Ngem Dimi Intalek Ida
Dagiti katulagan ken ordinansa ti mangitudo kadatayo ken mangtulong kadatayo a kanayon a manglagip iti koneksiontayo iti Apo a ni Jesucristo bayat ti panagdur-astayo iti dana ti katulagan.
Ti asawak, ni Susan, ti tallo a babbaromi ken ti assawada, amin nga appokomi, ken ni Elder Quentin L. Cook, ti kaabayko iti Korum ti Sangapulo-ket-dua iti dumani 15 a tawen, ket umanamongdanto amin iti kinapudno a diak makakanta a nasayaat. Ngem iti baet ti pagkurangak iti paglaingan a kumanta, magustuak a kantaen dagiti himno ti Pannakaisubli. Ti panagkadua ti naparegta a liriko ken nangayed nga ayug ti mangtulong kaniak nga agadal iti napateg a prinsipio ti ebanghelio ken mangparegta iti kararuak.
Maysa a himno a nangparabur iti biagko iti nakaskasdaaw a wagas ti “Let Us All Press On.” Itay nabiit ut-utobek ken sursuruek maipapan kadagiti naipangruna a balikas iti koro dayta a himno. “Ditay italek ti kuna ti nadangkes, no di laeng Apo ti tungpalen.”1
Ditay italek.
Bayat ti panagkantak iti “Let Us All Press On,” masansan a malagipko dagiti tao iti parmata ni Lehi nga agtultuloy iti dana nga agturong iti kayo ti biag a saanda laeng a “kumkumpet ”2 ngem ketdi “agtultuloy a kumpet iti landok a pagkaptan, agingga a nakaasidegda ket natnagda ket nakiranudda iti bunga ti kayo.”3 Inladawan ni Lehi dagiti ummong iti dakkel ken nalawa a pasdek a “mamabpabasol ti panangitudoda [kenkuana] ken dagiti … makiranranud iti bunga.”4 Ti sungbatna kadagiti lais ken insulto ket nangayed ken nakallalagip: “ngem dimi intaltalek ida.”5
Ikararagko a bendisionan ken lawlawagan ti tunggal maysa kadatayo ti Espiritu Santo no ibilangtayo a sangkamaysa no kasano a mapapigsatayo tapno “saan nga italek” ti dakes nga impluensia ken mangab-abi a timek ti kontemporario a lubong a pagnaedantayo.
Saan nga Italek
Ti sao nga italek isingasingna ti panangkita wenno panangikaso iti maysa a tao wenno maysa a banag. Iti kasta, ti liriko ti himno a “Let Us All Press On” balakadannatayo a mangeddeng iti husto a mangikaso iti “mabalin nga isao ti nadangkes.” Ket ni Lehi ken dagiti tao a kaduana a makiranranud iti bunga ti kayo ket mangted iti napigsa a pagwadan ti di panangikaso iti pananglais ken panangabi a masansan nga umay nga aggapu iti dakkel ken nalawa a pasdek.
Ti doktrina ni Cristo a naisurat “iti Espiritu ti sibibiag a Dios … iti taptapi a [puspusotayo] a naglasag”6 mangpadakkel iti kabaelantayo a “saan nga italek” ti adu a pannakasinga, pannakauyaw, ken dibersion iti natnag a lubong. Kas pagarigan, ti pammati a naipamaysa iti Apo Jesucristo ti naespirituan a mangpapigsa kadatayo. Ti pammati iti Mannubbot ti pagbatayan ti aramid ken bileg. No agtignaytayo a mayannurot iti kinapudno ti ebanghelio, maparaburantayo iti naespirituan a kabaelan nga agtulultuloy babaen dagiti karit ti mortalidad bayat ti panangipamaysa iti rag-o nga idiaya ti Apo. Pudno, “no aramidentayo ti umno ditay nasken nga agbuteng, gapu ta ti Apo, ti katulongantayo, kanayon nga asideg kadatayo.”7
Maysa a Personal a Koneksion babaen dagiti Katulagan
Ti iseserrek kadagiti sagrado a katulagan ken maikari nga umawat kadagiti ordinansa ti priesthood mangisangol ken mangibegkes kadatayo ken ni Apo Jesucristo ken iti Nailangitan nga Ama.8 Kaipapanan daytoy nga agtalektayo iti Mangisalakan kas Mangibalballaettayo9 ken Mangibabaettayo10 ken agpannuray iti kinaimbag, asi, ken paraburna11 iti panagdaliasattayo. No sipipigsatayo nga umay ken ni Cristo ken maisangol Kenkuana, umawattayo kadagiti pangdalus, pangagas, ken pangpapigsa a parabur ti awan inggana ken agnanayon a Pannubbotna.12
Ti panagtungpal ken panagayat iti panagkumit iti katulagan ket mangparnuay iti koneksion iti Apo a nalaus iti bileg a personal ken naespiritruan. No dayawentayo dagiti kondision ti sagrado a katulagan ken ordinansa, in-inut ken ken ad-adda a mayas-asidegtayo Kenkuana13 ken padasen ti epekto ti kinadiosanna ken ti sibibiag a kinapudno iti biagtayo. Ni Jesus nagbalin ngarud nga ad-adda pay a kangrunaan nga agbibiag iti scripture stories; mangimpluensia ti pagwadan ken pannursurona iti tunggal tarigagay, panunot, ken tignaytayo.
