Nasamay met lang ti Plano?
Paneknekak a nasamay ti plano ti kinaragsak. Daytoy ti pinarsua ti Nailangitan nga Amayo, a mangay-ayat kadakayo.
Nasamay met lang ti Plano?
Itay nabiit nagsarsaritakami iti maysa a baro a nagserbi iti mision adun a tawen ti naglabas, ket addan propesional a trabahona ti agdama. Iti sumagmamano a wagas, kasla dimmur-asen ti biagna. Ngem kimmapuy ti pammatina. Lumlumned isuna iti taaw ti panagdudua iti Mangisalakan ken Simbaanna. Inlawlawagna nga awan ti inaw-awatna a parabur a ninamnamana manipud iti naisubli nga ebanghelio. Dina narikna a nasamay ti plano ti kinaragsak iti biagna.
Ti mensahek ita ket agpaay iti amin a mabalin a maaddaan ti kastoy met a panagrikna. Agsaritaak kadagiti tao nga idi “nariknada a nagkanta iti pangsubbot nga ayat” ngem saandan a “marikna itan.”1
Insagana ti naayat a Nailangitan nga Amatayo ti napintas a plano para iti agnanayon a ragsaktayo. Ngem no saan a mapasamak iti biag ti wagas a ninamnamatayo, kasla saan a nasamay ti plano.
Apay ngata no dadduma mariknatayo ti narikna dagiti disipulo ni Jesus idi addada iti bapor, “iti tengnga ti baybay, sinabuagan dagiti dalluyon: ta ti angin sungat idi.”2
Idi, iti nasapa unay a bigat:
“Ni Jesus napan kadakuada, a nagnagna iti rabaw ti baybay.
“Ket dagiti disipulo idi nakitada a magmagna iti rabaw ti baybay, naglagawda, … gapu iti buteng nagikkisda.
“Ngem ni Jesus dagus a kinasaona ida a kunkunana, Agtalgedkayo, siak daytoy; dikay agbuteng.
“Ket ni Pedro simmungbat kenkuana ket kinunana, Apo, no sika ngarud, ibilinmo nga umayak kenka a magna iti rabaw ti danum.
“Ket kinunana, Umayka. Ket dimsaag ni Pedro iti bapor, ket nagna iti rabaw ti danum, a mapan ken Jesus.
“Ket idi nakitana ti angin, nagbuteng; ket idi mangrugi a lumned, nagikkis, … Apo, isalakannak.
“Ket dagus a ni Jesus inunnatna ti imana ket iniggananna ket kinunana kenkuana, O sika a bassit ti pammatina, Apayapay nagduaduaka?”3
Maibinglayko man kadakayo ti tallo a prinsipio a naadalko ken Pedro? Idawdawatko a matulongan koma dagitoy a prinsipio ti siasinno man a makarikna a saan a nasamay ti plano ti kinaragsak kadagiti biagda.
Umuna, agtignay iti pammati ken Jesucristo.
Masdaawak iti pammati ni Pedro. Iti simple nga awis ni Jesus nga “umayka,” pinanawanna ti naisabbuag a baporna. Kasla ammona a no inawis ni Jesucristo nga aramidenna ti maysa a banag, maaramidna daytoy.4 Ad-adda a nagtalek ni Pedro iti Mangisalakan ngem iti baporna. Ket ti pammati ti nangted kenkuana iti bileg nga agtignay iti tured bayat ti makapa-stress, ken nakabutbuteng a situasion.
Ti pammati ni Pedro ti mangipalagip kaniak iti maysa a padas a nangngegak manipud ken ni Elder José L. Alonso. Di nagbayag kalpasan ti ipupusay ti anak ni Elder Alonzo, napanawanna ti pamiliana a babassit pay dagiti annakna, nangngeg ngarud ni Elder Alonzo nga agsasarita dagiti ubbing.
“Anianto ti aramidentayo?” dinamagda.
Insungbat ti siam ti tawenna nga anakna a babai, “OK ni Daddy. Ikaskasabana ti ebanghelio ni Jesucristo.”
