Apendiks

Panangisagana kadagiti Annakyo para iti Tungpal Biag iti Dana ti Katulagan ti Dios

Gapu ta ay-ayatennakayo, agtalek kadakayo, ken ammona ti potensialyo, inikkannakayo ti Nailangitan nga Ama iti gundaway a tumulong kadagiti annakyo a sumrek ken dumur-as iti dana ti katulaganna, ti dana nga agturong iti biag nga agnanayon (kitaen iti Doktrina ken Katulagan 68:25–28). Iraman daytoy ti panangtulongto kadakuada nga agsagana nga agaramid ken agtungpal kadagiti sagrado a katulagan kas iti katulagan ti panagbuniag ken dagiti katulagan a naaramid iti templo. Babaen kadagitoy a katulagan, ibegkesto dagiti annakyo ti bagbagida iti Mangisalakan, ni Jesucristo.

Adu dagiti wagas a mangisagana kadagiti annakyo para iti daytoy a panagdaliasat iti dana ti katulagan, ket tulongannakayto ti Nailangitan nga Ama a mangtakuat iti kasayaatan a wagas a tumulong kadakuada. Bayat ti panagkalikagumyo a maaddaan iti inspirasion, laglagipenyo a saan nga amin a panagsursuro ket mapasamak kabayatan dagiti naiskediul nga adalen. Kinapudnona, paset ti mamagbalin iti panagsursuro iti pagtaengan a nabileg unay ket ti gundaway nga agsursuro babaen ti pagwadan ken babaen kadagiti babassit, simple a kanito—ti kita a gagangay a mapasamak iti panagayus ti inaldaw a panagbiag. Kas met laeng a ti panangsurot iti dana ti katulagan ket agtultuloy, tungpal biag a proseso, kasta met ti panagsursuro maipapan iti dana ti katulagan. (Kitaen iti “Home and Family,” Teaching in the Savior’s Way [2022], 30–31.)

ina ken anak

Adu dagiti wagas tapno maisagana dagiti annakyo para iti panagdaliasatda iti dana ti katulagan ti Dios.

Iti baba ti sumagmamano a kapanunotan a mabalin a mangiturong iti ad-adu pay nga inspirasion. Masarakanyo dagiti nayon a kapanunotan para iti panangisuro kadagiti ubbing nga agtawen iti Primary iti “Panangisagana kadagiti Ubbing para iti Tungpal Biag iti Dana ti Katulagan ti Dios” iti Umaykayo, Sumurot Kaniak—Para iti Primary.

Panagbuniag ken Kumpirmasion

Insuro ni Nephi a “ti ruangan a pagserkan[tayo]” iti dana ti katulagan “ket panagbabawi ken panagbuniag babaen iti danum” (2 Nephi 31:17). Dagiti panagkagumaanyo a tumulong kadagiti annakyo nga agsagana para iti panagbuniag ken kumpirmasion ti sititibker a makayaddang iti saksakada iti dayta a dana. Mairugi dagitoy a panagkagumaan babaen iti panangisuro maipapan iti pammati ken ni Jesucristo ken panagbabawi. Dagitoy pay ti mangiraman iti panangisuro maipapan no kasano a mapabarotayo dagiti katulagantayo iti panagbuniag babaen ti pannakiranudtayo iti sakramento iti tunggal lawas.

Adtoy ti sumagmamano a resources a makatulong kadakayo: 2 Nephi 31; Gospel Topics, “Baptism,” topics.ChurchofJesusChrist.org.

• Tunggal maaddaankayo iti padas a mangpapigsa iti pammatiyo iti Nailangitan nga Ama ken ni Jesucristo, ibinglayyo daytoy iti anakyo. Tulonganyo a maawatanna a ti pammati ket maysa a banag a mabalin nga ad-adda pay a mapapigsa iti unos ti biag. Ania dagiti sumagmamano a banag a mabalin nga aramiden ti anakyo tapno mapatanor ti napigpigsa a pammati ken ni Cristo sakbay a mabuniagan?

