Ti Panagserbi a Misionario ti Nangbendision iti Biagko iti Agnanayon
Ikararagko a makita ken maammuanyo a babbarito ken babbalasitang ken dagiti dadakkelyo no kasano a mangbendision ti panagserbi a misionario iti biagyo.
Agyamanak, President Nelson, iti panangtedmo manen iti dayta a balakad maipanggep iti serbisio a misionario.
Kakabsat, adun a tawen ti naglabas iti panagsaritak iti sapasap a komperensia, kellaat a diak makakita a nasayaat iti kanigid a matak gapu iti maysa a sakit ti mata a nagpakaro iti naglabas a panawen ken nangpalidem iti matak.
Iti panangsangok itoy a karit, agyamanak iti dadduma pay a kita ti pannirigan, agraman ti baro a pannirigan iti napalabas. Iti pananglagipko iti biagko, nabaelak a kitaen dagiti masinunuo a padas a nakaaramid iti napateg a pagdumaan. Maysa kadagita a padas ti no kasano ti panagserbik a full-time missionary idi baritoak iti England ket nangparabur iti biagko ken nangsukog iti naespirituan a pagtungpalak.
Nautobko no kasano a dagiti karit iti ekonomia a mainaig iti Dakkel a Panagrigat idi 1930s nagbanag iti daksanggasat a panagbaliw dagiti dadakkelko ken ti pamiliak. Nakumikom unay ti amak iti panangispalna iti automobile dealershipna ken panangsuporta iti pamilia bayat ti narigat a panawen a di agsimsimba dagiti dadakkelko.
Nupay dikami nagatendar iti simbaan kas pamilia, saan dayta ti nanglapped kaniak iti pannakilangenko iti gagayyemko.
Kadagita nga aldaw, ti ipapan iti mision ti maysa a banag a kayatko nga aramiden, ngem saan a maysa a banag nga isaritak maipapan kadagiti dadakkelko.
Bayat kaaddak iti kolehio, inkeddengmi iti sumagmamano a gagayyemko nga agserbi iti mision. Iti panangbisitak iti bishopko, pinunnuak ti aplikasionko iti misionario idinto a rimmuar iti ili dagiti dadakkelko. Idi nagsubli dagiti dadakkelko, sinorpresak ida iti damag a naawagannak nga agserbi iti Great Britain. Agyamanak iti naregget a suportada itoy a desision, ken iti naimbag a gagayyem a nagtulong kaniak a mangeddeng nga agserbi.
Ti panagserbik kas misionario insagananak nga agbalin a nasaysayaat nga asawa ken ama ken naballigian iti negosio. Daytoy pay ti nangisagana kaniak iti tungpal biag a panagserbi iti Apo iti Simbaanna.
Idi Abril 1985 a sapasap a komperensia, nadutokannak nga agsarita iti sesion iti priesthood. Inturongko dagiti saritak kadagiti babbarito. Insaritak maipapan iti panagsagana nga agserbi kas misionario. Kinunak, “Iti amin a training nga inawatko iti pagrebbengak iti Simbaan, awan ti napatpateg pay kaniak ngem iti training nga inawatko kas disinuebe nga elder nga agserserbi iti full-time mission.”1
“Am-ammonakayo ti Apo. No agserserbikayo iti misionyo, addaankayo iti padpadas a mangtulongto a mangam-ammo Kenkuana a nasaysayaat. Dumur-askayto a naespirituan nga agserbi Kenkuana. Iti naganna, maibaonkayto nga agserbi iti dadduma. Maikkankayto iti padas nga addaan iti pannignay manipud iti Espiritu Santo. Pusgannakayonto ti Apo a mangisuro iti naganna. Maipakitayonto Kenkuana a mapagtalkannakayo ken mapagpannurayannakayo.
Lima a bulan laeng ti naglabas, da Elder Jeffrey R. Holland ken Elder Quentin L. Cook, a nagserbi kas misionario iti British Isles, kinaduadak a bimmisita kadagiti miembro ken misionario iti dayta napintas a pagilian. Iti kaaddak sadiay, inutobko dagiti padasko kas maysa nga agtutubo a misionario. Paneknekak nga iti misionko ti nakaammuak nga am-ammodak ti Nailangitan nga Amak ken ti Mangisalakanko a ni Jesucristo.
Naparaburannak iti dua a nasayaat a mission presidents, da Selvoy J. Boyer ken Stainer Richards, kaduada dagiti napasnek a kompanionda, da Glady Boyer ken Jane Richards. Iti pananglagipko, makitak a nalawlawag a nagtalekda kaniak ken impategdak. Sinuruandak iti ebanghelio. Adu ti nimanamada kaniak. Inikkandak iti adu a mapangkarit a pagrebbengan ken gundaway a mangidaulo a mangtulong iti panagdur-asko ken mangisagana iti panagserbik.