Kas ken Pedro, naawatan daytoy bassit nga anakna a babai dagiti karitna ken nagtalek ken Jesucristo ken iti Pannubbotna. Mangiyeg iti kappia ken pigsa a dumur-as ti pammati iti Mangisalakan.
No subliam dagiti naglabas iti biagmo, patiek a makitamto nga inaramatmo ti pammatim iti namin-adu. Ti ikakappeng iti Simbaan ket tignay ti pammati. Ti panagkararag iti Nailangitan nga Ama ket maysa a tignay ti pammati. Ti panagbasa iti nasantuan a kasuratan ket maysa a tignay ti pammati. Ti idedengngeg iti mensahek daytoy a sapasap a komperensia ket maysa a tignay ti pammati. Kas ti naibagan ni President Russell M. Nelson , “Saanyo a pabassiten ti pammati nga adda kadakayo.”5
Adtoy ti sabali pay nga adal a nasursurok ken Pedro:
Iti panawen ti riribuk, umasideg a dagus ken Jesucristo.
Idi nagna a napan iti Mangisalakan, nagbuteng ni Pedro iti angin ket nangrugi a lumned. Ngem idi naamiris ni Pedro ti mapaspasamak, dina pinadas ti nagna iti danum a bukodna wenno naglangoy a nagsubli iti bapor. Imbes a naawanan iti pammati ken Cristo, kimpet a nasaysayaat, nga impukkawna, “Apo, isalakannak.”
“Ket dagus nga inunnat ni Jesus ti imana ket iniggamanna.”6
Maipasangotayo amin iti rigrigat iti biagtayo a mabalin a mangpakapuy iti pammatitayo ken manglemmes kadatayo. No mapasamak daytoy, laglagipen nga adda sabali pay a nagan ti plano ti kinaragsak ti Nailangitan nga Ama—ti plano ti pannakasubbot. Ti plano ket saan a ti kaadda ti nam-ay ken napintas a biag, saan a pulos a madalupo, saan a pulos a lumned, a kanayon a nakaisemtayo. Ammo ti Nailangitan nga Ama a nasken a masubbottayo. Daytoy ti gapu nga insaganana ti plano ti pannakasubbot.7 Daytoy ti gapu nga imbaonna ti Mannubbot. No agrigattayo—iti ania man a gapu—dina kayat a sawenn a saan a nasamay ti plano. Dayta ti panawen a kasapulantayo unay ti plano!
Kadagita a kanito, surotenyo ti pagwadan ni Pedro. Umasideg a dagus iti Mangisalakan.
“Ita ti kanito ken aldaw ti pannakaisalakanyo. … Saanyo nga itantan ti aldaw ti panagbabawiyo.”8
Sadino man ti yantayo ken sadino man ti naggapuantayo, ti panagbabawi ti dalan nga agtultuloy. Insuro ni Presidente Nelson:
“Awan ti nawaywaya, nataktakneng, wenno napatpateg iti panagdur-astayo ngem iti masansan, inaldaw a panangipamaysa iti panagbabawitayo. …
“Napasnekkayo man nga agtultuloy iti dana ti katulagan, naikaglis wenno nagsardengkayo iti dana ti katulagan, wenno saanyon a makita ti dana manipud iti yanyo ita, ipakaasik nga agbabawikayo. Padasenyo ti pangpapigsa a bileg ti inaldaw a panagbabawi—ti panangaramid ken panagbalin a nasaysayaat bassit iti inaldaw.”9
Ti yaasideg ken Cristo kaipapananna ti ad-adda ngem iti panangpanunot laeng Kenkuana wenno panangisarita Kenkuana wenno panangayat Kenkuana. Kaipapananna ti panangsurot Kenkuana. Kaipapananna ti panagbiag iti wagas a masuruannatayo nga agbiag. Ken para iti amin kadatayo, agbabawi a saan nga itantan.
