Abril 3–9

Paskua ti Panagungar

“Adino ti Yanna, O Patay ti Panagballigim?”

Bayat ti panangbasam kadagiti pammaneknek maipapan iti Panagungar ti Mangisalakan iti daytoy a balabala, isuratmo dagiti rikna ken impresion nga umay kenka manipud iti Espiritu Santo.

Isuratmo dagiti Impresionmo

Kabayatan ti maudi a lawas iti biag ti Mangisalakan, adu dagidi Judio iti aglawlawna ti nakipaset kadagiti kannawidan ti Fiesta ti Paskua. Insaganada dagiti makan, nagkantada, ken naguummongda a manglagip iti pannakaispalda iti balay ti Israel manipud iti pannakaadipen kadagiti Egipsio. Dimngeg dagiti pamilia iti estoria maipapan ti manangdadael nga anghel a lumablabas kadagiti pagtaengan dagiti kapuonanda a nangmarka kadagiti ridawda iti dara ti karnero. Iti baet amin dagitoy a parambak nga addaan iti nabaknang a simbolismo ti pannakaispal, manmano laeng ti makaammo a ni Jesucristo, ti Kordero ti Dios, ti mangisalakan kadakuada manipud iti pannakaadipen iti basol ken patay—babaen ti panagsagabana, pannakatayna, ken Panagungarna. Uray no kasta, adda dagiti nakailasin ken ni Jesus kas naikari a Mesiasda, ti agnanayon a Mangisalakanda. Manipud iti dayta nga aldaw, nagpaneknek dagiti disipulo ni Jesucristo iti intero a lubong, “a ni Cristo ket natay gapu kadagiti basbasoltayo … ; ken naitanem, ken nagungar iti maikatlo nga aldaw” (1 Taga Corinto 15:3–4).

Dagiti Kapanunotan para iti Bukod a Panagadal iti Nasantuan a Kasuratan

Mateo 21–28

Isalakannak ni Jesucristo manipud iti basol ken ipapatay, mangpapigsa kaniak kadagiti pagkapsutantayo, ken mangliwliwa kaniak kadagiti pannubokko.

Maysa a wagas a panangipamaysa kadagiti bendision ti Pannubbot ti Mangisalakan iti daytoy a lawas ket mangbubos iti oras iti tunggal aldaw iti panagbasa maipapan iti maudi a lawas ti biag ni Jesus (sumaruno ti mabalin nga iskediul iti panagbasa). Ania ti masarakam kadagitoy a kapitulo a makatulong kenka a mangrikna iti ayat ti Mangisalakan? Utobem no ania ti isuro kenka dagitoy a kapitulo maipapan no kasano a maisalakannaka manipud iti basol, ipapatay, pannubok, ken pagkapsutan. Kasano nga ar-aramatem ti pammatim iti bilegna iti pannakaisalakan?

• Domingo: Naballigian nga iseserrek iti Jerusalem (Mateo 21:6–11)

• Lunes: Panangdalus iti templo (Mateo 21:12–16)

• Martes: Panangisuro iti Jerusalem (Mateo 21–23)

• Mierkoles: Naituloy ti panangisuro (Mateo 24–25)

• Huebes: Ti Fiesta ti Paskua ken panagsagaba ni Cristo iti Minuyongan ti Getsemani (Mateo 26)

• Biernes: Pannubok, Pannakailansa iti Krus, ken pannakaitanem (Mateo 27:1–61

• Sabado: Naitanem ti bagi ni Cristo (Mateo 27:62–66) idinto a nagministro Isuna iti lubong dagiti espiritu (Doktrina ken Katulagan 138)

• Domingo: Yuuli ni Jesucristo ken panangparangna kadagiti disipulona (Mateo 28:1–10)

Kitaen met iti Easter.ComeuntoChrist.org.

Pannakailansa iti Krus, ni Louise Parker

Mateo 28:1–10; Lucas 24:13–35; Juan 20:19–29; 1 Taga Corinto 15:1–8,55

Adu dagiti saksi a nangpaneknek iti Panagungar ni Jesucristo.

Panunotem no ania koma ti kayarigan dagiti disipulo a mangbuya ken ni Jesus a naum-umsi, naparparigat, ken nailansa iti krus. Nasaksianda ti pannakabalinna, nariknada ti kinapudno dagiti pannursurona, ken addaanda iti pammati nga Isu ti Anak ti Dios. Ti pannakasaksi iti ipapatayna ti nalabit a nakaigapu tapno marikna dagiti disipulona ti ladingit ken pannakatikaw. Ngem iti nabiit, nagbalinda a saksi ti naindaklan a milagro ti Panagungarna.

Ania ti masursurom manipud kadagiti pakaammuan dagitoy a nakasaksi iti Nagungar a Mangisalakan? Markaan wenno isurat ti padas ti tunggal tao iti Mateo 28:1–10; Lucas 24:13–35; Juan 20:19–29; ken 1 Taga Corinto 15:1–8, 55. (Masarakan dagiti dadduma pay a saksi ti nagungar a Cristo iti 3 Nephi 11; Mormon 1:15; Ether 12:38–39; Doktrina ken Katulagan 76:19–24; 110:1–10; ken Joseph Smith—Pakasaritaan 1:15–17.) Ania ti makaawis iti riknam maipapan kadagiti pammaneknek dagitoy a saksi? Kalpasan ti Panagungar ti Mangisalakan, nagungar ken nagparang dagiti dadduma iti kaaduan (kitaen iti Mateo 27:52–53; 3 Nephi 23:9). Kasano a ti pammatim iti Mangisalakan ken ti kari ti panagungar ket mangimpluensia iti wagas ti panagbiagmo?

