Panagsagana para iti Maikadua a Yaay ni Cristo
Nangnangruna ita, kasapulantayo a sanguen ti kinapudno nga umas-asidegtayo iti Maikadua a Yaay ni Jesucristo.
Kas nailanad iti Libro ni Mormon, innem a tawen sakbay ti pannakayanak ni Jesucristo, ni Samuel, ti nalinteg a Lamanite, nagipadto kadagiti tao ni Nephi a kaaduan idin kadakuada ti kimmayakay,1 kadagiti tanda iti pannakayanak ti Mangisalakan. Nakalkaldaang, ta kaaduan kadagiti Nephite ti nangsupring kadagidiay a tanda gapu ta “saan a nainkalintegan ti yaayto ti maysa a nabiag a kas maysa a Cristo.”2
Nakaladladingit, kas maibatay iti naisurat iti nasantuan a kasuratan, adu kadagiti Judio iti kasta met, a saanda a maawat ti maysa a lalaki nga agnagan iti Jesus, a naggapu iti probinsia ti Galilea, nga isu ti nabayagen nga ur-urayen a Mesias.3 Ni Jesus, pudno nga immay a nangtungpal kadagiti adu nga impadto dagiti propeta a Hebreo, ket nailaksid ken nailansa iti krus gapu ta, kas insuro ni propeta Jacob iti Libro ni Mormon, a dagiti Judio ket “kumitkitada iti labes ti tun-oyen.” Gapu iti dayta, impadto ni Jacob nga “inikkaten ti Dios kadakuada ti kinalawagna, ket adu a banag ti intedna kadakuada a dida maawatan, agsipud ta kinalikagumanda daytoy. Ket inaramid ti Dios gapu ta kinalikagumanda, tapno maitiklebda.”4
Nupay kasta, awan ti pannursuro, awan ti milagro, ken awan ti panagparang uray pay ti maysa a nailangitan nga anghel, a nasaksian da Laman ken Lemuel,5 ti addaan panangallukoy a bileg a mangawis iti tattao nga agbalbaliw iti turongda, panangkita, wenno pammati a pudno ti maysa a banag. Kasta ti aglalo a mapasamak no dagiti pannursuro wenno milagro ket di umanamong iti pagayatan, tarigagay, wenno kapanunotan ti maysa a tao.
Pagdasigen koma dagitoy dua a paset ti nasantuan a kasuratan, ti umuna manipud ken ni Apostol Pablo nga agsasao maipapan kadagiti ud-udina nga aldaw, ken mangiladladawan kadagiti wagas ti tao, ken ti maikadua manipud ken ni propeta Alma a mangipakpakita no kasano nga agtrabaho ti Dios iti sangkataw-an. Umuna manipud ken ni Pablo:
“Ammuenyo met daytoy, nga iti maudi nga aldaw, [umayto] dagiti napeggad a panawen.
“Ta dagiti tattao ayatendanto ti bagbagida, naagum, napangas, ken napalangguad, nauyawdanto, sukirendanto dagiti nagannak kadakuada, didanto bigbigen ti naimbag a nakem, awanto ti pammatida,
“Naranggas, awanan asi, mamadpadakes, nauyong ken narungsotdanto, kaguradanto dagiti naimbag,
“Mangliliput, darasudos ken natangsitdanto. Ad-addanto nga ayatenda ti nalabes a ragragsak ngem ti Dios; …
“Agnanayon nga agsursuro, ngem saanna a madanun ti pannakaammo iti kinapudno.”6
Ket ita manipud ken ni Alma, a nangisao ti pagibasaran a pagbatayan iti ebanghelio ni Jesucristo: “Ita ipapanyo a minamaag kaniak daytoy; ngem adtoy kunak kadakayo, a dagiti babassit ken gagangay a banag agbalindanto a naindaklan a banag; ket adu a gundaway a maibabain ti masirib iti bassit a pamuspusan.”7
Agbibiagtayo iti agdama a lubong a napnuan iti naindaklan a pannakaammo ken nalabes a kinalaing. Numan pay kasta, dagitoy a banag ti mangilinged iti narasi a pundasion a nakaipatakderanda. Iti kasta, saanda nga agturong iti kinapudno ken iti Dios ken iti bileg a mangawat ti paltiing, manggun-od iti naespirituan a pannakaammo, ken mangpatanor iti pammati ken ni Jesucristo nga agturong iti pannakaisalakan.8
Maipalagip kadatayo dagiti balikas ti Apo ken ni Tomas ken kadagiti dadduma pay nga Apostol iti rabii ti datonna a pannubbot: “Kinuna ni Jesus kenkuana, Siak ti dalan, ti kinapudno, ken ti biag: awan makapan ken ni Ama, no saan a magna kaniak.”9
Para kadagiti addaan iti mata a makakita, lapayag a dumngeg, ken puso a mangrikna, nga ad-adda pay ita, kasapulan a sanguentayo ti kinapudno nga umas-asidegtayo iti Maikadua a Yaay ni Jesucristo. Pudno, dagiti nakaro a pakarigatan ket agur-uray kadagiti adda ditoy lubong iti panagsublina, ngem iti daytoy a banag, saan a nasken nga agbuteng dagiti napudno.