• No saan nga umisu ti pili ti anakyo, isaritayo a siraragsak maipapan iti sagut ti panagbabawi. Ket no agaramidkayo iti saan nga umisu a pili, ibinglayyo ti rag-o a sumangbay no agbabawikayo. Paneknekanyo dayta gapu ta nagsagaba ken natay ni Jesucristo gapu iti basbasoltayo, inikkannatayo iti bileg nga agbalbaliw. No agkiddaw ti anakyo iti pammakawan, siwayawaya ken siraragsak a pakawanenyo.

• Isaritayo iti anakyo ti maipapan iti panagbuniagyo. Ipakitayo dagiti ladawan ken ibinglayyo dagiti pammallagip. Saritaenyo ti maipapan iti no kasano ti nariknayo, no kasano a nakatulong kadakayo dagiti katulaganyo iti panagbuniag tapno mangam-ammo a nasaysayaat ken ni Jesucristo, ken no kasano nga agtultuloyda a mangbendision iti biagyo. Allukoyenyo ti anakyo nga agdamag kadagiti saludsod.

• No adda panagbuniag iti pamiliayo wenno iti wardyo, kuyogenyo ti anakyo a mangkita iti dayta. Pagsaritaanyo maipapan iti nakita ken nariknayo iti anakyo. No mabalin, kasaritayo ti tao a mabumbuniagan ket agsaludsodkayo kas iti sumaganad: “Kasano nga inaramidmo daytoy a pangngeddeng? Kasano a nagsaganaka?”

• Tunggal madlawyo nga ar-aramiden ti anakyo ti maysa a banag nga inkarina nga aramiden, ikkanyo iti napudno a pammadayaw. Ilawlawagyo a ti panangtungpal kadagiti panagkumit ket makatulong kadatayo nga agsagana a mangsalimetmet kadagiti katulagan nga aramidentayo no mabuniagantayo. Ania ti ikaritayo iti Dios no agbuniagtayo? Ania dagiti ikarina kadatayo (kitaen iti Mosiah 18:8–10, 13).

• No adda agkadua a sagrado a padasyo ken ti anakyo (kas iti simbaan, bayat ti panagbasa kadagiti nasantuan a kasuratan, wenno bayat ti panagserbi iti maysa a tao), isaritayo kenkuana ti maipapan kadagiti naespirituan a rikna wenno impresion nga adda kadakayo. Awisenyo ti anakyo a mangibinglay no ania ti riknana. Paliiwenyo dagiti nadumaduma a wagas a mabalin a makisarita ti Espiritu iti tattao, agraman dagiti wagas a personal a makisarita kadakayo. Tulonganyo ti anakyo a mangbigbig kadagiti kanito a mabalin a mapadpadasanna ti impluensia ti Espiritu Santo.

• Aggiddan a mangbuya kadagiti video iti Gospel Library collection a napauluan iti “Hear Him!” Pagsaritaan maipapan kadagiti nadumaduma a wagas a pakangngegan dagiti katulongan ti Apo iti timekna. Awisem ti anakmo a mangidrowing iti ladawan wenno agaramid iti video maipapan iti no kasano a mangngegna ti timek ti Mangisalakan.

• Saritaenyo maipapan no kasano a nangbendision kenka ti panagbalin a miembro ti Ti Simbaan ni Jesucristo dagiti Santo iti Ud-udina nga Aldaw. Kasano a nakaasidegkayo nga ad-adda iti Nailangitan nga Ama ken ni Jesucristo bayat ti panagserbiyo kadagiti dadduma ken bayat ti panagserbi kadakayo dagiti dadduma? Tulonganyo ti anakyo a mangpanunot kadagiti wagas a pakapagserbian ken pakapapigsaan dagiti dadduma kas miembro ti Simbaan.

