Dika Agbuteng: Mamatika Laeng!
Mangrugikayo nga agsapul iti ragsak babaen ti panagyaman iti parabur a naawattayon manipud iti mangmangted iti tunggal nasayaat a sagut.
Iturongko ti saritak ita kadagiti agtutubo ti Simbaan, a kaipapananna ti edad ti asino man wenno naub-ubing ngem ni President Russel M. Nelson. Manmano nga agusarak iti bisual, ngem diak mapagkedkedan a maibinglayko daytoy maysa.
Daytoy cri de couer aggapu iti agtawen-iti-walo a gayyemko a ni Marin Arnold, naisurat idi pito ti tawenna. Ipatarusko para kadakayo iti napabaro a nagkauna nga Egipsio:
Patpatgen a Bishop
ti sapasap a komperensia
ket Makabannog apay
A nasken nga
Aramidentayo? ibagayo kaniak no apay
Sipupudno, Marin
Arnold.1
Marin, ti mensahe nga itedko ket awan duadua a mangupay manen kenka. Ngem no suratam ti bishopmo tapno agreklamo, nasken nga ibagam kenkuana a ti naganko ket “Kearon. Elder Patrick Kearon.”
Iti dumani dua a tawen nagsaknap ti nakaro unay a pandemia iti planetatayo, kas iti adda iti biblia, ken idinto ta nangyeg dayta nga angol iti pannakaisardeng ti dumani amin a banag mainaig iti sosial, madlaw a di nangpasardeng iti kinabrutal, kinaranggas, ken naulpit a panagdarup a mainaig iti politika. Kasla di pay umdas dayta, maipaspasangotayo latta kadagiti karit iti gimong ken kultura, manipud iti pannakaipaidam ti ekonomia agingga iti pannakadadael ti aglawlaw agingga iti panagduduma iti puli ken adu pay.
Ti kasta a naririgat nga aldaw mabalin a makaupay kadagiti agtutubotayo, isuda a pakakitaan iti optimismo ken kinaregget maipanggep iti masakbayan ti biagtayo. Naibaga a “ti bileg dagiti agtutubo ti gagangay a kinabaknang ti intero a lubong. Dagiti … agtutubo … ti rupa … ti masakbayantayo.”2 Maysa pay, dagiti annaktayo ti pagtalkan a dagiti imada ti pangikabilanto iti pagbanagan daytoy a Simbaan.
Naikkantayo iti agdama a panawen, maawatan a marikna dagiti agtutubo a saanda nga idealistiko ngem idi. Ni Dr. Laurie Santos, maysa a propesor iti Yale University, nangbukel itay nabiit iti klase a napauluan iti Psychology and the Good Life. “Ti umuna a tawen nga indiaya ti klase, dumani [maysa a kuarter] ti [intero] nga undergraduate student body ti nag-enrol.”3 Binisita ngarud ti nasurok a 64 milion a tattao ti podcastna. Mangisursurat maipapan itoy a didigra, nakita ti maysa a journalist no kasano ti kasaem a makakita iti adu a nalalaing, agtutubo nga estudiante—ken nataengan—desperado “nga agsapsapul iti maysa a banag a napukawda” wenno, agtartarigagay iti maysa a banag nga awan kadakuada.4
Ipakaasik ita kadagiti agtutubotayo, ken dakayo a nagannak ken nataengan a mangbalakad kadakuada, ket rugianyo ti panagsapsapulyo iti ragsak babaen ti panagyaman iti parabur nga inawattayon iti mangmangted iti tunggal nasayaat a sagut.5 Iti umno a kanito adu iti lubong ti agdamdamag iti nauuneg a saludsod ti kararua, nasken a masungbatanmi iti “naimbag a damag”6 ti ebanghelio ni Jesucristo. Ti Simbaan ni Jesucristo dagiti Santo iti Ud-udina nga Aldaw, nga agtaltalinaed iti napateg a saadna iti mision ken mensahe ti Mangisalakan ti lubong, mangidiaya iti kapatgan a wagas nga addaan agnanayon a pategna iti agpada a panagsapul iti nasayaat ken agaramid iti nasayaat iti kasta a kasapulan nga oras.