Kitaen met iti “Jesus Is Resurrected,” “The Risen Lord Appears to the Apostles,” “Blessed Are They That Have Not Seen, and Yet Have Believed” (videos), ChurchofJesusChrist.org.

1 Pedro 1:3–11

Ni Jesucristo ti mangted kaniak iti namnama ken rag-o.

Ania a balikas wenno ragup ti balikas iti 1 Pedro 1:3–11 ti mangted kenka iti namnama gapu ken ni Jesucristo? Kaano a nariknam dayta a namnama?

Impaneknek ni Elder Gerrit W. Gong a ti Panangungar ti mangted iti namnama para kadagiti nakapukaw iti gurongda; dagiti nakapukaw iti kabaelanda a kumita, dumngeg, wenno magna; wenno dagiti naipagarup a napukaw iti awan sardayna a panagsakit, sakit iti panunot, wenno dadduma pay a kimmapuy a kabaelan. Sapulennatayo. Pagimbagennatayo. … [Kasta met a,] gapu ta ‘sinubbot ti Dios mismo dagiti basol ti lubong’ [Alma 42:15], … kabaelannan, nga addaan asi, a tulongannatayo a mayannurot kadagiti sakittayo. … Agbabawitayo ken aramiden ti amin a kabaelantayo. Awan patinggana nga arakupennatayo ‘iti takiag ti ayatna’ [2 Nephi 1:15]” (“Hosanna and Hallelujah—The Living Jesus Christ: The Heart of Restoration and Easter,” Liahona, Mayo 2020, 54).

Kitaen met iti Alma 27:28; 36:1–24; 3 Nephi 9:11–17; Moroni 7:40–41.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

ComeuntoChrist.org.Easter.ComeuntoChrist.org naglaon iti kronolohia ken panangiladawan iti no ania ti napasamak iti tunggal aldaw iti maudi a lawas ti biag ti Mangisalakan. Tunggal aldaw ti lawas, mabalin a sublien nga adalen ti pamiliam dagitoy a panangiladawan tapno kitaen no ania ti inaramid ti Mangisalakan iti dayta nga aldaw, wenno mabalinmo a basaen maipapan tii maudi a lawasna kadagiti nasantuan a kasuratan kas maysa a pamilia (kitaen iti naisingasing a listaan iti “Dagiti Kapanunotan para iti Bukod a Panagadal iti Nasantuan a Kasuratan” iti ngato).

Hymns ken Children’s Songbook.Ibilang ti aggigiddan a panangkansion kadagiti kanta maipapan iti Pannubbot ken Panagungar ti Mangisalakan kabayatan daytoy a lawas, agraman ti sumagmamano a saan unay a pamiliar kenka. (Kitaen iti topics index ti Hymns wenno Children’s Songbook, iti baba ti topics kas iti “Atonement,” “Easter,” wenno “Resurrection.”) Tapno makatulong kadagiti miembro ti pamilia a mangsursuro kadagiti kanta, mabalinmo ti mangipakita kadagiti ladawan a maigiddan kadagiti balikas.

“Jesus Christ” collection iti Gospel Library.Ti Gospel Library collection a napauluan iti “Jesus Christ” iramanna dagiti videos, artwork, ken music a makatulong iti pamiliam a mangrambak iti Panagungar ti Mangisalakan iti daytoy a Paskua ti Panagungar.

“Ti Sibibiag a Cristo: Ti Pammaneknek dagiti Apostol.”Kas maysa a pamilia, basaenyo ti “Ti Sibibiag a Cristo: Ti Pammaneknek dagiti Apostol” (ChurchofJesusChrist.org). Awisem ti tunggal miembro ti pamilia a mangpidut iti maysa a mensahe iti Paskua ti Panagungar manipud iti daytoy a pammaneknek tapno ibinglay iti dadduma. Kas pagarigan, mabalinmo ti agaramid kadagiti poster tapno ipakita iti social media, iti sango ti ridawyo, wenno iti pagtaenganyo.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Jesus Has Risen,” Children’s Songbook,, 70.

Panangpadur-as iti Bukod a Panagadal

Mangituding kadagiti nalaklaka a ragpaten a panggep a tun-oyen [goal]. Ti panangbubos uray sumagmamano laeng a minuto iti tunggal aldaw a panagadal kadagiti nasantuan a kasuratan ket mabalin a mangbendision iti biagmo. Agkumit iti panagadal iti tunggal aldaw, mangsapul iti wagas a mangipalagip iti bagim iti panagkumitmo, ken aramidem ti amin a kabaelam a mangsurot iti daytoy. No malipatam, saanka a sumuko.” Mangrugika latta manen.

Getsemani,, ni Adam Abram