“Mayo 15–21. Mateo 21–23; Marcos 11; Lucas 19–20; Juan 12: ‘Adtoy, Umayen ti Ariyo,” Umaykayo, Sumurot kaniak—Para kadagiti Indibidual ken Pamilia: Baro a Tulag 2023 (2022)
“Mayo 15–21. Mateo 21–23; Marcos 11; Lucas 19–20; Juan 12,” Umaykayo, Sumurot Kaniak—Para kadagiti Indibidual ken Pamilia: 2023
Ni Zaqueo iti Kayo ti Sikamoro, ni James Tissot
Mayo 15–21
Mateo 21–23; Marcos 11; Lucas 19–20; Juan 12
“Adtoy, Umayen ti Ariyo”
Sakbay ti panangbasam kadagiti kapanunotan iti daytoy a balabala, basaem ti Mateo 21–23; Marcos 11; Lucas 19–20; ken Juan 12. Isuratmo dagiti impresion a mabalinmo nga ibinglay iti pamiliam wenno kadagiti klasem iti Simbaan.
Isuratmo dagiti Impresionmo
Nabisinan ti Mangisalakan kalpasan ti panagbaniagana manipud iti Betania agingga iti Jerusalem, ket maysa a kayo ti higos iti adayo ti kasla maysa a pagtaudan ti taraon. Ngem idi asitgan ni Jesus ti kayo, nakitana a saan a nagbunga daytoy (kitaen iti Mateo 21:17–20; Marcos 11:12–14,20). Iti kasta, maipada ti kayo ti higos kadagiti managinsisingpet a lider ti relihion iti Jerusalem: dagiti ubbaw a pannursuroda ken ti akinruar a panangiladawanda iti kinasanto ket saan a nangted iti naespirituan a pannakataraon. Impakita dagiti Fariseo ken escriba a tungtungpalenda dagiti adu a bilin ngem nalibtawanda dagiti dua a kaindaklanan a bilin: ayatenyo ti Dios ken ayatenyo ti padayo a tao a kas iti bagiyo (kitaen iti Mateo 22:34–40; 23:23).
Iti kasupadina, adu a tao ti nangrugi a nakailasin iti nasayaat a bunga kadagiti pannursuro ni Jesus. Idi simmangpet iti Jerusalem, sinaraboda Isuna ket inwagaywayda dagiti sanga a naputed manipud kadagiti kayo a mangwada iti dalanna, nga agragragsakda ta iti kamaudiananna, a kas kuna ti padto idi ugma, “Umayen ti Ariyo” (Zacarias 9:9). Bayat ti panagbasam iti daytoy a lawas, panunotem dagiti bunga dagiti pannursuro ken pangsubbot a sakripisio ti Mangisalakan iti biagmo ken no kasano a makaisangbayka “iti adu a bunga” (Juan 12:24).
Dagiti Kapanunotan para iti Bukod a Panagadal iti Nasantuan a Kasuratan
Saan a mangukom ti Apo babaen iti akinruar a langa ngem babaen kadagiti tarigagay ti puso.
Idi panawen ni Jesus, adu a tao ti nangipagarup a dagiti publikano, wenno dagiti agsingsingir iti buis, ket saan a mapagtalkan, ken tinaktakawanda dagiti tao. Agsipud ta baknang ni Zaqueo, ti pangulo a publikano, mabalin nga isu koma ti ad-adda nga inatapda. Ngem nakaturong ti imatang ni Jesus iti puso ni Zaqueo. Ania ti kayat nga ipalgak ti Lucas 19:1–10 maipapan iti panagpuspuso ni Zaqueo? Mabalinmo nga isurat dagiti balikas kadagitoy a bersikulo a mangiladawan no ania ti inaramid ni Zaqueo a mangipakita iti kinapasnekna iti Mangisalakan. Ania dagiti tarigagay ti pusom? Ania ti ar-aramidem nga agkalikagum a mangsapul iti Mangisalakan, kas iti inaramid ni Zaqueo?
Kitaen met iti Doktrina ken Katulagan 137:9.
Ikondena ni Jesus ti panaginsisingpet.
Ti pannakipulapol ti Mangisalakan kadagiti escriba ken Fariseo ti mangbukel iti makaay-ayo a pagsupadian iti pannakipulapolna ken ni Zaqueo. Kas inlawlawag ni Presidente Dieter F. Uchtdorf, “nagtalinaed ken ni [Jesus] ti nalinteg a pungtot a maibusor kadagiti escriba, Fariseo, ken Saducio—dagita aginkukuna a nalintegda tapno magun-odda ti pammadayaw, impluensia, ken kinabaknang ti lubong, idinto nga idaddadanesda dagiti tao a rumbeng koma a bendisionanda” (“On Being Genuine,” Liahona, Mayo 2015, 81).
Iti Mateo 23, nagusar ti Mangisalakan iti sumagmamano a metapora a pangiladawan iti panaginsisingpet. Ibilangmo ti panangmarka wenno panangilista kadagitoy a metapora ken panangisurat no ania ti isuro dagitoy maipapan iti panaginsisingpet. Ania ti pagdumaan ti panaginsisingpet ken ti pagkapsutan ti tao a pakaipasanguantayo amin no ikarigatantayo ti agbiag iti ebanghelio? Ania ti sabali makaparegta kenka nga aramidem gapu kadagiti pannursuro ti Mangisalakan?
Kitaen met iti Pangiwanwan iti Nasantuan a Kasuratan, “Managinsisingpet.”
Mateo 21:1–11; Marcos 11:1–11; Lucas 19:29–44; Juan 12:1–8, 12–16
Ni Jesucristo ti Arik.