• Aramidenyo ti sakramento a sagrado ken naragsak a pasamak iti pamiliayo. Tulonganyo ti anakyo a mangplano kadagiti wagas a pangipamaysaan ken ni Jesucristo bayat ti sakramento. Kasano a maipakitatayo a sagrado kadatayo ti sakramento?

• Ti magasin a Friend ket mangiraman kadagiti artikulo, estoria, ken aktibidad a mangtulong kadagiti ubbing nga agsagana para iti panagbuniag ken kumpirmasion. Pagpilienyo ti anakyo iti sumagmamano a basaen ken pagesmanna a kaduanakayo. (Kitaen met iti koleksion “Preparing for Baptism” iti benneg dagiti ubbing ti Gospel Library.)

  ubing a lalaki a mabumbuniagan

  Insuro ni Nephi a “ti ruangan a pagserkan[tayo]” iti dana ti katulagan “ket panagbabawi ken panagbuniag babaen iti danum” (2 Nephi 31:17).

Panangisuro kadagiti Annakyo maipapan iti Priesthood

Ti priesthood isu ti turay ken bileg ti Dios a pangbendisionanna kadagiti annakna. Adda ti priesthood ti Dios iti lubong ita iti Ti Simbaan ni Jesucristo dagiti Santo iti Ud-udina nga Aldaw. Amin a miembro ti Simbaan a mangsalimetmet kadagiti katulaganda ket naparaburan iti bileg ti priesthood ti Dios kadagiti pagtaenganda a mangpapigsa iti bagbagida ken kadagiti pamiliada (kitaen iti General Handbook: Serving in The Church of Jesus Christ of Latter-day Saints, 3.5, ChurchofJesusChrist.org). Daytoy a bileg ti tumulongto kadagiti miembro iti panangaramid iti trabaho ti Dios iti pannakaisalakan ken pannakaitan-ok iti bukodda a biag ken dagiti pamiliada (kitaen iti General Handbook, 2.2).

Umawattayo kadagiti ordinansa babaen ti turay ti priesthood. No agserbi dagiti lallaki ken babbai kadagiti takem iti Simbaan, aramidenda dayta buyogen ti turay ti priesthood, iti babaen ti panangiturong dagidiay nakaiggem kadagiti tulbek ti priesthood. Amin nga annak ti Nailangitan nga Ama—dagiti annakna a lallaki ken babbai—ket mabendisionandanto bayat ti nasaysayaat a pannakaawatda iti priesthood.

Tapno masursuro ti ad-adu pay maipapan iti priesthood, kitaen iti Russell M. Nelson, “Spiritual Treasures,” Liahona, Nob. 2019, 76–79; Russell M. Nelson, “The Price of Priesthood Power,” Liahona, Mayo 2016, 66–69; “Priesthood Principles,” kapitulo 3 iti General Handbook.

• Aramidenyo dagiti ordinansa ti priesthood nga agtultuloy a paset ti biag ti pamiliayo. Kas pagarigan, tulonganyo ti anakyo nga agsagana a naespirituan para iti sakramento iti tunggal lawas. Paregtaenyo ti anakyo nga agkalikagum a maaddaan kadagiti bendision ti priesthood no masakit wenno kasapulanna ti liwliwa wenno panangiturong. Ugalienyo ti mangilawlawag kadagiti wagas a bembendisionan ti Apo ti pamiliayo babaen ti bileg ti priesthood.

• Bayat ti aggigiddan a panagbasayo kadagiti nasantuan a kasuratan, kitaenyo dagiti gundaway a mangilawlawag no kasano a bendisionan ti Dios dagiti tao babaen ti bilegna. Iburayyo dagiti bukodyo a padas idi pinaraburannakayo ti Dios babaen ti priesthoodna. Para kadagiti pagarigan dagiti bendision nga awatentayo manipud iti Dios babaen ti priesthood, kitaen iti General Handbook, 3.2, 3.5.

