Aramiden ti Kapatgan a Banag
No ipamaysatayo ti biagtayo ken Jesucristo, maparaburantayto iti naespirituan a pigsa, pannakapnek, ken rag-o.
Di unay nabayag, narikna ti maysa a gayyem a bumisita iti maysa a babai iti wardna. Dina inkankano ti parikna gapu ta dina unay am-ammo isuna—saan a nasken daytoy. Ngem gapu ta agtultuloy a mariknana daytoy, inkeddengna nga aramiden ti parikna. Gapu ta mariknana a saan a komportable maipapan iti asideg a panagbisita, inkeddengna a mangitugot iti banag a makatulong a mangpalag-an iti danagna. Awan duadua a di makapan nga awan ti iggemna! Isu a gimmatang iti sangalata a sorbetes ket pimmanaw a napan ket nagdanag amangan ta madi ti panagbisitana.
Nagtugtog iti ridaw ti babai, ket iti nabiit simmungbat ti kabsat a babai. Inyawat ti gayyemko ti sorbetes a naikabil iti brown a paper bag ket nagsaritada. Saan pay a nabayag idi naamiris ti gayyemko no apay a kasapulan ti panagbisita. Ket nagtugawda iti sango a beranda, ket imbinglay ti babai ti adu a karit a pakaipaspasanguanna. Kalpasan ti maysa nga oras a panagsaritada iti nadagaang a tiempo ti kalgaw, nadlaw ti gayyemko a matuntunaw ti sorbetes iti brown a paper bag.
Insaona, “Ladingitek unay a natunawen ti sorbetesmo!”
Insungbat a siiisem ti babai, “OK lang!” Diak pabus-oyan ti nasam-it!”
Iti tagainep, imbaga ti Apo ken propeta Lehi, “Nagasatka Lehi, gapu kadagiti banag nga inaramidmo.”1
Ti panagbalin a disipulo ni Jesucristo, iramanna ti ad-adda pay ngem iti inanama wenno panamati. Agkasapulan iti kagumaan, tignay, ken panagkumit. Agkasapulan nga agaramidtayo, agbalin a “managtungpal iti sao, ket saan laeng a managdengngeg.”2
Iti kaso ti natunaw a sorbetes, ania ti kapatgan a banag? Ti sorbetes? Wenno ti inaramid a banag ti gayyemko?
Adda napintas a padasko iti maipatpateg a balasitang a nagdamag iti napudno unay a saludsod: “Sister Craven, kasano nga ammom a pudno ti ania man a banag maipapan ti Simbaan? Gapu ta awan ti mariknak.”
Sakbay ti isusungbatko, immuna a nagsaludsodak kenkuana. “Ibagam kaniak maipapan ti bukodmo a panagadal iti nasantuan a kasuratan.”
Insungbatna, “Diak agbasbasa kadagiti nasantuan a kasuratan.”
Dinamagko, “Kumusta ti pamiliam? Agad-adalkayo kadi iti Umaykayo, Sumurot Kaniak a sangapamiliaan?”
Kinunana, “Saan.”
Dinamagko ti panagkararagna: “Ania ti mariknam no agkararagka?”
Insungbatna: “Diak agkarkararag.”
Simple ti sungbatko kenkuana: “No adda kayatmo nga ammuen, nasken nga adda aramidem.”
Di kadi pudno iti ania man a banag a kayattayo nga adalen wenno ammuen? Inawisko ti baro a gayyemko a rugianna nga aramiden ti ebanghelio ni Jesucristo: agkararag, agadal, agserbi iti dadduma, ken agtalek iti Apo. Saan a dumteng ti kumbersion no awan ti ar-aramiden. Umay babaen ti bileg ti Espiritu Santo no irantatayo nga agkagumaan a mangammo babaen ti panagdawat, panagsapul, ken panagtugtog. Umay babaen ti panangaramid.3
Iti Doktrina ken Katulagan, masansan a kuna ti Apo, “Saan a napateg.”4 Daytoy ti mangpautob kaniak a no adda banag a saan a napateg, nalabit nga adda banag a kapatgan. Iti panagpasnektayo nga agaramid iti maysa a banag wenno agaramid iti ania man a banag, a masaludsodtayo iti bagitayo, “Ania ti banag a kapatgan?”
