Ni Jesucristo nga umis-isem bayat ti pannakitugawna kadagiti umis-isem nga ubbing

Naan-anay nga Ayat, ni Del Parson

Nobiembre 27–Disiembre 3

1–3 Juan; Judas

“Ti Dios Isu ti Ayat”

Mangisuro dagiti Surat ni Juan ken Judas maipapan iti ayat ken silaw ti Nailangitan nga Ama. Bayat ti panagadalmo iti daytoy a lawas, utobem no apay a kasapulan dagiti ubbing a sursuruam ti lawag ken ayatna iti biagda. Laglagipem nga ibilang ti amin nga aktibidad iti daytoy a balabala, saan laeng a dagiti nailista iti baba ti grupo-ti-edad a sursuruam.

icon iti panagbibinninglay

Yawis ti Panagbibinninglay

Awisem dagiti ubbing a mangibinglay iti no kasano a nariknada ti ayat ti Nailangitan nga Ama ken ni Jesus wenno no apay iti panagkunada a maipada iti maysa a lawag ti Nailangitan nga Ama ken ni Jesus.

icon iti panangisuro

Isuro ti Doktrina: In-inaudi nga Ubbing

1 Juan 1:5–7; 2:8–11

Mangisangbay iti silaw iti biagko ti panangsurotko ken ni Jesus.

Insurat ni Juan maipapan iti silaw a mangisuro maipapan iti impluensia ti Nailangitan nga Ama ken Jesus iti biagtayo. Ibilangmo no kasano a matulongam dagiti ubbing a mangsursuro maipapan iti silaw nga idiayada.

Dagiti Mabalin nga Aktibidad

• Kiddawen kadagiti ubbing a manginagan kadagiti banag a mangted iti lawag. Tulongam ida a makaawat kadagiti pagimbagan ti lawag, kas iti panangtulong a mangpadakkel kadagiti mulmula, a mangpalugod kadatayo a makakita, ken mangted iti bara. Tapno maawatan no kasano a mangyeg ni Jesus kadatayo iti lawag, mabalinda ti agsisinnublat a mangsilaw iti flashlight iti maysa a ladawan ni Jesucristo bayat ti panangisaoda iti, “Ti Dios Isu ti silaw” (1 Juan 1:5). Paneknekam a makaisangbay iti lawag iti biagtayo ti Nailangitan nga Ama ken ni Jesucristo no padasentayo a suroten no ania ti isaoda.

• Awisem dagiti ubbing nga agsisinnublat iti panangiggem iti maysa a ladawan ti bombilia wenno kandela. No iggaman ti tunggal ubing ti ladawan, tulongam isuna a mangpanunot iti maysa a wagas a pakaisangbayantayo ti lawag ni Cristo iti biagtayo.

1 Juan 4:10–11, 20–21

Ipakitak ti panagayatko iti Dios no ipakitak ti panagayatko iti dadduma.

Tulongam dagiti ubbing a mangkita iti pagnaigan ti ayat a mariknada para iti Nailangitan nga Ama ken ti ayat nga ipakitada kadagiti annakna.

Dagiti Mabalin nga Aktibidad

• Ibasam ti 1 Juan 4:11 kadagiti ubbing, ken kansionen ti maysa a kanta maipapan iti ayat ti Dios, kas iti “My Heavenly Father Loves Me” (Children’s Songbook, 228). Kiddawem iti sumagmamano nga ubbing a mangibinglay iti no kasano nga ammoda nga ay-ayaten ida ti Nailangitan nga Ama. Kalpasan ti tunggal sungbat, awisem dagiti ubbing nga arakupenda ti bagbagida ket isaoda ti, “Ti Dios isu ti ayat, ket ay-ayatennak ti Dios.”

• Ibasam ti 1 Juan 4:21 kadagiti ubbing. Awisem ida a mangisarita wenno mangyakem iti nadumaduma a wagas a pangipakitaanda iti ayat iti maysa a gayyem, kas iti panangarakup wenno panangaramid ti maysa a kard. Kasano a mangiparikna dagitoy a banag kadagiti gagayyemtayo? Kasano ti rikna ti Nailangitan nga Ama no agaramidtayo iti nasayaat a banag para iti dadduma?