• Sursuruem ti linia ti priesthood ti turay ti maysa a tao iti pamiliam. (Mabalin nga umawat dagiti Melchizedek Priesthood holder iti maysa a kopia ti linia ti turayda babaen ti panangipatulodda iti email iti [e-mail]; kitaen met iti “Request a Priesthood Line of Authority” iti Help Center iti ChurchofJesusChrist.org.) Isarita no apay a napateg a maammuan a ti turay ti priesthood ket aggapu ken ni Jesucristo a mismo. Apay nga ibinglayna daytoy kadatayo?

• Isuroyo iti anakyo a kalpasan ti panagbuniag, mabalinna ti umawat iti bileg ti priesthood babaen ti panangsalimetmet iti katulagan ti panagbuniag. Aggiddan a mangrebyu iti mensahe ni President Russell M. Nelson a “Spiritual Treasures” (Liahona, Nob. 2019, 76–79). Ibagayo iti anakyo no kasano nga inyeg dagiti ordinansa ti priesthood ti bileg ti Dios iti biagyo. Para iti listaan dagiti sumagmamano a wagas a pannakabendisiontayo babaen ti bileg ti priesthood, kitaen iti General Handbook, 3.5.

• Paglinnawagan ti saludsod nga “Ania ti kayarigan ti maysa a katulongan ti Apo?” Aggiddan a basaen ti Doktrina ken Katulagan 121:36 42, ket sapulen dagiti sungbat. Tunggal madlawyo ti anakyo (wenno sabali pay) a mangyap-aplikar iti maysa kadagiti prinsipio wenno kababalin kadagitoy a bersikulo, ilawlawagyo dayta.

• No usarenyo wenno ti anakyo dagiti tulbek a manglukat iti maysa a ridaw wenno mangpaandar iti kotse, maaddaan iti kanito a mangidilig kadagita a tulbek kadagiti tulbek nga iggem dagiti lider ti priesthood. (Para iti pannakailawlawag ti kaipapanan dagiti tulbek ti priesthood, kitaen iti General Handbook, 3.4.1). Ania dagiti tulbek ti priesthood a “manglukat” wenno “mangpaandar” para kadatayo? Kitaen met iti Gary E. Stevenson, “Where Are the Keys and Authority of the Priesthood?,” Liahona, Mayo 2016, 29–32; “Where Are the Keys?” (video), ChurchofJesusChrist.org.

• No mai-set apartkayo para iti maysa a takem wenno calling, awisenyo ti anakyo a mangimatang, no mabalin. Bay-anyo a makita ti anakyo nga ipatpatungpalyo ti takem wenno callingyo. Mabalin a sapulenyo pay ketdi dagiti maitutop a wagas a pakatulonganna kadakayo. Iladawanyo no kasano a mariknayo ti bileg ti Apo iti takem wenno callingyo.

Ipapan iti Templo—Dagiti Panangbuniag ken Kumpirmasion para kadagiti Natay

Dagiti templo ti paset ti plano ti Nailangitan nga Ama para kadagiti annakna. Kadagiti templo, agaramidtayo kadagiti sagrado a katulagan iti Nailangitan nga Ama bayat ti pannakipasettayo kadagiti sagrado nga ordinansa, nga amin dagitoy ti mangitudo ken ni Jesucristo. Nangipaay ti Nailangitan nga Ama iti maysa a wagas para kadagiti amin nga annakna tapno agaramid kadagiti katulagan ken makipaset kadagiti ordinansa, agraman dagiti saan pay a nakaawat kadagitoy iti daytoy a biag. Iti rugi ti tawen a panagtawenna iti 12, umdasen ti tawen ti anakyo tapno mabuniagan ken makumpirmaan iti templo para kadagiti pimmusay a kapuonan.

Tapno masursuro ti ad-adu pay maipapan kadagiti panagbuniag ken kumpirmasion para kadagiti natay, kitaen iti “About Proxy Baptism and Confirmation,” temples.ChurchofJesusChrist.org.

