Mayo 8–14

Mateo19–20; Marcos 10; Lucas 18

“Ania Pay ti Pagkurangak?”

Basaem ti Mateo 19–20; Marcos 10; ken Lucas 18, a pampanunotem dagiti ubbing a sursuruam. Isuratmo dagiti ania man a parikna a maawatmo. Ti panagsaganam ket mangtulongto kenka a mangisuro kadagiti ubbing no ania ti nasken a maammuanda manipud kadagitoy a kapitulo.

Yawis ti Panagbibinninglay

Awisem dagiti ubbing a mangibinglay iti ania man a banag maysa a malagipda manipud iti adalen itay napalabas a lawas. Ipakitam dagiti ladawan a mangtulong kadakauada a manglagip.

Isuro ti Doktrina: In-inaudi nga Ubbing

Marcos 10:6–8

Kayat ti Nailangitan nga Ama nga agkallaysatayo iti templo ket maaddaan kadagiti agnanayon a pamilia.

Kasano a mairanud dagiti ubbing a sursuruam manipud iti panagsursuro maipapan iti doktrina ti agnanayon a kallaysa? Mabalin a makatulong kenka a mangrebyu iti kadagiti kinapudno maipapan iti kallaysa iti “Ti Kaamaan: Maysa a Waragawag iti Lubong” (ChurchofJesusChrist.org).

Dagiti Mabalin nga Aktibidad

• Ibasam ti Marcos 10:6–8 kadagiti ubbing, ken i-display ti maysa a ladawan ti nagkallaysa nga agassawa. Kiddawem kadagiti ubbing a mangitudo iti lalaki ken ti babai no mangngegda a binasam dagiti balikas a lalaki ken babai. Ilawlawag a kayat ti Nailangitan nga Ama nga agkallaysa ti lalaki ken ti babai iti tunggal maysa (kitaen iti Genesis 1:27–28).

• I-display dagiti ladawan ti maysa a pamilia ken ti maysa a templo. Kiddawem kadagiti ubbing nga isarita no ania ti makitada iti ladawan. Ilawlawag a kayat ti Nailangitan nga Ama a mailantiptayo kadagiti pamiliatayo iti templo tapno makadennatayo ida iti agnanayon. Agbalinka a managrikna kadagiti ubbing a saan pay a nailantip dagiti nagannakda.

• Agkansion iti maysa a kanta maipapan kadagiti pamilia, kas ti “A Happy Family” (Children’s Songbook,, 198). Ibilang ti panangkansion iti kanta iti sumagmamano a gundaway. Awisem dagiti ubbing a mangibinglay kadagiti naragsak a banag nga inaramidda kadua dagiti pamiliada. Apay nga agyamanda para kadagiti pamiliada?

• Agkansion iti kanta maipapan iti templo, kas iti “I Love to See the Temple” wenno “Families Can Be Together Forever” (Children’s Songbook, 95, 188). Paigganam kadagiti ubbing dagiti ladawan dagiti templo wenno pamilia, ket paingatom kadakuada dagiti ladawanda no kantaenda ti “templo” wenno “pamilia.” Tulongam dagiti ubbing a mangpanunot kadagiti gapu no apay pay a napateg ti agkallaysa iti templo.

Ay-ayaten ni Jesus dagiti ubbing, gapu ta “isuda dagiti agtagikua iti pagarian ti Dios” (Marcos 10:14).

Marcos 10:13–16

Kayat ni Jesus nga umay Kenkuana dagiti babassit nga ubbing tapno mabendisionanna ida.

Ipaay daytoy a pakaammuan ti gundaway a mangtulong kadagiti ubbing a makarikna no kasano ti kadakkel ti panagayat ni Jesus kadakuada.

Dagiti Mabalin nga Aktibidad

• Iti bukodmo a balikas, ibinglaymo ti pakaammuan iti Marcos 10:13–16. Mabalinmo pay nga ipabuya ti video a “Suffer the Little Children to Come unto Me” (ChurchofJesusChrist.org). Tulongam dagiti ubbing nga agpanunot kadagiti panawen a nariknanda ti ayat ni Jesus para kadakuada. Paneknekam kadagiti ubbing nga ay-ayaten ida ni Jesus ken kayatna a bendisionan ida.

• I-display ti ladawan a Ni Cristo ken dagiti Ubbing (Libro ti Arte ti Ebanghelio, num. 47). Tulongam dagiti ubbing a mangipapan no ania ti mabalin a kayarigan ti maysa kadagiti ubbing a nakatakded iti abay ni Jesus iti ladawan. Awisem dagiti ubbing a mangibinglay no ania ti riknada maipapan ken ni Jesus.

• Pagdrowingem dagiti ubbing kadagiti ladawan ti bagbagida a bembendisionan ni Jesus (kitaen iti Marcos 10:16 ken ti panid ti aktibidad iti daytoy a lawas.

Marcos 10:17–22

No agtungpalak kadagiti bilin, makaawatak iti agnanayon a biag.

Insuro ni Jesus iti baknang nga agtutubo a lalaki a tapno magun-od ti agnanayon a biag—ti biag a kas iti biag ti Nailangitan nga Ama—nasken a tungpalenna dagiti bilin.

