Kumbersion iti Pagayatan ti Dios
Ti personal a kumbersiontayo ket karamanna ti responsibilidad a mangibinglay iti ebanghelio ni Jesucristo iti lubong.
Agyamanak ken ni President Russell M. Nelson iti nabileg a naimpadtuan nga awisna para iti panagserbi ti misionario ken dagiti naparegta a mensahe iti misionario da President M. Russell Ballard ken Elder Marcos A. Aidukaitis ita nga aldaw.
Inikkannak iti gundaway ti mision iti Great Britain iti arinunos ti napan a tawen a mangyanninaw kadagiti napateg a pasamak nga espiritual a pundasion ti desisionko nga agserbi kas misionero.1 Idi agtawenak iti 15, ti ay-ayatek a kabsat a lalaki a ni Joe ket agtawen iti 20, tawen idi ti mabalin nga agserbi iti mision. Idiay Estados Unidos, gapu iti laban iti Korea, bassit dagiti napalubosan nga agserbi. Maysa laeng ti maawagan iti tunggal ward kada tawen.2 Nakakaskasdaaw idi dinawat ti bishopmi a sukisoken ni Joe ti posibilidad a kadua iti amami. Agsagsagana idin ni Joe a sumrek iti pagadalan medikal. Ti amami a saan nga aktibo iti Simbaan ket agsagsagana idin iti kuarta a pangtulong kenkuana ken dina kayat nga agmision ni Joe. Inlungalong ti amami nga ad-adda nga agballigi isuna iti pagadalan medikal. Dakkel nga isiu daytoy iti pamiliami.
Iti napateg a diskusionmi iti nalaing ken pagtamdan a manongko, napanunotmi a ti desisionna nga agmision ken mangitantan iti panagbasana ket agbasar kadagiti tallo a saludsod: (1) Nadiosan kadi ni Jesucristo? (2) Sao kadi ti Dios ti Libro ni Mormon? ken (3) Ni Joseph Smith kadi ti propeta ti Pannakaisubli? No wen ti sungbat kadagitoy a saludsod, nalawag a ni Joe ket ad-adda nga agballigi iti ebanghelio ni Jesucristo ngem iti panagdoktorna a nasapsapa.3
Iti dayta a rabii, napasnek a nagkararagak nga addaan iti pudno a gagem. Iti di mailibak a nabileg a wagas, pinasingkedan ti Espiritu kaniak a dagiti sungbat kadagitoy tallo a saludsod ket wen. Nabileg a pasamak daytoy kaniak. Nautobko a ti tunggal desision nga aramidek iti unos ti panagbiagko ket maimpluensiaan kadagitoy a kinapudno. Ammok nga agmisionak met no adda gundaway a maited kaniak. Iti panagbiagko nga agserserbi ken kadagitoy naespirituan a padasko, naawatak a ti pudno a pannakabaliw ket bunga ti siririing a panangawat iti pagayatan ti Dios, ket igiyanatayo ti Espiritu Santo kadagiti aramidentayo.
Adda pammaneknekko idin iti kinadios ni Jesucristo kas Mannubot ti lubong. Iti dayta a rabii, naawatko ti naespirituan a pammaneknek iti Libro ni Mormon4 ken ni Propeta Joseph Smith.
Instrumento ni Joseph Smith kadagiti Ima ti Apo.
Ti pammaneknekmo ket mapapigsanto no ammom iti pusom babaen kadagiti kararagmo a ni Joseph Smith ti instrumento kadagiti ima ti Apo. Iti naglabas a walo a tawen, maysa kadagiti annongek iti Sangapulo-ket-dua nga Apostol ket ti mangrebyu ken mangbasa iti amin a napateg a papeles ken dokumento ken sukisok a nangiturong iti pannakaipablaak ti Saints volumes.5 Ti pammaneknekko ken panagraemko ken Propeta Joseph Smith ket permi a napapigsa ken napabaknang kalpasan a mabasak dagiti makaguyugoy a detalye ti biagna ken ti naipadto a panagministeriona.
Ti patarus ni Joseph iti Libro ni Mormon babaen iti sagut ken bileg ti Dios ket napateg iti Pannakaisubli.6 Di agbalbaliw ti Libro ni Mormon, naisurat a nasayaat, ken aglaon kadagiti sungbat kadagiti naindaklan a saludsod. Maysa a mainayon a pammaneknek ken ni Jesucristo. Paneknekak a ni Joseph Smith ket nalinteg, napnuan iti pammati, ken instrumento kadagiti ima ti Apo a mangyeg iti Libro ni Mormon.
Dagiti paltiing ken pasamak a naisurat iti Doktrina ken Katulagan ti mangipaay kadagiti tulbek, ordinansa, ken katulagan a kasapulan iti pannakaisalakan ken pannakaitan-ok. Impasdekda saan laeng a dagiti kasapulan iti panangbangon iti Simbaan no di ket mangited pay iti natibker a doktrina a mangisuro kadatayo a mangamiris iti pateg ti biag ket ikkannatayo iti agnanayon a pannirigan.
