Pakanem ti Karnerok,, ni Kamille Corry

Hunio 26–Hulio 2

Mateo 28; Marcos 16; Lucas 24; Juan 20–21

“Nagungaren”

Dagiti ubbing nga addaan iti pammaneknek maipapan kadagiti kinapudno dagitoy a kapitulo ket addaanda iti natibker a pundasion a pangbuklanda iti pammatida. Kasano a maawismonto ti Espiritu a mangipaneknek kadagitoy a kinapudno?

Yawis ti Panagbibinninglay

Ti panangkita iti maysa a ladawan ti makatulong kadagiti ubbing a manglagip kadagiti banag a nasursuroda iti pagtaengan wenno iti dadduma pay a lugar. Nalabit a mabalinmo ti mangipakita iti ladawan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia ket paibinglay kadagiti ubbing no ania ti ammoda maipapan iti estoria a naipakita iti ladawan.

Isuro ti Doktrina: In-inaudi nga Ubbing

Mateo 28; Marcos 16; Lucas 24; Juan 20:1–23

Agbiagakto manen kalpasan ti ipapatayko, kas iti inaramid ni Jesus.

Ti Pannubbot ni Jesucristo, agraman ti Panagungarna, ti kapatgan a pasamak iti pakasaritaan, ken daytoy ti pundasion ti pammati a Kristiano. Bayat ti panangbasam maipapan iti Panagungar, utobem no kasano a matulongamto dagiti ubbing a mangpapigsa iti pammatida ken ni Jesucristo.

Dagiti Mabalin nga Aktibidad

• Isaritam ti estoria maipapan iti Panagungar ni Jesus iti bukodmo a balikas. (No kasapulan, usarem ti “Kapitulo 54: Nagungaren ni Jesus,” iti Dagiti Estoria iti Baro a Tulag, 139–44, wenno ti maitutop a video iti ChurchofJesusChrist.org.) Ilawlawag nga idi natay ni Jesus, pinanawan ti espirituna ti bagina. Idi nagungar Isuna, nagtipon manen ti espiritu ken bagina. Pagisisinnublatem dagiti ubbing iti panangulitda iti estoria kenka. Saludsodem kadagiti ubbing no ania koma ti nariknada no nakitada ni Jesus a sibibiag manen.

• Ipabuyam ti video a “What Happens after We Die?” (ChurchofJesusChrist.org), ket isaritam ti maipapan iti maysa a tao nga ammom a natayen. Ibinglaymo ti pammaneknekmo nga agungarto ti amin iti maysa nga aldaw. Awisem dagiti ubbing a mangibinglay kadagiti pammaneknekda.

• Aggigiddan nga agkansion iti maysa a kanta maipapan iti Panagungar ti Mangisalakan, kas iti “Did Jesus Really Live Again?” (Children’s Songbook, 64). Pagpanunoten dagiti ubbing no anianto ti rikna ti makakita ken ni Jesus. Paibinglaymo kadakua dadagiti kapanunotanda iti klase.

Juan 20:24–29

Maaddanak iti pammati ken ni Jesucristo uray no diak makita Isuna.

Panunotem no kasano a matulongam dagiti ubbing a makaawat no ania ti pammati ken no kasano a maipakitada ti pammati iti Mangisalakan.

Dagiti Mabalin nga Aktibidad

• Ipakitam ti ladawan a Christ Approaches Thomas (ChurchofJesusChrist.org) bayat ti panangisaritam maipapan iti padas ti Tomas iti Juan 20:24–29. Ulitem ti estoria, ngem iti daytoy a gundaway kiddawen kadagiti ubbing a mangted iti sumagmamano kadagiti detalye.

• Ipakitam ti maysa a kahon nga addaan iti maysa a banag iti unegna a saan a makita dagiti ubbing, ken iladawam ti banag kadagiti ubbing. Saludsodem kadakuada no mamatida no talaga nga adda ti banag iti uneg ti kahon ken apay. Kalpasanna ipakitam ti banag, ken ilawlawagmo a ti pammati ket panangpati kadagiti banag a saantayo a makita. Ti kapatgan a pammati a maddaantayo ket ti pammati ken ni Jesucristo.

Adtoy Dagiti Imak, ni Jeff Ward

Juan 21:15–17

Maipakitak ti ayatko ken ni Jesus babaen iti panangserbik iti dadduma.

Kasano a maparegtam dagiti ubbing nga agayat ken mangtulong kadagiti adda iti aglawlawda?

Dagiti Mabalin nga Aktibidad

• Basaen ti Juan 21:15–17, wenno ipabuyam ti video “Feed My Sheep” (ChurchofJesusChrist.org). Tulongam dagiti ubbing a makaawat no ania ti kayat ni Jesus nga aramiden ni Pedro: mangibinglay iti ebanghelio ken mangawis iti amin a tao a mamati ken ni Jesus. Ikkam ti tunggal maysa dagiti ubbing iti papel a sinan-karnero, ken kiddawem kadakuada nga isurat wenno idrowing ditoy ti maysa a banag a maaramidda a makatulong iti maysa a tao nga am-ammoda nga umas-asideg ken ni Jesus.

• Tulongam dagiti ubbing nga agpanunot kadagiti banag nga ar-aramidenda nga agayat ken agserbi iti dadduma. Ania ti mabalin nga aramidentayo a mangipakita iti ayattayo?

