Bassit a Karnero, ni Jenedy Paige

Disiembre 18–24

Paskua

“Naimbag a Damag ti Dakkel a Ragsak”

Ibilangmo no kasano a makatulong ti panagutobmo iti pannakayanak ken mision ti Mangisalakan tapno makaisangbay iti espiritu ti talna ken kinasagrado iti panawen ti Paskua.

Isuratmo dagiti Impresionmo

Apay a mangisangbay iti kasta a dakkel a ragsak ti pannakayanak ti maysa a maladaga? Nalabit a gapu ta ti maysa a kayyanak a maladaga mabalin a maysa a simbolo ti namnama. Adda maysa a banag maipapan iti baro a biag a napnuan kadagiti posibilidad a mangawis kadatayo nga agutob maipanggep iti no ania ti maipaay a biag para iti dayta nga ubing ken no ania dagiti nakaskasdaaw a banag nga ipatungpalnanto. Saan nga iti kaano man a napudpudnon daytoy ngem iti pannakaipasngay ti Anak ti Dios, ni Jesucristo. Saan nga iti kaano man ad-adun ti namnama a naited iti maysa nga ubing, ken saan nga iti kaano man adda idin maysa a nayanak a naaddaan iti adu unay a kari.

Idi inawis ti maysa nga anghel dagiti pastor a mangsapul iti maysa a kayyanak nga ubing iti maysa a kulluong, inikkanna pay ida iti mensahe maipapan iti dayta nga ubing. Maysa a mensahe ti namnama—nga immay daytoy a maladaga iti daga tapno mangipatungpal iti sagrado a mision. Inaramid dagiti pastor ti mensaheda nga “impakaammoda … ket amin dagiti nakangngeg nagsiddaawda kadagiti insao kadakuada dagiti pastor. Ngem sinalimetmetan amin ni Maria dagitoy a bambanag, ket pinampanunotna iti pusona” (Lucas 2:17–19). Nalabit a nasayaat a tuladem ti pagwadan ni Maria iti daytoy a Paskua: utobem iti pusom dagiti banag a nasursurom maipapan iti Mangisalakan iti daytoy a tawen. Kasano nga impatungpalna ti misionna a mangsubbot kadagiti nabasam a pakasaritaanna? Ken napatpateg pay, kasano a nagbalbaliw ti biagmo gapu iti misionna? Kalpasanna mabalin a mariknam a naparegtaka a mangtulad iti pagwadan dagiti pastor: kasano a ‘maipakaammom” ti inaramiden ni Jesucristo para kenka?

Dagiti Kapanunotan para iti Bukod a Panagadal iti Nasantuan a Kasuratan

Mateo 1:18–25; 2:1–12; Lucas 1:26–38; 2:1–20

Bimmaba ni Jesucristo tapno mayanak kadatayo iti daga.

Uray no namin-adu idin a nabasam wenno nangngegamon ti estoria ti pannakayanak ni Jesucristo, adalem daytoy itan a kanito a pampanunotem daytoy: “Ti Paskua saan laeng a panangrambak no kasano nga immay ni Jesus iti lubong no di ketdi ti panangammo pay no asino Isuna—ti Apo ken Mangisalakantayo, ni Jesucristo—ken no apay nga immay Isuna” (Craig C. Christensen, “The Fulness of the Story of Christmas” First Presidency Christmas devotional, Dis. 4, 2016], broadcasts.ChurchofJesusChrist.org).

Ania ti ammom maipapan ken ni Jesucristo sakbay ti pannakayanakna? (kitaen, kas pagarigan, iti Juan 17:5; Mosiah 3:5; Doktrina ken Katulagan 76:13–14, 20–24; Moises 4:2). Kasano nga apektuan daytoy a pannakaammo ti marikriknam no kasta a basbasaem ti maipapan iti pannakaipasngayna?

Ania ti ammom maipapan no apay nga immay ni Jesucristo iti daga? (kitaen, kas pagarigan, iti Lucas 4:16–21; Juan 3:16–17; 3 Nephi 27:13–16; Doktrina ken Katulagan 20:20–28). Kasano nga apektuan daytoy a pannakaammo ti marikriknam maipapan iti Mangisalakan? Kasano nga apektuan daytoy ti wagas ti panagbiagmo?

Kitaen met iti 2 Taga Corinto 8:9; Hebreo 2:7–18; 1 Nephi 11:13–33; Alma 7:10–13; The Nativity” (video, ChurchofJesusChrist.org.

1 Taga Corinto 15:21–26; Taga Colosas 1:12–22; 1 Pedro 2:21–25

Impatungpal ni Jesucristo ti misionna ket inaramidna daytoy a kabalinak ti agtawid ti biag nga agnanayon.

