Itag-ayyo ti Pusoyo ket Agrag-okayo
Nayanaktayo itoy a panawen para iti nadiosan a panggep, ti pannakaummong ti Israel.
Makisasao ken ni Thomas B. Marsh, kabumbuniag idi a kameng, kinuna ti Apo a mangparparegta, “Itag-aymo ti pusom ket agragsakka, ta dimtengen ti oras ti misionmo” (Doktrina ken Katulagan 31:3).
Patiek a makapagserbi daytoy nga awis kas inspirasion para iti amin a miembro ti Simbaan. Kalpasan ti amin, inawattayo manipud iti Nailangitan nga Ama ti mision ti pannakaummong ti Israel iti agsumbangir ti belo.
“Dayta a panaguummong,” kinuna ni President Russell M. Nelson, “ti kapatgan a banag a mapaspasamak ditoy daga ita. Awanen ti sabali pay a maidasig iti kinadakkelna, awanen ti sabali pay a maidasig iti kinapategna, awanen ti sabali pay a maidasig iti kinatan-okna.”1
Awan duadua, adu dagiti maikari a panggep iti lubong. Imposible a naganan amin ida. Ngem diyo kadi kayat ti makiraman iti dakkel a panggep a maipatungpalyo ken pakaaramidan ti tulongyo a napateg a pagdumaan? Ti panaguummong ti mangaramid iti agnanayon a pagdumaan iti amin. Mabalin a makiraman dagiti tao iti amin nga edad itoy a panggep iti baet dagiti kasasaadda ken ti pagnaedanda. Awan ti ad-adda a maibilang a sabali pay a panggep iti lubong.
Iti pannakisaona kadagiti agtutubo, kinuna ni President Nelson: “Inlatang ti Nailangitan nga Amatayo ti adu kadagiti kataknengan nga espirituna—nalabit … ti kasayaatan a buyotna—para iti daytoy maudi a paset. Dagidiay a natakneng nga espiritu—dagidiay a kasayaatan nga agay-ayam, dagidiay a bannuar—ket dakayo!”2
Wen naisaganakayon sakbay daytoy a biag ken nayanakkayo a makiraman iti naindaklan nga aramid ti panaguummong ti Israel iti agsumbangir ti belo kadagitoy udi-udina nga aldaw (kitaen iti Doktrina ken Katulagan 138:53–56).
Apay a napateg unay daytoy a panggep? Gapu ta “napateg dagiti kararua iti imatang ti Dios” (Doktrina ken Katulagan 18:10). Ket gapu ta “siasino man a mamati ken [Jesucristo], ken mabuniagan, maisalakanto; ket … mangtawid iti pagarian ti Dios” (3 Nephi 11:33). Mainayon pay, “amin nga adda iti Amak maitedto kenkuana” dagiti amin nga umawat iti ordinansana ken agtungpal iti katulaganna (Doktrina ken Katulagan 84:38). Mainayon pay, “bassit dagiti agani” (Lucas 10:2).
Iti laeng Simbaan ni Jesucristo dagiti Santo iti Ud-udina nga Aldaw a masarakantayo ti bileg, turay, ken wagas a mangidiaya iti kasta a bendision iti dadduma, sibibiag man wenno natay.
Kas iti kinuna ni President Nelson: “Ania man nga oras nga aramidenyo ti ania man a mangtulong iti asino man—iti agsumbangir ti belo—mangala iti addang iti panangaramid kadagiti katulagan iti Dios ken panangawat kadagiti kasapulan nga ordinansa ti panagbuniag ken ti templo, tumultulongkayo a mangummong iti Israel. Kas iti dayta ti kasimplena.”3
Idinto nga adu ti wagas a mangtulong iti panaguummong, kayatko ti agsao ti maysa kangrunaanna: panagserbi kas maysa a full-time misionary. Para iti adu kadakayo, kaipapanan daytoy ti panangbalin a mangisursuro a missionary. Para iti adu kadakayo, kaipapanan daytoy ti panangbalin a service missionary. Padpadasen ti lubong a mangsinga kadagiti agtutubo iti daytoy sagrado a pagrebbengan nga us-usaren ti buteng ken panagamak.