1 Juan 2:3–5; 5:3

Ipakitak ti ayatko iti Dios no agtungpalak kadagiti bilinna.

Insuro ni Juan a “saan a nadagsen dagiti bilin ti Dios” (1 Juan 5:3). Ketdi, maysa a wagas a panangyebkas iti ayat Kenkuana ti panangsurot kadagiti bilinna.

Dagiti Mabalin nga Aktibidad

• Basaem ti 1 Juan 5:3, ket kiddawem kadagiti ubbing a dumngeg no ania ti kuna daytoy a bersikulo maipapan iti no kasano a maipakitatayo nga ay-ayatentayo ti Dios. Awisem dagiti ubbing a manginagan iti adu a bilin agingga a kabaelanda. Ania ti mariknatayo no tungpalentayo dagiti bilin ti Nailangitan nga Ama?

• Awisem dagiti ubbing a mangidrowing iti maysa a ladawan a mangipakpakita iti maysa a wagas a mabalin a pangipakitaanda iti Nailangitan nga Ama nga ay-ayatenda Isuna. Kas pagarigan, mabalin nga agdrowingda iti maysa a ladawan ti bagbagida nga agtungtungpal iti maysa kadagiti bilin.

• Aggigiddan nga agkansion iti maysa a kanta maipapan iti panagtungpal, kas iti “Choose the Right Way” (Children’s Songbook, 160–61). Kasano ti riknatayo no agtungpaltayo?

icon iti panangisuro

Isuro ti Doktrina: In-inauna nga Ubbing

1 Juan 2:8–11; 4:7–8, 20–21

Ipakitak ti panagayatko iti Dios no ipakitak ti panagayatko iti dadduma.

Kasano a matulongam dagiti ubbing a makaawat a ti panagayat iti Dios iramanna ti panagayat kadagiti adda iti aglawlawtayo—uray pay dagiti tao a mabalin a naiduma kadatayo wenno narigat nga ayaten?

Dagiti Mabalin nga Aktibidad

• Kiddawen kadagiti ubbing nga iladawanda nga adda maysa a tao a kabarbaro a dumardar-ay iti pagadalanda wenno ward ket awan pay ti asino man nga am-ammona sadiay. Kasano ti mabalin a rikna daytoy a tao? Awisem ti maysa nga ubing a mangbasa iti 1 Juan 4:7–8. Ania ti isingasing daytoy a bersikulo maipapan iti no kasano ti nasken a panangtratotayo iti daytoy a tao? Mangiburay iti kasta met la a senario, wenno kiddawem kadagiti ubbing a mangpanunot kadagiti situasion a mabalin a pakaaddaanda iti gundaway a mangipakita iti ayat.

• Kiddawem kadagiti ubbing a mangbasa iti 1 Juan 4:7–8, 20–21, ket awisem ida a saggaysa a mangisurat iti maysa a binatog a manggupgop iti no ania iti panagkunada ti kapatgan nga adalen kadagitoy a bersikulo. Kalpasan nga iburayda dagiti binatogda, ibinglaymo ti estoria manipud iti biagmo wenno manipud iti Friend wenno Liahona a magasin a mariknam a mangiladawan no ania ti isuro dagitoy a bersikulo (kitaen, kas pagarigan, iti “Say Hello to Halim,” Friend, Hunio 2019, 8–9; wenno Liahona, Hunio 2019, F18–F19). Awisem dagiti ubbing a mangibinglay kadagiti bukodda a pagarigan. Kasano a maipakitatayo ti ayattayo kadagiti adda iti aglawlawtayo?

1 Juan 2:3–6; 4:17–18; 5:2–5

Ipakitak ti ayatko iti Dios no agtungpalak kadagiti bilinna.

