Oktubre 2–8

Taga Efeso

“Maipaay iti Pannakapaan-anay dagiti Sasanto”

Bayat ti panangadalmo iti Surat kadagiti Taga Efeso, panunotem ti maipapan iti no ania dagiti pagbatayan a mabalinmo a yunay-unay a mangbendision kadagiti ubbing a sursuruam. Isuratmo dagiti ania man a kapanunotan a mapanunotmo bayat ti panagbasam.

Yawis ti Panagbibinninglay

Awisem dagiti ubbing nga agtakder iti maysa a linia. Mangrugi iti sango ti linia, ikkam ti tunggal ubing iti gundaway a mangibinglay iti maysa a banag a nasursurona itay kallabes maipapan iti ebanghelio kabayatan ti sangapamiliaan a panagadal iti nasantuan a kasuratan, iti Primary, wenno iti sadino man a lugar.

Isuro ti Doktrina: In-inaudi nga Ubbing

Taga Efeso 2:19

Nasken nga aggagayyem dagiti miembro ti Simbaan ken “agkakailian.”

Ad-adda kadi a kasla “ganggannaet” wenno “kailian” dagiti ubbing iti klasem iti tunggal maysa ken iti dadduma a miembro ti ward? Tulongam ida a makaawat a nupay addaantayo kadagiti pagdudumaan, tultulongannatayo ti Mangisalakan nga agkaykaysa ken aggiinnayat iti tunggal maysa.

Dagiti Mabalin nga Aktibidad

• Ikabil ti maysa a ladawan ti Mangisalakan iti tengnga ti siled. Awisem dagiti ubbing nga agtakder iti nadumaduma a paset ti siled tapno mangibagi kadagiti “estranghero” wenno “ganggannaet.” Tulongam ida a makaawat a dagitoy a balikas kayatna a sawen dagiti tao a ditayo pay am-ammo. Bayat ti panangbasam iti Taga Efeso 2:19, awisem ida nga aggaraw nga agturong iti ladawan ni Cristo agingga a nakatakderda nga aggiinnasideg. Ibagam kadakuada a bayat ti yaasidegtayo iti Mangisalakan, agbalintayo a nakaykaysa kadagiti dadduma kas “agkakailian,” wenno aggagayyem

• Mangsapul kadagiti ladawan dagiti ubbing manipud iti nadumaduma a paset ti lubong, ken ilemmeng dagitoy iti lawlaw ti siled. Ikabil ti maysa a ladawan ti Mangisalakan iti sango ti siled. Awisem ti klasem nga agparisda a kas misionario ket agsinnublatda a mangsapul ti maysa a ladawan ti maysa a “ganggannaet” nga ikabilda iti asideg ti ladawan ti Mangisalakan. Tulongam ida a makaawat a no mabuniagan dagiti tao, agbalinda a paset ti pamilia ti Simbaan, wenno ti “sangakabbalayan ti Dios.” Kasano a matulongantayo ti maysa a tao a kabarbaro a makarikna a maaw-awat isuna a siraragsak?

Taga Efeso 6:1–3

Kayat ti Nailangitan nga Ama nga agtulnogak kadagiti nagannak kaniak.

Bayat ti panangbasam iti Taga Efeso 6:1–3, agpanunotka kadagiti wagas a makatulong kadagiti ubbing a makaawat no apay a napateg nga agtulnogda kadagiti nagannak kadakuada.

Dagiti Mabalin nga Aktibidad

• Ibasam ti Taga Efeso 6:1 iti klase, wenno tulongam ti maysa kadagiti ubbing a mangbasa iti daytoy. Tulongam ida a mangpanunot kadagiti panawen idi nagtulnogda kadagiti nagannak kadakuada. Kiddawem kadakuada a mangibinglay no kasano a naparaburanda iti panangtulnog ken no kasano ti riknada idi nagtungpalda. Apay a napateg nga agtulnogtayo kadagiti nagannak kadatayo?

• Aggigiddan nga agkansion iti kanta a maipapan iti panagtulnog kas iti “Quickly I’ll Obey” (Children’s Songbook, 197). Pagsisinnublatem dagiti ubbing a mangnagan iti maysa a banag nga idawat dagiti nagannak kadakuada nga aramidenda, ket awisem ida nga agpammarang nga agaramid iti dayta a banag.

