Bassit a Kordero, ni Jenedy Paige

Disiembre 18–24

Paskua

“Naimbag a Damag ti Dakkel a Ragsak”

Maysa a gundaway daytoy nga adalen a mangtulong kadagiti ubbing a sursuruam a mangrambak iti pannakayanak, biag, ken mision ti Mangisalakan iti panawen ti Paskua. Laglagipem daytoy a kapanunotan bayat ti panagsaganam a mangisuro.

Yawis ti Panagbibinninglay

I-display ti ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket awisem dagiti ubbing a mangibinglay no ania ti ammoda maipapan ti pannakayanak ti Mangisalakan.

Isuro ti Doktrina: In-inaudi nga Ubbing

Mateo 2:1–12; Lucas 2:1–14

Immay ni Jesucristo iti daga kas maysa a maladaga.

Pagaayat dagiti ubbing ti estoria maipapan iti pannakayanak ni Jesucristo. Ania dagiti kinapudno a mainaig iti doktina a makitam iti daytoy nga estoria a mariknam a nasken a maawatan dagiti ubbing?

Dagiti Mabalin nga Aktibidad

• Ibasam ti Lucas 2:1–14 kadagiti ubbing, wenno iladawam dagiti pasamak kadagitoy a bersikulo babaen ti panagibasarmo itiKapitulo 5: Nayanak ni Jesucristo” Dagiti Estoria iti Baro a Tulag, 13–15, wenno iti maitutop a video iti ChurchofJesusChrist.org). Awisem dagiti ubbing nga agdrowingda kadagiti ladawan dagitoy a pasamak ken usarenda dagiti ladawan a mangisarita iti estoria iti bukodda. Apay a naragsaktayo a nayanak ni Jesus?

• Kiddawen kadagiti ubbing nga isaritada kenka ti estoria maipapan kadagiti Mamasirib a Lalaki a nangsursurot iti bituen a nangsapul ken ni Jesus. No kasapulanda ti mapalagipan iti estoria, kitaen iti Mateo 2:1–12 wenno “Kapitulo 7: Dagiti Mamasirib a Lalaki” (iti Dagiti Estoria iti Baro a Tulag, 18, wenno ti maitutop video iti ChurchofJesusChrist.org). Ilemmengmo ti maysa a ladawan ni Jesus iti siled. Mangidrowing wenno manggettengka iti maysa a papel a sinan-bituen ket ingato daytoy iti tangatang. Awisem dagiti ubbing nga agpammarang a mamasirib a tao a mangibakbaklay kadagiti sagut, ket iturong ida iti lawlaw ti siled a mangsapul ken ni Jesus. Tulongam dagiti ubbing nga agpanunot iti sumagmamano a sagut a mabalintayo nga ited ken ni Jesus.

• Kansionen ti sumagmamano a himno wenno kanta kadagiti ubbing (kitaen iti Hymns, dagiti num. 201–14; Children’s Songbook, 34–54). Kiddawem kadakuada a mangibinglay iti maysa a banag nga isuro ti kanta a mariknada a napateg a maammuan.

Getsemani, ni J. Kirk Richards

Juan 3:16

Inaramid ni Jesucristo a makipagnaedakto manen iti Nailangitan nga Ama iti maysa nga aldaw.

Maawatan kadi dagiti ubbing a sursuruam no apay nga immay ni Jesucristo iti daga? Maaddaan iti panawen nga agutob no ania ti inaramid ti Mangisalakan a personal kenka ken no kasano a matulongam dagiti ubbing a makaawat no ania ti inaramidna para kadakuada.

Dagiti Mabalin nga Aktibidad

• Mangitugot iti maysa a nabungon a sagut iti klase nga addaan iti maysa a ladawan ni Jesucristo iti unegna. Ikkam iti tag ti sagut a nakasurat ti “Juan 3:16” iti daytoy, ket ibagam kadagiti ubbing a maysa daytoy a pamugtuan maipapan iti no ania daytoy a sagut. Basaem ti Juan 3:16 kadagiti ubbing, ket awisem ida a mangpugto no ania ti sagut ket luktam daytoy. Apay nga imbaon ti Dios ti Anakna?

• Tulongam dagiti ubbing a mangileppas iti daytoy a binatog: “Immay ni Jesucristo iti daga tapno .” Kalpasanna ipakitam ti ladawan a mainaig iti pangsubbot a sakripisio, ipapatay, ken Panagungar ti Mangisalakan (kitaen iti Libro ti Arte ti Ebanghelio, dagiti num. 56–59), ket isaritam biit maipapan kadagitoy a pasamak. Mabalinyo nga aggigiddan a kansionen ti maysa a kanta maipapan iti no apay nga immay ni Jesus iti daga, kas iti “He Sent His Son” (Children’s Songbook, 34–35). Paneknekam ti maipapan ken ni Jesucristo ken no ania ti inaramidna para kenka.

