“Septiembre 25–Oktubre 1. Taga Galacia: ‘Magna iti Espiritu,’” Umaykayo, Sumurot Kaniak—Para iti Primary: Baro a Tulag 2023 (2022)
“Septiembre 25–Oktubre 1. Taga Galacia,” Umaykayo, Sumurot Kaniak—Para iti Primary: 2023
Sinarungkaran ti nagungar a Mangisalakan ni Pablo iti pagbaludan (kitaen iti Dagiti Aramid 23:11). Mawayawayaannatayo ni Jesucristo manipud iti “sangol ti pannakaadipen” (Taga Galacia 5:1).
Septiembre 27–Oktubre 1
Taga Galacia
“Magna iti Espiritu”
Bayat ti panangbasam iti Taga Galacia, ania dagiti impresion nga adda kenka maipapan iti no ania ti kasapulan a masursuro dagiti ubbing iti klasem?
Yawis ti Panagbibinninglay
Mangted kadagiti ubbing iti sumagmamano a minuto a mangidrowing iti maysa a banag a nasursuroda manipud iti kallabes unay a panaglilinnawag iti ebanghelio iti pagtaengan wenno iti simbaan. Paibinglaymo kadagiti ubbing no ania ti ibagi ti tunggal drowing.
Isuro ti Doktrina: In-inaudi nga Ubbing
Tullongannak ti Espiritu Santo a mangrikna iti ayat, rag-o, ken talna.
Mabigbig dagiti babassit nga ubbing ti bunga ti Espiritu. Daytoyto ti mangisagana kadakuada a mangsapul ti impluensia ti Espiritu Santo iti unos ti biagda.
Dagiti Mabalin nga Aktibidad
-
I-display wenno ipakita dagiti sumagmamano a kita ti bunga, ken kiddawem kadagiti ubbing nga iladawanda no kasano ti raman ti tunggal a bunga. Ilawlawag a kas kadagiti bunga a nadumaduma ti ramanda, mariknatayo ti Espiritu Santo iti nadumaduma a wagas, a kas iti ayat ken talna. Iladawan ti sumagmamano a wagas a nakariknaam iti Espiritu Santo iti biagmo, ket paibinglaymo kadagiti ubbing no kasano ti rikna ti Espiritu Santo kadakuada.
Mabalin a mapadasan dagiti ubbing iti amin nga edad ti “bunga ti Espiritu.”
-
Basaen ti Taga Galacia 5:22–23 kadagiti ubbing, ken ilawlawag dagiti balikas a mabalin a saanda nga ammo. Awisen ti tunggal ubing a pumili iti maysa a bunga ti Espiritu a nadakamat kadagitoy a bersikulo, ket tulongam ida a mangpanunot iti maysa a panawen idi napadasanna daytoy. Awisem dagiti ubbing a mangidrowing kadagiti simple a ladawan dagiti padasda.
Kayat ni Jesuscristo a tulongak dagiti agkasapulan.
Maipada ti pammilin iti Taga Galacia 6:2 iti pannursuro ni Alma iti Mosiah 18:8 kadagiti tao nga asidegen a mabuniagan. Alaem daytoy a gundaway a mangtulong kadagiti ubbing nga agsagana para iti katulagan ti panagbuniag.
Dagiti Mabalin nga Aktibidad
-
Ipakitam ti maysa a ladawan ti maysa nga ubing a mabunbuniagan (kas iti Libro ti Arte ti Ebanghelio, num.104). Saludsodem kadagiti ubbing no ania ti ar-aramidden ti ubing. Ilawlawag a no mabuniagantayo, agaramidtayo kadagiti katulagan, wenno kari. Basaen ti Taga Galacia 6:2 wenno Mosiah 18:8 a mangtulong kadagiti ubbing a mangammo iti maysa kadagiti banag nga ikaritayo nga aramiden: makipagbaklay kadagiti dagensen ti tunggal maysa. Awisem dagiti ubbing a mangidrowing kadagiti ladawan a pakatulonganda kadagiti dadduma a mangibakbaklay kadagiti dagensen.