Nupay nalikmutan ti estoria ti pannakayanak ni Cristo kadagiti nakaskasdaaw a pasamak, ti pannakapasngayna ket maysa lang a gagangay a pannakayanak no saan a gapu iti naindaklan nga aramid nga impatungpalna idi agangay iti biagna. Kas iti panangilawlawag ni Presidente Gordon B. Hinckley iti daytoy, “Ti maladaga a ni Jesus iti Betlehem nagbalin laeng a sabali a maladaga nga awanan iti pannubbot ni Cristo iti Getsemani ken Kalbario, ken ti naballigian a kinapudno ti Panagungar” (“The Wondrous and True Story of Christmas,” Ensign, Dis. 2000, 5).

Getsemani, ni J. Kirk Richards

Ti pakakitaan iti nadiosan a mision ti Mangisalakan ken ti nabileg nga ayatna para iti dadduma masarakan iti intero a Baro a Tulag. Ania dagiti binatog wenno pakaammuan a mapanunotmo? Mabalinmo a sublian daytoy a resource wenno ti study journalmo ket irebyum ti sumagmamano kadagiti impresion nga insuratmo. Mabalinmo met a basaen ti 1 Taga Corinto 15:21–26; Taga Colosas 1:12–22; 1 Pedro 2:21–25 ket utobem no kasano a binendisionan ti Mangisalakan ken ti aramidna ti biagmo. Ania ti mariknam a nakaparegtaam a mangbalbaliw iti biagmo? Kasano a magun-odmonto ti bileg ti Mangisalakan?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 1:18–25; 2:1–12; Lucas 1:26–38; 2:1–20.Kasano a marambakam ti pannakayanak ni Jesucristo a kaduam ti pamiliam? Dagitoy ti sumagmamano a kapanunotan, wenno aramidem iti bukodmo a wagas:

• Aggigiddan a basaen wenno yakemyo dagiti paset ti estoria ti Pannakayanak.

• Buyaen ti video “The Christ Child” (ChurchofJesusChrist.org).

• Sukisoken dagiti sumagmamano a resources iti “Jesus Christ” koleksion iti Gospel Library, nangruna iti benneg a napauluan iti “His Birth (Christmas).”

• Buyaem ti maysa a First Presidency Christmas devotional (broadcasts.ChurchofJesusChrist.org).

• Aggigiddan a mangkanta kadagiti himno ti Paskua, wenno mangpili kadagiti kaarruba wenno gagayyem a sarungkaran ken kantaan ida (kitaen iti Hymns, nos. 201–14).

• Aramiden ti maysa a serbisio.

• Idawatmo kadagiti miembro ti pamilia a mangsapul kadagiti detalye ti estoria ti Pannakayanak a mangted kadakuada kadagiti kapanunotan para kadagiti arkos wenno dekorasion a mabalinda nga aramiden a mangipalagip kadakuada maipapan ken ni Jesucristo.

1 Taga Corinto 15:21–26; Taga Colosas 1:12–22; 1 Pedro 2:21–25.Apay nga agyamantayo a nayanak ni Jesucristo? Ania dagiti sagut nga intednan kadatayo? Kasano a maipakitatayo Kenkuana ti panagyamantayo? Mabalin ti pamiliam ti agkansion iti maysa a kanta maipapan iti misionna, kas iti “He Sent His Son” (Children’s Songbook, 34–35).

“Ti Sibibiag a Cristo: Ti Pammaneknek dagiti Apostol.”No kayatmo a tulongan ti pamiliam a mangipamaysa iti Mangisalakan iti panawen ti Paskua, nalabit a mabalinyo ti mangbubos iti sumagmamano nga oras nga aggigiddan a mangbasa ken mangadal iti “Ti Sibibiag a Cristo: Ti Pammaneknek dagiti Apostol” (ChurchofJesusChrist.org). Nalabit mabalinmo a yulo dagiti binatog manipud iti “Ti Sibibiag a Cristo” wenno sapulem dagiti panangiladawan ti kabibiag ti Mangisalakan iti Baro a Tulag a mangsuporta kadagiti palawag ditoy. Mabalinmo pay nga awisen ti tunggal miembro ti pamilia nga isurat ti bukodna a pammaneknek ken ni Jesucristo ken, no matignay, ibasana daytoy iti pamilia.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Once within a Lowly Stable,” Children’s Songbook, 41.

Panangpadur-as iti Bukod a Panagadal

Sapulem ni Jesucristo. Isurodatayo dagiti nasantuan a kasuratan nga amin a banag paneknekanda ni Jesucristo (kitaen iti Moises 6:62–63), isu a nasken a sapulentayo Kenkuana iti amin a banag. Bayat ti panangbasam kadagiti nasantuan a kasuratan, ibilangmo ti panangisurat wenno panangmarka kadagiti bersikulo a mangisuro kenka maipapan Kenkuana. Maaddaan iti panawen kadagiti aldaw a mangpaspasungad iti Paskua tapno magsapul kadagiti banag iti aglawlawmo a mangipaneknek maipapan ken ni Jesucristo.

Ti Pannakayanak, ni Brian Call