dagiti kabsat a babbai a misionario a makisarsarita iti agtutubo a lalaki

Oktubre 16–22

1 ken 2 Tesalonica

“An-anayan ti Pagkurkurangan iti Pammatiyo”

Nainkararagan a basaem ti 1ken 2 Taga Tesalonica a pampanunotem dagiti ubbing, masarakamto dagiti pagbatayan a nasken a maawatanda.

icon iti panagbibinninglay

Yawis ti Panagbibinninglay

Iti adalen iti napalabas a lawas, inawismo kadi dagiti ubbing a mangyaplikar iti nasursuroda iti sumagmamano a wagas? Pausarmo kadagiti ubbing dagiti umuna a sumagmamano a minuto iti klase iti daytoy a lawas a mangibinglay kadagiti padasda.

icon iti panangisuro

Isuro ti Doktrina: In-inaudi nga Ubbing

1 Taga Tesalonica 5:1–6

Bayat ti panangsurotko kadagiti bilin ti Dios, nakasaganaakto para iti Maikadua a Yaay ni Jesucristo.

Ditayo ammo no kaanonto ti panagsubli ti Mangisalakan iti daga. Ngem mabalintayo ti agsipsiput Kenkuana ken agsagsagana para iti yaayna.

Dagiti Mabalin nga Aktibidad

• Awisem ti maysa nga ina a mangisarita biit no ania ti rikna ti agur-uray a mayanak ti maladagana. Basaem ti 1 Taga Tesalonica 5:2–3, ken ibagam kadagiti ubbing nga umayto manen ni Jesucristo iti daga, ngem awan ti makaammo iti eksakto no kaano—kas iti maysa nga ina a di makaammo iti eksakto no kaanonto ti pannakayanak ti maladagana.

• Kiddawem kadagiti ubbing nga agsarita maipanggep iti maysa a panawen idi nagsaganada para iti maysa a biahe wenno pasken. Ania ti inaramidda tapno makapagsaganada? Mangitugot iti maysa a maleta wenno bag, ket pagpammarangem dagiti ubbing nga agimpake tapno agsagana para iti maysa a panagbiahe. Addaan iti tunggal banag nga agpammarangda a yimpake, tulongam dagiti ubbing a mangpamunot iti maysa a wagas a mabalin a pakapagsaganaantayo iti yaay manen ni Jesucristo.

• Ibasam ti 1 Taga Tesalonica 5:6 kadagiti ubbing, ken ilawlawag a no saantayo nga agsagsagana para iti yaay manen ni Jesucristo, kasla nakaturogtayon ken saantayo a nakasagana para Kenkuana. Awisem dagiti ubbing nga agpammarang a matmaturogda. Ilawlawag a no agsaganatayo, kasla nakariingtayo ken agur-uray Kenkuana. Awisen ida nga agriing.

• Aggigiddan nga agkansion iti maysa a kanta maipapan iti Maikadua a Yaay, kas iti “When He Comes Again” (Children’s Songbook, 82–83).

2 Taga Tesalonica 2:1–3

Insuro ni Pablo a mapasamakto ti maysa nga ikakalilis iti kinapudno sakbay ti yaay manen ni Jesucristo.

Ti Simbaan nga impasdek ni Jesucristo ket in-inut a natnag iti ikakalilis iti kinapudno, kaipapananna a napukaw iti daga ti turay ti priesthood ken dagiti kinapudno ti ebanghelio. Impadto ni Pablo a mapasamakto daytoy nga ikakalilis iti kinapudno, wenno “panakatnag,” sakbay ti Maikadua a Yaay ti Mangisalakan.

