Datayo ti Ti Simbaan ni Jesucristo dagiti Santo iti Ud-udina nga Aldaw
Ti Simbaan ket saan la a dagiti pasdek ken ti ecclesiastical a disenio; ti Simbaan ket datayo, dagiti miembro, a ni Cristo ti mangidadaulo ken dagiti propeta ti pannakangiwatna.
Idi naawatko ti imbitasion nga “umayka ket kitaem,”1 nagantendarak iti umuna a gundaway iti Ti Simbaan ni Jesucristo dagiti Santo iti Ud-udina nga Aldaw idi agtawenak ti 26. Nabiit pay a nagsinakami iti umuna nga asawak idi. Adda anakko a lalaki a tallo ti tawenna. Ket nariknak nga awanen ti pigsak a binuyogan iti buteng. Idi simrekak iti pasdek, nakariknaak iti napnuan bara bayat ti panangkitak iti pammati ken ragsak dagiti tao iti aglawlawko. Pudno la unay daytoy “a pagkamangan no agbagyo.”2 Kalpasan ti tallo a lawas, inaramidko ti katulagan ti panagbuniag iti Nailangitan nga Ama ket rinugiak ti panagdaliasatko a kas maysa a disipulo ni Cristo, nupay saan a naan-anay ti panagbiagko bayat dayta a panagdaliasat.
Tapno maawatko dagidiay agnanayon a bendision, adu a pisikal ken naespirituan a bambanag ti masapul a nakasagana. Naipasublin ken naikasaban ti ebanghelio ni Jesucristo; nabangonen ken napagtalinaeden dayta a meetinghouse; addaan iti ecclesiastical a disenio, manipud kadagiti propeta ken lokal a lider; ken branch a napno kadagiti natulagan a miembro a nakasagana a mangawat kaniak ken iti anakko iti pannakayegmi iti Mangisalakan tapno, “mataraonan kadagiti nasayaat a balikas ti Dios,”3 ken maikkankami kadagiti gundaway nga agserbi.4
Manipud idi punganay, inkagumaan ti Dios nga ummongen ken urnosen dagiti annakna5 “tapno mangipatungpal iti saan[tayo] nga ipapatay ken agnanayon a biag.”6 Iti dayta a panggep, imbagana a mangbangontayo iti lugar a pagdaydayawan7 a pakaawatantayo iti pannakaammo ken dagiti ordinansa ti pannakaisalakan ken pannakaitan-ok; agaramid ken agtungpal kadagiti katulagan a mangbegkes kadatayo ken ni Jesucristo;8 maipaayan iti “bileg ti kinadios”;9 ket agguummong a sangkamaysa a manglagip ken ni Jesus ken mangpapigsa iti tunggal maysa Kenkuana.10 Ti kaadda ti organisasion ti Simbaan ken dagiti pasdekna ket para iti naespirituan a pagimbagantayo. “Ti Simbaan… ket maysa nga andamio a pangbangonantayo kadagiti agnanayon a pamilia.”11
Bayat ti pannakisaritak iti maysa a gayyemko nga agpaspasar iti narigat a panawen iti biagna, dinamagko no kasano ti panagbiagda iti pamiliana. Nagsangit a nangibaga a tultulongan ti bishopna babaen iti daton iti panagayuno. Innayonna, “Diak la ammon no ania ti nagbambanaganmi iti pamiliak no saan a gapu iti Simbaan.” Insungbatko, “Ti Simbaan ket dagiti miembro. Isuda dagiti sidadaan ken naayat a mangted iti daton iti panagayuno tapno matulongan dagiti agkasapulan kadatayo. Aw-awatem dagiti bunga ti pammati ken determinasionda a mangsurot ken ni Jesucristo.”
