“Disiembre 25–31. Apocalipsis 15–22: ‘Ti Agballiginto Tawidennanto Amin Dagitoy a Bambanag,’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Disiembre 25–31. Apocalipsis 12–22,” Umaykayo, Sumurot Kaniak—Para kadagiti Indibidual ken Pamilia: 2023
Ti Siudad nga Agnanayon, ni Keith Larson
Disiembre 25–31
Apocalipsis 15–22
“Ti Agballiginto Tawidennanto Amin Dagitoy a Bambanag”
No dadduma ti kadakkelan a tubeng iti panagsursuro ket ti panangipapan a ditayo kasapulan ti agsursuro—gapu ta ammotayon. Bayat ti panagbasam kadagiti nasantuan a kasuratan, agbalinka a nakasagana kadagiti nalawag a pannakaammo ken pannakaawat a kayat ti Apo nga ited kenka.
Isuratmo dagiti Impresionmo
No malagipmo, mangrugi ti libro ti Apocalipsis iti panangipakdaar ti Mangisalakan iti Bagina a “ti pangrugian ken ti paggibusan” (Apocalipsis 1:8). Siaannatup, aggibus daytoy kadagiti isu met la a balikas: “Siak … ti pangrugian ken ti paggibusan” (Apocalipsis 22:13). Ngem ania ti kaipapanan dayta? Ti pangrugian ken ti paggibusan ti ania? Sibibileg a paneknekan ti Apocalipsis a ni Jesucristo isu ti pangrugian ken paggibusan ti amin a banag—ti naindaklan, nasakup a pasamak ti panagbiag ken pannakaisalakan ti tao. isu “ti Kordero a napapatay manipud iti pamuon ti lubong” (Apocalipsis 13:8). Ken Isu ti Ari dagiti ari a mangigibus iti kinadangkes, ladingit, ken uray pay ti patay mismo ken mangpadpadaan iti “baro a langit ken baro a daga” (Apocalipsis 21:1).
Ngem sakbay a dumteng ti baro a langit ken baro a daga, adu dagiti parmekentayo: dagiti angol, gubat, ken nakaro a kinadangkes—amin dagitoy nga iladawan ti Apocalipsis a silalawag. Ngem adda met kadatayo ni Jesucristo kabayatan daytoy a paset. Isu ti “naraniag a bituen ti agsapa” a mangsilnag iti nalidem a tangatang kas maysa a kari nga asidegen ti agsipnget (Apocalipsis 22:16). Ket daytoy ket umayen iti kabiitan. Isu ket umayen. Uray no awisennatayo, “Umaykayo kaniak” (Mateo 11:28), umay Isuna met kadatayo. “Umayak a sidadaras,” impakdaarna. Ken addaan iti namnama ken pammati a napatarnaw kadagiti apuy ti rigat iti ud-udina nga aldaw, sumungbattayo iti “Uray no kasta, umayka, Apo Jesus” (Apocalipsis 22:20).
Dagiti Kapanunotan para iti Bukod a Panagadal iti Nasantuan a Kasuratan
Awisennak ti Apo a pumanaw iti Babilonia ken tawidek “ti nasantuan a siudad.”
Kalpasan ti panangsaksi iti panagdadael ken pagpeggadan dagiti maudi nga aldaw, nakita ni Juan ti masakbayan nga aldaw a mabalin a madagup iti panangipakdaar ti Apo “Adtoy, aramidek a baro ti amin a banag” (Apocalipsis 21:5). Maysa a wagas tapno maawatan ti kaipapanan dayta ket ti panangidasig iti panangiladawan ni Juan iti Babilonia, ti simbolo ti kinailubongan ken kinadangkes, (kitaen iti Apocalipsis 16–18), iti panangiladawanna iti baro a Jerusalem, simboliko ti celestial a gloria iti sidong ti Dios (kitaen iti Apocalipsis 21–22). Mabalin a makatulong kenka ti tsart iti baba:
|
Babilonia |
Baro a Jerusalem |
|---|---|
Babilonia | Baro a Jerusalem |
Babilonia | Baro a Jerusalem |
Babilonia | Baro a Jerusalem |
Babilonia | Baro a Jerusalem |
Babilonia | Baro a Jerusalem |
Ania dagiti dadduma pay a pagdudumaan a makitam?
Mabalinmo pay nga utoben no ania ti kayat a sawen kenka ti “rummuar iti” Babilonia (Apocalipsis 18:4). Ania ti masarakam iti Apocalipsis 21–22 a mangparegta nga aramidem daytoy?
Ti Maudi a Panangukom, ni John Scott
Makednganto ti amin nga annak ti Dios manipud iti libro ti biag.
Ipapanmo a maysa a nagsurat ti nangidiaya nga isuratna ti libro maipapan iti biagmo. Ania dagiti detalye wenno padas a kayatmo a mairaman? No naammuam a maisuratto pay dagiti masakbayan nga aramidmo, kasano nga irugim ti biagmo a maidumduma? Panunotem maipapan iti daytoy bayat ti panangbasam iti Apocalipsis 21–24 Ania ti namnamaem a maisuratto maipapan kenka iti libro ti biag? Kasano nga iladawam ti akem ti Mangisalakan iti libro ti biag? Iti opinionmo, apay a napateg a maawagan daytoy iti “ti libro ti biag ti Kordero”? (Apocalipsis 21:27).