• Dumar-ay iti templo a masansan no ipalubos dagiti kasasaadyo. Kasaritayo ti anakyo no apay a mapmapankayo ken no kasano a tulongannakayo ti templo a makarikna a nasingsinged ti Nailangitan nga Ama ken ni Jesucristo.

• Irebyu ken paglinnawagan dagiti temple recommend questions a sangkamaysa. Isaritayo iti anakyo maipapan iti no ania ti mapasamak iti maysa nga interbyu iti rekomenda ti templo. Ibinglay no apay a napateg kadakayo ti rekomenda ti templo.

• Aggiddan a basaen ti Malakias 4:6. Isaritayo no kasano a makaisubli ti puspusoyo kadagiti kapuonanyo. Sursuruenyo ti ad-adu pay maipapan kadagiti kapuonanyo babaen ti agkakadua a panangsukisokyo iti pakasaritaan ti pamiliayo iti FamilySearch.org. Sapulenyo dagiti kapuonan a nasken a mabuniagan ken makumpirmaan. Matulongannakayo ti maysa a temple and family history consultant ti ward.

• Aggiddan a mangrebyu iti sumagmamano kadagiti resources iti koleksion a napauluan iti “Temple” iti benneg dagiti ubbing ti Gospel Library. (Kitaen met iti “Preparing Your Child for Temple Baptisms and Confirmations” iti ChurchofJesusChrist.org ChurchofJesusChrist.org.)

Panangawat iti maysa a Bendision ti Patriarka

Mabalin a ti bendision ti patriarka ti maysa a pagtaudan ti pannarabay, liwliwa, ken inspirasion. Naglaon daytoy iti personal a balakad manipud iti Nailangitan nga Ama kadatayo ken tulongannatayo a makaawat iti agnanayon a pakabigbigan ken panggeptayo. Tulonganyo ti anakyo nga agsagana nga umawat iti bendision ti patriarka babaen ti panangisuro kenkuana iti kaipapanan ken sagrado a kababalin dagiti bendision ti patriarka.

(Tapno masursuro ti ad-adu pay, kitaen iti Gospel Topics “Patriarchal Blessings,” topics.ChurchofJesusChrist.org.

• Ibinglayyo iti anakyo ti padasyo iti panangawat iti bendision ti patriarka. Mabalinyo nga ibinglay dagiti banag kas iti no kasano a nagsaganakayo nga umawat iti dayta, no kasano a nakatulong kadakayo nga umas-asideg iti Dios, ken no kasano nga usarenyo ti bendision iti biagyo. Mabalinyo pay nga awisen ti anakyo a makisarita kadagiti dadduma pay a miembro ti pamilia a nakaawaten kadagiti bendisionda iti patriarka.

• Maaddaan iti panawen nga aggiddan a mangrebyu iti sumagmamano kadagiti resources iti Gospel Topics, “Patriarchal Blessings.” Tapno masursuro maipapan iti proseso ti panangawat iti bendision ti patriarka, kitaen iti General Handbook, 18.17.

• No adda dagiti kapuonanyo a nakaawat kadagiti bendision ti patriarka, mabalin a makaparegta ti panangbasa iti sumagmamano kadagitoy a kadua ti anakyo. Tapno agkiddaw kadagiti bendision dagiti kapuonan a pimmusay, ag-log in iti ChurchofJesusChrist.org, i-klik ti account icon iti top right corner ti screen, ket pilien ti “Patriarchal Blessing.”

• Kalpasan a nakaawat ti anakyo iti bendision ti patriarka, awisenyo ti asino man a miembro ti pamilia a nakaimatang tapno mangisurat kadagiti riknada ken mangibinglay kadagitoy iti anakyo.

