“Mayo 15–21. Mateo 21–23; Marcos 11; Lucas 19–20; Juan 12: ‘Adtoy, Umayen ti Ariyo,’” Umaykayo, Sumurot Kaniak—Para iti Primary: Baro a Tulag 2023 (2022)
“Mayo 15–21. Mateo 21–23; Marcos 11; Lucas 19–20; Juan 12,” Umaykayo, Sumurot Kaniak—Para iti Primary: 2023
Ni Zaqueo iti Kayo ti Sikamoro,, ni James Tissot
Mayo 15–21
Mateo 21–23; Marcos 11; Lucas 19–20; Juan 12
“Adtoy, Umayen ti Ariyo”
Bayat ti panangbasam iti Mateo 21–23; Marcos 11; Lucas 19–20; ken Juan 12, ikasom dagiti impresion a maawatmo manipud iti Espiritu Santo. Ibasar iti “Panangipaay kadagiti Kasapulan dagiti In-inaudi nga Ubbing” iti rugi daytoy a resource para kadagiti banag a laglagipem bayat ti panangisurom kadagitoy a pagbatayan.
Yawis ti Panagbibinninglay
Ipakitam ti maysa a ladawan manipud iti balabala itoy a lawas iti Umaykayo Sumurot Kaniak—Para kadagiti Indibidual ken Pamilia, ket awisem dagiti ubbing a mangibinglay no ania ti ammoda maipapan ti mapaspasamak iti ladawan.
Isuro ti Doktrina: In-inaudi nga Ubbing
Am-ammonak ti Nailangitan nga Ama ken ni Jesus babaen iti naganko.
Bayat ti panangbasam maipapan iti pannakilangen ti Mangisalakan ken ni Zaqueo, ania dagiti mensahe a makasarakam a mabalin a mangbendision kadagiti ubbing a sursuruam?
Dagiti Mabalin nga Aktibidad
-
Ipakitam ti ladaawan ni Zaqueo iti Kayo a Sikamora (iti daytoy a balabala wenno iti ChurchofJesusChrist.org). Tulongam dagiti ubbing a mangilasin ken ni Zaqueo ken mangisao iti naganna. Agparnuayka kadagiti garaw nga aramiden dagiti ubbing bayat ti panangisaritam ti estoria maipapan kada Zaqueo ken Jesus—kas pagarigan, panagkiadda tapno makitada ti maysa a bunggoy dagiti tattao wenno panagpammarangda nga umul-uli iti maysa a kayo. Ilawlawag a nakita ti Mangisalakan ni Zaqueo ket inawaganna iti naganna. Paneknekam nga ammo ti Mangisalakan ti tunggal maysa kadagiti ubbing ken dagiti naganda.
-
Mangitugot iti awan nagyanna a kuadro ti ladawan iti klase, wenno mangaramid iti maysa a sinan-kuadro manipud iti papel. Awisem ti tunggal ubing nga agsisinnublat a mangiggem iti kuadro iti lawlaw ti rupada idinto nga isao dagiti dadduma pay iti klase ti, “Am-ammo ti Nailangitan nga Ama ken ni Jesus ni [nagan ti ubing].”
-
Aggigiddan a kansionen ti maysa a kanta maipapan iti ayat ti Nailangitan nga Ama, kas iti “I Am a Child of God” (Children’s Songbook, 2–3). Tulongam dagiti ubbing a dumngeg kadagiti banag a makatulong kadakuada a mangammo nga ay-ayaten ida ti Nailangitan nga Ama.
Ti templo ket maysa a sagrado a lugar.
Ti panagraem ken ni Jesus iti templo, kas nailadawan kadagitoy a bersikulo, makatulong kadagiti ubbing a sursuruam a makaawat a maysa a sagrado a lugar ti templo.
Dagiti Mabalin nga Aktibidad
-
Ipakita ti ladawan Ni Jesus a Mangdaldalus iti Templo Libro ti Arte ti Ebanghelio,num. 51), ket isaritam ti estoria kas naisurat iti Mateo 21:12–14. Tulongam dagiti ubbing a mangsapul kadagiti iti kuarta ken ayup iti ladawan. Kalpasanna ilawlawag no apay a kayat ti Mangisalakan a pagtalawen iti templo dagiti agsuksukat iti kuarta ken dagiti tao nga aglaklako kadagiti ayup.
