Maysa a Dakkel a Panagbalbaliw iti Puso
“Awanen iti Maitedko Pay Kenka”
Saan a maysa a pasamak ti panagbalbaliw iti puso; masapul ti pammati, panagbabawi, ken agnanayon a naespirituan nga aramid tapno mapasamak.
Pakauna
Iti Biernes ti Oktubre 28,1588, kalpasan a naperdi ti timon ket naiturong babaen laeng iti paggaudan, ti barko a La Girona, a kukua ti Great Spanish Armada, naidungpar kadagiti bato iti Lacada Point iti Northern Ireland.1
Narneb ti barko. Maysa kadagiti nakalasat a gumawgawawa a makalasat ket nagsingsing iti balitok nga inted kenkuana ti asawana sumagmamano a bulanen ti napalabas naikitikit iti, “Awanen ti maitedko pay kenka.”2
“Awanen ti maitedko pay kenka,”—maysa a ragup ti balikas ken maysa a singsing nga addaan disenio ti maysa nga ima a nakapetpet iti maysa a puso, maysa a pangyebkas iti ayat ti asawa a babai iti asawana.
Pakainaigan iti Nasantuaan a Kasuratan
Idi nabasak daytoy nga estoria, nakaited kaniak iti nauneg nga impresion, ket napanunotko ti awis ti Mangisalakan:“Ket idatonyo kaniak a daton ti nasneban a puso ken napnuan babawi nga espiritu.”3
Napanunotko met ti reaksion ti tattao iti balikas ni Ari Benjamin:“Wen, mamatikami kadagiti amin nga insawangmo kadakami …, a nangipaay iti naindaklan a panagbalbaliw kadakami, wenno iti puspusomi, nga awanen ti tarigagaymi nga agaramid iti kinadangkes, ngem ti ketdi agtultuloy a panagaramid iti kinaimbag.”4
Personal a Koneksion
Palubosandak man a mangibinglay iti padasko idi agtawenak ti 12, a mariknak ti epektona inggana ita.
Kinuna ni nanangko, “Eduardo, darsem. Maladawtayon kadagiti miting iti Simbaan.”
“Nanang, kaduaek ni Tatang ita nga aldaw,” insungbatko.
“Siguradoka kadi? Nasken nga agatendarka iti priesthood quorum mitingmo,” kinunana.
Insungbatko, “Kaasi met ni Tatang! Mabati nga agmaymaysa. Kaduaek ni tatang ita nga aldaw.”
Saan a miembro ni tatang ti Ti Simbaan ni Jesucristo dagiti Santo iti Ud-udina nga Aldaw.
Napan nagsimba ni nanangko ken dagiti kakabsatko a babbai iti Domingo. Isu a napanak ken ni Tatangko iti workshopna, a sadiay ti kayatna a pagyanan iti Domingo, ket kas imbagak ken ni nanangko, kinaduak isuna iti sumagmamano a minuto, kalpasanna dinamagko, “Tatang, nasayaat met la ti amin?”
Intuloyna ti pagliwliwaanna nga agtarimaan kadagiti radio ken relos, ket inisemannak laeng.
Kalpasanna imbagak kenkuana, “Innak makiay-ayam kadagiti gagayyemko.”
Di timmangad ni Tatang, a nagkuna kaniak, “Domingo ita. Dika kadi mapan iti simbaan?”
“Wen, ngem imbagak ken Nanang a diak mapan ita,” insungbatko. Intuloy ni Tatang ti aramidna, ken para kaniak, pammalubos daytan a pumanaw.
Adda napateg a soccer game iti dayta a bigat ket imbaga dagiti gagayyemko a diak libtawan gapu ta nasken a mangabakkami iti dayta nga ay-ayam.
Ngem ti parikutko nasken a lumabasak iti sango ti kapilia tapno makapanak iti pagay-ayaman iti soccer.