Ipapan iti Templo—ti Endowment

Tarigagayan ti Dios a mangipaay, wenno mangbendision, iti amin nga annakna iti “bileg manipud iti ngato” (Doktrina ken Katulagan 95:8). Mapantayo iti templo nga umawat iti bukodtayo nga endowment iti maminsan laeng, ngem dagiti katulagan nga aramidentayo iti Dios ken ti naespirituan a bileg nga itedna kadatayo a kas paset ti endowment ket mabalin a mangbendision kadatayo iti inaldaw a panagbiagtayo.

Tapno masursuro ti ad-adu pay maipapan iti endowment, kitaen iti “About the Temple Endowment,” temples.ChurchofJesusChrist.org; Russell M. Nelson, “Prepare for the Blessings of the Temple,” Ensign, Okt. 2010, 41–51.

• Mangi-display iti maysa a ladawan ti templo iti pagtaenganyo. Isaritayo iti anakyo dagiti rikna a mapadasanyo iti templo. Masansan nga isaritayo maipapan iti ayatyo iti Apo ken iti balayna ken dagiti katulagan nga inaramidyon sadiay.

• Aggiddan nga agsukisok temples.ChurchofJesusChrist.org. Aggiddan a mangbasa kadagiti artikulo kas iti “About the Temple Endowment” ken “Prepare for the House of the Lord.” Bay-an nga agdamag ti anakyo iti ania man a saludsodna maipapan iti templo. Para iti panangiwanwan maipapan iti no ania ti mabalinyo nga isarita maipapan iti ruar ti templo, kitaen iti mensahe ni Elder David A. Bednar a “Prepared to Obtain Every Needful Thing” (Liahona, Mayo 2019, 101–4; kitaen nangnangruna iti “Home-Centered and Church-Supported Learning and Temple Preparation”).

• Bayat ti pannakipasetyo iti anakyo wenno panangsaksi kadagiti dadduma nga ordinansa (kas iti sakramento wenno maysa a bendision ti pannakaagas), maaddaan iti kanito a mangilawlawag iti simbolismo a nairaman iti ordinansa. Ania ti ibagi dagiti simbolo? Kasano nga ipaneknek dagitoy ti maipapan ken ni Jesucristo? Makatulong daytoy iti anakyo nga agsagana a mangutob iti simboliko a kaipapanan dagiti ordinansa iti templo, a mangpaneknek pay ken ni Jesucristo.

• Tulonganyo ti anakyo a mangpaliiw no kasano a tungtungpalenna ti katulagan ti panagbuniag a nailadawan iti Mosiah 18:8–10, 13. Tulonganyo pay ti anakyo a mangpaliiw no kasano a mangbembendision ti Apo kenkuana. Mangbukel iti panagtalek iti anakyo iti kabaelanna a mangtungpal kadagiti katulagan.

• Isaritayo a sipapanayag ken masansan maipapan iti no kasano a dagiti katulaganyo iti templo ti mangiwanwan kadagiti piliyo ken mangtulong kadakayo a dumur-as a nasingsinged ken ni Jesucristo. Mabalinyo nga usaren ti General Handbook, 27.2, tapno mangrebyu kadagiti katulagan nga aramidentayo iti templo.

Panagserbi ti Mision

Insuro ni Elder David A. Bednar: “Ti maysa a kapatgan a banag a maaramidyo tapno makapagsagana para iti maysa nga awag nga agserbi ket ti panagbalin a misionario a nabayag sakbay a mapankayo iti mision. … Ti isyu ket saan a mapan iti mision; imbes ketdi, ti isyu ket panagbalin a maysa a misionario ken panagserbi iti unos ti panagbiagtayo buyogen ti amin a puso, kabaelan, panunot, ken pigsatayo. … Agsagsaganakayo para iti tungpal biag nga aramid ti misionario” (“Becoming a Missionary,” Liahona, Nob. 2005, 45–46). Dagiti padas ti anakyo iti panagbalin a misionario ket mangparaburto kenkuana iti agnanayon, saan laeng iti panawen a mabalin a panagserbina kas maysa a misionario.