Padak a disipulo ni Cristo, ditayo tagibassiten ti nakakaskasdaaw nga aramid ti Apo babaen kadatayo, ti Simbaanna, iti baet dagiti pagkapuyantayo. No dadduma datayo ti mangmangted ken no dadduma datayo ti umaw-awat, ngem maymaysatayo amin a pamilia ni Cristo. Ti Simbaan isu ti pasdek nga impaayna tapno Isu ti mangiwanwan ken mangbendision kadatayo bayat ti panagdaydayawtayo Kenkuana ken panagserbitayo iti tunggal maysa.
Dimmawat iti dispensar kaniak ti sumagmamano a kakabsat a babbai, a mangipagpagarup a saanda nga aktibo a miembro iti Relief Society gapu ta agserserbida iti Primary wenno Young Women. Dagidiay a kakabsat a babbai ti maibilang kadagiti kangrunaan nga aktibo iti Relief Society gapu ta tultulonganda dagiti napapateg nga annaktayo ken pappapigsaenda ti pammati dagiti agtutubo ken ni Jesucristo.
Saan a limitado ti Relief Society iti maysa a siled iti maysa a pasdek, maysa nga adalen iti Domingo, maysa nga aktibidad, wenno maysa a panguluen iti lokal wenno sapasap a lebel. Ti Relief Society isu dagiti natulagan a babbai ti Simbaan; daytoy ket datayo—tunggal maysa kadatayo ken datayo amin. Daytoy ti “sangalubongan a komunidad ti panangngaasi ken panagserbi.”12 Iti sadino man ken amin a lugar a papanantayo, kanayon a pasettayo ti Relief Society bayat ti panangikagumaantayo a mangipatungpal iti nadiosan a panggepna, nga isu ti aramid ti Dios nga ipatungpal dagiti babbai iti saggaysa wenno sangkamaysa a wagas13 babaen iti panangipaay iti tulong: “tulong iti kinapanglaw, tulong iti masaksakit; tulong iti panagduadua, tulong para iti kinakuneng—tulong iti amin a manglapped … iti rag-o ken panagrang-ay.”14
Kasta a pannakaibilang ti adda met iti elders quorum ken kadagiti organisasion ti Simbaan iti amin nga edad, karaman dagiti ubbing ken agtutubo. Ti Simbaan ket saan la a dagiti pasdek ken ecclesiastical a disenio, ti Simbaan ket datayo, dagiti miembro. Datayo ti Ti Simbaan ni Jesucristo dagiti Santo iti Ud-udina nga Aldaw, ni Cristo ti mangidadaulo ken dagiti propeta ti pannakangiwatna. Kinuna ti Apo:
“Adtoy, daytoy ti doktrinak—-asino man nga agbabawi ket umasideg kaniak, isu met laeng ti simbaanko. …
“Ket … asino man nga adda iti simbaanko, ket makapagibtur iti simbaanko agingga iti panungpalan, ipatakderkonto iti batok.”15
Kakabsat, anian a pribilehiotayo ti maibilang iti Simbaan ni Jesucristo, tapno mapagkaykaysatayo ti pammati, puso, pigsa, panunot, ken im-imatayo para Kenkuana tapno agaramid kadagiti nabileg a milagrona. “Ta ti bagi [ti SImbaan ni Cristo] saan a maymaysa a kameng, no di ket adu.”16
Maysa nga agtutubo a lalaki ti nangibaga iti nanangna, “Idi ubingak, no tunggal mangtedak iti maysa a doliar nga apagkapullok, impagarupko nga iti dayta a maysa a doliar maipatakderen ti sibubukel a meetinghouse. Nakakatkatawa aya?”
Nasagid ti rikna ti ina, insungbatna, “Nagpintas dayta! Inladawam kadi dagita iti panunotmo?”
“Wen!” kinunana. “Napipintasda, ket aduda ta minilmiliondan!”17
Patpagek a gagayyemko, addaantayo koma iti pammati kas ti maysa nga ubing a naragsakan a nakaammo nga uray ti kabassitan a pagkagumaantayo, makaipaay iti naisangsangayan a pagdumaan iti pagarian ti Dios.