Inkeddengkon, impardasko ti nagtaray nga agturong iti pagay-ayaman iti soccer ket nagsardengak iti sango ti dakkel a tubeng, ti kapilia. Inalistuak ti napan iti bangir a sidewalk a sadiay adda dadakkel a kayo, ket nagtarayak iti nagbabaetanda tapno awan makakita kaniak gapu ta orasen nga agsangpet dagiti miembro iti miting.
Nakasangpetak apagisu a mangrugi ti ay-ayam. Nakapagay-ayamak ken nakaawidak sakbay a sumangpet ni nanangko.
Nasayaat a nalpas ti amin: nangabak ti teammi, ket naragsakanak unay. Ngem ti natanang a panagtarayko a napan iti pagay-ayaman ket nadlaw ti deacons quorum adviser.
Nakitanak ni Brother Felix Espinoza ti napardas a panagtartarayko kadagiti kayo tapno didak makita.
Iti rugi ti lawas, immay ni Brother Espinoza iti balayko ket indawatna nga agsaritakami. Dina imbaga ti ania man a nakitana idi Domingo, kasta met a dina dinamag no apay a diak nakimiting.
Inyawatna laeng ti manual ket kinunana, “Kayatko a sika ti mangisuro iti priesthood class inton Domingo. Minarkaakon ti leksion para kenka. Saan unay a narigat. Kayatko a basaem, ket umayakto kalpasan ti dua nga aldaw tapno tulonganka iti pannakaisagana ti leksion.” Idi naibaganan daytoy, inyawatna ti manual ket pimmanawen.
Diak kayat ti mangisuro iti klase, ngem diak kabaelan nga ibaga kenkuana ti saan. Naplanok iti dayta a Domingo ti agbati manen tapno kadwaek ti amak—kayatna a sawen, adda manen sabali a napateg a soccer game.
Ni Brother Espinoza ti maysa a tao a raraemen dagiti agtutubo. Nabirokanna ti naisubli nga ebanghelio ket nabaliwan ti biagna wenno, iti sabali a pannao, ti pusona.
Idi madanonan ti malem ti Sabado, napanunotko, “Siguro, mabalin a bumangonakto a masakit inton bigat, ket diakto mapan iti simbaan.” Saanen a ti soccer game ti pagdanagak; no di tay klase nga isurok, aglalo ti leksion ket maipanggep iti aldaw ti Sabbath.
Dimteng ti Domingo, ket nakariingak a nasalsalun-at ngem idi. Awan ti pagpambarko—diak malisian.
Daydi ti umuna a panangisurok iti leksion, ngem adda iti sibayko ni Brother Espinoza, ket dayta ti aldaw a naaramid ti naindaklan a panagbalbalaiw iti pusok.
Manipud iti dayta a kanito, rinugiak a nginilin a nasantuan ti aldaw ti Sabbath ket iti panaglabas ti panawen, kadagiti balikas ni President Russel M. Nelson, ti aldaw ti Sabbath ket nagbalin a pagragsakan.6
“Apo, Itedko Kenka ti amin a banag; Awanen ti maitedko pay Kenka.”
Panaggun-od
Kasano ti pananggun-odtayo iti dayta a dakkel a panagbalbaliw ti puso? Nairugi daytoy ket in-inut a mapasamak
-
no agadaltayo iti nasantuan a kasuratan tapno magun-od ti pannakaammo a mangpapigsa iti pammatitayo ken ni Jesucristo, a mangparnuayto iti maysa a tarigagay nga agbalbaliw.7
-
no patanoretayo dayta a tarigagay babaen iti kararag ken panagayuno;8
-
no agtignaytayo, a mayannugot iti balikas a naadal wenno naawat, ken makitulagtayo tapno isuko ti puspusotayo Kenkuana, kas met laeng kadagiti tao ni Ari Benjamin.9
Pammigbig ken Katulagan
Kasano nga ammotayo nga agbalbaliw ti pusotayo?10
-
No kayattayo a paragsaken ti Dios iti amin a banag.11
-
No tratuentayo dagiti dadduma iti ayat, respeto ken panangibilang.12
-
No makitatayo a dagiti kababalin ni Cristo ket agbalbalinen a paset ti kinataotayo.13
-
No mariknatayo nga agtultuloy ti pannarabay ti Nasantuan nga Espiritu.14
-
No agtulnogtayo iti maysa a bilin a narigattayo a tungpalen ket kalpasanna agtultuloy nga agbiag iti daytoy.15
No dumngegtayo a nasayaat iti balakad dagiti lidertayo ken siraragsak nga ikeddengtayo ti mangsurot iti daytoy, ditayo kadi napadasan ti dakkel a panagbalbaliw iti puso?
