dagiti kabsat a babbai a misionario a makisarsarita iti agtutubo a lalaki

Oktubre 16–22

1 ken 2 Taga Tesalonica

“An-anayan ti Pagkurkurangan iti Pammatiyo”

No saantayo nga isurat dagiti impresion nga awatentayo manipud iti Espiritu, nalabit malipatantayo dagitoy. Ania ti iparikna ti Espiritu kenka nga isurat bayat ti panangbasam iti 1 ken 2 Taga Tesalonica?

Isuratmo dagiti Impresionmo

Sadiay Tesalonica, a napabasol da Pablo ken Silas iti pananglabsing a “mangriribuk iti lubong” (Dagiti Aramid 17:6). Ti panangaskasabada ti namagpungtot kadagiti saan a mapagduaduaan a dadulo kadagiti Judio, ket sinugsugan dagitoy a dadaulo dagiti tao nga agarimbangaw (kitaen iti Dagiti Aramid 17:1–10). Kas bungana, naibalakad kada Pablo ken Silas a pumanaw iti Tesalonica. Nariribukan ni Pablo maipapan kadagiti kabumbuniag a Taga Tesalonica ken ti pakaipaspasanguanda a pannakairurumen, ngem saan a nakapagsubli a mangsarungkar kadakuada. “Idi saankon a masbaalan” insuratna, “imbaonko a maammuan ti pammatiyo.” Kas sungbat, ni Timoteo a katulong ni Pablo, a nagserserbi diay Tesalonica, “imbagana kadakami ti naragsak a damag ti pammati ken ti ayatyo” (1 Taga Tesalonica 3:5–6). Kinapudnona, naam-ammo dagiti Santo iti Tesalonia kas dagiti pagwadan “iti amin a mamati” (1 Taga Tesalonica 1:7), ken pakadamagan ti pammatida a nagwaras kadagiti ganggannaet a siudad iti sabali a pagilian. Ipapanmo a rag-o ken pakalag-anan ni Pablo a dumngeg a ti trabahona kadakuada “ket saan nga awan iti kaes-eskanna” (1 Taga Tesalonica 2:1). Ngem ammo ni Pablo a saan nga umdas ti kinapudno iti napalabas para iti naespirituan a pannakaisalakan iti masakbayan, ken na-annad isuna iti impluensia dagiti palso a mannursuro kadagiti Santo (kitaen iti 2 Taga Tesalonica 2:2–3). Ti mensahena kadakuada, ken kadatayo, ti mangituloy nga “an-anayan ti pagkurkurangan iti pammati[tayo]” ken “ rumang-aykayo la koma a rumang-ay” iti ayat (kitaen iti 1 Taga Tesalonica 3:10; 4:10).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

1 Taga Tesalonica 1–2

Agserbi dagiti disipulo ti ebanghelio iti kinapudno ken ayat.

Iti 1 Taga Tesalonica, ipalgak dagiti balikas ni Pablo ti agpada a pannakaseknan ken ti rag-o ti maysa a tao a nangted a sibubukel ti bagina iti panagserbi kadagiti annak ti Dios. Nangnangruna iti umuna a dua a kapitulo ti 1 Taga Tesalonica, masarakamto dagiti balikas ken ragup ti balikas a mangiladawan dagiti galad ken tignay ti maysa a disipulo ti Apo. Kas pagarigan ania ti masursurom manipud iti 1 Taga Tesalonica 1:5–8; 2:1–13 maipapan iti panagserbi iti Apo?

Panunotem maipapan kadagiti bukodmo a gundaway nga agserbi iti Dios ken dagiti annakna. Ania ti masarakam kadagitoy a kapitulo a mangparegta kenka a mangpasayaat iti serbisiom? Ibilangmo ti panangsaludsod iti bagim a maibatay iti no ania ti masarakam, kas iti “Nagbalinkayo nga ulidan kadagiti banag nga ammok?” (kitaen iti 1 Taga Tesalonica 1:7).

1 Taga Tesalonica 3:7–13; 4:1–12

“Dumakkelkayo ken aduan iti ayat.”

Nagrag-o ni Pablo iti kinapudno dagiti Santo iti Tesalonica (kitaen iti 1 Taga Tesalonica 3:7–9). Ngem kayatna pay ida a “rumang-ay a rumang-ay” iti kinapudno” (1 Taga Tesalonica 4:1). Bayat ti panagbasam iti 1 Taga Tesalonica 3:7–13; 4:1–12, panunotem dagiti wagas a mabalinmo ti “rumang-ay a rumang-ay a naespirituan (1 Taga Tesalonica 4:10). Kas pagarigan, kitaen nga inusar ni Pablo dagiti balikas a kas “kinasanto” ken “pannakapasanto.” Ania ti masursurom manipud kadagiti sinurat ni Pablo maipapan kadagiti kaipapanan dagitoy a balikas? Kasano a matulongannaka ti Mangisalakan nga agbalin a nasansantuan ken ad-adda a napasanto?

Kitaen met iti Pangiwanwan iti Nasantuan a Kasuratan, “Nasantuan,” “Pannakapasanto,” scriptures.ChurchofJesusChrist.org.

1 Taga Tesalonica 4:16–18; 5:1–10; 2 Taga Tesalonica 1:4–10

No napudno ken managsiputak, nakasaganaakto para iti Maikadua a Yaay ti Mangisalakan.