Kinuna ni President Russell M. Nelson a daytoy a kaputotan dagiti agtutubo adda kabaelanda a maaddaan iti “ad-adda nga epekto [para iti pagimbagan] iti lubong ngem iti ania man a sigud a kaputotan.”7 Datayo, ti amin a tao, nasken nga “[agkan]kanta iti kanta ti pangsubbot nga ayat,”8 ngem kasapulan ti disiplina dayta—“kinadisipulo,” no aramidenyonto—ti kita a mangsaluad maibusor ti madi a galad ken makaperdi nga ugali a manglapped iti panagkantatayo iti dayta a kansion ti agnanayon a pannakaisalakan.
Uray no agtalinaedtayo iti “nainit a bangir ti kalsada,”9 makapagtaraytayo iti tao a determinado a mangsapul iti maysa a banag a dakes maipapan iti amin a banag. Ammoyo ti pagsasaona: “Kanayon nga agbalin a kadaksan dagiti banag sakbay nga agbalinda a dakes.” Anian a nakadakdakes a pannirigan, ken anian a napeggad a panagbiag! Wen, mabalin a kayattayo no dadduma ti pumanaw iti yantayo, ngem awan duadua a ditayo panawan ti kinasiasinotayo—annak ti sibibiag a Dios a mangipatpateg kadatayo, a kanayon a nakasagana a pakawanennatayo, ken dinatayo kaano man baybay-an. Dakayo dagiti kapatgan a sanikuana. Dakayo ti anakna, a nangtedanna kadagiti propeta ken kari, naespirituan a sagut ken paltiing, milagro ken mensahe, ken anghel iti agpada a bangir ti belo.10
Inikkannakayo pay iti Simbaan a mangpapigsa kadagiti pamilia iti mortalidad ken mangbegkes kadakuada iti kinaagnanayon. Daytoy ti mangted iti nasurok a 31,000 a ward ken branch a pagguummongan, pagkantaan, pagayunuan ken pagkararagan dagiti tao iti tunggal maysa ken pangtedanda iti sanikuada iti napanglaw. Ditoy a managanan, maaddaan sungsungbatan, mapagministeran ti tunggal tao, ken boluntario a pagsisinnerbian dagiti gagayyem ken pada a tao iti calling-da manipud iti aramid a klerikal agingga iti rebbengen a custodial. Agserbi dagiti young adult—ken kasta met dagiti senior couple—iti mision iti rinibu iti bukodda a gastos nga awan dayengdengda sadino man ti pagtrabahuanda, ken agbiahe dagiti miembro nga agtutubo ken nataengan iti templo tapno mangannong iti sagrado nga ordinansa a kasapulan a mangbegkes a sangkamaysa iti pamilia ti tao—natured nga aramiden iti kasta a nasupadi a lubong ngem temporario laeng ti kasta a sinnupadi. Sumagmamano laeng dagiti rason nga itedtayo para iti “namnama nga adda [kadatayo].”11
Siempre iti aldawtayo, nagririgat unay a banag ti nakaipasanguan ti asino man a disipulo ni Jesucristo. Dagiti lider daytoy a Simbaan it-itedda ti biagda iti panagsapsapul iti tarabay ti Apo iti panangrisut kadagita a karit. No adda di maresolba iti pannakapnek ti tunggal maysa, nalabit a buklenda ti paset ti krus a kinuna ni Jesus a nasken nga ibaklaytayo tapno sumurot Kenkuana.12 Husto daytoy gapu ta addanto dagiti nalidem nga aldaw ken narigat a banag nga inkari ti Dios, nga iti ulep iti aldaw ken monmon ti apuy iti rabii, iwanwanna dagiti propeta, mangted iti landok a pagkaptan, luktanna ti akikid a ruangan nga agturong iti akikid a dana, ken kangrunaan ti amin patgannatayo iti bileg a mangturpos iti dalan.13
Ngarud, agtalinaedkayo koma iti sibubukel a pasken nupay dikayo sigurado iti broccoli. Agpapudot iti silawna ket ipabulodyo ti bukodyo a silaw iti panggep.14 Addaandan iti daytoy iti Primary: Ni Jesus kayatna “[kadakayo] a raniag ti init.”15
Idi napan ken ni Jesus ti lider ti Judio a ni Jairo tapno agasanna ti 12 ti tawenna nga anakna a babai a nakaudatal a matmatayen iti balayda, makumikom ti Mangisalakan iti napaut idi dimteng ti adipen a kunkunana itoy madandanagan nga ama, “Tay anakmo a babai natayen; dika bannogen ti Mannursuro.”