Awan umdas a kabaelak a mangiladawan iti eksakto a kasasaad ken bileg ti natulagan a koneksiontayo iti nagungar ken nabiag nga Anak ti Dios. Ngem saksiak a pudno dagiti koneksionko Kenkuana ken iti Nailangitan nga Ama ken ti kangrunaan a pagtaudan ti namnama, talna, rag-o, ken naespirituan a pigsa a mangpabael kadatayo tapno “di agbuteng, nupay katawaannatayo ti kabusor.”14 Kas agar-aramid ken agtungtungpal iti katulagan a disipulo ni Jesucristo, maparaburantayo nga “agtured, gapu ta kaabaytayo ti Apo”15 ket ditayo ikankano dagiti impluensia ti dakes ken manglalais a lubong.
No bisitaek dagiti miembro ti Simbaan iti sangalubongan, masansan a saludsodek daytoy: ania ti mangtulong kenka a “di italek” dagiti nailubongan nga impluensia, panaguyaw, ken panaglais? Makaisuro unay dagiti sungbatda.
Masansan nga itampok dagiti miembro ti pateg ti yaawis iti bileg ti Espiritu iti biagtayo babaen ti napateg a panagadal iti nasantuan a kasuratan, napasnek a kararag, ken umno a panagsagana a makiraman iti ordinansa ti sakramento. Masansan pay a madakamat ti naespirituan a suporta dagiti napudno a miembro ti pamilia ken mapagtalkan a gagayyem, dagiti napateg a lesson a naadal babaen ti ministering ken panagserbi iti naisubli a Simbaan ti Apo, ken ti kapasidad a mang-discern iti naan-anay a kinaubbaw ti ania man a banag a naggapu iti dakkel ken nalawa a pasdek.
Nakitak kadagitoy a sungbat ti miembro ti umisu a pagtuladan a kangrunaan ti pategna. Umuna ken kapatgan, addaan dagitoy a disipulo iti natibker a pammaneknek iti plano ti Nailangitan nga Ama iti ragsak ken ti akem ni Jesucristo kas Mannubbot ken Apotayo. Maikadua, ti naespirituan a pannakaammo ken kombiksionda ket saggaysa, personal, ken masinunuo; saanda a sapasap ken abstract. Denggek dagitoy naanep a kararua nga agsarita maipapan kadagiti katulagan a mangmangted iti pigsa a mangparmek iti oposision ken ti koneksionda iti sibibiag nga Apo a mangsupsuporta kadakuada kadagiti panawen iti agpada a naimbag ken dakes. Kadagitoy nga indibidual, pudno a ni Jesucristo ti personal a Mangisalakantayo.
Maipagna dagiti katulagan ken ordinansa ti ebanghelio iti biagtayo kas met iti kompas. Ti kompas ti maysa a ramit a mangipakita iti kapatgan a direksion ti amianan, abagatan, daya, ken laud para iti panggep ti nabigasion ken orientasion ti heograpiko. Iti pumada a wagas, dagiti katulagan ken ordinansatayo ti mangitudo ken mangtulong kadatayo a kanayon a manglagip iti koneksiontayo iti Apo a Jesucristo bayat ti panagdur-astayo iti dana ti katulagan.
