Gagangay a Napintas—Napintas a Gagangay
Aramidentayo koma ti ebanghelio a gagangay bayat iti panangawattayo iti bagitayo kadagiti nadiosan a naidutok a pagrebbengantayo.
Pakauna
Idanonko ti nabara a kablaaw kadakayo a makiramraman kadaytoy a komperensia.
Ita sapay koma ta mailadawak ti dua nga elemento ti naisubli nga ebanghelio ni Jesucristo, a sarunuen ti uppat a pakaammuan manipud kadagiti Santo iti Ud-udina nga Aldaw iti intero a lubong a mangipakpakita iti pannakaaramat dagitoy a prinsipio. Ti umuna nga elemento ti naisubli nga ebanghelio—ti aramid ti Dios a pannakaisalakan ken pannakaitan-ok—maipamaysa kadagiti nadiosan a naidutok a pagrebbengan. Ti maikadua nga elemento ipalagipna kadatayo a ti ebanghelio ket nalawag, napateg, ken gagangay.
Dagiti Nadiosan a Naidutok a Pagrebbengan
Tapno umawat iti agnanayon a biag, masapul nga “umasideg[tayo] ken ni Cristo, ket agbalin a naan-anay kenkuana.”1 Bayat ti yaasidegtayo ken Cristo ken itutulong ti dadduma nga aramiden met iti kasta, makiramantayo ti aramid ti Dios a pannakaisalakan ken pannakaitan-ok, a mangipamaysa kadagiti nadiosan a naidutok a pagrebbengan.2 Naitunos dagitoy nadiosan a pagrebbengan kadagiti tulbek ti priesthood nga insubli da Moises, Elias, ken Elijah, kas nairekord iti maika-110 a benneg ti Doktrina ken Katulagan,3 ken ti maikadua a dakkel a bilin nga inted kadatayo ni Jesucristo nga ayatentayo ti padatayo a tao kas iti bagbagitayo.4 Masarakanda iti umuna a dua a panid ti napabaro a General Handbook, nga available iti amin a miembro.
Saankayo koma nga agsidduker iti buteng gapu iti kinarikut wenno makariro, no mangngegyo dagiti balikas a “General Handbook” wenno “dagiti nadiosan a naidutok a pagrebbengan”. Dagitoy a pagrebbengan ket gagangay, makaparegta, makapatignay, ken maaramid. Adtoy dagitoy:
-
Panagbiag iti Ebanghelio ni Jesucristo
-
Panangaywan kadagiti agkasapulan
-
Awisen ti amin nga umawat iti ebanghelio
-
Panamagkaykaysa kadagiti pamilia para iti kinaagnanayon
Mabalin a makitayo a kas iti panangkitak: kas maysa a mapa ti kalsada nga agsubli iti managayat a Nailangitan nga Amatayo.
Nalawag, Napateg, ken Gagangay ti Ebanghelio
Naisao idin a ti ebanghelio ni Cristo ket “gagangay a napintas ken napintas a gagangay.”5 Saan a napintas ti lubong. Kumplikado, narikut, ken napnuan riribuk ken ringgor daytoy. Mabendisionantayo bayat ti pananglikliktayo iti kinarikut, a gagangay unay iti lubong, a sumrek iti dalan a pangawatan ken pangaramatantayo iti ebanghelio.
Napaliiw ni President Dallin H. Oaks: “Naisuro kadatayo iti adu a babassit ken gagangay a bambanag iti ebanghelio ni Jesucristo. Nasken a mapalagipantayo nga iti kadagupan ken iti agbayag, dagiti kasla babassit a bambanag agbalinda a dadakkel a bambanag.”6 Inladawan mismo ni Jesucristo a nalaka ti sangolna ken nalag-an ti dagensenna.7 Ikarigatantayo amin a pagtalinaeden ti ebanghelio a gagangay—iti biagtayo, iti pamiliatayo, kadagiti klase ken korumtayo, ken kadagiti ward ken staketayo.
