Ti Panagbalbaliw-langa, ni Carl Heinrich Bloch

Abril 10–16

Mateo 15–17; Marcos 7–9

“Sika ti Cristo”

Ti panagbasa kadagiti nasantuan a kasuratan ti mangyawis iti Espiritu Santo iti biagmo. Maysa kadagiti napateg a mision ti Espiritu Santo ti agpaneknek maipapan ken ni Jesucristo. Bayat ti panangbasam kadagiti nasantuan a kasuratan iti daytoy a lawas, ikasom dagiti naespirituan a rikna a mangpapigsa iti pammaneknekmo maipapan iti Mangisalakan.

Isuratmo dagiti Impresionmo

Saan kadi a karkarna nga idawat dagiti Fariseo ken Saducio a mangipakita ni Jesus kadakuada iti “maysa a tanda nga aggapu sadi langit”? Saan kadi nga umdas dagiti adu ken nalatak a milagrona? Ania pay dagiti nabileg a pannursurona wenno dagiti adu a wagas a nangipatungpalanna kadagiti nagkauna a padto? Ti dawatda ket tinignay ti saan a kaawan dagiti pagilasinan ngem ti saanda a panagtulok a “mangrikna kadagiti pagilasinan” ken mangawat kadagitoy. (Kitaen iti Mateo 16:1–4.)

Kas kadagiti Fariseo ken Saducio, nasaksian ni Pedro dagiti milagro ti Mangisalakan ken nangngeganna dagiti pannursurona. Ngem ti umisu a pammaneknek ni Pedro, “Sika ti Cristo, ti Anak ti sibibiag a Dios,” saan a simmangbay babaen kadagiti pisikal a riknana—ti “lasag ken darana.” Ti pammaneknekna impalgak kenkuana ti “Amatayo sadi langit.” Tipaltiing ket ti bato a nangbangonan ti Mangisalakan iti Simbaanna idi ken ita—paltiing manipud iti langit kadagiti katulonganna. Ket daytoy ti bato a pakabangonan ti kinadisipulotayo—paltiing a ni Jesus ti Cristo ken dagiti katulonganna ti agiggem kadagiti “tulbek ti pagarian.” Idi nabangontayo iti daytoy a pundasion, “dagiti ruangan ti impierno saanto nga agballigi [kadatayo].” (Mateo 16:15–19).

Dagiti Kapanunotan para iti Bukod a Panagadal iti Nasantuan a Kasuratan

Mateo 16:13–17

Umay ti pammaneknek maipapan ken ni Jesucristo babaen ti paltiing.

No saludsoden ni Jesucristo dagiti tao ita, “Asino iti panagkuna dagiti tao a Siak ti Anak ti Tao?” ania koma ti sungbatda? Kasano ti panangsungbatmo no saludsoden ni Jesus kenka, “Siasinoak iti panagkunayo?” (Kitaen iti Mateo 16:13–15.)

Utobem ti pammaneknekmo maipapan iti Mangisalakan ken no kasano nga inawatmo daytoy. Ania ti masursurom manipud iti Mateo 16:15–17 a mabalin a mangpapigsa iti daytoy? No kayatmo a sursuruen ti ad-adu pay maipapan iti pammaneknek ken bukod a paltiing, agsukisok kadagitoy a nasantuan a kasuratan: Juan 15:26; 2 Nephi 31:17–18: Alma 5:45–48; ken Doktrina ken Katulagan 8:2–3.

Kitaen met iti “President Nelson: Hear Him—Personal Revelation” (video), ChurchofJesusChrist.org.

Mateo 16:13–19; 17:1–9; Marcos 9:2–9

Addan iti daga ita dagiti tulbek ti pagarian ti langit.

Dagiti “tulbek ti pagarian ti langit” nga inkari ti Mangisalakan nga ited ken ni Pedro ket dagiti tulbek ti priesthood (Mateo 16:19). Ania dagiti tulbek ti priesthood? Apay a kasapulantayo dagitoy? Utobem dagitoy a saludsod bayat ti panagbasam maipapan iti kari ti Mangisalakan iti Mateo 16:13–19 ken ti pannakaipatungpalna iti Mateo 17:1–9; Mark 9:2–9 (kitaen met iti Patarus ni Joseph Smith, Marcos 9:3 [iti Marcos 9:4, footnote a]).

Dadduma pay a resources a mangtulong kenka nga agsursuro maipapan kadagiti tulbek ti priesthood iramanna ti Doktrina ken Katulagan 65:2; 107:18–20; 110:11–16; 128:9–11; “Dagiti Tulbek ti Priesthood” iti Pangiwanwan iti Nasantuan a Kasuratan (scriptures.ChurchofJesusChrist.org); ken ti mensahe ni Elder Gary E. Stevenson “Where Are the Keys and Authority of the Priesthood?,” (Liahona, Mayo 2016, 29–32). Bayat ti panagadal kadagitoy a resources, ibilangmo ti panangilista no ania ti nasursurom maipapan kadagiti tulbek ti priesthood ken dagiti bendision a sumangbay manipud kadagitoy. Apay iti panagkunam a ti tulbek ti maysa a nasayaat a simbolo para iti karbengan a mangiturong iti serbisio iti priesthood?