Ti nasken a panggeptayo iti pagarianna ket ti mangyeg iti tunggal maysa ken ni Cristo. Kas mabasatayo iti nasantuan a kasuratan, inawis ti Mangisalakan dagiti Nephite:
“Adda kadi masakit kadakayo? Yasidegyo ida. Adda kadi kadakayo … marigatan iti uray ania a kita? Yasidegyo ida ta agasak, gapu ta adda asik kadakayo; napno ti lalaemko iti panangngaasi.
“… ta makitak nga umdas ti pammatiyo a pamkuatak a mangagas kadakayo.”18
Saan kadi nga addantayo amin iti panagsagaba a mayasideg iti sakaanan ti Mangisalakan? Nupay adu ti addaan iti pagkapsutan ti bagi, ad-adu pay dagiti addaan iti emosional a pakaburiboran, agkarigatan ti dadduma a mangpasayaat iti sosial a pannakilangenda, ket kalikagumantayo amin ti inana no makarit ti espiritutayo. Agsagabatayo amin iti sumagmamano a wagas.
Mabasatayo nga “amin dagiti ummong, a sangsangkatunos, napanda a kaduada dagiti masakitda … ken dagiti amin a marigatan iti ania man a kita ket inagasanna ida a saggaysa apaman a naipanda kenkuana.
“Ket inaramidda amin, kadakuada a naagasan ken kadakuada nga awan sakitna, nagrukbabda iti sakaananna, ken nagdaydayawda kenkuana.”19
Manipud iti ubing a nagbayad ti apagkapullo nga addaan pammati, iti agsolsolo nga ina nga agkasapulan iti asi ti Apo, iti maysa nga ama a marigrigatan a mangsuporta iti pamiliana, kadagiti kapuonantay nga agksapulan iti ordinansa ti pannakaisalakan ken pannakaitan-ok, iti tunggal maysa a mangpabpabaro kadagiti katulagan iti Dios iti kada lawas, kasapulantayo ti tunggal maysa, ken mayasidegtayo ti tunggal maysa iti panangsubbot a pangagas ti Mangisalakan.
Patpatgek a kakabsatko, surotentayo koma ti awis ni Jesucristo a mangyasideg iti bagbagitayo ken dagiti sagsagabaentayo Kenkuana. No umasidegtayo Kenkuana ken yegtayo dagiti ipatpategtayo Kenkuana, makitana ti pammatitayo. Paimbagenna ida, ken paimbagennatayo.
Kas “natalna a paspasurot ni Cristo,”20 ikagumaantayo ti agbalin a “sangsangkamaysa ti puso ken panunot”21 ket agpakumbaba; managpabus-oy; nalanay; nalaka a kasarsarita; napno iti panaganus ken panagitured; managpalabes iti amin a banag; naregta a mangtungpal kadagiti bilin ti Dios iti amin a kanito; addaan pammati, namnama, ken panangngaasi, ket kanayon nga agaramid iti adu a nasayaat.22 Ikarkarigatantayo ti agbalin a kas ken ni Jesucristo.
Paneknekak a kas Simbaan ni Cristo, datayo ti wagas nga, kas insuro ni President Russel M. Nelson “aramidento ti Mangisalakan ken Mannubbottayo, ti sumagmamano kadagiti kabilgan nga aramidna ita ken iti yaayna manen.”23
Kinuna ti Apo:
“Adtoy, idarasko ti aramidko iti umno a panawenna.
“Ket itedko kadakayo … ti bilin nga ummongenyo a sangsangkamaysa ti bagbagiyo, ket urnosenyo ti bagbagiyo, ken isaganayo ti bagbagiyo, ken pasantuenyo ti bagbagiyo; wen, patarnawenyo ti puspusoyo, ket dalusanyo dagiti imayo ken dagiti dapanyo iti sangok, tapno aramidenkayo a nadalus.”24
Ipangagtayo koma daytoy nadiosan nga awis ken sirarag-o nga agguummong, aguurnos, agsagana ken mangpasanto iti bagbagitayo ti napakumbaba a kararagko iti nagan ni Jesucristo, amen.