Iti 1 Taga Tesalonica 5:1–10, inaramat ni Pablo ti sumagmamano a metapora a mangisuro maipapan iti panawen a panagsublinto ni Jesus iti daga. Bayat ti panagadalmo kadagitoy a metapora, ibilangmo ti panangisurat kadagiti impresion nga umay kenka maipapan iti Maikadua a Yaay ni Jesucristo:

• “Kas mannanakaw iti rabii”:

• “Panagpasikal ti maysa a babai a masikog”:

• Dadduma pay a metapora a masarakam:

Ania dagiti mainayon a kinapudno ti masursurom maipapan iti Maikadua a Yaay ni Jesucristo manipud iti 1 Taga Tesalonica 4:16–18; 5:1–10; 2 Taga Tesalonica 1:4–10? Ania ti nangguyugoy kenka nga aramidem nga agsiput ken agsagana para iti yaay ti Mangisalakan?

Kitaen met iti D. Todd Christofferson, “Preparing for the Lord’s Return,” Liahona, Mayo 2019, 81–84.

2 Taga Tesalonica 2

Ti ikakalilis iti kinapudno, wenno pannakatnag manipud iti kinapudno, ti naipadto a mapasamak sakbay ti Maikadua a Yaay.

Iti baet ti kumarkaro a panagidadanes, adu kadagiti Santo iti Tesalonica ti namati nga asidegen ti Maikadua a Yaay ti Mangisalakan. Ngem ammo ni Pablo a sakbay a nagsubli ni Jesus iti daga addanto maysa nga ikakalilis iti kinapudno—maysa a panagalsa wenno “pannakatnag” manipud iti kinapudno (kitaen iti 2 Taga Tesalonica 2:1–4). Mabalinmo a paunegen ti pannakaawatmo iti Dakkel nga Ikakalilis iti Kinapudno—ken iti panangbigbigmo iti pateg iti Pannakaisubli—babaen ti panangutobmo iti sumagmamano kadagiti sumaganad:

• Nasantuan a kasuratan a nangipadto ti Ikakalilis iti Kinapudno: Isaias 24:5; Amos 8:11–12; Mateo 24:4–14; 2 Timoteo 4:3–4

• Nasantuan a kasuratan a mangipakita iti Ikakalilis iti Kinapudno a nangrugin idi panawen ni Pablo: Dagiti Aramid 20:28–30; Taga Galacia 1:6–7; 1 Timoteo 1:5–7

• Dagiti pammaliiw dagiti Kristiano a repormista maipapan iti Dakkel nga Ikakalilis iti Kinapudno:

  Martin Luther: “Saanko a kinalikaguman ti mangreporma iti Simbaan a mainugot kadagiti Nasantuan a Kasuratan. … Kunak laeng a nagsardengen nga agtalinaed ti Kristianismo kadagiti tao a nasken koma a mangtaginayon iti daytoy” (iti E. G. Schweibert, Luther and His Times: The Reformation from a New Perspective [1950], 590).

  Roger Williams: “Ti ikakalilis iti kinapudno … pinagrupsana ti amin ta awan ti mabalin a maipasubli manipud iti dayta nga ikakalilis iti kinapudno agingga a saan a mangibaon ni Cristo kadagiti baro nga apostol tapno agipasdek manen kadagiti baro a simbaan (iti Philip Schaff, The Creeds of Christendom [1877], 851).

Kitaen met iti 2 Nephi 28; Gospel Topics, “Apostasy,” topics.ChurchofJesusChrist.org.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

1 Taga Tesalonica 3:9–13.Ania ti makaawis kenka maipapan iti rikna ni Pablo para kadagiti gagayyemna? Kasano a mabalintayo a “dumakkel ken aduan iti ayat iti maysa ken maysa”? (bersikulo 12).

1 Taga Tesalonica 4:13–18.Ania dagiti ragup ti balikas kadagitoy a bersikulo maipapan iti Panagungar a mangted kenka iti liwliwa?

1 Taga Tesalonica 5:14–25.Bayat ti panangrebyum iti balakad ni Pablo iti 1 Taga Tesalonica 5:14–25, awisem ti tunggal miembro ti pamilia a mangsapul iti maysa a ragup ti balikas a mabalin nga ipamaysa ti pamiliam. Mangsapul kadagiti managpartuat a wagas tapno i-display dagitoy a ragup ti balikas iti pagtaengam kas maysa a palagip. Kas pagarigan, mabalin a sapulen wenno idrowing ti tunggal tao dagiti ladawan a mangipakita wenno mangaramat iti ragup ti balikas a pilienna.

2 Taga Tesalonica 3:13.Mariknatayo kadi ti “maupay nga agaramid iti naimbag”—nalabit a matalipupostayo, gapu kadagiti dawdawaten a kasapulan iti kinadisipulo? Ania ti mangtulong kadatayo no mariknatayo ti kastoy? (Kitaen iti Taga Galacia 6:9; Doktrina ken Katulagan 64:33.) Kasano a makapagtitinnulongtayo iti maysa ken maysa no mapasamak daytoy?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I’m Trying to Be like Jesus,” Children’s Songbook, 78–79.

Panangpadur-as iti Bukod a Panagadal

Agkalikagum a maaddaan iti paltiing iti inaldaw. “Masansan a sumangbay ti paltiing iti ‘tunggal binatog’ (2 Nephi 28:30), saan nga iti mamimpinsan. … Saanmo a pagarupen ti [panagadal iti ebanghelio] a kas maysa a banag a pagbubosam iti orasmo no di ketdi maysa a banag a kanayon nga ar-aramidem” (Panangisuro iti Wagas ti Mangisalakan, 12).

Ni Cristo kadagiti ulep

Ni Nagungar a Cristo, ni Robert T. Barret