Adda dagiti pannakasinga a mapaspasaran a pandemia, panangpanaw iti napintas a trabaho, panagsardeng nga agadal, wenno panagessem a maaddaan iti maysa a karelasion. Addaanto ti tunggal maysa kadagiti bukodna a karit. Tumpuar iti agangay ti kasta a pannakasinga kadagiti panawen a panagserbi iti Apo, ken dagiti pili a kasla madlaw ket saan a kanayon a nalaka itoy a kanito.
Naammuak manipud iti padas ti naburibor a panunot ti kasta a maysa nga agtutubo. Idi agsagsaganaak a mapan iti misionko, adda dagiti makapasiddaaw a puersa a naggandat a manguppapay kaniak. Maysa ti dentistak. Idi naammuanna ti appointmentko tapno agbalinak a missionary, pinadasnak a paayen iti panagserbik. Diak impagarup uray iti kabassitan a suppiaten ti dentistak ti Simbaan.
Ti pannakasinga ti panagadalko ket kumplikado met. Idi kiniddawko ti dua a tawen a panag-leave of absence-ko iti programa ti unibersidad, naammuak a saan a mabalin. Maikkatak iti unibersidad no diak makasubli kalpasan ti makatawen. Iti Brazil, serioso daytoy gapu ta ti kriteria ti panangawat iti programa iti maysa nga unibersidad ket narigat unay ken kompetitibo a panageksamen.
Kalpasan ti naulit a panangpilit, naipakaammo kaniak a no mangliwatak iti makatawen, makapag-aplayak iti eksepsion iti naidaddaduma a gapu. Mabalin a maaprobaran wenno saan. Nagamakak iti ideya iti panangala manen iti dayta narigat a pannubok iti panangawat kalpasan ti dua a tawen a panagsardeng iti panagadalko.
Adda pay espesial a panaggustok iti maysa a balasitang. Kasta met ti panaggusto ti adu kadagiti gagayyemko. Nakunak iti bagik, “No innak agmision, adda madi a mapasamak.”
Ngem ni Apo Jesucristo ti dakkel nga inspirasionko a diak agbuteng iti masakbayan no ikarigatak ti agserbi Kenkuana iti amin a pusok.
Adda met misionna nga ipatungpal. Iti bukodna a balikas, inlawlawagna, “Ta bimmabaak manipud langit, a diak aramiden ti pagayatak, no di ti pagayatan ti nangibaon kaniak” (Juan 6:38). Ken nalaka kadi ti misionna? Siempre saan. Ti panagsagabana, a napateg a paset ti misionna, ti nangigapu Kenkuana, “uray pay Dios, a kaindaklan iti amin, nga aggarigenggen gapu iti saem, ken agdara iti tunggal teterreman, ken agsagaba nga agpada ti bagi ken ti espiritu—ket kayat[na] a saan koma nga uminum iti napait a kopa, ken kumsen—
“Nupay kasta, madaydayaw koma ti Ama, ket nakiranud ken lineppas[na] ti panangisagana[na] kadagiti annak ti tattao” (Doktrina ken Katulagan 19:18–19).
Kasla narigat kadatayo ti panagserbi iti full-time mission. Nalabit nga agkasapulan nga isukotayo dagiti napateg a banag iti apagkanito. Awan duadua nga ammo daytoy ti Apo, ket kanayonto nga adda Isuna iti sibaytayo.
Kinapudnona, iti mensaheda kadagiti misionario iti Preach My Gospel, ikari ti Umuna a Panguluen, “Gunggonaan ken nawadwad a bendisionannakayto ti Apo no napakumbaba ken nainkararagan nga agserbikayo Kenkuana.”4 Pudno a nagasat ti amin nga annak ti Dios iti maysa a wagas wenno sabali, ngem adda pagdumaan ti pannakaparabur ken nawadwad a pannakaparabur iti serbisiona.
Malagipyo dagiti karit nga impagarupko a sinangok sakbay ti misionko? Ti dentistak? Nasarakak pay ti sabali. Ti unibersidadko? Mailaksidda kaniak dagitoy. Malagipyo dayta a balasitang? Inkallaysana ti maysa kadagiti nasayaat gagayyemko.
