Ti Naimbag a Samaritano, ni Dan Burr

Abril 17–23

Mateo 18; Lucas 10

“Anianto ti Aramidek Tapno Matawidko ti Biag nga Agnanayon?”

Ania dagiti kinapudno iti Mateo 18 ken Lucas 10 a nasken a masursuro dagiti ubbing? Denggem dagiti parikna manipud iti Espiritu Santo bayat ti panangbasam kadagitoy a kapitulo. Ti Umaykayo, Sumurot Kaniak—Para kadagiti Indibidual ken Pamilia ket makatulong kenka a mangiwanwan iti panangadalmo, ken daytoy a balabala ti makaited kenka kadagiti kapanunotan iti panangisuro.

Yawis ti Panagbibinninglay

Idawat kadagiti ubbing mangibinglay ti maysa a banag a nasursuroda manipud ken ni Jesucristo iti pagtaengan wenno iti Primary.

Isuro ti Doktrina: In-inaudi nga Ubbing

Mateo 18:21–35

Nasken a kanayon a pakawanek dagiti dadduma.

Bayat ti panangbasam iti Mateo 18:21–35, ibilangmo dagiti bukodmo a padas iti panagpakawan ken no ania ti nasken a maammuan dagiti ubbing maipapan iti daytoy a pagbatayan.

Dagiti Mabalin nga Aktibidad

• Isalaysay ti pangngarig ti awan asina nga adipen (kitaen iti Mateo 18:23–35). Ilawlawag a no adda maysa a tao a natangsit wenno saan a nainkalintegan, nalabit a mariknatayo ti gura wenno liday iti damo. Ngem ti panangpakawan kaipapananna ti pannakariknatayo manen iti talna. No pakawanentayo ti maysa a tao, ikeddengtayo a ditayon gumura kadakuada. (Tulongam dagiti ubbing a makaawat a no natangsit ti maysa a tao kadakuada, nasken nga agpatulongda kadagiti nagannak kadakuada wenno sabali pay a mapagtalkan a nataengan.

• Isurat ti pakawanenka iti pisarra, ken ibagam kadagiti ubbing a makatulong dagitoy a balikas ti mangsukat iti naliliday a kanito iti nararagsak a kanito. Mangidrowing ti maysa a naliday a rupa iti pisarra, ken mangibinglay iti sumagmamano a pagarigan dagiti ubbing nga agpipinnakawan. Kalpasan ti tunggal pagarigan, awisem ti maysa nga ubing a mangsukat iti naliday a rupa iti maysa a naragsak a rupa.

• Makipagkansion kadagiti ubbing iti maysa a kanta maipapan iti pammakawan, kas iti “Help Me, Dear Father” (Children’s Songbook, 99). Ibinglaymo ti pammaneknekmo a tulongannatayto ti Nailangitan nga Ama nga mamakawan iti dadduma.

Lucas 10:25–37

Insuronak ni Jesus a mangkita iti amin a tattao a kas kaarrubak ken ay-ayatek ida.

Maipakita kadagiti ubbing ti pangngarig maipapan iti naimbag a Samaritano no asino dagiti kaarrubatayo ken no kasano ti nasken a panangtratotayo kadakuada. Mangpanunot kadagiti wagas a pakaparegtaan dagiti ubbing a “mapan, ket aramiden met ti kasta” (Lucas 10:37).

Dagiti Mabalin nga Aktibidad

• Saludsodem iti tunggal ubing, “Asino ti kaarrubam?” Gupgopen ti pakaammuan iti Lucas 10:25–37, ken ibinglay no kasano a sinungbatan ni Jesus dayta a saludsod. Ania ti insuro ni Jesus maipapan no kasano ti nasken a panangtratotayo kadagiti kaarrubatayo?

• Basaen ti Lucas 10:25–37 bayat iti panangyakem dagiti ubbing iti pangngarig maipapan ti naimbag a Samaritano. Tulongam ida nga agpanunot kadagiti wagas a makapagbalinda a naimbag a Samaritano babaen ti panangipakita iti ayat ken kinaasi iti dadduma.

• Isuratmo ti sumagmamano a pagarigan dagiti situasion a panagkasapulan ti maysa a tao iti tulong, ken ilemmengmo dagiti papel iti lawlaw ti siled. Pasapul kadagiti ubbing dagiti papel. Basaen dagiti situasion, ket awisem dagiti ubbing a mangibinglay no kasano a maipakitada ti kinaasi iti tao iti dayta a situasion.

• Makipagkanta kadagiti ubbing iti maysa a kanta maipapan iti kinaasi, kas iti “Jesus Said Love Everyone” ken “Kindness Begins with Me” (Children’s Songbook, 61,145). Tulongam dagiti ubbing a mangpanunot iti sumagmamano a wagas a pakaipakitaanda iti ayat ken kinaasi iti dadduma. Mabalinda pay ti agdrowing kadagiti ladawan ti bagbagida nga agar-aramid kadagitoy a banag.

Isuro ti Doktrina: In-inauna nga Ubbing

Mateo 18:21–35

Pakawanennakto ti Nailangitan nga Ama kas iti panangpakawanko iti dadduma.