-
Ibasam kadagiti ubbing daytoy a ragup ti balikas manipud iti Taga Galacia 6:2: “Agtitinulongkayo iti pakadagsenan ti maysa ken maysa.” Tapno mailadawan no ania ti kaipapanan daytoy, mangted iti maysa kadagiti ubbing iti maysa a banag a nadagsen a bagkaten. Kalpasanna agkiddaw iti maysa nga agboluntario a mangtulong iti ubbing a mangbagkat iti banag. Ilawlawag kadagiti ubbing nga adu dagiti banag a marikna a kasla dadagsen, kas iti panagsakit wenno panagliday wenno panagladingit. Ania ti mabalin nga aramidentayo a makatulong iti maysa a tao iti daytoy a kita ti dagensen?
Dagiti aramidtayo, agpada a naimbag ken dakes, ket adda pagbanaganda.
Babaen iti panangisuro nga apitentayo no ania ti imulatayo, kas nailawlawag iti Taga Galacia 6:7–9, mabalinmo a suruan dagiti ubbing a mangpanunot kadagiti bunga dagiti aramidda.
Dagiti Mabalin nga Aktibidad
-
I-display ti maysa a bukel ken maysa a nateng. Ibasam ti Taga Galacia 6:7–9 kadagiti ubbing. Kiddawen kadagiti ubbing nga agpammarangda a mangimula iti bukel no mangngeganda ti balikas nga agmula. Kiddawem kadakuada nga agpammarang nga agpuros iti nateng manipud iti maysa a mula no mangngeganda ti balikas nga agapit.
-
Mangipakita iti sumagmamano a kita ti nateng kadagiti ubbing, ken tulongam ida a mangsapul kadagiti bukel iti tunggal maysa. Ipanmo dagiti bukel iti maysa a pagikkan, ken pagsisinublatem dagiti ubbing a mangpili iti maysa ket ibagada no ania a nateng ti agtubonto no imulada daytoy. Tulongam ida a mangkita a kas met laeng kadagiti bukel nga imulatayo ti mangikeddeng iti nateng a magun-odtayo, dagiti pili nga aramidentayo ti mangikeddeng kadagiti pagbanagan ken bendision nga awatentayo iti kamaudianan.
-
Agaramid iti maysa a linia iti suelo nga usaren ti tape. Ikabil ti maysa a naragsak a rupa ken naliday a rupa iti agsumbangir nga ungto iti linia. Mangawis iti maysa nga ubing nga agtakder iti tengnga iti linia, ket tulongam ti dadduma pay nga ubbing nga agpanunot kadagiti pili a mangiturongto iti kinaragsak wenno kinaliday. Iti tunggal pili, kiddawem iti ubing iti tengnga nga agaddang a mapan iti naragsak a bangir wenno naliday a bangir. Uliten kadagiti aktibidad iti sumagmamano a daras, ken pagsisinnublatem dagiti dadduma pay nga ubbing nga agtakderda iti rabaw ti tape.
Isuro ti Doktrina: In-inauna nga Ubbing
Ti pannakabuniag aramidennatayo a “maymaysa ken Cristo.”
Insuro ni Pablo kadagiti Santo a taga Galacia nga idi nabuniaganda nagbalinda a “maymaysa ken Cristo Jesus.” Kasano a matulongam dagiti ubbing nga agkagumaan para iti panagkaykaysa a nailadawan iti Taga Galacia 3:26–28?
Dagiti Mabalin nga Aktibidad
-
Awisem dagiti ubbing a mangbasa iti Taga Galacia 3:26–28 a pampanunoten daytoy a saludsod: Ania ti mapasamak no mabuniaganak? Mabalin a kayatmo nga ipamaysa dagiti ragup ti balikas kas iti “mangikawes ken Cristo” wenno “maymaysa ken Cristo.” Ania ti mabalin a kaipapanan dagitoy a ragup ti blaikas? Kasano a maipada ti “panangikawes ken Cristo” iti panangawat iti naganna iti bagbagitayo? (kitaen iti Doktrina ken Katulagan 20:75–79). Ania ti maaramidtayo tapno maipakitatayo iti dadduma nga inawattayon ti naganna iti bagbagitayo?