Idi simmangpet ni Jesus iti Jerusalem sumagmamano laeng nga aldaw sakbay nga impatungpalna ti Pannubbotna, impakita dagiti nakabigbig Kenkuana kas Arida ti debosionda babaen ti panangpulotda Kenkuana, panangilatagda kadagiti lupot ken sangsanga ti palma iti dalanna nga agturong iti Jerusalem, ken nagdirdir-ida iti panagdaydayaw. Ibilangmo no kasano a mabalin a mangpauneg iti pannakaawatmo dagiti sumaganad a resources kadagitoy a pasamak, a nangrugi iti maudi a lawas ti biag ti Mangisalakan.
-
Ti nagkauna a pagwadan ti pannakapulot ti maysa nga ari: 2 Ar-ari 9:1–6, 13
-
Iti nagkauna a padto ti naballigian nga iseserrek: Zacarias 9:9
-
Ti kaipapanan ti balikas a hosanna: “Hosanna” iti Pangiwanwan iti Nasantuan a Kasuratan (scriptures.ChurchofJesusChrist.org)
-
Dagiti padto maipapan iti no kasano nga umayto manen ti Mangisalakan: Apocalipsis 7:9–12
Kasano a madayaw ken maawatmo ti Mangisalakan a kas Apo ken Arim?
Kitaen met iti Gerrit W. Gong, “Hosanna and Hallelujah—The Living Jesus Christ: The Heart of Restoration and Easter,” Liahona, Mayo 2020, 52–55; “The Lord’s Triumphal Entry into Jerusalem” (video), ChurchofJesusChrist.org.
Ti dua a naindaklan a bilin ket ti agayat iti Dios ken agayat iti dadduma kas iti bagik.
No mariknam ti pannakatalipupos bayat ti panagkagumaanmo a mangsurot ken ni Jesucristo, dagiti balikas ti Mangisalakan iti maestro ti linteg iti Mateo 22 ti makatulong kenka a mangpalag-an ken mangipamaysa iti kinadisipulom. Adtoy ti maysa a wagas tapno maaramid daytoy: Agaramidka iti listaan ti sumagmamano kadagiti bilin ti Apo. Kasano a mainaig ti tunggal banag iti listaam iti dua a naindaklan a bilin? Kasano a makatulong kenka ti panangipamaysam iti dua a naindaklan a bilin a mangtungpal iti dadduma pay a bilin?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Mateo 21:12–14.Kasano nga ipakita dagiti balikas ken tignay ni Jesus iti Mateo 21:12–14 no ania ti nariknana maipapan iti templo? Kasano a maipakitatayo no kasano ti riknatayo maipapan iti templo? Kasano nga “ikkatentayo” ti (bersikulo 12) iti biagtayo tapno mapagbalintayo ti pagtaengantayo nga ad-adda a kas iti templo? Ibilang ti panagkansion iti maysa a kanta maipapan iti templo kas iti “I Love to See the Temple” (Children’s Songbook,, 95).
-
Mateo 21:28–32.Ania dagiti adalen manipud iti pangngarig maipapan iti lalaki nga addaan iti dua nga annak a lallaki a makatulong iti pamiliam? Kas pagarigan, mabalinmo nga usaren ti estoria a mangilawlawag ti kinapateg ti napudno a panagtungpal ken panagbabawi. Nalabit a makaisurat ti pamiliam iti iskrip a mangidrama ti pangngarig ket agsisinnublatda a mangyakem kadagiti nadumaduma a papel nga akmen.
-
Mateo 22:15–22; Lucas 20:21–26.Mabalin a magustuan dagiti ubbing ti panagaramid kadagiti sinsinan sensilio nga usarenda ti “ladawan ken superskrips” kadagitoy. Mabalinda a suratan dagiti likud ti sensilio iti sumagmamano a “banag a kukua ti Dios” (Mateo 22:21) a maitedtayo Kenkuana. Mabalinmo met nga isarita no ania ti kaipapanan ti maaddaan iti “ladawan ken superskripsion” ti Mangisalakan kadatayo (Mateo 22:20; kitaen met iti Mosiah 5:8; Alma 5:14).
-
Juan 12:1–8.Kasano nga impakita ni Maria ti ayatna iti Mangisalakan? Kasano nga ipakitatayo ti ayattayo para Kenkuana?
Panangbuggo kadagiti Saka ni Jesus, ni Brian Call
-
Juan 12:42–43.Ania dagiti bunga ti kagimongan a mangupay kadatayo no dadduma iti panangyebkas wenno panangsalaknib iti pammatitayo ken ni Cristo? Para kadagiti pagarigan dagiti tao a saan a sumuko iti social pressure, kitaen iti Daniel 1:3–20; 3; 6; Juan 7:45–53; 9:1–38; ken Mosiah 17:1–4. Kasano nga ipakitatayo ti respeto kadagiti dadduma bayat ti panangipeksa wenno panangsalaknibda kadagiti pammatida iti relihion?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a himno: “Rejoice, the Lord Is King!,” Hymns, no. 66.
Panangpadur-as iti Panangisurotayo
Usarem ti arte a mangiraman kadagiti miembro ti pamilia. “Ti Libro ti Arte ti Ebanghelio ken ti Gospel Media Library iti ChurchofJesusChrist.org naglaon iti adu a ladawan ken video a makatulong [iti pamiliam] a mangiladawan iti panunotda kadagiti konsepto wenno pasamak” (Panangisuro iti Wagas ti Mangisalakan, 22).
Naballigian nga Iseserrek, ni Walter Rane