Dagiti Mabalin nga Aktibidad

• Kalpasan ti panangbasa iti 2 Taga Tesalonica 2:3 kadagiti ubbing, agpatulongka kadakuada a mangbangon iti maysa a sinan-torre babaen kadagiti plastik a baso wenno bloke. Ibagam kadagiti ubbing a dagiti baso wenno bloke ket mangibagi kadagiti napapateg a paset iti pudno a Simbaan, kas kadagiti kinapudno ti ebanghelio, ti priesthood, dagiti pannakailantip iti templo, ken dagiti propeta. Kalpasan ti ipapatay ni Pablo ken dagiti dadduma pay nga Apostol, napukaw dagitoy a banag, ken awan ti pudno a Simbaan iti daga iti uneg ti adu a tawen. Awisem ti maysa nga ubing a mangtuktok iti torre, ken ilawlawag a naawagan daytoy iti Ikakalilis iti Kinapudno wenno “panakatnag.” Idi insubli manen ni Jesucristo ti Simbaanna, naawagan daytoy iti Pannakaisubli.

• Ipakita ti maysa a Libro ni Mormon ken dagiti ladawan ti propeta ken ti maysa a templo. Awisem dagiti ubbing a mangisao iti “Ikakalilis iti Kinapudno” no ilemmengmo dagiti banag iti maysa a supot ken mangisao iti “Pannakaisubli” no iruarmo dagiti banag iti supot.

• Agkansion kadagiti kanta a mangisuro kadagiti kinapudno a napukaw kabayatan ti Ikakalilis iti Kinapudno ken naisubli iti aldawtayo, kas iti “The Church of Jesus Christ,” “The Priesthood Is Restored,” ken “I Love to See the Temple” (Children’s Songbook, 77, 89, 95).

icon iti panangisuro

Isuro ti Doktrina: In-inauna nga Ubbing

1 Taga Tesalonica 5:1–6

Bayat ti panangsurotko kadagiti bilin ti Dios, nakasaganaakto para iti Maikadua a Yaay ni Jesucristo.

Makatulong kadatayo ti balakad ni Pablo nga agsagana ken agsiput para iti naindaklan nga aldaw inton umay manen ti Mangisalakan iti daga.

Dagiti Mabalin nga Aktibidad

• Awisem ti maysa nga ubing a mangbasa iti 1 Taga Tesalonica 5:1–6 idinto a sumursurot dagiti dadduma pay nga ubbing. Kalpasan ti tunggal bersikulo, kiddawem iti maysa nga ubbing a gupgopenna no ania iti panagkunana a kayat a sawen ti bersikulo. Mabalin a kayatmo nga ilawlawag a ti “ti aldaw iti Apo” kaipapananna ti Maikadua a Yaay ni Jesucristo. Apay a panunoten dagiti ubbing a ti Maikadua a Yaay ket maidilig iti maysa a mannanakaw iti rabii wenno maysa a babai nga asidegen nga agpasngay iti maysa a maladaga?

• Ibagam kadagiti ubbing a mangipapanda a sumarungkarto ti Mangisalakan iti klasem iti uray ania nga oras ita nga aldaw. Kasano a makapagsaganatayo para iti isasarungkarna? Tulongam dagiti ubbing a mangpanunot kadagiti bambanag a maaramidtayo tapno maisaganatayo ti bagbagitayo para iti aldaw a panagsubli ni Jesucristo. Kas pagarigan, mabalintayo ti agbabawi, mamakawan, mangpadur-as iti pannakilangentayo iti pamiliatayo, mangsurot iti propeta, maaddaan iti impluensia ti Espiritu Santo, ken agtungpal kadagiti katulagantayo. Allukoyem dagiti ubbing a mangpili ti maysa a banag nga aramidendanto tapno maisaganada ti bagbagida nga umawat iti Mangisalakan iti Yaayna.

2 Taga Tesalonica 2:1–3

Insuro ni Pablo a mapasamakto ti ikakalilis iti kinapudno sakbay ti yaay manen ni Jesucristo.

No maawatan dagiti ubbing a ti Simbaan ni Jesucristo ken ti ebangheliona ket napukaw iti daga kabayatan ti Dakkel nga Ikakalilis iti Kinapudno, ti panagkasapulan iti Pannakaisubli ket agbalinto a nalawlawag kadakuada.