Ngem pudno a nawadwad a pinaraburannak ti Dios. Ket naadalko a makasangbay dagiti parabur ti Apo iti wagas a sabali iti no kasano ti namnamaentayo. Kalpasan ti amin, saantayo a panunot dagiti panunot ti Dios (kitaen iti Isaias 55:8–9).
Maibilang iti adu a nawadwad a parabur nga intedna kaniak gapu iti panagserbik Kenkuana kas maysa a full-time missionary ket ti dakdakkel a pammati ken ni Jesucristo ken ti Pannubbotna ken napigpigsa a pannakaammok ken pammaneknekko kadagiti pannursurona, tapno diak nalaka a maipuyot “ti tunggal angin ti doktrina” (Taga Efeso 4:14). Napukaw ti butengko a mangisuro. Dimmakkel ti kabaelak a nangsango kadagiti karit nga addaan iti namnama. Babaen iti panangpaliiw kadagiti indibidual ken pamilia a naam-ammok wenno nasuruak idi misionarioak, naadalko a pudno dagiti pannursuro ti Dios idi kunana a ti basol saan a mangyeg iti pudno a ragsak ket ti panagtungpal iti bilbilin ti Dios ket tulongannatayo a rumang-ay iti agpada a temporal ken naespirituan (kitaen iti Mosiah 2:41; Alma 41:10). Ken naadalko iti bagik a ti Dios isu ti Dios dagiti milagro (kitaen iti Mormon 9).
Napateg amin dagitoy a banag iti panagsaganak iti panagkabannuagko, agraman ti panagkallaysak ken panagbalinko a naganak, panagserbik iti Simbaan, ken iti propesion ken komunidad.
Kalpasan ti misionko, nangted pagimbagak ti nayon a turedko a mangidatag iti bagik kas napudno a pasurot ni Jesucristo ken ti Simbaanna iti amin a kasasaad ken iti amin a tao, uray panangibinglay iti ebanghelio iti napintas a babai nga agbalinto a nasagudayan, masirib, naragsak, ken patpatgen nga agnanayon a kadua, ti silnag ti biagko.
Wen. Nawadwad a pinaraburannak ti Dios, adayo nga amang iti impagarupko, kas met laeng iti amin a panangparaburna iti amin a “a napakumbaba ken nainkararagan nga agserbi Kenkuana.” Agnanayon a pagyamanak ti Dios iti kinaimbagna.
Ti misionko ti naan-anay a nangsukog iti biagko. Naadalko a napateg daytoy iti panagtalek iti Dios, agtalek iti sirib ken asina ken iti karina. Kalpasan ti amin, Isu ti Amatayo, ken awan duadua, kayatna ti kasayaatan para kadatayo.
Patpatgek nga agtutubo iti intero a lubong, idanonko ti kasta met la nga inyawis ti propetatayo, ni President Nelson, iti amin kadakayo, “nga agpailista iti youth battalion ti Apo a tumulong a mangummong iti Israel.” Kinuna ni President Nelson:
“Awan ti dakdakkel pay a pagbanagan. Awan duadua nga awan.
“Nasken a kayat a sawen daytoy a panaguummong ti amin a banag kadakayo. Daytoy ti mision a nakaibaonanyo iti daga.”5
Nayanaktayo itoy a panawen para iti nadiosan a panggep, ti pannakaummong ti Israel. No agserbitayo kas full-time missionary, makarittayo no dadduma, ngem ti Apo Mismo ti naindaklan a pagwadan ken tarabaytayo kadagiti kasta a kasasaad. Maawatanna no ania ti rigat ti panagmision. Addaan iti tulongna, maaramidtayo dagiti narigat a banag. Addanto Isuna iti sibaytayo (kitaen iti Doktrina ken Katulagan 84:88), ken nawadwad a paraburannatayo no napakumbabatayo nga agserbi Kenkuana.
Para kadagitoy amin a gapu, diak masdaaw a kinuna ti Apo ken ni Thomas B. Marsh ken kadatayo amin, “Itag-aymo ti pusom ket agragsakka, ta dimtengen ti oras ti misionmo.” Iti nagan ni Jesucristo, amen.