No ti panangpanunot iti panagtakder iti sango ti Dios tapno maukom ket saan a mangpagin-awa kenka, ibilangmo ti panangbasa iti Apocalipsis 21:1–4. Iti panangibasar kadagitoy a bersikulo, kinuna ni Elder Dieter F. Uchtdorf:
“Agbalinto dayta nga Aldaw ti Panangukom a maysa nga aldaw ti asi ken ayat—maysa nga aldaw no maagasan dagiti agladladingit a puso, no masukatan dagiti lua ti panagladingit iti lua ti panagyaman, no maaramidto nga umno ti amin. Wen, addanto napalaus a panagladingit gapu iti basol. Wen, addanto panagbabawi ken uray pay nakaro a saem gapu kadagiti bidduttayo, kinamaagtayo, ken kinatangken ti panagpuspusotayo a nakaigapu iti pananglibtaw kadagiti gundaway para iti amang a dakdakkel pay a masakbayan.
“Ngem addaanak iti panagtalek a saantayto laeng a mapnek iti panangukom ti Dios; masdaawtayo ken matalipupostayonto pay iti awan patinggana a grasia, asi, ken kinamanagparabur, ken ayatna para kadatayo, nga annakna” (“O How Great the Plan of Our God!,” Liahona, Nob. 2016, 21).
Kasano nga apektuan dagitoy a kinapudno ti wagas a panangkitam iti Maudi a Panangukom? Ania ti iparegta kenka dagitoy a kinapudno a mangbalbaliw iti biagmo?
Kitaen met iti Pangiwanwan iti Nasantuan a Kasuratan, “Libro ti Biag.”
Kayat kadi a sawen dagitoy a bersikulo nga awanen ti ania man a mainayon a nasantuan a kasuratan malaksid iti Biblia?
Inlanad dagiti sumagmamano a tao iti Apocalipsis 22:18–19 kas maysa rason tapno saan a maawat ti Libro ni Mormon ken ti dadduma pay a nasantuan a kasuratan iti ud-udina nga aldaw. Mabalin pay a masarakam ti sungbat iti daytoy a panangsuppiat iti mensahe ni Elder Jeffrey R. Holland “My Words … Never Cease” (Liahona, Mayo 2008, 91–94).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Apocalipsis 15:2–4.Bayat ti panaglilinnawag ti pamiliam kadagitoy a bersikulo, a mangibasar iti “ti kanta ni Moises” ken ti “ti kanta ti Kordero,” mabalinmo a basaen ti kanta ni Moises iti Exodo 15:1–19, kasta met dagiti dadduma pay a kanta a nadakamat kadagiti nasantuan a kasuratan, kas iti Doktrina ken Katulagan 84:98–102. Apay a makarikna dagiti “agballigi iti animal” (Apocalipsis 15:2) nga agkankantada kadagiti kansion kas kadagitoy? Nalabit a mabalin nga agkanta ti pamiliam iti maysa a himno wenno kanta dagiti ubbing a pagdaydayaw.
-
Apocalipsis 19:7–9.Nalabit a mabalinmo a buyaen dagiti ladawan ti kallaysa manipud iti pakasaritaan ti pamiliam wenno pagsasaritaan maipapan iti maysa a panawen idi dimmar-ay ti pamiliam iti maysa a pasken ti kallaysa. Apay a ti kallaysa ti nasayaat a pangidasig iti katulagan ti Apo iti Simbaanna? (Kitaen met iti Mateo 22:1–14.)
-
Apocalipsis 20:2–3.Kasano a tulongannatayo ti 1 Nephi 22:26 tapno maawatan no ania ti mabalin a kaipapanan ti “pannakaigalut” ni Satanas?
-
Apocalipsis 22:1–4.Ania ti mabalin a kayat a sawen ti maaddaan iti nagan ti Mangisalakan iti muging[tayo]? (Apocalipsis 22:4; kitaen met iti Exodo 28:36–38; Mosiah 5:7–9; Alma 5:14; Moroni 4:3; Doktrina ken Katulagan 109:22; David A. Bednar, “Honorably Hold a Name and a Standing,” Liahona, Mayo 2009, 97–100).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “When He Comes Again,” Children’s Songbook, 82–83.
Panangpadur-as iti Panangisurotayo
Surnadam dagiti awis nga agtignay. “No surnadam ti maysa nga awis nga agtignay, ipakitam [kadagiti miembro ti pamiliam] nga ipatpategmo ida ken no kasano a pinaraburan ti ebanghelio ti biagda. Ikkam met ida iti gundaway a mangibinglay kadagiti padasda” (Panangisuro iti Wagas ti Mangisalakan, 35).
Ni Cristo iti nalabaga a roba nga agtugtugaw iti maysa a puraw a kabalio.