Kitaen met iti Dallin H. Oaks, “The Melchizedek Priesthood and the Keys,” Liahona, Mayo 2020, 69–72; Bible Dictionary, “Transfiguration, Mount of.”

Dagiti tulbek ti priesthood ket ti turay a mangiturong iti pannakausar ti priesthood.

Mateo 17:14–21; Marcos 9:14–29

No agsapsapul iti dakdakkel a pammati, nasken a rugiak iti pammati nga addan kaniak.

Ti ama a nadakamat iti Mateo 17 ken Marcos 9 addaan kadagiti rason a mangrikna iti panagduadua no mabalin nga agasan ni Jesus ti anakna a lalaki. Indawatna kadagiti disipulo ni Jesus a paimbagenda ti anakna, ket saanda a kabaelan. Ngem idi nagkiddaw iti Mangisalakan para iti maysa a milagro, pinilina nga ipeksa ti pammati. “Apo, mamatiak,” kinunana. “Kalpasanna, iti panangbigbigna nga agkurang ti pammatina, innayonna, “Tulungam ti kurang a pammatik.”

Ania ti insuro ti Espiritu kenka bayat ti panangbasam maipapan iti daytoy a milagro? Kasano a natulongannaka ti Nailangitan nga Ama a mangpadakkel iti pammatim? Ania ti maaramidmo a mangpapigsa iti pammati nga addan kenka? Nalabit a mabalinmo ti mangtipon iti listaan dagiti nasantuan a kasuratan, dagiti mensahe ti komperensia, wenno dagiti padas a nangpatibker iti pammatim.

Kitaen met iti Jeffrey R. Holland, “Lord, I Believe,” Liahona, Mayo 2013, 93–95.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 15:7–9; Marcos 7:6–7.Ania ti pagdumaan ti panangdayaw iti Dios kadagiti bibigtayo, wenno balikas, ken panangdayaw Kenkuana iti puspusotayo?

Mateo 15:17–20; Marcos 7:18–23.Apay a naannadtayo maipapan no ania ti ikabiltayo iti ngiwattayo? Batay iti no ania ti insuro ni Jesus kadagitoy a bersikulo, apay a nasken a naan-annadtayo maipapan no ania ti rummuar kadagiti ngiwattayo—ken dagiti rummuar iti puspusotayo? Kasano a mapagtalinaedtayo a natarnaw ti puspusotayo?

Mateo 16:15–17.Kasano nga ipalgak ti Dios kadatayo a ni Jesus isu “ti Cristo, ti Anak ti Dios a sibibiag”? (bersikulo 16). Kasano a maisaganatayo ti bagbagitayo nga umawat iti daytoy a paltiing manipud Kenkuana?

Mateo 16:13–19; 17:1–9.Tapno maisuro kadagiti ubbing maipapan dagiti tulbek ti priesthood, mabalinmo nga isarita ti estoria ni Elder Gary E. Stevenson maipapan iti pannakaikandadona iti kotsena (kitaen iti video “Where Are the Keys?” iti ChurchofJesusChrist.org). Mabalin a pausarmo kadagiti annakmo dagiti tulbek a mangilukat iti balay, kotse, wenno dadduma a kandado. Ibilang ti panangipakita iti maysa a ladawan ti Presidente ti Simbaan ken panangipaneknek nga iggemna amin dagiti tulbek ti priesthood, kas iti inaramid ni Pedro.

Mateo 17:20.Dagiti propeta nga addaan iti pammati ken ni Jesucristo mapagkusukosda dagiti bantay (kitaen iti Jacob 4:6; Moises 7:13). Ngem masansan, a saan a dayta ti milagro a kasapulantayo. Insuro ni Presidente M. Russell Ballard: “No addaantayo iti pammati a kas iti kabassit ti maysa a bukel ti mustasa, matulongannatayo ti Apo a mangikkat kadagiti bantay ti pannakaupay ken panagduadua kadagiti aramid nga agur-uray kadatayo bayat ti panagserbitayo kadua dagiti annak ti Dios, agraman dagiti miembro ti pamilia, miembro ti Simbaan, ken dagiti saan pay a miembro ti Simbaan” (“Precious Gifts from God,” Liahona, Mayo 2018, 10). Ania dagiti sumagmamano a bantay iti biagtayo a kasapulan a matignay? Kasano a maipakitatayo ti pammati iti pannakabalin ti Dios a tumulong kadatayo a mangikkat kadagitoy a bantay?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “I Believe in Christ,” Hymns, no. 134.

Panangpadur-as iti Panangisurotayo

Aguummong a masansan. Insuro ni Presidente Henry B. Eyring: “Saanyo iti kaano man a libtawan ti maysa a gundaway a mangummong a sangkamaysa kadagiti annakyo tapno agsursuro iti doktrina ni Jesucristo. Manmano laeng dagiti kakasta a kanito no maidasig kadagiti panagkagumaan ti kabusor” (The Power of Teaching Doctrine,” Ensign,, Mayo 1999,74).

Maestro, Inyegko Kenka ti Anakko, ni Walter Rane