Video: “Dakayo Dagiti Babbai A Nasirmatana”
Idi 1979, adda iti ospital ni Presidente Spencer W. Kimball idi inawisna ti asawana a mangbasa iti saritana iti maysa a sapasap a miting dagiti babbai.
Sister Camilla Kimball: “Adu iti kangrunaan a panagdur-as a sumangbay iti Simbaan kadagiti maudi nga aldaw ti umapayto gapu ta naruay kadagiti naimbag a babbai ti lubong (nga addaan iti masansan iti kasta nga akin-uneg nga espiritualidad) ket maiyasidegto iti Simbaan iti dadakkel a bilang. Mapasamakto daytoy iti tukad a dagiti babbai ti Simbaan mangyanninawda iti kinalinteg ken kinasaririt iti biagda ken iti tukad a dagiti babbai ti Simbaan ket makita a naidumduma ken naisalsaluminada—kadagiti naragsak a wagas—kadagiti babbai ti lubong.”1
Presidente Russell M. Nelson: “Patpatgek a kakabsat a babbai, dakayo a napateg a kakaduami kadagitoy maudi nga al-aldaw, ti aldaw a nasirmata ni Presidente Kimball ket ita. Dakayo dagiti babbai a nasirmatana! Ti naimbag a kababalinyo, silaw, ayat, pannakaammo, tured, galad, pammati, ken nalinteg a panagbiag ti mangyasideg kadagiti nasasayaat a babbai iti lubong, a kaduada dagiti pamiliada, iti Simbaan iti naindaklan unay a bilang!
“Kasapulanmi … ti pigsayo, ti kumbersionyo, ti napigsa a pammatiyo, ti kabaelanyo a mangidaulo, ti siribyo ken dagiti timekyo. Di maileppas ti pagarian ti Dios no awan dagiti babbai nga agaramid iti sagrado a katulagan ken agtungpal kadagitoy, babbai a makapagsao babaen ti bileg ken turay ti Dios! …
“… Ania man ti takemyo, ania man dagiti kasasaadyo, kasapulanmi dagiti impresionyo, dagiti nalawag a kapanunotanyo, ken ti inspirasionyo. Kasapulandakayo nga agsao iti ward ken stake councilyo. Kasapulanmi ti tunggal naasawaan a kabsat a babai nga agsao kas ‘maysa a tumultulong ken naan-anay a kadua’ bayat ti pannakikaykaysayo iti assawayo iti panangiturayna iti pamiliayo. Naasawaan wenno awan asawana, addaankayo kakabsat a babbai iti naisangayan a kabaelan ken naiduma nga intuision a naawatyo kas sagut manipud iti Dios. Dimi matulad ti naidumduma nga impluensiayo.
“Ammomi a nagturpos ti naindaklan nga aramid ti panagparsua iti pannakaparsua ti babai! Kasapulanmi ti pigsayo! …
“… Agyamanak kadakayo, patpatgek a kakabsat a babbai, ket bendisionankayo, tapno maragpatyo ti naan-anay a potensialyo, bayat ti pannakipasettayo a sangkamaysa kadaytoy sagrado nga aramid. Agtitinulongtayo a mangisagana iti lubong para iti Maikadua a Yaay ti Apo.”2