Bayat iti panangdengngegyo kadagiti sumaganad nga estorianga isaritak kadakayo, bigbigenyo a napilida a nasayaat a mangparegta iti maysa a bangir ken mangipakaammo iti sabali a bangir. Dagiti tignay ti tunggal maysa kadagitoy a Santo iti Ud-udina nga Aldaw agbalinda a pagwadan iti tunggal maysa kadatayo iti panangaramat iti ebanghelio iti nalawag, napateg, ken gagangay a wagas bayat iti panangipatungpal iti maysa kadagiti nadiosan a naidutok a pagrebbengan.
Panagbiag iti Ebanghelio ni Jesucristo
Umuna, panagbiag iti ebanghelio ni Jesucristo. Ni Jens iti Denmark agkarkararag iti inaldaw tapno agbiag iti ebanghelio ken mangilasin kadagiti parikna ti Espiritu Santo. Nasursurona ti agtignay a dagus no mariknana ti pangiturong ti Espiritu.
Imbinglay ni Jens ti sumaganad:
“Agnanaedkami iti bassit a balay a tinabla ti guduana ken pan-aw ti atepna iti tengnga ti bassit a purok, nga asideg iti waig ti purok.
“Iti daytoy a rabii nga addaan iti kaapintasan a panawen ti kalgaw ti Danish, nakalukat dagiti ridaw ken tawa, ken natalna ken naulimek ti amin. Gapu iti nadayag a raniag ken atiddog a brabii iti kalgaw, saanak nga agap-apura a mangsukat ti napundi a bombilia iti bodega.
“Kellaat nga, adda nabileg a riknak a masapul a sukatak daytoy a dagus! Iti dayta met la a gundaway, nangngegko ti asawak, ni Mariann, nga aw-awagannak ken dagiti ubbing nga agbuggokamin iti ima-imami gapu ta nakasaganan ti pangrabii!
“Nabayagkamin nga agassawa ket ammok a daytoy a gundaway ket saan nga oras a mangrugi ti ania man no di ket agbuggo ti im-imami, ngem impukkawko ken ni Mariann a mapanak la biit gumatang iti baro a bombilia. Nariknak a masapul a pumanawak a dagus.
“Ti grocery store ket adda laeng iti sabali a bangir ti waig. Gagangay a magmagnakami, ngem nagbisikletaak ita. Bayat iti ilalabasko iti waig, nakitak ti maysa nga ubing a lalaki, nga agtawen ngata iti 2, magmagna a maymaysa iti ngarab ti waig, asideg unayen iti danum—kellaat a natinnag! Maysa minuto nga adda idiay—ken iti sumaruno nagpukawen!
“Awan nakakita daytoy no di laeng siak. Impuruakko ti bisikletak iti daga, timmaray, ken tinappuakko iti pagat-siket a waig. Ti rabaw ti danum dagus a nagserra iti lumot, tapno narigat a makita ti uneg ti danum. Kalpasanna adda nariknak a naggaraw iti maysa a bangir. Inkabilko ti takiagko iti danum, tinengngelko ti T-shirt, sako ginuyod nga inlung-aw ti ubing. Nangrugi nga immanges, naguyek, ken nagsangit. Saan a nagbayag kaduan daytoy ubing a lalaki dagiti nagannakna.”
Bayat ti panagkararag ni Brother Jens iti tunggal bigat para iti tulong a mangbigbig ti parikna ti Espiritu Santo, uray dagiti karkarna a banag kas iti dagus a panangsukat iti bombilia, ikarkarararagna pay nga agbalin koma a maysa a ramit tapno bendision kadagiti annak ti Dios. Agbibiag ni Jens iti ebanghelio babaen ti panagkalikagumna a maaddaan iti nadiosan a pangiturong iti inaldaw, panagpasnekna nga agbalin a maikari a , ken panangaramid iti amin a kabaelanna a mangsurot iti dayta a pangiturong no dumteng daytoy.