Ti kapatgan a direksion para kadatayo amin iti mortalidad ket umay ken ni Cristo ket agbalin a naan-anay Kenkuana.16 Dagiti nasantuan a katulagan ken ordinansa ti mangtulong kadatayo a mangipamaysa iti Mangisalakan ken agkagumaan, babaen iti paraburna,17 nga agbalin a kas Kenkuana. Naipanamnama unay, “ti saan a makita a [bileg] tulongannatayto iti nadayag a panggep ti kinapudno.”18
Ikakapet a Naimbag iti Landok a Pagkaptan
Ti natulagan a koneksiontayo iti Dios ken Jesucristo ket ti wagas a pakaawatantayo iti kapasidad ken pigsa a “saan nga italek.” Mapapigsa daytoy a begkes no agtultuloytayo a kumpet a naimbag iti landok a pagkaptan. Ngem idi damagen dagiti kabsat ni Nephi: “Ania ti kaipapanan ti landok a pagkaptan a nakita ti amatayo …?
Ket kinuna ni [Nephi] kadakuada nga isu ti balikas ti Dios; ket asino man a mangipangag iti balikas ti Dios, ken kumpet a naimbag itoy,saandanto a maungaw; wenno dinto ida rimbawan dagiti sulisog ken dagiti naranggas a pana dagiti kabusor tapno mabulsek, a mangiturong kadakuada iti pannakadadael.”19
Kitaen koma a ti kabaelan a mangkedked iti sulisog ken dagiti naranggas a pana ti kabusor ket kari kadagiti indibidual a “kumpet a naimbag” imbes a “kumpet laeng” iti balikas ti Dios.
Makaay-ayo nga, inladawan ni Apostol Juan ni Jesucristo kas ti Balikas.20
“Idi punganay ket ti Balikas, ken ti Balikas adda iti Dios, ket ti Balikas isu ti Dios. …
“Amin a banag inaramidna; ket no awan isuna saan koma a naaramid ti ania man a naaramid. …
“Ket naaramid ti Balikas a lasag, ket nakipagtaeng kadatayo, (ket nakitatayo ti dayagna, ti dayag a kas iti Bugbugtong nga Anak ti Ama,) a napno iti parabur ken kinapudno.”21
Ngarud, maysa kadagiti nagan ni Jesucristo ket “Ti Balikas.”22
Mainayon pay, ti maikawalo a Pagannurotan ti Pammati dakamatenna ti, “Mamatikami iti Biblia a ti sao ti Dios no husto la ketdi ti pannakaipatarusna; mamatikami met iti Libro ni Mormon a balikas ti Dios.”23
Ngarud, dagiti pannursuro ti Mangisalakan, kas naisurat iti nasantuan a kasuratan, isuda pay “ti balikas.”
Isingasingko man ti ikakapet a naimbag iti balikas ti Dios kasapulanna ti (1) pananglagip, panangdayaw, ken panangpapigsa iti personal a koneksiontayo iti Mangisalakan ken iti Amana babaen dagiti katulagan ken ordinansa ti naisubli nga ebanghelio ken (2) sikakararag, sipapasnek, ken agtultuloy a panangusar iti nasantuan a kasuratan ken pannursuro dagiti sibibiag a propeta ken apostol kas pudno a paggapuan ti naipalgak a kinapudno. No maibegkestayo ken “kumpet a naimbag” iti Apo nagbalbaliw babaen ti panagbiag iti doktrinana,24 ikarik a saggaysa ken sangapada a maparaburantayo nga “agtakder kadagiti nasantuan a lugar, ken saantayto a matignay.”25 No agtalinaedtayo ken ni Cristo, agtalinaed ken makipagnanto Isuna kadatayo.26 Awan duadua, “kadagiti aldaw ti pannubok paregtaennanto dagiti Santona, ket rumang-ay iti panggep ti kinapudno”27
Pammaneknek
Agtultuloy. Kumpet a naimbag. Saan nga Italek.
Saksiak a ti kinapudno iti katulagan ken ordiansa ti naisubli nga ebanghelio ti Apo mangpabalin kadatayo nga agtultuloy iti aramid ti Apo, tapno kumpet a naimbag Kenkuana a kas Balikas ti Dios, ken tapno saan nga italek dagiti pangallilaw ti kabusor. Iti pannakiranget para iti umno, usarentayo koma ti espada, uray “ti nabileg nga espada ti kinapudno,”28 iti sagrado a nagan ni Apo Jesucristo, amen.