Nagtrabaho dati ti maysa kadagiti babbalasangko iti missionary training center. Imbagana kaniak maipapan iti sinuruanna nga elder a nagpudno kenkuana a di sigurado no pudno ti Libro ni Mormon. Intultuloyna ti nagkararag para iti nespirituan a saksi, ngem awan ti naawatna a sungbat.
Nagkararag ti balasangko a mangammo iti nasken nga aramidenna tapno matulonganna ti misionario. Ti impresion a naawatna ket saan a naited laeng kadagiti nasantuan a kasuratan tapno mabasatayo ida ken maaddaan iti pammaneknek; naitedda pay a mangisuro kadatayo nga agtungpal iti bilbilin ti Dios. Imburay ti balasangko daytoy a kapanunotan iti misionario.
Idi agangay, nakitana manen daytoy a misionario, a langana ti naragsak unay. Imbagana kenkuana nga iti kamaudianan inawatna ti pammaneknek a pudno ti Libro ni Mormon. Ammona a simmangbay daytoy a saksi gapu ta ikarkarigatanna unay nga aramiden ti isursuro ti Libro ni Mormon.
Surotentayo koma ti pagwadan ni Pedro iti yaasidegna iti Mangisalakan iti panawen ti riribuk. Surotenyo ni Jesucristo imbes nga agpannuray iti bukodyo a sirib ken pigsa. Kasano man ti kapaut ti panangpadasyo a magna iti danum nga awan Isuna, di pay naladaw ti mangdanon Kenkuana. Nasamay ti plano!
Adtoy ti maikatlo a prinsipio a naadalko ken Pedro ken iti padasna:
Ipakumbabam ti bagim iti sango ti Apo, ket itag-aynakanto iti nain-indaklan a bambanag.
Impakita ni Pedro ti pammati, agpada iti rabaw ti danum ken iti panagpatulong iti Mangisalakan idi kasapulanna. Nupay kasta, nakita ti Mangisalakan ken Pedro ti potensial para iti adu pay. “O sika a bassit ti pammatina,” kinunana, “Apayapay nagduaduaka?”10
Mabalin a pinagbabawyan ni Pedro daytoy a babalaw. Ngem napakumbaba nga inawatna. Intuloyna ti nagkalikagum iti dakdakkel a pammati ken Jesucristo. Babaen ti adu a nayon a padas a mangpappapigsa iti pammati—narigat unay ti dadduma kadagitoy—idi agangay nagbalin ni Pedro a napigsa a lider a kasapulan ti Apo a pagbalinanna. Naipatungpalna dagiti naindaklan a banag iti serbisio ti Apo.
Ania dagiti naindaklan a banag a kayat ti Apo a maipatungpalyo? Iti Simbaan ken pagarianna, adu ti gundaway a makapagserbi ken agministro iti dadduma kas iti inaramid ti Mangisalakan. Kayatna nga agbalinka a paset ti naindaklan nga aramidna. Dinto agbalin a napudpudno kenka ti plano ti ragsak ngem iti no kaano a tultulongam ti dadduma nga agbiag iti daytoy.
Iti panangpapigsak iti pammatik, makapagbalbaliw-biag dagitoy a balikas ni Alma: “Nagasat dagiti mangipakumbaba iti bagbagida a saan a napilit nga agpakumbaba.”11 Napakumbaba nga isaadtayo koma ti bagbagitayo a mabalin a maitag-aynatayo ni Jesus, maiturongnatayo, ken aramidentayo ti amin a kabaelantayo.12
Paneknekak a maar-aramid ti plano ti ragsak. Daytoy ti pinarsua ti nailangitan nga Amayo, nga am-ammo ken ay-ayatennakayo a naan-anay. Nasamay gapu ta naparmek ni Jesucristo ti basol ken ipapatay babaen iti Pannubbotna. Umaykayo Kenkuana, sumurotkayo Kenkuana, ken “nadaras ti pannakaidanon kadakayo ti naindaklan a plano ti pannakasubbot.”13 Iti nagan ni Jesucristo, amen.