-
Ipakitam dagiti ladawan dagiti templo (kas pagarigan, kitaen iti Libro ti Arte ti Ebanghelio, 117–21), ket kiddawem kadagiti ubbing a mangibinglay no ania ti riknada no makakitada iti maysa a templo. Mabalinmo nga ilawlawag a ti templo ket maysa a lugar a papanantayo tapno agaramid kadagiti kari iti Dios, agsapul kadagiti sungbat dagiti kararag, ken marikna nga asidegtayo iti Dios. Tulongam dagiti ubbing a mngbigbig kadagiti rikna manipud ti Espiritu Santo a mangibagbaga kadakuada a maysa a naisangsangayan a lugar ti templo. Kiddawem kadagiti ubbing nga agtignay a kasla addada iti uneg ti templo. Kas pagarigan, mabalinda ti agarasaas no agsarsaritada ken siraraem nga agtugawda.
-
Aggigiddan a kantaenyo ti kanta a maipapan iti templo, kas iti “I Love to See the Temple” (Children’s Songbook, 95), ket awisem dagiti ubbing a mangaramid iti maysa a panggep a tun-oyen a sumrek iti uneg iti templo iti maysa nga aldaw.
Ti templo ket ti balay ti Apo.
Makapagtulnogak.
kayat ti Nailangitan nga Ama nga agbalintayo a natulnog. Ti pangngarig maipapan iti dua nga annak a lallaki ket maysa a gundaway a mangisuro maipapan iti kinapateg ti panagtulnog.
Dagiti Mabalin nga Aktibidad
-
Idrowing ti ladawan ti dua nga annak a lallaki iti pisarra, ket usarem dagiti drawing bayat ti panangisaritam manen iti pangngarig iti Mateo 21:28–32. Siasino nga anak a lalaki ti nagaramid iti umno a banag iti kamaudianan? Kiddawem kadagiti ubbing a manginaganda kadagiti banag a mabalinda nga aramiden tapno agbalinda a natulnog iti pagtaenganda. Pagdrowingen ida kadagiti ladawan ti bagbagida nga agar-aramid iti maysa kadagita a banag.
-
Awisem dagiti ubbing a mangibinglay kadagiti padasda iti panagbalinda a natulnog kadagiti nagannakda. Kasano a nabendisionanda iti panagbalinda a natulnog?
Isuro ti Doktrina: In-inauna nga Ubbing
No sapulek ti Mangisalakan, masarakakto.
Mabalinmo nga usaren ti estoria ni Zaqueo a mangtulong kadagiti ubbing nga agpanunot kadagiti banag a mabalinda nga aramiden tapno ad-adda nga umasidegda iti Mangisalakan.
Dagiti Mabalin nga Aktibidad
-
Basaem ti Lucas 19:1–10, nga agsardeng biit iti tunggal sumagmamano a bersikulo tapno paglilinnawagan no ania ti ipalgak dagiti bersikulo maipapan ken ni Zaqueo. Ania ti inaramid ni Zaqueo tapno makitana ni Jesus? Kasano a sinungbatanna idi kiniddaw ni Jesus kenkuana a bumaba manipud iti kayo? Kiddawem iti tunggal ubing a mangibinglay iti maysa a gapu no apay a kayatda a makita ni Jesus. No immay ti Mangisalakan iti siudadtayo, ania koma ti aramidetayo tapno makapagsagana?
-
Awisem dagiti ubbing a mangpanunot kadagiti tao nga am-ammoda a, kas ken ni Zaqueo, mabalin nga agkalkalikagum a mangsapul iti Mangisalakan. Kiddawen kadagiti ubbing no ania ti mabalinda nga aramiden a mangtulong iti maysa a tao a a masursuruan maipapan iti Mangisalakan.
-
Awisem dagiti ubbing a mangibinglay kadagiti padasda idi nariknada nga am-ammo ida ken ay-ayaten ida ti Nailangitan nga Ama ken ni Jesucristo.
Ti templo ket maysa a sagrado a lugar a nasken a dayawek.
