Natarnaw a Kinapudno, Natarnaw a Doktrina, ken Natarnaw a Paltiing
Aramidenyo koma daytoy a komperensia nga oras ti panagbussog kadagiti mensahe ti Apo babaen dagiti katulonganna.
Patpatgek a kakabsatko, kablaawankayo iti sapasap a komperensia! Anian a rag-o a makaduadakayo! Dumani kanayon a pinampanunotkayo bayat ti naglabas nga innem a bulan. Nagkakararagak maipapan kadakayo ken para kadakayo. Kadagiti kallabes a lawas napasnek nga inkararagko nga agbalin koma daytoy a komperensia nga oras ti paltiing ken panagutob para iti amin nga agkalikagum a manggun-od kadagita a bendision.
Naragsakkami nga agsarita manen kadakayo manipud iti Conference Center. Kaaduan dagiti tugaw ti awan nagyanna, ngem ti kaadda ti sumagmamano a miembro ti Tabernacle Choir ket nakaskasdaaw a panagdur-as. Kablaawandakayo amin itoy dakkel a komperensia a virtual, sadinokayo man.
Maipaspasangotayo pay laeng iti peggad ti COVID-19 ken dagiti variants daytoy. Agyamankami iti panangsurotyo iti balakadmi ken ti balakad dagiti medical expert ken opisial ti gobierno iti bukodyo a komunidad.
Yawismi ti tunggal sapasap a komperensia kas iturong ti Apo.1 Naiduma ti pormat iti naglabas a tawtawen. Idi naub-ubingak, agpaut ti komperensia iti tallo wenno uppat nga aldaw. Idi agangay, nayababa ti komperensia iti dua nga aldaw. Tunggal mensahe—idi ken ita—ti bunga ti napasnek a kararag ken adu a naespirituan a panagsagana.
Dagiti General Authority ken Sapasap nga Opisial ti Simbaan nga agsarita ipamaysada ti mensaheda iti Mangisalakantayo, ni Jesucristo, ti asina, ken ti awan patinggana a pangsubbot a bilegna. Awan pay ti panawen iti pakasaritaan ti lubong a personal a napatpateg ti pannakaammo ti Mangisalakantayo ken mainaig iti tunggal kararua ti tao. Panunoten no kasano ti kadaras a marisut dagiti makadadael a supiat iti sangalubongan—ken dagiti suppiat iti biag ti tunggal maysa kadatayo—no pilientayoi amin ti sumurot ken ni Jesucristo ken dumngeg kadagiti pannursurona.
Iti dayta nga espiritu, awisenkayo a dumngeg iti tallo a banag bayat daytoy a komperensia: natarnaw a kinapudno, natarnaw a doktrina ni Cristo, ken natarnaw a paltiing. Maisuppiat iti duadua ti dadduma, adda talaga kasta a banag nga umno ken biddut. Adda talaga naan-anay a kinapudno—agnanayon a kinapudno. Maysa nga angol ti aldawtayo ti manmano a tao laeng ti makaammo no sadino ti asitganda iti kinapudno.2 Masiguradok kadakayo a naglaon iti natarnaw a kinapudno ti mangngeganyo ita ken inton bigat.
Nabileg ti natarnaw a doktrina ni Cristo. Balbaliwanna ti biag ti tunggal maysa a makaawat ken mangipatungpal iti daytoy iti biagna. Ti doktrina ni Cristo matulongannatayo a mangsapul ken agtalinaed iti dana ti katulagan. Ti panagtalinaed iti dayta akikid ngem nalawag a dana ket mangpaikarinto kadatayo nga umawat amin a kukua ti Dios.3 Awan ti napatpateg pay ngem ti amin a kukua ti Amatayo!
Maudi, ti natarnaw a paltiing iti saludsod iti pusoyo mangaramidto a napateg ken di malipatan daytoy a komperensia. No diyo pay nagun-od ti ministering ti Espiritu Santo a mangtulong kadakayo a dumngeg iti kayat ti Apo a denggenyo itoy dua nga aldaw, awisenkayo nga aramidenyo itan. Aramidenyo koma daytoy a komperensia nga oras ti panagbussog kadagiti mensahe ti Apo babaen dagiti katulonganna. Adalenyo no kasano nga usaren ida iti biagyo.
Daytoy ti Ti Simbaan ni Jesucristo dagiti Santo iti Ud-udina nga Aldaw. Datayo dagiti natulagan a tattaona. Impakdaar ti Apo a padarasenna ti aramidna iti panawenna,4 ket ar-aramidenna iti daytoy iti dumakdakkel a kapardas. Pribilehiotayo a makiraman iti nasantuan nga aramidna.
Ipaayko ti bendision iti amin nga agkalikagum a manggun-od iti dakdakkel a silaw, pannakaammo, ken kinapudno. Yebkasko ti ayatko iti tunggal maysa kadakayo, iti sagrado a nagan ni Jesucristo, amen.