Panangaywan kadagiti Agkasapulan
Adtoy ti pagarigan ti panangaywan kadagiti agkasapulan. Maysa nga aldaw maysa a stake president iti Cucuta Stake iti Colombia ti nangkuyog iti stake Young Women president a sumarungkar iti dua a babbalasitang—ken ti in-inauna a barito a kabsatda—nga aglaslasat iti naririgat a pannubok. Itay nabiit pay pimmusay ti amada, ket pimmusay ti inada nga immun-una iti makatawen. Nabatida itan nga is-isuda laengen dagiti tallo nga agkakabsat iti bassit, nanumo a pagtaenganda. Naramid dagiti pader iti nakersang a kayo a naintaran kadagiti supot a plastik, ket ti naingpis a lata a naiyatep iti batogda laeng a pagturoganda.
Kalpasan ti isasarungkarda, ammo dagitoy a lider a masapul a tumulongda. Babaen ti ward council, nairugi ti maysa a plano a makatulong kadakuada. Dagiti amin a lider ti ward ken stake—Relief Society, elders quorum, Young Men, Young Women—ken adu a pamilia insaganada ti bagbagida iti aramid a mangparabur iti daytoy a pamilia.
Kinontak dagiti organisasion ti ward ti sumagmamano a miembro iti ward nga agtartrabaho iti construction. Adu ti timmulong iti disenio, nagidonar dagiti dadduma iti oras ken bannog, nagisagana iti makan dagiti dadduma, ken adda pay dadduma a nagidonar iti materiales.
Idi nalpasen ti bassit a balay, naragsak nga aldaw daytoy para kadagiti timmulong ken iti tallo nga agtutubo a miembro iti ward. Nakarikna ti bara ken pammatalged a begkes ti pamiliada a ward dagitoy naulila nga ubbing tapno mammuanda a saanda nga agmaymaysa ken adda a kanayon ti Dios para kadakuada. Narikna dagiti timmulong ti ayat ti Mangisalakan para itoy a pamilia ken nagtignayda a kas imana iti panagserbi kadakuada.
Panangawis iti Amin nga Umawat iti Ebanghelio
Panagkunak magustuanyonto daytoy a pagarigan iti panangawis iti amin nga umawat ti ebanghelio. Saan nga ammo ni Cleiton iti Cape Verde no ania ti mapasamak kas resulta ti ipapanna iti klasena iti seminary iti ward iti maysa nga aldaw. Ngem ti biagna ken ti biag dagiti dadduma pay ket agnanayonto a nabalbaliwan gapu ta inaramidna daytoy.
Nabuniagan iti Simbaan ni Cleiton, a kaduana ti inana ken ti manongna, iti nasapsapa bassit, ngem nagsardengen ti pamilia a mapan makimisa. Ti maminsan nga idadar-ayna iti seminary ti mangipaneknek iti panagbalbaliw ti pamilia.
Dagiti dadduma nga agtutubo iti seminary class ket nabara ken managpasangbay. Impariknada ken ni Cleiton ken inallukoyda a dumar-ay iti sabali pay nga activity. Inaramidna dayta ken rinugiannan ti nagatendar iti dadduma pay a Church meetings. Nakita ti nasirib a bishop ti spiritual potential ni Cleiton ket inawisna nga agbalin nga assistant-na. “Manipud iti dayta a kanito,” kuna ni Bishop Cruz, “nagbalin ni Cleiton a maysa a pagwadan ken impluensia iti dadduma pay nga agtutubo.”
Ni nanangna ti immuna a tao a pinagsubli ni Cleiton iti simbaan, simmaruno ni manongna. Kalpasanna pinalawana ti sirkulo dagiti gagayyemna. Maysa kadagiti gagayyemna ti agtutubo a kataebna, ni Wilson. Idi damo a maam-ammona dagiti missionary, impeksa ni Wilson ti tarigagayna nga agpabuniag. Natignay ken nasdaaw dagiti missionary no kasano ti kaadun ti naibinglay ni Cleiton ken ni Wilson.