Tapno masursuro ti ad-adu pay, kitaen iti Russell M. Nelson, “Preaching the Gospel of Peace,” Liahona, Mayo 2022, 6–7; M. Russell Ballard, “Missionary Service Blessed My Life Forever,” Liahona, Mayo 2022, 8–10; Missionary Preparation: Adjusting to Missionary Life, ChurchofJesusChrist.org.

• Imodelo no kasano nga ibinglay ti ebanghelio iti gagangay a wagwagas. Kanayon nga agbalinkayo nga alerto kadagiti gundaway a mangibinglay iti dadduma kadagiti riknayo maipapan iti Nailangitan nga Ama ken ti Mangisalakan ken dagiti bendision nga awatenyo kas miembro ti Simbaanna. Awisenyo dagiti dadduma a makikadua iti pamiliayo kadagiti aktibidad iti Simbaan a mainaig iti pamilia.

• Agsapulkayo kadagiti gundaway a pakilangenan ti pamiliayo kadagiti misionario. Awisen ida a mangisuro kadagiti gagayyemyo, wenno idiayayo a pangisuruen ida kadagiti tao iti pagtaenganyo. Saludsoden kadagiti misionario maipapan kadagiti padasda ken no kasano a ti panagserbi kas misionario ket tumultulong kadakuada nga umas-asideg ken ni Jesucristo. Saludsoden pay no ania ti inaramidda (wenno tinarigagayanda koma nga aramiden) tapno agsagana nga agbalin a misionario.

• No nagserbikayo iti maysa a mision, isaritayo a sipapanayag ken masansan maipapan kadagiti padasyo. Wenno awisenyo dagiti gagayyem wenno miembro ti pamilia a nagserbi iti mision tapno agsarita maipapan iti misionda. Mabalinyo pay nga isarita dagiti wagas a nakaibinglayanyo iti ebanghelio kadagiti dadduma iti unos a panagbiagyo. Tulonganyo ti anakyo a mangpanunot kadagiti wagas a pakaibinglayanna iti ebanghelio.

• Ikkanyo ti anakyo kadagiti gundaway a mangisuro iti pamiliayo kadagiti pagbatayan ti ebanghelio. Mabalin met nga agsanay ti anakyo a mangibingbinglay kadagiti pammatina iti dadduma. Kas pagarigan, mabalinyo nga ilawlawag dagiti saludsod kas iti “Kasano a yam-ammotayo ti Libro ni Mormon iti maysa a tao a di pay pulos nakangngeg iti dayta?” wenno “Kasano nga iladawantayo ti panagkasapulan iti Mangisalakan iti maysa a tao a saan a Kristiano?”

• Tulonganyo ti anakyo nga agbalin a komportable a makisasao kadagiti tao. Ania dagiti sumagmamano a nasayaat a wagas a pangirugi iti pannakisarita? Allukoyenyo ti anakyo a mangsursuro no kasano a dumngeg iti no ania ti isasao dagiti dadduma, maawatan no ania ti adda iti pusoda, ken mangibinglay kadagiti kinapudno ti ebanghelio a mabalin a mangbendision iti biagda.

• Agsapulkayo kadagiti gundaway a pakasursuruan ti anakyo maipapan kadagiti dadduma a kultura ken pammati. Tulonganyo isuna a mangbigbig ken mangraem kadagiti nasayaat ken pudno a prinsipio kadagiti pammati dagiti dadduma.

Ipapan iti Templo—Pannakailantip

Iti templo, mabalin nga agkallaysa ti asawa a lalaki ken babai para iti agnanayon. Mapasamak daytoy iti maysa nga ordinansa a maawagan iti pannakailantip. Uray no mabalin nga adu a tawen ti kaadayo daytoy nga ordinansa para iti anakyo a lalaki wenno babai, dagiti babassit, simple, agtultuloy a banag nga agkadua nga aramidenyo kabayatan dagita a tawen ket makatulong kenkuana nga agsagana para iti daytoy nakaskasdaaw a bendision.