“Ngem idi mangngeg ni Jesus simmungbat kenkuana, a kunkunana, Dika agbuteng: mamatika laeng, ket isu mapasalun-atto.”16
Ket nalaingan. Ket aramidenyo met. “Dika agbuteng, mamatika laeng.”
Gapu ta tunggal maysa kadakayo ditoy nga agbuybuya ket napateg iti Dios ken iti Simbaanna, gibusak itoy espesial a panangipakdaar kas apostol. Sakbay nga inawatyo ti sagut ti Espiritu Santo, addan naimula a Silaw ni Cristo iti kararuayo,17 a ti “silaw nga adda iti amin a banag, … mangted biag iti amin a banag,”18 ken isu ti impluensia iti naimbag iti puspuso ti amin a tao a nagbiag wenno agbiagto. Naited dayta a silaw a mangsaluad ken mangisuro kadakayo. Maysa kadagiti kapatgan a mensahena ti biag isu ti kapatgan iti amin a sagut, ti sagut a maadaltayo ket magun-od iti agnanayon laeng babaen ti Pannubbot ni Apo Jesucristo. Kas Silaw ken Biag ti Lubong,19 immay ti Bugbugtong nga Anak ti Dios a mangted kadatayo iti biag babaen ti panangparmekna iti patay.
Ikumittayo koma a naan-anay ti bagitayo iti sagut ti biag ken tulongantayo dagiti agpeggad a mangisuko itoy sagrado a sagut. Dakayo a lider, mamalbalakad, gagayyem, pamilia—agannad kadagiti pagilasinan ti depresion, pannakaupay, wenno ania man a banag a seniales ti panagdangran iti bagi. Idiayayo ti tulongyo. Dumngegkayo. Mangaramid iti kita ti pannakiballaet no maitutop.
Iti asino man kadagiti agtutubotayo nga agkarkarigatan dita, ania man dagiti pakaseknan wenno rigatyo, saan a panagpakamatay ti sungbat. Dina palag-anen ti ut-ot a mariknayo wenno ipagarupyo a dakayo ti mangigapgapu. Iti lubong nga agkasapulan unay iti amin a lawag a magun-odna, saanyo koma a pabassiten ti agnanayon a silaw nga inkabil ti Dios iti kararuayo sakbay daytoy a lubong. Kasaoyo ti maysa a tao. Agpatulongkayo. Diyo dadaelen ti biag a nangtedan ni Cristo iti biagna tapno mataginayon. Maibturanyo dagiti rigat ditoy a biag gapu ta tulongandakayo a mangibtur kadakuada. Napigpigsakayo ngem iti ipagarupyo. Magun-od ti tulong, manipud iti dadduma ken nangnangruna manipud iti Dios. Maay-ayatkayo ken ik-ikkan-pategkayo ken kasapulankayo. Kasapulandakayo! “Dika agbuteng, mamatika laeng.”
Maysa a tao a nagpasar iti paspasamak a nalidliday nga amang ngem iti mapasarantayo, insangitna: “Agtultuloykayo [ay-ayatek nga agtutubo a gagayyemko]. Pigsa ti pakinakem, … kakabsat a lallaki; ket ala, ala gaw-aten ti balligi! Pagragwenyo ti puspusoyo, ket agragsakkayo iti aglaplapusanan.”20 Adu dagiti pagragsakantayo. Agkakaduatayo, ken addatayo Kenkuana. Saanyo nga ipaidam kadakami ti gundaway nga addakayo kadakami, idawatko, iti sagrado ken nasantuan a nagan ni Apo Jesucristo, amen.