Ti Nadiosan a Kababalinmo ken Agnanayon a Pagtungpalam
Awisek ti panangipamaysayo iti biagyo ken ni Jesucristo ken laglagipen dagiti pundasion ti kinapudno iti Young Women theme.
Patpatgek a kakabsat a babbai, agyamankami ti kaaddayo ditoy Mapadayawanak a makipagpaset kadaytoy a session dagiti babbai ti sapasap a komperensia. Naaddaannak met iti pribilehio nga agatendar kadagiti klase ti Young Women. Ngem kayatko nga ibaga ti nabatad—saanak nga ubing ken saanak a babai! Uray no kasta, nasursurok a diak unay mailanglangi no maisaok tay Young Women theme a kaduak dagiti babbai. Ti naindaklan a doktrina a naisuro iti Young Women Theme1 ket napateg kadagiti young women, ngem maiyaplikar iti amin, a pakairamanantay a saan a young women.
Mangrugi ti Young Women Theme iti, “Maysaak a maipatpateg nga anak a babai dagiti Nailangitan a Nagannak nga addaan iti nadiosan a kababalin ken agnanayon a pagtungpalan.”2 Naglaon daytoy a sarita iti uppat a napateg a kinapudno. Umuna, maysaka a maipatpateg nga anak a babai. Awan aramidem—wenno dimo aramiden—ti mabalin a mangbalbaliw kadayta. Ay-ayatennaka ti Dios gapu ta espiritu nga anaknaka a babai. No dadduma, ditay marikna ti ayatna, ngem kanayon nga adda latta. Ti panagayat ti Dios ket naan-anay.3 No dadduma, saantayo a kabaelan a marikna dayta nga ayat.
Napateg ti akem ti Espiritu a mangipakaammo ti ayat ti Dios kadatayo.4 Ngem, ti impluwensia ti Espiritu Santo ket mabalin a lapdan “ ti nakaro nga emosion kas ti pungtot, gura, … [wenno] buteng … kasla panangnanam iti naimas a sabor ti ubas kabayatan a mangmangan iti sili a jalapeño. … [Ti maysa a sabor] ket naan-anay a rimbawanna ti sabali.”5 Kasta met, dagiti galad a mangiyadayo kadatayo iti Espiritu Santo, karaman ti basol,6 ket mangparigat kadatayo iti panangbigbig iti ayat ti Dios kadatayo.
Kasta met, kumapsot ti panagriknatayo iti ayat ti Dios gapu kadagiti naririkut a kasasaad ken pisikal wenno mental a sakit, ken dadduma pay. Iti amin kadagitoy, ti balakad ti mapagtalkan a lider wenno propesional ket masansan a makatulong. Ikagumaantay met a pasayaaten ti panangriknatayo iti ayat ti Dios babaen ti panangsaludsodtayo, “Saan kadi nga agbalbaliw ti panagayatko iti Dios wenno ay-ayatek kadi isuna no nasayaat dagiti aldawko, ngem saan unay no saan a nasayaat dagiti aldawko?”
Ti maikadua a kinapudno ket addaantayo iti nailangitan a nagannak, maysa nga ama ken maysa nga ina.7 Ti doktrina ti Nailangitan nga Ina ket sumangbay babaen iti paltiing ken naisalsalumina a pammati dagiti Latter-day Saints. Inlawlawag ni President Dallin H. Oaks ti kinapateg daytoy a kinapudno: “Ti teolohiatayo mangrugi iti nailangitan a nagannak. Kangatuan a tarigagaytayo ti agbalin a kas kadakuada.”8
Saan unay nga adu ti naipalgak maipapan iti Nailangitan nga Ina, ngem no ania ti ammotayo ket nagupgop iti maysa a gospel topic a masapulan iti Gospel Library application.9 No mabasayon no ania ti naglaon idiay, maamuanyo amin no ania ti ammok maipapan iti dayta a topiko. Ad-adu la koma ti naammuak. Uray sika adda pay salsaludsodmo ket kayatmo a mabirukan ti ad-adu pay a sungbat. Ti agsukisok ti dakdakkel a pannakaawat ket napateg a paset ti naespirituan a panagdur-astayo, ngem agannad koma. Di masukatan ti rason iti paltiing.