Nautobko pay iti pannakaawag ni President Spencer W. Kimball a mangidaulo iti Canada Toronto Mission a kaduak ti ay-ayatek nga asawak, ni Barbara, ken dagiti annakmi iti sibaymi. Inawagannakami ni President Kimball nga agserbi idi Abril 1974, nabiit kalpasan nga intedna ti naparegta a mensahena a misionario a napauluan iti “When the World Will Be Converted.”2 Iti dayta a mensahe inlawlawag ni President Kimball ti panniriganna iti no kasano a mayeg ti ebanghelio iti sangalubongan. Inawaganna ti ad-adu pay a misionario manipud iti lawlaw ti lubong. Pinalagipannatayo iti namnamaen ti Apo “a tunggal tao nasken nga … ipukkawna ti pammallaag a timek kadagiti agindeg iti daga.”3 Ti pannursuro ni President Kimball maipapan iti namnamaen ti barito nga agserbi iti mision agbalin iti topiko ti pagsasaritaan iti pagtaengan iti sangalubongan. Saan a nagbaliw dayta a namnamaen. Agyamanak nga impatalged pay ni President Russel M. Nelson ti namnamaen ti Apo itoy a bigat.
Dumani 10 a tawen manipud idi impakaammo ni President Thomas S. Monson ti panangibaba iti edad ti misionario kadagiti agtutubo a lallaki ken agtutubo a babbai.4 Iti pannirigak, umuna a gapu iti daytoy a panagbaliw ket mangted iti adu pay kadagiti agtutubotayo iti gundaway a panagbalbaliw ti biag tapno agserbi kas misionario.
Kas Apostol ni Apo Jesucristo, awagankayo itan dakayo babbarito—ken dakayo a babbalasitang nga agtarigagay nga agserbi iti mision—a rugianyo itan a kasarita dagiti dadakkelyo maipapan iti panagserbi iti mision. Awisenkayo pay a kasaritayo dagiti gagayyemyo maipapan iti panagserbi iti mision, ken no di sigurado ti maysa a gayyemyo maipapan iti panagserbi, allukoyen ida a makisao iti bishopda.
Ikumityo iti bagbagiyo ken iti Nailangitan nga Amayo nga agserbikayo iti mision ken manipud itoy nga oras nga agtultuloy ikarigatan a pagtalinaedenyo ti puspuso, im-ima, ken pampanunotyo a nadalus ken maikari. Awisenkayo a manggun-od iti natibker a pammaneknek ti naisubli nga ebanghelio ni Jesucristo.
Amma ken inna dagitoy nasayaat nga agtutubo, adda napateg nga akemyo itoy a wagas ti panagsagana. Rugianyo itan a kasao dagiti annakyo maipapan iti serbisio a misionario. Ammomi a ti pamilia tti kangrunaan ng impluensia iti panangtulong kadagiti agtutubotayo a lallaki ken babbai nga agsaganada.
No addakayo pay laeng iti umno nga edad para iti sebisio a misionario ngem di pay nagserbi gapu iti pandemia ken sabali a gapu, awisenkayo nga agserbi itan. Kasaoyo ti bishopyo, ket agsaganakayo nga agserbi iti Apo.
Allukoyenkayo dakayo a bishop a tulonganyo ti amin a babbarito ken babbalasitang nga asidegen iti edad ti misionario tapno agsaganada nga agserbi, ken allukoyenkayo pay dakayo a bishop nga ilasinyo dagiti naan-anay ti edadna a di pay nakapagserbi. Awisenyo ti tunggal barito nga agbalin a misionario, kasta met ti tunggal balasitang nga agtarigagay nga agserbi.
Kadagiti misionario nga agdama nga agserserbi, agyamankami kadakayo. Ti misionyo ket nagbalinen a sangalubongan a pandemia. Kas bungana, ti padasyo iti mision ket saan a maipada iti padasko iti mision wenno iti padas ti asino man a misionario a nakapagserbi idin sakbay ti 2020. Ammok a saan a nalaka daytoy. Ngem uray bayat dagitoy narigat a panawen, adda impaaramid ti Apo kadakayo, ket inaramidyo a nasayaat. Kas pagarigan, inusaryo ti teknolohia iti baro a wagas a mangsapul kadagiti nakasagana a mangadal maipapan iti Pannakaisubli ti ebanghelio ni Jesucristo. No nakapagserbikayon a sipapasnek ken segun iti kabaelanyo, ammok a maragsakan ti Apo iti panagkagumaanyo. Ammok a ti panagserbiyo ti mangbendisionto iti biagyo.
No mai-release-kayo iti misionyo, laglagipenyo a dikayo nai-release iti panagaktibo iti Simbaan. Padur-asenyo dagiti napintas nga ugali a naadalyo iti misionyo, ituloyyo a patibkeren ti pammaneknekyo, ikarigatanyo ti agtrabaho, agkararag, ken agtulnog iti Apo. Dayawenyo dagiti katulagan nga inaramidyo. Ituloyyo a paraburan ken pagserbian dagiti dadduma.
Ikararagko a makita ken maammuanyo a babbarito ken babbalasitang ken dagiti dadakkelyo no kasano a mangbendision ti panagserbi a misionario iti biagyo. Maammuanyo koma iti panunotyo ken mariknayo iti puspusoyo ti bileg ti inyawis ti Apo kadagiti naindaklan nga annak a lallaki ni Mosiah. Kinunana, “mapankayo…ket imulayo ti balikasko; ngem nasken a naanuskayo iti naunday a panagitured ken rigrigat, tapno makaipakitakayo kadakuada iti nasayaat a pagwadan nga adda kaniak, ket aramidenkayo a ramit ti imak iti pannakaisalakan ti adu a kararua.”5
Bendisionan koma ti Dios dagiti agtutubo ti Simbaan nga agtarigagay nga agsagana ken agserbi Kenkuana ti napakumbaba a kararagko, nga idatonko ita a bigat iti sagrado a nagan ni Apo Jesucristo, amen.