Isuro ti Doktrina: In-inauna nga Ubbing

Mateo 1:18–25; 2:1–12; Lucas 1:26–38; 2:1–20

Immay ni Jesucristo iti daga kas maysa a maladaga.

Kasano a matulongam dagiti ubbing a mangipamaysa ken ni Jesucristo iti Paskua?

Dagiti Mabalin nga Aktibidad

• Awisem ti maysa kadagiti ubbing a basaenna ti maipapan kadagiti pasamak a mainaig iti pannakayanak ti Mangisalakan (kitaen iti Mateo 1:18–25; 2:1–12; Lucas 1:26–38; 2:1–20). Kiddawem kadagiti dadduma pay nga ubbing nga agsisinnublat nga agdrowing kadagiti ladawan iti pisarra maipapan iti no ania ti iladladawan dagiti nasantuan a kasuratan. Ania ti isuro kadatayo dagitoy nga estoria maipapan ken ni Jesucristo?

• Awisem dagiti ubbing a mangisurat iti sumagmamano a panid ti papel kadagiti banag a maaramidda a makatulong kadakuada a mangipamaysa iti Mangisalakan kabayatan ti panawen ti Paskua. (Mabalinda ti mangala kadagiti kapanunotan manipud iti video “Good Tidings of Great Joy: The Birth of Jesus Christ” iti ChurchofJesusChrist.org.) Awisen ida a mangibinglay no ania ti insuratda. Allukoyem dagiti ubbing a mangyawid kadagiti papel ket aramidenda kadagiti pamiliada dagiti singasing nga insuratda kadagiti papel.

• Agkansion kadagiti kanta maipapan iti Mangisalakan (kitaen iti Children’s Songbook, 34–54; Hymns, dagiti num. 201–14), ket awisem dagiti ubbing a mangibinglay iti paggugustoda a linia wenno ragup dagiti balikas manipud kadagiti kanta.

Juan 3:16

Inaramid ni Jesucristo a makipagnaedakto manen iti Nailangitan nga Ama iti maysa nga aldaw.

Kasano a matulongam dagiti ubbing a mangrebyu iti no ania ti nasursuroda iti daytoy a tawen ken maawatanda no apay a kasapulanda ni Jesucristo iti biagda?

Dagiti Mabalin nga Aktibidad

• Suratam ti dua a panid ti papel iti Asino ni Jesucristo? Ken ti sabali pay iti Apay nga immay Isuna iti daga? ket isab-itmo dagitoy iti nadumaduma a diding iti siled ti klase. Awisem ti tunggal ubing a mangbasa iti maysa kadagiti sumaganad a nasantuan a kasuratan: Mateo 16:15–16; Juan 3:16; 1 Nephi 10:4; Mosiah 3:8; Alma 7:10–13; 3 Nephi 27:14–15. Kiddawen kadagiti ubbing a mangsapul kadagiti sungbat, iti nasantuan a kasuratan a nabasada iti dua a saludsod kadagiti diding. Awisem ida a mangisurat kadagiti sungbatda ket isab-itda dagitoy iti diding iti batog ti maitutop a saludsod. Kasano a maipakitatayo ti panagyamantayo iti inaramid ni Jesucristo para kadatayo?

• Awisem dagiti ubbing a mangilista iti pisarra ti amin a nagan wenno pangawag ken ni Jesus a mapanunotda (kitaen iti Pangiwanwan iti Nasantuan a Kasuratan, “Jesucristo, dagiti nagan ni”). Ania ti isuro kadatayo dagitoy a nagan a maipapan ken ni Jesucristo ken iti misionna? Apay a kasapulantayo ni Jesucristo iti biagtayo? Tapno matulongan a masungbatan daytoy a saludsod, ipabuyam ti video “Why We Need a Savior—A Christmas Message about Our Savior Jesus Christ” (ChurchofJesusChrist.org).

Yallukoy ti Panagsursuro iti Pagtaengan

Allukoyem dagiti ubbing a mangsapul ti uray maysa laeng a wagas a pakapagserbian ti maysa a tao wenno ad-adda a pakayasidegan ken ni Jesucristo itoy a Paskua.

Panangpadur-as iti Panangisurotayo

Awisem dagiti ubbing ti mangibinglay iti no ania ti masursuroda. Mabalin a maaddaan dagiti ubbing iti napigsa nga impluensia para iti pagimbagan dagiti pamiliada. Allukoyem dagiti ubbing a sursuruam a mangibinglay kadagiti pamiliada iti maysa a banag a nasursuroda iti Primary. (Kitaen iti Panangisuro iti Wagas ti Mangisalakan,30.)