• Ipakitam ti maysa a ladawan ni Jesucristo a mabumbuniagan (kitaen iti Libro ti Arte ti Ebanghelio, num. 35), ken ibinglay no kasano a nagtulnog ti Mangisalakan iti Nailangitan nga Ama babaen ti panagbuniag (kitaen iti 2 Nephi 31:6–7) Ibinglaymo ti maysa a padas a nakapagtulnogam kadagiti nagannak kenka ket nabendisionanka. Apay a kayat ti Nailangitan nga Ama nga agtungpaltayo kadagiti nagannak kadatayo?

Taga Efeso 6:10–18

Masalaknibannak ti kalasag ti Dios manipud iti dakes.

Kasano a matulongamto dagiti ubbing a makaawat a ti panagaramid ti nalinteg ket kas iti panangikawes iti kabal?

Dagiti Mabalin nga Aktibidad

• Ipakitam ti ladawan ti maysa a tao a nakakawes iti kabal, a kas iti maysa iti panid ti aktibidad iti daytoy a lawas wenno balabala itoy a lawas iti Umaykayo, Sumurot Kaniak—Para kadagiti Indibidual ken Pamilia. Bayat ti pananggupgopmo iti Taga Efeso 6:10–18, ipakitam kadagiti ubbing no kasano a salakniban dagiti nadumaduma a paset ti kabal dagiti nadumaduma a paset ti bagi. (Kitaen iti “The Whole Armor of God,” Friend, Hunio 2016, 24–25.)

• Mangitugot iti sumagmamano a banag iti klase a mabalin a mangibagi iti pedaso ti kalasag a nadakamat iti Taga Efeso 6:14–17 (kas pagarigan, maysa a kallugong wenno bidang), wenno agaramid kadagiti simple a pedaso ti sinan-kabal manipud iti papel. Pagsisinnublatem dagiti ubbing a mangikawes iti “kabal.” Tulongam ida a makaawat no kasano nga ikabiltayo ti kabal ti Dios (kas pagarigan, babaen ti panagadal kadagiti nasantuan a kasuratan, panagserbi iti dadduma, panagkararag, panagtungpal, ken dadduma pay). Ilawlawag no kasano a ti panangaramidtayo kadagitoy a banag ket mangsaluad kadatayo iti dakes?

Isuro ti Doktrina: In-inauna nga Ubbing

Taga Efeso 2:13–19

“Agkakailiantayo” iti sangakabbalayan ti Dios.

Mapapigsa dagiti ubbing no addaanda kadagiti nasayaat a gagayyem iti ebanghelio. Kasano a matulongam ida a mangpatanor iti nasaysayaat a pannakigayyem iti tunggal maysa?

“Kailiannatayo” dagiti Santo ti Dios.

Dagiti Mabalin nga Aktibidad

• Basaen ti Taga Efeso 2:19 , ket paglilinnawagan no ania ti kaipapanan ti maysa nga estranghero wenno ganggannaet. Ibinglaymo iti maysa a padas a nakariknaam a maysaka nga estranghero wenno ganggannaet ket tinulongannaka ti maysa a tao tapno nariknam a naragsakda a nangpasangbay ken immawat kenka. Awisem dagiti ubbing a mangibinglay kadagiti kasta met laeng a padas. Ania ti maaramidtayo tapno agbalintayo nga “agkakailian” imbes a ganggannaet? Adda kadi ubbing iti klasem a masansan a saan a dumar-ay, nalabit a gapu ta mariknada a kasla ganggannaetda? Tulongam dagiti ubbing a mangaramid iti maysa a plano a tumulong kadagita a miembro a makarikna a siraragsak a maawat ken maayatda.

• Tapno matulongan dagiti ubbing a mapapigsa dagiti relasionda iti tunggal maysa, mangisurat iti sumagmamano a saludsod iti pisarra a mangguyugoy kadakuada a mangibinglay iti maysa a banag maipapan iti bagbagida, kas iti Kaano idi a nasungbatan ti maysa a kararagmo? wenno Ania ti paggugustom a banag nga aramidem iti pamiliam? Bingayem dagiti ubbing iti kada paris, ket awisem ida nga agdamag iti saludsod iti tunggal maysa. Ania ti nasursurotayo maipapan iti tunggal maysa?