Dagiti Mabalin nga Aktibidad

• Isaritam ti estoria ti baknang nga agtutubo a lalaki iti Marcos 10:17–22 kadagiti ubbing. (Kitaen met iti “Kapitulo 42: Ti Nabaknang nga Agtutubo a Lalaki,” iti Dagiti Estoria iti Baro a Tulag, 105–6, wenno ti maitutop a video iti ChurchofJesusChrist.org.) Kiddawem kadakuada a dumngeg no ania ti imbaga ni Jesus iti agtutubo a lalaki nga aramidenna ken no kasano a simmungbat ti agtutubo a lalaki.

• Isaritam ti maysa wenno ad-adu pay nga estoria maipapan kadagiti ubbing nga agkiddaw iti balakad wenno pangiturong manipud kadagiti nagannakda ngem saanda a sumurot wenno agtungpal. Ania dagiti sumagmamano a banag a dawdawaten kadatayo ti Nailangitan nga Ama nga aramidentayo? Kasano ti riknatayo no tungpalentayo dagiti bilinna?

• Ibinglay dagiti padas idi nakaawatka kadagiti bukodmo a parikna a mangaramid iti maysa a banag tapno agbalin a nasaysayaat.

Isuro ti Doktrina: In-inauna nga Ubbing

Marcos 10:6–8

Kayat ti Nailangitan nga Ama nga agkallaysatayo iti templo ket maaddaan kadagiti agnanayon a pamilia.

Makatulong kadagiti ubbing dagiti banag nga insuro ni Jesus maipapan iti kallaysa a mangpadpadaan iti panagkallaysa iti templo ken panangpatanor iti agnanayon a pamilia. no maipasangoda kadakuada kadagiti maisupadi a mensahe iti lubong.

Dagiti Mabalin nga Aktibidad

• Kiddawem iti maysa kadagiti ubbing a mangbasa iti Marcos 10:6–8 iti napigsa. Ilawlawag a ti makinaig kaipapananna ti “dumket” wenno “kumpet” iti maysa a banag. Apay a napateg dagiti agassawa nga agtipon a sangkamaysa, aggiinnayat iti tunggal maysa, ken agtinnulong kas agkadua?

• Agpatulongka kadagiti ubbing a mangpanunot kadagiti sungbat dagiti saludsod kas iti “Apay a napateg ti pamilia iti Simbaan?” wenno “Apay a napateg kadakayo ti agkallaysa iti templo?” Tulongam ida a mangsapul kadagiti sungbat iti resources kas iti Marcos 10:6–8; 1 Taga Corinto 11:11; Doktrina ken Katulagan 42:22; 131:1–4; Moises 3:18, 21–24; ken “Ti Kaamaan: Maysa a Waragawag iti Lubong.”

• Aggigiddan nga agkansion iti kanta a mangiladawan kadagiti bendision ti templo, kas iti “Families Can Be Together Forever” (Children’s Songbook, 188). Ibinglaymo ti pamaneknekmo maipapan iti agnanayon a kallaysa ken ti pamilia kadagiti ubbing. Awisem ida a mangibinglay met kadagiti pammaneknekda.

Marcos 10:17–22

Matulongannak ni Jesus a mangammo no ania ti nasken nga aramidek tapno dumur-as.

Sinapul ti nabaknang nga agtutubo a lalaki ni Jesus ket immawat iti masinunuo a pangiturong a naipangpangruna a nairanta para kenkuana. Kasano a maparegtam dagiti ubbing nga agsapul iti kasta met la a pannarabay iti bukodda a biag?

Dagiti Mabalin nga Aktibidad

• Kiddawem kadagiti ubbing a mangsapul iti maysa a bersikulo iti Marcos 10:17–22 a mangilawlawag iti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Ilawlawag a personal ti balakad nga inted ni Jesus iti agtutubo a lalaki, ket makaawattayo amin iti personal a pangiturong manipud iti Apo babaen iti Espiritu.

• Aggigiddan a basaen ti Marcos 10:17–22. Awisem dagiti ubbing a mangisurat iti pisarra dagiti bilin nga imbaga ti Mangisalakan iti nabaknang nga agtutubo a lalaki a tungpalenna (kitaen iti bersikulo 19). Ania pay ti indawat ni Jesus kenkuana nga aramidenna (kitaen iti bersikulo 21). Allukoyem dagiti ubbing a mangpanunot maipapan kadagiti banag a mabalin a kasapulanda a rugian nga aramiden wenno isardeng nga aramiden tapno nasaysayaat a surotenda ni Jesus. Ania dagiti dadduma pay a wagas a mabalintayo nga ammuen no ania iti kayat ni Jesus nga aramidentayo?

Yallukoy ti Panagsursuro iti Pagtaengan

Awisem dagiti ubbing a mangipakita iti pamiliada nga ay-ayatenda ida, nalabit a babaen ti panagsurat iti maysa a note wenno panagaramid iti naasi nga aramid ti serbisio.

Panangpadur-as iti Panangisurotayo

Ikasom dagiti ubbing. Kasano ti panagresponde dagiti ubbing iti klasem kadagiti aktibidad iti panagsursuro? No kasla saanda a napasnek a makiraman, mabalin a daytoy ti panawen tapno mangpadas iti sabali pay nga aktibidad wenno agpagnapagna biit a siuulimek. Iti sabali a bangir, no madlawmo a napasnek a makiraman dagiti ubbing ken masursuruanda manipud iti masinunuo a paset ti adalen, saanmo a piliten ti mangituloy tapno laeng masiguradom a maisurom ti amin a material iti adalen.