Masansan nga agusar dagiti advertizer iti slogan kas iti “Kasapulan” wenno “Nasken nga Adda” iti namnama a pangawis kadatayo a mamati a kasapulan ti produkto nga ilaklakoda para iti pagragsakan ken pagimbagantayo. Ngem talaga kadi a kasapulan ti ilaklakoda? Nasken a talaga kadi a maaddaantayo iti daytoy? Napateg kadi a talaga daytoy?
Adtoy ti sumagmamano a kapanunotan nga ibilang. Ania ti banag a kapatgan?
-
Mano a “likes” ti maalatayo kadagiti posttayo iti social media? Wenno kasano ti kadakkel ti ayat ken pammateg kadatayo ti Nailangitan nga Amatayo?
-
Panangaruat iti kaudian nga estilo iti kawes? Wenno panangipakita iti respeto iti bagitayo babaen ti panagkawes a disente?
-
Panangsapul iti sungbat babaen ti internet search? Wenno panangawat iti sungbat manipud iti Dios babaen ti Espiritu Santo?
-
Panagtarigagay iti ad-adu pay? Wenno pannakapnek no ania iti naiteden kadatayo?
Isuro ni President Russell M. Nelson:
“Addaan iti Espiritu Santo kas kaduayo, makitayo iti kultura ti kinalatak a nangrimbaw iti kagimongantayo. Makapagbalinkayo a nasirsirib ngem dagiti immuna a henerasion. …
“Mangituding iti pagrukodan para iti dadduma iti lubong!”5
Agtalinaed a nakapokus iti no ania ti pudno a kasapulan para iti manayon a rag-o. Awan ti ad-adda nga ayaten ni Satanas no di ti panangpukawtayo iti agnanayon nga ik-ikkan pategtayo, nga iturturongnatayo a mangsayang iti napateg nga oras, talento, wenno naespirituan a pigsa iti bambanag a di nasken. Awisek ti tunggal maysa kadatayo nga ikararagan dagiti banag a mangsinga kadatayo iti panangaramid iti kapatgan.
Insuro ti third grade teacher ti inauna nga anakko ti klasena a “pengdan ti utekmo.” Daytoy ti palagip kadagiti agtutubo nga estudiantena nga isuda ti mangkontrol iti panunotda ket ngarud makontrolda ti aramidenda. Palagipak ti bagik a “pengdan ti utekko” no makitak ti bagik a maisiasi iti banag nga awan pategna.
Itay nabiit imbaga kaniak ti maysa nga estudiante iti haiskul a nagbalinen a nalatak iti dadduma nga agtutubo ti Simbaan ti di panangikankano kadagiti bilin tapno agbasol ken agbabawi iti kamaudianan. Naibaga kaniak a “daytoy ti kita ti badge of honor.” Awan duadua, ituloy ti Apo a pakawanen dagiti napakumbaba nga agbabawi “nga addaan pudno a panggep.”6 Ngem di nasken nga usaren ti naasi a Pannubbot ti Mangisalakan iti kasta a nalais a wagas. Ammotayo ti pangngarig ti maysa a napukaw a karnero. Siempre, panawan ti pastor ti dadduma a 99 a karnero tapno mangsapul ti maysa a nayaw-awan. Ngem mapanunotyo kadi ti rag-o a maiyeg iti Naimbag a Pastor dagiti agpili nga agbalin a 99? Dagiti agtitipon a sangkamaysa ken agtitinnulong nga agtungpal kadagiti katulaganda? Mailadawanyo kadi iti panunotyo no ania ti langa ti lubong, ti eskuela, trabaho, wenno balayyo no ti panagbalin a natulnog ket nalatak a banag nga aramiden? Di maipapan daytoy iti panagbiag a naan-anay—maipapan daytoy iti panangsarak iti rag-o bayat ti panagaramidtayo iti kasayaatan nga agtungpal iti katulagan nga inaramidtayo iti Apo.
