyaman no agkararagda.
Mamatitayo a ni Jesus ti Anak ti Dios.
”Kasano a mausarmo ti estoria da Maria, Marta,ken Lazaro a makatulong kadagiti ubbing a mangammo, kas iti inaramid ni Marta, a ni Jesus “ti Cristo, ti Anak ti Dios”? (Juan 11:27).
Dagiti Mabalin nga Aktibidad
-
Isurat iti pisarra dagti sumagmamano a palawag nga insao dagiti tao iti Juan 11. Awisem dagiti ubbing a mangbigbig no asino ti nangisao iti tunggal palawag, ket kiddawem kadakuada nga agsukisok iti Juan 11 a mangkita kadagiti sungbatda. Ania ngata ti mariknada no isuda koma da Jesus, Marta, Maria, wenno Lazaro? Kasano a makatulong kadatayo ti panangpati ken ni Jesus no naliday wenno mabutengtayo?
-
Basaem ti pammaneknek ni Marta, a masarakan iti Juan 11:20–27. Pasapul kadagiti ubbing dagiti balikas ken ragup ti balikas a mangipakita nga addaan iti pammati ni Marta ken ni Jesucristo. Ania ti maaramidtayo tapno maaddaantayo iti pammati kenkuana?
-
Tulongam dagiti ubbing a mangyulo iti Juan 11:25. Ilawlawag nga agungarto ti amin, ngem dagiti nalinteg laeng ti umawatto iti agnanayon a biag ken makipagnaed manen iti Nailangitan nga Ama ken ni Jesucristo.
Yallukoy ti Panagsursuro iti Pagtaengan
Mangted kadagiti ubbing iti sumagmamano a papel a mausarda a mangisurat wenno mangidrowing kadagiti banag a pagyamyamananda iti unos ti makalawas.
Panangpadur-as iti Panangisurotayo
Ti panangulit ket maysa a tulbek iti panagsursuro. Mangted benepisio kadagiti ubbing ti pannakangngegda iti pagbatayan ti ebanghelio wenno panangaramid iti maysa nga aktibidad iti mamin-adu pay ngem iti maminsan. Padasem ti panangulit kadagiti aktibidad iti nadumaduma a wagas.