• Isurat ti nagan ti tunggal ubing iti klasem kadagiti panid ti papel a nagetteng iti sukog ti sinan-karnero, ken iwarawara dagitoy a sinan-karnero iti aglawlaw ti siled. (Iraman ti nagnagan dagiti ubbing a saan a masansan a dumardar-ay.) Awisem dagiti ubbing a mangummong kadagiti sinan-karnero babaen ti panangsapulda iti maysa nga addaan iti naganda iti daytoy. Tulongam dagiti ubbing a mangpanunot kadagiti wagas a makapagsaganada a mangtulong iti maysa a gayyem a saan a mapmapan iti simbaan.

Isuro ti Doktrina: In-inauna nga Ubbing

Mateo 28; Marcos 16; Lucas 24; Juan 20:1–23

Gapu ta nagungar ni Jesus, agungarto ti tunggal maysa.

Gagangay a masdaaw dagiti ubbing no ania ti mapasamak kalpasan ti ipapataytayo. Panunotem no kasano a maisurom maipapan iti Panagungar iti wagas a mangbukelto iti pammatida.

Dagiti Mabalin nga Aktibidad

• Awisem dagiti ubbing nga agkidem ken mangipapan a nakatugawda iti tanem ni Jesus idinto a basaem ti Juan 20:1–17 wenno gupgopem ti estoria ti Panagungarna (kitaen met iti “Kapitulo 54: Nagungaren ni Jesus,” iti Dagiti Estoria iti Baro a Tulag, 139–44, wenno ti maitutop a video iti ChurchofJesusChrist.org). Ania ti kayat a sawen ti agungar? Ania koma ti kayarigan ti makakita iti nangungar a Mangisalakan?

• Kiddawem iti tunggal ubing a mangadal iti padas ti maysa a tao a nakakita iti nagungar a Mangisalakan ken ibinglayna iti dadduma pay iti klase no ania ti nasursurona.

• Buyaem ti maysa wenno ad-adu kadagitoy a video a kaduam dagiti ubbing: “Jesus Is Laid in a Tomb,” “Jesus Is Resurrected,” “Christ Appears on the Road to Emmaus,” ken “The Risen Lord Appears to the Apostles” (ChurchofJesusChrist.org). Awisem dagiti ubbing a mangibinglay no apay a napateg kadakuada ti Panangungar ti Mangislakan.

Juan 20:24–29

Maaddanak iti pammati ken ni Jesucristo uray no diak makita Isuna.

Kasano a matulongamto dagiti ubbing a mangpapigsa iti pammatida ken ni Jesucristo?

Dagiti Mabalin nga Aktibidad

• Awisem dagiti ubbing a mangbasa iti Juan 20:24–29. (Buyaen pay ti video a “Blessed Are They That Have Not Seen, and Yet Have Believed,” iti ChurchofJesusChrist.org.) Kasano a maammuantayo a sibibiag ni Jesucristo, nupay saantayo a makita Isuna?

• Isuratmo ti tunggal balikas iti ragup ti balikas a “Nagasat dagiti saan a nakakita, ngem namatida” iti nagsisina a panid ti papel. Awisem dagiti ubbing a mangurnos kadagiti balikas. Awisem ida a mangisarita kadagiti padasda a nakariknaanda iti ayat ti Mangisalakan uray no saanda pay a nakita Isuna.

• Awisem dagiti ubbing a mangidrowing kadagiti banag a mabalinda nga aramiden a mangpapigsa iti pammatida iti daytoy a lawas. Paibinglaymo kadakuada ti indrowingda, ket ibinglaymo ti inaramidmo a nangpapigsa iti pammatim ken Jesucristo.

Juan 21:1–17

Maipakitak ti ayatko ken ni Jesus babaen ti panangpakanko iti karnerona.

Dakkel a makaimpluensia dagiti ubbing kadagiti adda iti aglawlawda. Kasano a maparegtam ida a mangpapigsa iti dadduma iti ebanghelio?

Dagiti Mabalin nga Aktibidad

• Basaen ti Juan 21:1–17 nga aggigiddan. No basaenyo dagiti bersikulo 9–13, pagpanunotem dagiti ubbing maipapan iti maysa a panawen idi inlutuan ida ti maysa a tao iti naisangsangayan a makan, ket awisem ida a mangpannunot maipapan kadagiti wagas a naespirituan a pakanennatayo ni Jesus. No basaem dagiti bersikulo 15–17, sukatam ti nagan ni Simon iti nagan dagiti ubbing. Asino dagiti karnero ni Jesus? Kasano a makatulongtayo Kenkuana a mangpakan kadakuada?

• Mangibinglay ti simple a merienda kadagiti ubbing. Bayat ti pannanganda, saludsodem kadakuada no kasano a maipada ti panangibinglay iti ebanghelio iti maysa a tao iti panangpakan kadakuada.

Yallukoy ti Panagsursuro iti Pagtaengan

Awisem dagiti ubbing a mangusar iti panid ti aktibidad ita a lawas a mangisuro kadagiti pamiliada maipapan iti Panangungar ti Mangisalakan.

Panangpadur-as iti Panangisurotayo

Surnadam dagiti awis nga agtignay. No awisem dagiti ubbing nga agtignay iti no ania ti masursuroda, surnadam ti awismo kabayatan ti sumaruno a klase. Mangipakita daytoy kadagiti ubbing a maseknanka maipapan iti no kasano a bembendisionan ti ebanghelio ti biagda. Bayat ti panangibinglayda kadagiti padasda, mapapigsadanto ken agtitinnulongdanto nga agbiag iti ebanghelio.