Ti panangipapan dinto agturong iti nain-indaklan nga espiritual a pannakaammo, no di ket iti pannakalimlimotayo wenno panangibaw-ing iti pokustayo manipud iti naipalgaken.10 Kas pagarigan, insuro ti Mangisalakan kadagiti disipulo, “Agkararagkayo iti Ama iti naganko.”11 Surotentayo daytoy a pagtuladan ken iturongtayo ti panagdaydayawtayo iti Nailangitan nga Ama iti nagan ni Jesucristo ket saantayo nga agkararag iti Nailangitan nga Ina.12
Manipud idi nangdutok ti Dios iti propeta, naawtorisarandan nga agsao iti biangna. Ngem saanda a mangpataud iti doktrina “a nakem[da] laeng”13 wenno isuroda ti saan a naipalgak. Ibilang dagiti balikas ni propeta Balaam iti Daan a Tulag, a nadiayaan iti pasuksok a mangilunod kadagiti Israelita tapno agimbag ni Moab. Kinuna ni Balaam, “No itedna [ti ari ni Moab] koma kaniak ti balayna a napno iti pirak ken balitok, diak mabalin a labsingen ti sao ti Apo a Diosko, tapno aramidek ti nakurang wenno nalabes.”14 Kasta met ti pannakalapped dagiti propeta iti ud-udina nga aldaw. Ti panangkalikagum iti paltiing manipud iti Dios ket kinapalangguad ken di nabunga. Ketdi, urayentayo iti Apo ken ti panawenna a mangipalgak kadagiti kinapudnona babaen ti wagas nga inaramidna.15
Ti maikatlo a kinapudno iti panglukat a parapo ti Young Women theme ket addaantayo iti “nadiosan a kababalin.” Paset daytoy iti kinasiasinnotayo. Nainyespirituan a “genetic” daytoy, inawattayo manipud kadagiti nailangitan a nagannaktayo15 ket di masapul iti panaggunay iti biangtayo. Daytoy ti kapapatgan iti kinataotayo, uray no ania ti pilientayo a panangbigbig iti bagitayo. Nasken para iti tunggal maysa ti panangawat kadaytoy a naindaklan a kinapudno ngem nangnangruna kadagiti tao a maibilang kadagiti grupo nga iti pakasaritaan ket marigrigat, mairurumen, ken mailanglangi. Laglagipenyo a ti kapatgan a pakailasinanyo ket mainaig iti nailangitan a kababalinyo kas anak ti Dios.
Ti maikapat a kinapudno ket addaantayo iti “agnanayon a pagtungpalan.” Saan a maipilit ti kasta a pagtungpalan kadatayo. Kalpasan ti ipapatay, awatentayto ti tumutop kadatayo ket “pasarentayo [laeng] daytay kayat[tayo] a maawat,”17 Ti pannakaipatungpal ti agnanayon a pagtungpalan ket agdepende kadagiti pilitayo. Kalikagumanna iti panagaramid ken panagtungpal kadagiti sagrado a katulagan. Daytoy a dana ti katulagan ket ti wagas nga umasidegtayo ken Cristo ken naibasar iti naan-anay a kinapudno, ken awan inggana, di mabaliwan a linteg. Ditay kabaelan a parnuayen ti bukodtay a dana sa mangnamnamatayo kadagiti inkari ti Dios a bunga. Ti panangnamnama iti bendisionna bayat ti di panangsurot kadagiti agnanayon a linteg a nakaibatayan dagitoy18 ket di umiso, kas tay panangpanunot a sagidentayo ti napudot a paglutuan ken “ikeddengtayo” a saantayo a mauram.