Dagiti Mabalin nga Aktibidad

• Awisen ti maysa kadagiti ubbing a mangbasa iti 2 Taga Tesalonica 2:1–3. Segun kadagitoy a bersikulo, ania ti nasken a napasamak sakbay ti “ti aldaw ni Cristo,” a kaipapananna ti Maikadua a Yaay? Ania ti kayat a sawen kenka ti ragup ti balikas a “pannakatnag”? Siguraduem a maawatan dagiti ubbing a kaipapananna ti Dakkel nga Ikakalilis iti Kinapudno, a napasamak kalpasan ti ipapatay dagiti Apostol ti Mangisalakan. Mabalin a kayatmo nga ibinglay ti impormasion manipudd iti “Ikakalilis iti Kinapudno” iti Pangiwanwan iti Nasantuan a Kasuratan (scriptures.ChurchofJesusChrist.org).

• Tulongam dagiti ubbing a mangilista iti pisarra iti sumagmamano kadagiti kinapudno ken bendision a pagragsakantayo gapu iti ebanghelio. Pugasem a saggaysa dagitoy a banag, ken saludsoden kadagiti ubbing no kasano a maiduma ti biagda no awan dagitoy a banag. Ilawlawag a dagitoy a kinapudno ket napukaw kabayatan ti Dakkel nga Ikakalilis iti Kinapudno. Apay a napateg a maisubli iti daga ti Simbaan ni Jesucristo iti ud-udina nga aldaw? Awisen dagiti ubbing nga “isubli” wenno isuratda manen dagiti kinapudno ken bendision iti pisarra.

2 Taga Tesalonica 3:7–13

Kayat ni Nailangitan nga Ama nga agtrabahoak.

Kasano a matulongam a makita dagiti ubbing a maysa a bendision ti aramid, saan a maysa a banag a liklikan?

Dagiti Mabalin nga Aktibidad

• Awisen dagiti ubbing nga agsisinnublat iti panangbasa kadagiti bersikulo manipud iti 2 Taga Tesalonica 3:7–13 ket sapulen dagiti problema a pakaipaspasanguan dagiti Santo. Apay a kayat ti Nailangatan nga Ama nga agtrabahotayo? Ania ti mapasamak no saantayo a nasursuro iti kaano man ti agtrabaho a sipapasnek? Pagsisinnublatem dagiti ubbing a mangyakem kadagiti simple a trabaho idinto a pugtuan ti dadduma pay nga ubbing no ania ti ar-aramidenda.

• Awisem dagiti ubbing nga agsarita maipanggep iti maysa a panawen idi impasnekda ti nagtrabaho iti maysa nga aramid, maysa a proyekto, wenno maysa a panggep a tun-oyen. Ania ti riknada maipapan iti bagbagida idi nalpasdan? Ania ti kaipapanan ti “saan koma a maupay nga agaramid iti naimbag”? (2 Taga Tesalonica 3:13). Ania ti mangtulong kadakuada nga agtultuloy no marikna a narigat nga aramiden ti trabaho?

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangibaga iti maysa a miembro ti pamilia wenno gayyem a gapu ti pagyamyamananda nga addaantayo iti ebanghelio iti daga iti agdama (makatulong ti panid ti aktibidad itoy a lawas a mangted kadakuada kadagiti kapanunotan).

Panangpadur-as iti Panangisurotayo

Suportaram dagiti nagannak dagiti ubbing. “Dagiti nagannak ti kapatgan a mannursuro iti ebanghelio kadagiti annakda—agpadada nga addaan iti kangrunaan a pagrebbengan ken kadakkelan a bileg a makaimpluensia kadagiti annakda (kitaen iti Deuteronomio 6:6–7). Bayat ti panangisurom kadagiti ubbing iti simbaan, sikakararag a mangsapul kadagiti wagas a pakatulongam kadagiti nagannak iti napateg nga akemda” (Panangisuro iti Wagas ti Mangisalakan,25).

panid ti aktibidad: mapasamak ti Ikakalilis iti Kinapudno sakbay ti Maikadua a Yaay