Maysa kadagiti adu nga ehemplo ti akemna kas propeta ni Joseph Smith ket masarakan iti maika-76 a seksion ti Doktrina ken Katulagan. Nalawag daytoy a rekord iti parmata ti langit, karaman dagiti pagarian ti gloria a nagasat a naawat da Propeta Joseph Smith ken Sidney Rigdon idi Pebrero 16, 1832. Iti dayta a panawen, kaaduan kadagiti simbaan ket agisursuro a ti Pannubbot ti Mangisalakan ket saan a makaipaay iti pannakaisalakan dagiti kaaduan. Pammati idi a bassit laeng dagiti maisalakan ket kaaduanna dagiti mapan impierno ken madusa, iramanna ti awan patingganaa pannakaparparigat a nakana.”7
Naglaon ti maika-76 a benneg iti nagloriaan a parmata dagiti tukad ti gloria nga ayan dagiti kaaduan nga annak ti Nailangitan nga Ama a natured idi iti biag sakbay ti yaay iti daga ket nagasatda unay iti maudi a panangukom.8 Ti parmata iti tallo a tukad ti gloria, a ti kababaan ti “mangrimbaw iti amin a pannakaawat,”9 ket pudno a panangkontra iti napigsa ngem riro a doktrina a dagiti kaaduan madusa ken mapan impierno.
No panunutem, 26 laeng ni Joseph Smith idi, limitado ti adalna, bassit wenno awan ammona kadagiti klasikal a lengguahe a pannakaisurat ti Biblia, pudno nga instrumento isuna kadagiti ima ti Apo. Iti maika-17 a bersikulo ti 76 a seksion, naguyugoy isuna a nangaramat iti balikas a killo imbes a pannakadusa a nausar iti Ebanghelio ni Juan.10
Nakain-interesante ta kalpasan ti 45 a tawen, maysa a lider ti Anglikano a simbaan ken adun ti napaneknekanna nga iskolar iti akademiko,11 ni Frederic W. Farrar, nangisurat iti The Life of Christ12 ti mangirupir a ti kaipapanan ti pannakadusa iti King James Version ti Biblia ket bunga dagiti riro ti panagipatarus manipud iti Hebreo ken Griego iti Ingles.13
Iti panawentayo, adun dagiti nangawat iti konsepto nga awan koma dusa ti basol. Suportaranda ti awan kondisionna a panangpalubos iti basol nga awan panagbabawi. Ti naipalgak a doktrinatayo ket dina laeng kontraen ti ideya a kaaduan dagiti tao ket agnanayonto a madusa ken mapan impierno ngem ipakitana pay a ti personal a panagbabawi ket naibilin a kasapulan tapno makipagpaset iti Pannubbot ti Mangisalakan ken agtawid iti celestial a pagarian.14 Paneknekak a ni Joseph Smith ket pudno nga instrumento kadagiti ima ti Apo iti pannakaiyeg iti Pannakaisubli ti ebangheliona.
Gapu iti Pannakaisubli ti ebanghelio ni Jesucristo, agpada a maawatantayo ti pateg ti panagbabawi ken “dagiti aramid ti kinalinteg.”15 Maawatanmi ti naindaklan a kinapateg ti Pannubbot ti Mangisalakan ken dagiti makaisalakan nga ordinansa ken katulaganna, karaman dagiti maar-aramid iti templo.
Dagiti “aramid ti kinalinteg” ket agtaud manipud kadagiti bunga ti kumbersion. Ti pudno a pannakabaliw ket isangbay ti panangaklon ken panangkumit a sumurot iti pagayatan ti Dios.16 Ti padaya dagiti bunga ken parabur nga agayus manipud iti kumbersion ket pudno ken permanente a kapia ken ti personal a kinatalged ti pudno a ragsak17—iti laksid dagiti adu a bagyo kadaytoy a biag.
Baliwan ti kumbersion iti Mangisalakan ti natural a tao a nadiosan, naiyanak manen, nadalusan a tao—baro a parsua ken Cristo a Jesus.18
Adu Dagiti Mailiklik laeng iti Kinapudno Gapu ta Dida Ammo ti Pangsapulanda.