Mabalin a pagaammoyo a datiak nga agtamtaming kadagiti adda sakitda iti puso. Nagun-odda dagiti kasayaatan a bunga babaen iti panangsurotda kadagiti nairugi ken nakabasar iti ebidensia a plano ti panangagas. Nupay ammoda daytoyen, makitulag dagiti dadduma a pasiente iti sabali a plano ti panangagas. Kunaenda, “Diak kayat ti umawat iti adu unay a panagagas” wenno “diak kayat ti dumalan iti adu unay a follow-up test.” Siempre, nawaya dagiti pasiente a pumili kadagiti bukodda a desision, ngem no sumiasida iti kasayaatan a plano ti panangagas, agsagabada. Saan a mangpili iti di nasayaat a wagas dagiti pasiente iti sakit ti puso sadanto babalawen ti doktorda para kadagiti di nasayaat a bunga.
Pudno met dayta kadatayo. Nangted ti Nailangitan nga Ama iti dalan nga agturong iti kasayaatan nga agnanayon a bunga. Addaantayo iti wayawaya nga agpili, ngem saantayo a mapili dagiti pagbanagan iti di panangsurot ti naipalgak a dalan.19 Imbaga ti Apo, “Dayta aglabsing iti paglintegan, ken saan nga agtungpal iti paglintegan, ngem kayatna ketdi ti agbalin a paglintegan, … saan a mapasanto ti paglintegan, uray pay ti kaasi, linteg, wenno pangngeddeng.”20 Saantayo a mabalin a sumiasi iti dalan ti Nailangitan nga Ama, satayunto pabasulen Isuna para iti di nasayaat a bunga.
Ti maikadua a parapo ti Young Women theme ket mabasa a: “Kas disipulo ni Jesucristo, ikarigatak ti agbalin a kas Kenkuana. Agsapul ken agtignayak a mayannurot kadagiti bukod a paltiing ken agserbi iti dadduma iti nasantuan a naganna.” Mapadur-astayo ti pammaneknek ken ni Jesucristo babaen iti panagtignay nga addaan pammati.21 Magun-odtayo ti naespirituan a sagut “iti pannakaammo a ni Jesucristo ti Anak ti Dios, ken nailansa iti krus para kadagiti basol ti lubong.” Wenno mabalin a maawattayo ti sagut a mamati kadagiti balikas dagiti makaammo,22 aginggana a maammuantayo mismo. Masurottayo dagiti pannursuro ti Mangisalakan ken matulongantayo ti dadduma nga umasideg Kenkuana. Iti kastoy a wagas, makikaduatayo iti aramidna.23
Ituloy ti Young Women theme, “Agtakderak a kas saksi ti Dios iti amin a panawen ken iti amin a banag, ken iti amin a lugar.” Kasapulan nga amin a miembro ti Simbaan agbalin a kas saksi iti Dios,24 ngem dagiti Apostol ken Seventy ket naibilin kas naisangsangayan a saksi ni Jesucristo.25 Panunotem ti maysa nga ay-ayam ti soccer a ti goalie lang ti mangsaluad iti goal. No awan ti tulong dagiti sabali nga agay-ayam, saan a kabaelan ti goalie a dependaran ti goal, ket kanayunto a maabak ti grupoda. Kasta met ngarud, kasapulan ti tunggal maysa iti grupo ti Apo.26
Irugi ti maudi a parapo ti Young Women theme, “No ikarigatak tapno maikari iti pannakaitan-ok, ipategko ti sagut ti panagbabawi ket agkalikagum a dumur-as iti inaldaw.” Gapu iti pannubbot a sakripisio ti Mangisalakan, makapagbabawitayo, agsursurotayo kadagiti bidduttayo, ken saantayo a makondenar kadakuada. Insuro ni President Russell M. Nelson: “Ibilang ti adu a tao a dusa ti panagbabawi. … Ngem daytoy rikna a pannakadusa ket gapuanan ni Satanas. Lapdannatayo a kumita ken Jesucristo, a nakatanggaya ti takiagna, mangnamnama ken nakasagana a mangagas, mamakawan, mangdalus, mangpapigsa, mangpatarnaw, ken mangpasanto kadatayo.”27