Taga Efeso 6:1–3

Kayat ti Nailangitan nga Ama nga agtulnog ken agdayawak kadagiti nagannak kaniak.

Panunoten maipapan kadagiti wagas a pakatulongam kadagiti ubbing a makaawat no apay a napateg nga agtulnog kadagiti nagannak kadakuada.

Dagiti Mabalin nga Aktibidad

• Awisem dagiti ubbing a mangbasa iti Taga Efeso 6:1–3 a saggaysa ket ilasinda dagiti ragup ti balikas a napateg kadakuada. Awisem ida a mangibinglay kadagitoy a ragup ti balikas ken no apay a mariknada a napateg dagitoy a ragup ti balikas.

• Awisem dagiti ubbing a mangibinglay kadagiti pagwadan ti tattao kadagiti nasantuan a kasuratan a nagtulnog ken nagdayaw kadagiti nagannak kadakuada, a kas iti Mangisalakan (kitaen iti Lucas 2:42–52, Ruth (kitaen iti Ruth 1, wenno Nephi (kitaen iti 1 Nephi 3:1–8). Apay a napateg nga agtulnog ken agdayawtayo kadagiti nagannak kadatayo?

• Mangted iti tunggal ubing iti maysa a papel a nasuratan iti balikas nga agdayaw iti ngato. Paglilinnawagan no ania ti kaipapanan ti balikas. Awisem dagiti ubbing a mangisurat wenno mangidrowing kadagiti papelda iti maysa a banag a maaramidda a mangipakita a dayawenda dagiti nagannak kadakuada.

Taga Efeso 6:10–18

Masalaknibannak ti kalasag ti Dios manipud iti dakes.

Bayat ti panangbasam iti Taga Efeso 6:10–18, panunotem ti sumagmamano kadagiti naespirituan a pagpeggadan a pakaipasanguan dagiti ubbing ken no kasano a matulongam a mapapigsa dagiti ubbing a maibusor kadagitoy.

Dagiti Mabalin nga Aktibidad

• Bayat ti panangbasa ti maysa nga ubing iti Taga Efeso 6:10–18, kiddawem iti sabali pay nga ubing a mangilista wenno mangidrowing iti pisarra dagiti pedaso ti sinan-kabal a nadakamat. Apay a napateg ti kabal iti pagbabakalan? Kasano a maikawestayo ti naespirituan a kabal iti inaldaw?

• Dutokam ti tunggal ubing a mangidrowing ken mangsurat iti maysa a pedaso ti sinan-kabal a nailadawan iti Taga Efeso 6:14–17. Kasano a masalaknibannatayo dagitoy a pedaso ti sinan-kabal manipud iti dakes? Ania ti ikari ti Apo kadagiti agkawes iti kabal ti Dios? (kitaen iti Taga Efeso 6:13). Ania ti kayat a sawen ti “sumarikedked inton dakes nga aldaw”?

Yallukoy ti Panagsursuro iti Pagtaengan

Awisem dagiti ubbing nga agbalin a managsiput itoy a lawas para iti maysa a tao a mabalin a makarikna a kasla maysa a ganggannaet. Karitem ida a mangaramid iti maysa a banag a mangtulong iti dayta a tao.

Panangpadur-as iti Panangisurotayo

Tulongam dagiti babassit nga ubbing a makasursuro manipud kadagiti nasantuan a kasuratan. Makasursuro dagiti babassit nga ubbing a manipud kadagiti nasantuan a kasuratan, ngem mabalin a kasapulanda ti agpokus iti maysa a bersikulo wenno uray maysa laeng a kangrunaan a ragup ti balikas. Mabalinmo nga awisen dagiti ubbing nga agtakder no mangngeganda ti maitudo a balikas wenno ragup dagiti balikas. (Kitaen iti Panangisuro iti Wagas ti Mangisalakan,25–26.)