Tapno masursuro ti ad-adu pay, kitaen ti Gospel Topics “Sealing,” topics.ChurchofJesusChrist.org.

• Aggiddan a mangbasa iti “Ti Kaamaan: Maysa a Waragawag iti Lubong” iti ChurchofJesusChrist.org. Ania ti isuro daytoy a waragawag maipapan iti kinaragsak iti biag ti pamilia ken maipapan kadagiti naballigian a panagasawa? Kaduayo ti anakyo, mangpilikayo iti maysa kadagiti prinsipio a nailista iti warawagag tapno adalen. Mabalinyo a kitaen dagiti nasantuan a kasuratan a mainaig iti dayta a prinsipio iti Panangiwanwan iti Nasantuan a Kasuratan. Mabalinyo pay ti mangikeddeng kadagiti panggep a tun-oyen tapno ad-adda a naan-anay a mayaplikar dayta a prinsipio iti pamiliayo. Iti panangaramidyo kadagiti panggepyo a tun-oyen, pagsasaritaanyo ti epekto ti panagbiag iti dayta a prinsipio iti biag ti pamilia.

• Kaduayo ti anakyo, basaenyo ti mensahe ni President Dieter F. Uchtdorf nga “In Praise of Those Who Save” (Liahona, Mayo 2016, 77–80). No madanonyo ti benneg a napauluan iti “A Society of Disposables,” mabalinyo a sapulen dagiti banag iti pagtaenganyo a maibelleng ken dadduma pay a banag a saan. Isaritayo no kasano a naiduma ti panangtratoyo kadagiti banag no kayatyo nga agpaut dagitoy. Ania ti isingasing daytoy maipapan iti no kasano ti nasken a panangtratotayo iti panagasawa ken dagiti relasion iti pamilia? Ania pay ti masursurotayo manipud iti mensahe ni President Uchtdorf maipapan iti no kasano a matulongannatayo ti Mangisalakan a mangbangon kadagiti natibker a panagasawa ken pamilia?

• No naasawaankayo, sipupudno a makisaritakayo iti anakyo maipapan kadagiti banag a mariknayo a nasayaat ti ar-aramidenyo kas agassawa, dagiti banag a masursuroyo, ken dagiti wagas nga ikarkarigatanyo a pasayaaten. No nailantipkayo nga agassawa iti templo, ipakitayo iti anakyo babaen ti pagwadan no kasano nga ikagkagumaanyo nga agtungpal kadagiti katulaganyo iti tunggal maysa ken iti Apo. Ibagayo iti anakyo no kasano nga ikagkagumaanyo a pagbalinen ti Nailangitan nga Ama ken ti Mangisalakan a sentro ti relasionyo ken no kasano a tulongandakayo.

• No kasapulan a maaramid dagiti pangngeddeng ti pamilia, mangangay kadagiti konseho ti pamilia ken panaglilinnawag. Siguraduenyo a mangngegan ken maipatpateg ti amin nga opinion dagiti miembro ti pamilia. Usarenyo dagitoy a panaglilinnawag kas gundaway a mangimodelo iti nasalun-at a komunikasion ken kinaimbag kadagiti relasion ti pamilia, uray no saan nga agpapada ti panangkita ti tunggal maysa kadagiti banag.

• No adda di panagkikinnaawatan wenno panagsusupiat iti pamilia, ipakitayo ti kinaanus ken pannakipagrikna. Tulonganyo ti anakyo a makakita no kasano a makatulong kenkuana ti panangtaming iti panagsusupiat kadagiti wagas a kas ken ni Cristo nga agsagana para iti naragsak a panagasawa. Aggigiddan a basaen ti Doktrina ken Katulagan 121:41–42, ket pagsasaritaan maipapan no kasano a mayaplikar dagiti pagbatayan kadagitoy a bersikulo iti panagasawa.