No napudno ti panagbabawitayo, awan ti naespirituan a sugat nga agtalinaed, uray no ania ti naaramidantayo, kasano man kakarona, wenno mano a daras a naulittayo daytoy.28 Ngem no masansan ti panagbabawitayo ken sapulen ti pammakawan nga addaan iti pudno a panggep, mapakawantayo.29 Anian a naisangsangayan a sagut manipud iti Mangisalakantayo, a ni Jesucristo!30 Ipatalged kadatayo ti Espiritu Santo a napakawantayon. No mariknatayo ti ragsak ken talna,31 napukaw ti manidsidir a basol,32 ket saantayon a maparparigat iti lagip kadagiti basoltayo.33
Uray kalpasan ti pudno a panagpakawan, mabalin a maitibkoltayo. Ti pannakaitibkol saanna kayat a sawen a dayta panagbabawi ket nagkurang ngem mabalin nga iyanninawna laeng ti pagkapuyan ti tao. Anian a makaliwliwa a maammuan nga “agsupadi ti panangkita ti Apo iti pagkapsutan ken iti panagrebelde.” Ditay koma agduadua iti kabaelan ti Mangisalakan a mangtulong kadatayo iti pagkapsutantayo gapu ta “no agsao ti Apo maipapan iti pagkapsutan, kanayon nga adda ti kaasi.”34
Aggibus ti Young Women theme iti, “Addaan iti pammati, papigsaek ti pagtaengak ken pamiliak, agaramid ken agtungpalak kadagiti sagrado a katulagan, ken umawatak kadagiti ordinansa ken bendision ti nasantuan a templo.” Ti panangpapigsa iti pagtaengan ken pamilia ket pananganamong iti panangrugi ti agtultuloy a kinamanagtalek, panangtaginayon iti sagut ti pammati, wenno panangisubli kadaytoy.35 Ngem uray pay, ti pigsa aggapu iti pammati ken ni Jesucristo ken babaen iti panagaramid kadagiti sagrado a katulagan.
Iti templo, maadaltayo no siasinnotayo ken sadinno ti naggapuantayo. Kuna ti taga-Roma a pilosopo a ni Cicero, “Ti kinaawan iti ammo iti napasamak sakbay pay a naiyanakka ket mamagtalinaed kenka nga ubing a kanayon.”36 Isu, siempre, dakdakamatenna ti pakasaritaan a sekular, ngem ti obserbasionna ket mabalin a dumakkel. Agnanayon nga agtalinaedtayo nga ubbing no saantayo a maammuan ti agnanayon a pangngarig a magun-od iti templo. Dumakkeltayo iti Apo idiay, awaten ti pakabuklan ti Espiritu Santo,37 ket agbalin a naan-anay a naikumit a kas disipulo ti Mangisalakan.38 No agtungpaltayo kadagiti katulagantayo, maawattayo ti bileg ti Dios iti biagtayo.39
Awisek ti panangipamaysayo iti biagyo ken ni Jesucristo ken laglagipen dagiti pundasion ti kinapudno iti Young Women Theme. No sitatallugodkayo, tarabayennakayo ti Espiritu Santo. Kayat ti Nailangitan nga Amatayo nga agtawid ken awatentayo ti amin nga adda iti Ama.40 Dinaka masagutan iti ad-adu pay. Dinaka makarian iti ad-adu pay. Ad-adda ti panangayatna kenka ngem ti ammom ket kayatna a naragsakka iti daytoy a biag ken iti umay a biag. Iti nagan ni Jesucristo, amen.