Adawek ti apagkanito manipud iti Gospel Topics ti Simbaan iti babaen ti paulo a “Maikadua a Yaay ni Jesucristo”:
“Inton umay manen ti Mangisalakan, umayto Isuna iti pannakabalin ken dayag a mangbigbig iti daga a kas pagarianna. Ti Maikadua a Yaayna ti pangrugianto iti Milenio.
“Ti Maikadua a Yaay ket agbalinto a nakabutbuteng, naladingit a panawen para kadagiti nadangkes, ngem agbalinto daytoy nga aldaw ti talna ken balligi para kadagiti nalinteg. Impakdaar ti Apo:
“‘Isuda a masirib ken nangawat iti kinapudno, ken nangala iti Nasantuan nga Espiritu a bagnosda, ken saan a pinaallilaw—pudno kunak kadakayo, saandanto a mapukan ken maipuruak iti apuy, ngem mailusotandanto ti aldaw.
“‘Ket maitedto ti daga kadakuada a tawidenda; ket umadudanto ken pumigsada, ket dumakkelto dagiti annakda nga awanan iti basol nga agturong iti pannakaisalakan.
“‘Ta addanto ti Apo iti tengngada, ket maipaayto kadakuada ti dayagna, ket isunto ti arida ken mangted kadakuada iti paglintegan’ (Doktrina ken Katulagan 45:57–59).”10
Iti intayo panagsagana iti Maikadua a Yaay ni Jesucristo, mangtedak iti maysa a napateg, makaliwliwa a balikas para kadagiti napudno a naadaw manipud iti propeta iti Daan a Tulag a ni Amos: “Awanto ti aramiden ti Dios, no di ket ipalgakna ti palimedna kadagiti katulonganna a dagiti propeta.”11
Iti daytoy a wagas, iti agdama a propeta ti Apo ditoy lubong, a ni President Russell M. Nelson, inted na iti nabiit daytoy makaparegta a balakad: “Ti ebanghelio ni Jesucristo isu ti ebanghelio ti panagbabawi. Gapu iti Pannubbot ti Mangisalakan, mangted ti ebangheliona iti awis nga agtuloy nga agbalbaliw, dumur-as, ken agbalin a natartarnaw. Daytoy ti ebanghelio ti namnama, pannakaagas, ken panagdur-as. Ngarud, ti ebanghelio ti maysa a mensahe ti rag-o! Agrag-o dagiti espiritutayo iti tunggal addang nga alaentayo.”12
Paneknekak ti kinapudno ti Dios ken dagiti milagro iti inaldaw a panagbiag ti di mabilang a tattao manipud iti agpada a nababa ken nangato a kasasaad ti biag. Pudno, adu kadagiti nasagraduan a padas ti manmano a mapagsasritaan, maigapu iti sagrado a nagtaudanda ken ti mabalin a panangdillaw dagiti awan ammona a nasaysayaat.
Itoy a banag, impalagip kadatayo ti maudi a propeta iti Libro ni Mormon, a ni Moroni:
“Ket agsaoak manen kadakayo a nangtallikud iti paltiing ti Dios, ket kunayo a nalpasdan, nga awan ti paltiing, wenno padto, wenno sagut, wenno panangagas, wenno panagsasao ti dila, ken ti pannakaipatarus ti pagsasao;
“Adtoy kunak kadakayo, siasino man a mangtallikud kadagitoy a banag saanna nga ammo ti ebanghelio ni Cristo; wen, saanna a nabasa ti nasantuan a kasuratan; no kasta, saanna a maawatan ida.
“Gapu ta saantayo kadi a mabasa a ti Dios isu met laeng idi kalman, ita, ken iti agnanayon, ket kenkuana awan ti naidumduma wenno anniniwan ti panagbalbaliw?”13
Igibusko ti panagsaok iti makaparegta unay a naipadto a deklarasion manipud iti Propeta a ni Joseph Smith, a naipaay iti umadani a panaggibus ti panagserbina bayat ti panangur-urayna iti Maikadua a Yaay ni Jesucristo: “Saantayo kadi nga agtuloy iti naindaklan a panggep? Agtuloykayo a saan nga agsanud. Pigsa ti pakinakem, kakabsat a lallaki [ken, inayunko man, babbai]; ket ala, ala gaw-aten ti balligi! Pagrag-uenyo ti puspusoyo, ket agragsakkayo iti aglaplapusanan.”14 Iti dayta inayonko ti pammaneknekko iti nagan ni Jesucristo, amen.