Addaan iti lubong a mangipekpeksa iti duadua maipapan iti Dios ken umad-adu ti kinatikaw ken dadagsen, daytoy ti panawen a nasken nga agtalinaedtayo a kaasitgan iti propeta. Kas parasao ti Apo, maitalektayo a ti idagadag, ibalakad, ken ipakaasina nga aramidentayo ket dagiti banag a kapatgan.
Nupay mabalin a narigat, adda kanayon wagas a panangaramid iti umno a banag. Bayat ti panagsasarita ti grupo dagiti aggagayyem iti eskuela, nagliday ti maysa a balasitang idi nagbalin ti saritaanda iti panangdillaw iti pagrukodan ti Simbaan. Naamirisna a dina kabaelan ti agulimek lattan—nasken nga adda aramidenna. Sidadayaw, insaona maipapan ti ayat ti Nailangitan nga Ama ken no kasano a paraburan ken saluadan dagiti bilinna dagiti annakna. Nalaklaka koma nga amang no awan ti inaramidna. Ngem ania ti kapatgan a banag? Panangawat ken pannakaibilang? Wenno panagtakder kas saksi ti Dios “iti amin a panawen ken iti amin a banag, ken iti amin a lugar”?7
No rummuar ti naisubli a Simbaan ni Jesucristo iti kasipngetan, nasken a rummuartayo met iti kasipngetan. Kas babbai nga agtungtungpal iti katulagan, nasken a pagraniagentayo ti silawtayo iti ebanghelio iti sangalubongan babaen ti panagtignay ken panagbalin a pagwadan. Aramidentayo daytoy a sangkamaysa kas annak a babbai ti Dios—puersa ti 8.2 million a babbai nga agtawen iti 11 ken natataengan a maymaysa ti aramidda. Um-ummongentayo ti Israel iti pannakiramantayo iti aramid ti pannakaisalakan ken pannakaitan-ok: panagpasnek nga agbiag iti ebanghelio ni Jesucristo, panangaywan iti agkasapulan, panangawis iti amin nga umawat iti ebanghelio ken panamagkaykaysa kadagiti pamilia iti kinaagnanayon.8 Ti ebanghelio ni Jesucristo ket ebanghelio nga agipatpatungpal ken ebanghelio ti rag-o! Ditay koma tagibassiten ti kabaelantayo a mangaramid kadagiti banag a kapatgan. Mangted ti nadiosan a tawidtayo iti tured ken talek nga agaramid ken makapagbalintayo amin iti ammo ti Nailangitan nga Ama a pagbalinantayo.
Aggapu ti tema dagiti agtutubo para itoy a tawen iti Proverbio 3:5–6:
“Agtalek iti Apo iti amin a pusom; ket saan nga agpannuray iti bukod a pannakaawat.
“Iti amin a dalanmo isu ti bigbigem, ket iturongnanto dagiti desdesmo.”
Ti kangrunaan a paset ti panagtalek iti Dios ket panagtultuloy, panangpati nga Isu iwanwannatayo uray no awanantayo iti amin a sungbat.
Kakabsat, saan a maipapan daytoy iti sorbetes. Maipapan daytoy iti panagaramid iti ad-adu pay. Maipapan daytoy iti panagaramid iti kapatgan. Panagyaplikar daytoy iti doktrina ni Cristo iti biagtayo no agpasnektayo nga agbalin nga ad-adda a kas Kenkuana.
Ti ad-adda a panagtalinaedtayo a natibker iti dana ti katulagan, ad-adda pay a dumakkel met ti pammatitayo ken Jesucristo. No dumakkel ti pammatitayo, dumakkel met ti tarigagaytayo nga agbabawi. Ket no ad-adda nga agbabawitayo, ad-adda pay met a mapapigsatayo ti natulagan a relasiontayo iti Dios. Dayta natulagan a relasiontayo yasidegnatayo iti templo gapu ta ti panagtungpal iti katulagan iti templo ket ti no kasano nga agibturtayo iti panungpalan.
No ipamaysatayo ti biagtayo ken Jesucristo, matarabaytayto nga agaramid iti no ania ti kapatgan. Ket maparaburantayto iti naespirituan a pigsa, pannakapnek, ken rag-o! Iti nagan ni Jesucristo, amen.