-
Aggigiddan a mangbasa iti Taga Galacia 3:28, ket lasinen ti sumagmamano a wagas a nakabigbigan dagiti tao iti bagbagida idi nabuniaganda iti panawen ni Pablo. Tulongam dagiti ubbing a mangibaga iti sumagmamano a wagas a pakabigbiganda iti bagbagida iti agdama. Ania ti padpadasen ni Pablo nga isuro kadatayo maipapan no kasano ti nasken a panangkitatayo iti tunggal maysa no mabuniagantayo?
No “magnaak iti Espiritu,” awatekto ti “bunga ti Espiritu.”
No mabuniagantayo ken awatentayo ti sagut ti Espiritu Santo, maawattayo ti bunga ti Espiritu nga ad-adu pay iti biagtayo. Kasano a matulongamto dagiti ubbing a mangilasin iti daytoy a bunga iti biagda?
Dagiti Mabalin nga Aktibidad
-
Mangted iti tunggal ubing iti maysa a papel (mabalinmo a gettengen ti papel iti sukog dagiti prutas), ket kiddawen kadagiti ubbing a mangsapul iti maysa a “bunga ti Espiritu” a nailista iti Taga Galacia 5:22–23. Awisem ida a mangsurat iti maysa kadagiti prutas iti maysa a bangir ti papelda ken maysa a balikas a kayatna a sawen ti kasupadi iti sabali pay a bangir. (Tulongam ida a makaawat kadagiti balikas a saanda pay nga ammo.) Awisem ida a mangibinglay kadagiti prutasda iti klase. Ania ti maaramidtayo tapno maaddaantayo a kanayon iti Espiritu Santo?
-
Awisem dagiti ubbing a mangbasa iti maipapan iti bunga ti Espiritu iti Taga Galacia 5:22–23 ken isurat wenno idrowing ti maysa a ladawan iti panawen a nariknada ti maysa kadagita a bunga. Kiddawem kadakuada a mangibinglay iti estoria wenno ladawanda iti sabali pay a tao iti klase. Apay a ti bunga ti nasayaat a wagas a mangtulong kadatayo tapno maawatantayo no kasano nga impluensiaannatayo ti Espiritu?
Dagiti aramidtayo, agpada a naimbag ken dakes, ket adda pagbanaganda.
Tulongam dagiti ubbing a makaawat a no dadduma umay a dagus dagiti pagbanagan ti ugalitayo ken iti sabali a gundaway mabalin nga umayda “iti naituding a panawen” (bersikulo 9).
Dagiti Mabalin nga Aktibidad
-
Aggigiddan a basaen ti Taga Galacia 6:7–9. Mangted iti maysa a listaan dagiti aramid (wenno bukbukel nga “imulatayo”) ken dagiti pagbanagan (wenno bunga nga apitentayo”). Idawat kadagiti ubbing a mangiparis kadagiti aramid kadagiti pagbanaganda.
-
Awisem dagiti ubbing a mangilista iti sumagmamano kadagiti bendision a namnamaenda nga awaten manipud iti Nailangitan nga Ama. Tulongam ida a mangpanunot kadagiti “bukel” a nasken nga imulada tapno “maapit” dagitoy a bendision.
Yallukoy ti Panagsursuro iti Pagtaengan
Tulongam dagiti ubbing a magsapul kadagiti wagas a pakayaplikaran iti inaldaw a biagda dagiti kinapudno a nasursuroda ita nga aldaw. Kas pagarigan, mabalinmo nga awisen ida a mangsiput kadagiti nasayaat a pagbanagan, wenno “bunga,” a sumangbay gapu kadagiti nasayaat a pangngeddeng nga aramidenda.
Panangpadur-as iti Panangisurotayo
Ibagaymo dagiti aktibidad para iti edad dagiti ubbing. Mangted kadagiti ubbing iti gundaway a makiraman, ngem laglagipem a ti kabaelanda a mangaramid kadagitoy ket agdudumanto a maibatay iti edad ken panagnakemda. Kasapulan dagiti in-inaudi nga ubbing ti ad-adu pay a pannarabay ken panangiturong. Bayat ti panagnakemda, ad-adu ti kontribusion dagiti ubbing ken mabalin a nasaysayaat pay ti panangibinglayda kadagiti kapanunotanda. (Kitaen iti Panangisuro iti Wagas ti Mangisalakan, 25–26.)