Ti pangngarig ti awan asina nga adipen ket mabalin a nakallalagip a wagas a pangisuro kadagiti ubbing a kayat ti Nailangitan nga Ama a pakawanentayo ti tunggal maysa.

Dagiti Mabalin nga Aktibidad

• Basaem ti Mateo 18:23–35 kadagiti ubbing. Ilawlawag a ti ari ken apo ti mangibagi iti Nailangitan nga Ama, ti adipen ti mangibagi kadatayo, ken ti pada nga adipen ti mangibagi kadagiti nagbiddut kadatayo. Saludsodem kadagiti ubbing kas iti “Ania ti isuro daytoy nga estoria maipapan iti no kasano ti nasken a panangtratotayo iti dadduma? Kaano a naammuam a narigat ti mangpakawan iti maysa a tao? Kasano a naiwaksim dagita a sakit ti nakem? Kaano a kinasapulam ti mapakawan para iti maysa a biddut a pili?”

• Ipabuyam ti video “Forgive Every One Their Trespasses: The Parable of the Unmerciful Servant” (ChurchofJesusChrist.org) tapno matulongan dagiti ubbing a mangiladawan iti panunotda iti daytoy a pangngarig.

• Isuratmo iti pisarra ti multiplication problem 70 x 7, ket tulongam dagiti ubbing a mangsolbar iti daytoy. Kiddawem iti maysa a tao a mangbasa iti Mateo 8:21–22, ket ilawlawagmo nga inusar ni Jesus daytoy a bilang a nangisuro kadatayo a nasken a kanayon a mamakawantayo.

• Kiddawem kadagiti ubbing a tulongandaka nga agpanunot iti sumagmamano a kasasaad a mabalin a kasapulanna a pakawanen ti sabali a tao. Awisem dagiti ubbing a mangyakem iti no kasano nga ipakitada iti pammakawan kadagitoy a kasasaad.

• Makipagkansion kadagiti ubbing iti maysa a kanta maipapan iti pammakawan, kas iti “Help Me, Dear Father” (Children’s Songbook, 99). Tulongam dagiti ubbing a makaawat no ania ti isuro ti kanta kadatayo maipapan iti panangpakawan kadagiti dadduma.

Lucas 10:30–37

Mabalinko nga ayaten ken agserbi iti dadduma, nangnangruna kadagiti agkasapulan.

Utobem dagiti panawen iti bukodmo a biag idi nagbalin a “naimbag a Samaritano” kenka ti maysa a a tao. Kasano a maparegtam dagiti ubbing nga agbalin a “naimbag a Samaritano” iti dadduma?

Dagiti Mabalin nga Aktibidad

• Dutokan ti tunggal ubing a siuulimek a basaen iti pangngarig ti naimbag a Samaritano. Awisem dagiti ubbing a mangisarita kadagiti pasetda iti pangngarig iti husto nga urnos a mangisarita iti estoria.

• Ilawlawag kadagiti ubbing a saan unay a kayat dagiti Judio dagiti Samaritano isu a no agdaliasatda manipud iti Jerusalem nga agturong iti Galilea, lawlawenda ti Samaria tapno maliklikanda ti makipulapol iti asino man a Samaritano. Tapno mailadawan daytoy, ipakitam ti mapa 1, “Pisikal a Mapa ti Nasantuan a Daga.” Apay nga agusar ni Jesus iti maysa a Samaritano a kas pagwadan ti kinaasi iti daytoy a pangngarig? Ania ti isuro kadatayo daytoy nga estoria maipapan iti panangtulong iti dadduma nga agkasapulan? (Kitaen met iti Mosiah 4:16–22.)

• Kiddawen kadagiti ubbing a mangibinglay iti padas idi nagbalin a naimbag a Samaritano kadakuada ti maysa a tao.

• Karitem dagiti ubbing a mangituding iti panggep a tun-oyen nga agbalin a kas iti naimbag a Samaritano itoy a lawas. Mabalin a saludsodem kadakuada no adda am-ammoda a masakit wenno malidlidayan wenno maysa a tao a saan a masansan a makimisa. Saludsodem kadagiti ubbing no kasano a makatulongda iti dayta a tao. Tulongam dagiti ubbing a makaawat no kasano a ti panagserbi iti dadduma ket makatulong kadakuada nga agtungpal kadagiti kari nga inaramidda idi panagbuniag (kitaen iti Mosiah 18:8–10).

Yallukoy ti Panagsursuro iti Pagtaengan

Awisem dagiti ubbing a mangibinglay iti pamiliada ti panggep a tun-oyenda nga agbalin a kas naimbag a Samaritano itoy a lawas.

Panangpadur-as iti Panangisurotayo.

Suruam dagiti ubbing a mangisurat kadagiti impresion. No masursuruan dagiti ubbing iti ugali a mangisurat kadagiti impresion, daytoy ti mangtulongto kadakuada a mangilasin ken mangsurot iti Espiritu. Mabalin nga isurat dagiti ubbing dagiti impresion babaen ti panangmarka kadagiti nasantuan a kasuratan, panangidrowing kadagiti ladawan, wenno panagsurat kadagiti simple a serrek iti diurnal.