Mabalin a nalaklaka ti panagtungpal kadagiti bilin no maawatantayo dagiti kinapudno a maisursuro iti 1 Juan 5:3. Kasano a matulongam dagiti ubbing a mangkita kadagiti bilin a saan a dadagsen ngem ketdi kas gundaway a pangyebkasan iti ayatda para iti Dios?

Dagiti Mabalin nga Aktibidad

• Awisem dagiti ubbing a mangilista iti pisarra kadagiti wagas a mabalinda a pangipakitaan iti Dios nga ay-ayatenda Isuna. Kalpasanna aggigiddankayo a mangbasa iti 1 Juan 2:5–6; 5:2–5 para kadagiti nayon pay a kapanunotan. Kasano a ti panagtungpal kadagiti bilin ket mangipakita nga ay-ayatentayo ti Nailangitan nga Ama?

maysa a pamilia nga aggigiddan a nakaparintumeng nga agkarkararag

Makatulong kadatayo ti panagtungpal kadagiti bilin ti Dios a mangparmek iti lubong.

• Basaem ti 1 Juan 4:17, ket ilawlawag kadagiti ubbing a tapno “adda kinatured iti aldaw ti pannakaukom” kaipapananna ti maaddaan ti panagtalek ken kappia inton tumakderda iti imatang ti Dios tapno maukom. Ania ti isuro daytoy a bersikulo a kasapulantayo nga aramiden tapno maaddaan iti daytoy a panagtalek? Ania dagiti sumagmamano a banag a maaramidtayo itan tapno agbalin a managtalek iti sango ti Dios?

Judas 1:18–22

Makapagbalinak a napudno uray no pagang-angawandak dagiti dadduma.

Gapu ta datayo dagiti disipulo ni Jesucristo, no dadduma pagang-angawandatayo dagiti dadduma gapu kadagiti pammatitayo wenno ti wagas ti panagbiagtayo. Naglaon dagitoy a bersikulo iti balakad ni Judas maipapan iti no kasano nga agtalinaedtayo a napudno kadagiti kasta a situasion.

Dagiti Mabalin nga Aktibidad

• Kiddawen kadagiti ubbing a mangibinglay kadagiti panawen idi pinagang-angawan ida dagiti dadduma gapu iti panagaramidda iti umno. Awisem dagiti ubbing a mangbasa iti Judas 1:18–22 ket sapulenda ditoy ti no kasano a makapagtalinaedtayo a napudno no uy-uyawen wenno pagang-angawandatayo dagiti dadduma. Isurat iti pisarra no ania ti masarakanda, ket paglilinnawagan dagiti wagas a mabalin a pakasurotanda iti daytoy a balakad.

• Gupgopem ti tagtagainep ni Lehi (kitaen ti 1 Nephi 8:1–35), nga idawdawat iti sumagmamano nga ubbing a mangbasa kadagiti bersikulo manipud iti 1 Nephi 8:26–28, 33. Ilawlawag no kasano a maipada dagiti tao iti dakkel ken nalawa a pasdek kadagiti aguy-uyaw nga insarita ni Judas. Ania ti maaramidtayo tapno saandatayo a maimpluensiaan dagiti mangkatkatawa kadatayo wenno saan nga umanamong ti pammatitayo? (kitaen iti 1 Nephi 8:30, 33).

icon iti panagsursuro

Yallukoy ti Panagsursuro iti Pagtaengan

Allukoyem dagiti ubbing a mangplano nga agaramid iti maysa a banag a pangibinglayanda iti lawagda kadagiti pamiliada.

Panangpadur-as iti Panangisurotayo

Naregta dagiti ubbing. No dadduma mabalin a mariknam a ti kinaregta dagiti ubbing ti maysa a pakasingaan iti panagsursuro. Ngem mabalinmo a padur-asen dagiti naregta a kinataoda babaen ti panangawismo kadakuada a mangyakem, mangidrowing, wenno agkanta maipapan iti maysa a pagbatayan ti ebanghelio. (Kitaen iti Panangisuro iti Wagas ti Mangisalakan,25–26.)

panid ti aktibidad: mangyeg iti lawag iti biagko ti panangsurotko ken ni Jesus