Ania dagiti obligasion nga agayus manipud iti kumbersion? Iti Liberty Jail nakita ni Propeta Joseph nga adu dagiti “mailiklik laeng iti kinapudno gapu ta dida ammo ti pangsapulanda.”19
Iti pakauna ti Apo iti Doktrina ken Katulagan, naisagana ti dakkel a buya a deklarasion ti panggep ti Apo kadatayo. Imbatadna, “Gapuna, siak nga Apo, iti pannakaammok iti didigra a dumtengto kadagiti agindeg iti daga, inawagak ti katulongak a ni Joseph Smith, Jun., ket kinasaok manipud iti langit, ken binilinko.” Imbagana pay, “Tapno ipakdaar dagiti nalupoy ken nanumo ti pakabuklan ti ebangheliok agingga kadagiti suli ti lubong.”20 Iraman daytoy dagiti full-time a misionario. Iraman daytoy ti tunggal maysa kadatayo. Masapul koma a kasla laser a focus iti tunggal maysa a naparaburan iti kumbersion iti pagayatan ti Dios. Awisennatay ti Dios nga agbalin a timek ken imana.21 Ti ayat ti Dios ti agbalinto a giyatayo iti lawag. Insuro ti Mangisalakan kadagiti adalanna, “Inkay ngarud. ket pagbalinenyo nga adadalan dagiti amin a nasion.”22 Ket impalgakna ken Joseph Smith, “Ikasabayo ti naganko iti tunggal parsua a di pay nakaawat iti daytoy.”23
Maysa a lawas kalpasan ti dedikasion iti Kirtland Tenple idi Abril 3, 1836, a Domingo ti Panagungar ken Paskua pay, nagparang ti Apo iti naidumduma a parmata kada Joseph ken Oliver Cowdery. Inaklon ti Apo ti templo ket imbagana, “ Daytoy ti pangrugian ti bendision a maibukbokto kadagiti ulo dagiti taok.”24
Kalpasan a nagngudo daytoy a parmata, nagparang ni Moses “ket intalekna … dagiti tulbek ti panaguummong ti Israel manipud iti uppat a paset ti daga, ken ti pannakaiturong dagiti sangapulo a tribu manipud iti daga iti amianan.”25
Ni Presidente Russell M. Nelson, ti ay-ayatentayo a propeta ita ken mangig-iggem kadagiti isu met lang a tulbek, insurona ita a bigat: “Dakayo nga agtutubo a lallaki ti nairanta para kadaytoy a panawen, ti naikari a panagguummong ti Israel a mapaspasamak. No agserbikayo iti mision, napateg ti akemyo iti daytoy awan kapadana a pagteng!”26
Para iti mandato ti Mangisalakan a mangiburay iti ebanghelio nga agbalin a paset ti kinasiasinnotayo, masapultay nga agbalin a nakomberte iti pagayatan ti Dios; masapul nga ayatentayo dagiti kaarrubatayo, iburaytayo ti naipasubli nga ebanghelio ni Jesucristo ken awisentayo amin nga umay ken mangkita. Kas miembro ti Simbaan, taginayonentayo ti sungbat ni Propeta Joseph ken ni John Wentworth, ti editor iti Chicago Democrat, idi 1842. Dumawdawat isuna idi iti impormasion maipapan iti Simbaan. Ginibusan ni Joseph ti sungbatna babaen iti panangaramatna iti “Pagrukodan ti Kinapudno” kas pakauna iti sangapulo-ket-tallo a Pagannurotan ti Pammati. Imbatad ti pagrukodan, iti eksakto a wagas, ti rumbeng a maileppas:
“Awan ti namulitan nga ima a makapasardeng iti aramid manipud iti panagprogreso; mabalin a rumsua dagiti pammarparigat, mabalin nga agkakadua dagiti bunggoy a mangriribuk, mabalin a mangperdi iti dayaw ti kinaulbod, ngem ti kinapudno ti Dios ket agtultuloyto a situtured, sitatakneng, ken agmaymaysa, agingga a mastrekna ti tunggal kontinente, masarungkaranna ti tunggal lugar, mapananna ti tunggal pagilian, ken mapangngeganna ti tunggal lapayag agingga a maipatungpalto dagiti panggep ti Dios, ket kunaento ti Naindaklan a Jehova a nalpasen ti aramid.”27
Daytoy ti nabayagen nga awag kadagiti kaputotan ti Latter-day Saints, nangnangruna kadagiti misionero. Iti espiritu ti “Pagrukodan ti Kinapudno,” agyamantayo ta iti baet ti sangalubongan a pandemiko, dagiti mamati a misionero ket makaiburay iti ebanghelio. Dakayo a misionero, patpatgendakayo! Dawaten ti Apo iti tunggal maysa kadatayo nga iburaytayo ti ebangheliona iti sao ken aramid. Ti personal a kumbersiontayo ket karamanna ti responsibilidad a mangibinglay iti ebanghelio ni Jesucristo iti lubong.
Dagiti bendision ti panangiburay iti ebanghelio ket panangpadakkel iti kumbersiontayo iti pagayatan ti Dios ken bay-an nga agballigi ti Dios kadagiti biagtayo.28 Bendisionantay dagiti sabali tapno mapadasantayo ti “naisangsangayan a panagbalbaliw” ti puso.29 Adda ti pudno nga agnanayon a ragsak iti panangiyasideg kadagiti kararua ken ni Cristo.30 Ti panagubra para iti kumbersion ti bagi ken dagiti sabali ti natan-ok nga aramid.31 Paneknekak iti nagan ni Jesucristo, amen.