Kasano a makatulong kenka ti pakaammuan ti Mangisalakan a mangdaldalus iti templo tapno mangisuro kadagiti ubbing maipapan iti kinasagrado dagiti templo?
Dagiti Mabalin nga Aktibidad
-
Awisem dagiti ubbing a mangbasa iti Mateo 21:12–14. Ipakitam ti ladawan a Ni Jesus a Mangdaldalus iti Templo (Libro ti Arte ti Ebanghelio, num. 51), ket kiddawem kadakuada no ania a bersikulo ti naipakita iti ladawan.
-
Awisem dagiti ubbing a mangibinglay no ania ti nariknada idi napanda iti uneg ti templo, nabisitada ti aglawlaw ti templo, wenno nakitada dagiti ladawan dagiti templo. Ania ti nakatulong kadakuada a nangammo a maysa a sagrado a lugar ti templo? Mabalinmo nga ibinglay kadagiti ubbing no apay nga ipatpategmo ti templo. Apay a sagrado daytoy kenka?
-
Awisem ti maysa wenno ad-adu pay nga agtutubo ti klase ken agsarita maipapan iti no kasano a nagsaganada a sumrek iti templo. No nakapandan iti templo, kiddawem kadakuada nga agsarita maipapan iti no ania ti nariknada idi addada sadiay.
-
Gettengem iti babassit a pedaso ti ladawan ti maysa a templo kas puzzle, ket ikkam ti tunggal ubing iti maysa a pedaso. Kiddawen kadagiti ubbing a mangisurat iti likudan ti pedaso ti puzzle iti maysa a banag a mabalinda nga aramiden tapno makapagsaganada a sumrek iti templo. Bayat ti panangibinglay ti tunggal ubing iti maysa a kapanunotan, inayon ti pedasona iti puzzle.
-
Iti pisarra, isurat ti sumaganad: matulongannak nga agsagana nga agserbi iti templo. Mangawis kadagiti miembro ti klase a mangisingasing kadagiti wagas a mangileppas itoy a binatog. Mabalin nga iraman iti sumagmamano a kapanunotan ti “Panagtungpal kadagiti katulagak iti panagbuniag” wenno “Ti Espiritu Santo.”
Kayat ni Jesus nga agbalinak a nalinteg kadagiti tignayko ken tarigagayko.
Insuro ni Jesus kadagiti eskriba ken Fariseo maipapan iti kinapateg ti pudno a panagbiag iti ebanghelio—saan laeng a panagpammarang tapno agbalin a nalinteg. Ania ti makatulong kadagiti ubbing a makaawat iti daytoy a kinapudno?
Dagiti Mabalin nga Aktibidad
-
Bayat ti panangbasam iti Mateo 23:25–28 kadagiti ubbing, ibilangmo ti panangibinglay iti daytoy a kaipapanan ti managinsisingpet manipud iti Bible Dictionary: “Maysa nga aginkukuna a relihioso idinto a saan met a relihioso.” Apay a dakes ti agbalin a maysa a managinsisingpet?
-
Ipakitam kadagiti ubbing ti kopa a nadalus iti ruar ngem narugit iti uneg tapno makatulong a mangiladawan ti metapora iti Mateo 23:25. Kasano a masiguradotayo a nadalus ken natarnawtayo iti uneg?
Yallukoy ti Panagsursuro iti Pagtaengan
Awisem dagiti ubbing a mangpanunot iti maysa a banag a nasursuroda iti klase a mabalinda nga ibinglay kadagiti pamiliada iti pagtaengan.
Panangpadur-as iti Panangisurotayo
Suportaram dagiti nagannak dagiti ubbing. “Dagiti nagannak ti kapatgan a mannursuro iti ebanghelio para kadagiti annakda—agpadada nga addaan iti kangrunaan a pagrebbengan ken kaindaklan a bileg a makaimpluwensia kadagiti annakda (kitaen iti Deuteronomio 6:6–7). Bayat ti panangisurom kadagiti ubbing iti simbaan, sikakararag a mangsapul kadagiti wagas a pakatulongam kadagiti nagannak iti napateg nga akemda” (Panangisuro iti Wagas ti Mangisalakan, 25).