“Apo, Itedko Kenka ti amin a banag; Awanen ti maitedko pay Kenka.”
Panangituloy ken Pagimbagan
Kasano ti panangpatalinaedtayo iti dakkel a panagbalbaliw?
-
No makiranudtayo iti linawas iti sakramento ken pabaruentayo ti katulagan nga umawattayo iti nagan ni Cristo, kanayon a laglagipen Isuna, ken tungpalen dagiti bilinna.16
-
No iturongtayo ti biagtayo iti templo17. Ti masansan nga ipapan iti templo makatulongto kadatayo nga agtalinaed iti baro ken napabaro a puso bayat ti pannakiramantayo kadagiti ordinansa.
-
No ayaten ken pagserbiantayo dagiti kaarrubatayo babaen ti dagiti aktibidad iti ministering ken aramid ti misionario.18
Kalpasanna para iti naindaklan a rag-otayo, dayta akin-uneg a panagbalbaliw ket mapapigsa ken agsaknap inggana a dumur-as daytoy iti adu a nasayaat nga aramid.
Daytoy dakkel a panagbalbaliw iti puso ti mangisangbay kadatayo iti rikna ti wayawaya, panagtalek, ken talna.20
Saan a maysa a pasamak ti panagbalbaliw iti puso; masapul ti pammati, panagbabawi, ken agnanayon a naespirituan nga aramid tapno mapasamak. Mangrugi daytoy no agtarigagaytayo nga agtulnog iti pagayatan ti Apo, ket mapasamak daytoy no sumrek ken tungpalentayo dagiti katulagan Kenkuana.
Dayta nga aramid ti tunggal tao ket adda nasayaat nga epektona kadatayo ken dagiti tao iti aglawlawtayo.
Kas kinuna ni President Russell M. Nelson, “Panunotem no kasano dagiti makadadael a supiat iti sangalubongan—ken dagiti adda iti biag ti tunggal maysa kadatayo—ket marisutto no pilientayo amin ti agtungpal ken ni Jesucristo ken dumngegtayo kadagiti pannursurona.”21 Ti panangtungpal kadagiti pannursuro ti Mangisalakan ti mangiturong iti dakkel a panagbalbaliw ti puso.
Patpatgek a kakabsat, agtutubo, ken ubbing, bayat ti pannakiramantayo iti komperensia iti ngudo daytoy a lawas, bay-an a dagiti balikas dagiti propetatayo, nga aggapunto iti Apo, ket sumrek iti puspusotayo tapno mapadasantayo ti maysa a dakkel a panagbalbaliw.
Para kadagiti di pay nakikappeng iti naisubli a Simbaan ti Apo, awisenkayo a dumngeg kadagiti misionario nga addaan iti napudno a tarigagay a maammuan no ania ti namnamaen ti Dios kadakayo ken mangpadas iti dayta akin-uneg a panagbalbaliw.
Ita ti aldaw nga ikeddeng a suroten ti Apo a ni Jesucristo. “Apo, itedko Kenka, ti pusok; awanen ti maitedko pay Kenka.”
Kas iti pannakabirok iti singsing manipud iti narneb a barko, no itedtayo ti puspusotayo iti Dios, maisalakantayo manipud iti nadawel a baybay iti daytoy a biag, ken iti agangay mapalinistayo ken mapatarnaw babaen ti Pannubbot ni Cristo ket agbalin nga “annak ni Cristo,” a naespirituan a “nayanak Kenkuana.”23 Paneknekak daytoy iti nagan ni Jesucristo, amen.