Saan pay a nagpatingga dita dagiti panagkagumaan ni Cleiton. Tinulonganna ti dadduma pay a miembro a less-active nga agsubli, kas mainayon ti panangibinglayna ti ebanghelio iti gagayyemna iti sabali a pammati. Ita addan 35 nga aktibo nga agtutubo iti ward, nga addaan iti narang-ay a seminary program, pagyamanan ti dakkel a panagkagumaan ni Cleiton nga agayat, agibinglay, ken agawis. Ni Cleiton, a kaduana ni manongna, ni Cléber, agpadada nga agsagsagana nga agserbi iti full-time mision.
Panamagkaykaysa kadagiti Pamilia para iti Kinaagnanayon
kamaudiananna, bay-andak a mangibinglay iti pagarigan ti panagkaykaysa dagiti pamilia para iti kinaagnanayon. Damo a nasursuro ni Lydia manipud Kharkiv, Ukraine ti maipapan iti templo manipud kadagiti missionary. Madagdagdagus, nakarikna ni Lydia iti nasged a tarigagay a dumar-ay iti templo, ket kalpasan ti panagbuniagna, nangrugi nga agsagana nga umawat iti temple recommend.
Dimmar-ay ni Lydia iti Freiberg Germany Temple tapno awatenna ti endowmentna ket kalpasanna binubosda ti sumagmamano nga aldaw para iti proxy work. Kalpasan ti dedikasion ti Kyiv Ukraine Temple, kanayonen a dimmar-ay ni Lydia iti templo. Agnanayon a nailantipda iti asawana a ni Anatoly, sadiay ken kalpasanna naawaganda nga agserbi kas misionarry iti templo. Agpadada a asarakanda ti nasursurok a 15,000 a nagan dagiti kapuonan ket nagtrabahoda tapno maipaay dagiti ordinansa iti templo para kadakuada.
Idi madamag no ania ti mariknana maipapan iti temple work, kuna ni Lydia, “Ania ti naawatko iti uneg ti templo? Nagaramidak kadagiti baro a katulagak iti Dios. Timmibker ti pammaneknekko. Nasursurok ti umawat ti bukodko a paltiing. Nabaelak ti nagaramid kadagiti pangisalakan nga ordinansa para kadagiti natayen a kapuonak. Ken mabalinko nga ayaten ken pagserbian dagiti sabali a tao.” Inggibusna iti daytoy pudno unay a palawag: “Kayat ti Apo a kanayonnatayo a makita iti templo.”
Panangigibus
Maparegtaak babaen ti kinasayaat dagitoy a Santo iti Ud-udina nga Aldaw, tunggal maysa nga addaan iti nadumaduma a nagtaudan, a naisentro kadagitoy uppat nga estoria. Adu ti maadal manipud kadagitoy namilagruan a nagbanagan a dimteng babaen ti gagangay a panangusar kadagiti gagangay a pagbatayan ti ebanghelio. Kabaelantayo met dagiti amin nga inaramidda.
Aramidentayo koma ti ebanghelio a gagangay bayat iti panangawattayo dagiti nadiosan a naidutok a pagrebbengantayo: Tapno agbiag iti ebanghelio ni Jesucristo tapno agbalin a sensitibo ti parikna, a kas inaramid ni Jens iti Denmark. Tapno maaywanan dagiti agkasapulan, kas impakita dagiti miembro ti Cúcuta stake iti Colombia iti panangipaay iti pagtaengan kadagiti naulila a miembro iti ward. Tapno maawis ti amin nga umawat iti ebanghelio, iti wagas nga inaramid ni Cleiton manipud iti isla a pagilian iti Cape Verde iti Africa kadagiti gagayyem ken pamiliana. Kamaudiananna, tapno mapagkaykaysa dagiti pamilia para iti kinaagnanayon, kas impakita ni Sister Lydia iti Ukraine babaen dagiti bukodna a nga ordinansa iti templo, dagiti panagkagumaanna iti family history, ken ti serbisiona iti templo.
Awan duadua a mangyegtoiti rag-o ken kappia no maaramid dagitoy. Ikarik ken paneknekak daytoy—ken ni Jesucristo kas Mangisalakantayo ken Mannubbottayo—iti nagan ni Jesucristo, amen.