Ti Panagkasapulan iti Maysa a Simbaan
Nalawag nga isuro dagiti nasantuan a kasuratan ti naggapuan ken panagkasapulan iti simbaan nga iturturong babaen ken addaan ti turay ti Apo, ni Jesucristo.
Tawtawen ti napalabas, rinugian ni Elder Mark E. Petersen, miembro ti Korum dagiti Sangapulo‑ket‑dua nga Apostol ti saritana iti daytoy a pagwadan:
“Ni Kenneth ken ti asawana, ni Lucille, ket nasayaat a tattao, napudno ken nalinteg. Saanda agsimsimba, nupay, mariknada a nasayaatda uray awan daytoy. Insuroda dagiti annakna ti kinapudno ken kinasayaat ket kinunada iti bagbagida a dayta laeng met ti aramiden ti Simbaan kadakuada.
“Ket nupay kasta, ipapilitda a kasapulanda dagiti udi ti lawas para iti panagaliwaksay ti pamilia … [ken] talaga a makalapped kadakuada ti makimisa.”1
Ita, ti mensahek ket maipapan kadagitoy nasayaat ken relihioso a tattao a nagsardengen a makiraman wenno makigimong iti simbaanda.2 No kunak a “simbaan,” iramanko dagiti sinagoga, moske, ken dadduma pay a gunglo ti relihion. Maseknankami ta nababa unay ti dumar-ay kadagitoy amin iti intero a pagilian.3 No agsardengtayo ti mangipateg kadagiti simbaantayo para iti ania man a rason, agpeggadtayo iti naespirituan a biagtayo, ket adu ti mangisina iti bagbagida iti Dios ket bumassit dagiti bendisionna kadagiti pagiliantayo.
Makatulong ti idadar-ay ken panagaktibotayo iti maysa a simbaan iti panagbalintayo a nasaysayaat a tao ken nasaysayaat nga impluensia iti biag ti dadduma. Iti simbaan maisuro kadatayo no kasano ti mangyaplikar kadagiti pagbatayan a mainaig iti relihion. Makasursurotayo iti tunggal maysa. Nabilbileg ti makaallukoy a pagwadan ngem iti sermon. Mapatibkertayo babaen iti pannakilangen kadagiti dadduma a kapada iti pampanunot. Ti idadar-ay ken pannakigimong iti simbaan, dagiti pusotayo ket, kas kuna ti Biblia, “pinagkaykaysa iti ayat.”4
I.
Nalawag nga isuro dagiti nasantuan a kasuratan nga inted ti Dios kadagiti Kristiano iti Biblia ken iti kabaruanan a paltiing a kasapulan ti simbaan. Agpada nga ipakitada a binuangay ni Jesucristo ti simbaan ken ninamnamana nga ituloy ti simbaan ti trabahona kalpasanna. Inawagan ni Jesus dagiti Sangapulo-ket-dua nga Apostol ket intedna ti turay ken tulbek a mangiturong iti daytoy. Isuro ti Biblia a ni Cristo “ti ulo ti simbaan”5 ken naited kadagiti agtakem nga opisial “a mamagbalin kadagiti Santo a naan-anay, para ti aramid iti panagserbi, para iti pannakapabileg iti bagi ni Cristo.”6 Awan duadua a ti Biblia ti nalawag a nagtaudan ti simbaan ken ti panagkasapulan para iti daytoy ita.
Adda dagiti agkuna a saan a makatulong kadakuada dagiti miting iti simbaan. Adda pay agkuna, “Awan ti nasursurok ita nga aldaw” wenno “Awan nakigayyem kaniak” wenno “Napabainanak.” Saan koma a mangyadayo kadatayo ti personal a pannakaupay manipud iti iti doktrina ni Cristo, a nangisuro kadatayo nga agserbi, saan a tapno paserbian.7 Adda daytoy iti panunotna, maysa pay a miembro ti nangiladawan no ania ti pokus ti idadar-ayna iti Simbaan:
“Tawtawenen ti naglabas, binaliwak ti galadko maipapan iti panagsimba. Saanakon a mapan makimismisa para iti pagimbagak, no di ketdi pampanunotek dagiti sabali. Ikarigatak a kumustaen dagiti tao a nakatugaw nga agmaymaysa, a mangkablaaw kadagiti sangaili, … tapno siaayat nga umawat iti maysa a pagrebbengan. …
“iti ababa a pannao, makimisaak iti tunggal lawas nga addaan panggep nga agaktibo, saan a basta laeng mapan, ken agar-aramid iti napintas a pakaidumaan iti biag dagiti tao.”8
Insuro ni Presidente Spencer W. Kimball a “saantayo a mapan kadagiti miting iti Sabbath tapno agaliwaksay wenno tapno laeng masursuruan. Mapantayo tapno agdaydayaw iti Apo. Maysa daytoy a pagrebbengan ti tunggal maysa. … No maysa a pannakapaay kenka ti serbisio, napaaykan. Awan ti maysa a makapagdaydayaw para kenka; nasken nga aramidem ti bukodmo a panaguray iti Apo.”9
Ti pannakimisa ti makalukat iti puspusotayo ken mangpasanto kadagiti kararuatayo.
Iti maysa a simbaan saantayo laeng nga agserbi nga agmaymaysa wenno iti bukodtayo a pili wenno pagnam-ayan. Gagangay nga agserserbitayo iti maysa a bunggoy. Iti serbisio masarakantayo dagiti gundaway a mangparmek iti panagimbubukod iti edadtayo. Makatulong kadatayo a mangparmek iti kinamanagimbubukod a manglapped ti naespirituan a panagdur-astayo.
Adda pay dagiti napateg nga pagsayaatan a dakamatek biit. iti sibaan makaduatayo dagiti nasingpet a tao a napasnek nga agserserbi iti Dios . Ipalagip daytoy a saantayo nga agmaymaysa kadagiti aktibidadtayo a mainaig iti relihion. Masapultayo amin a makilangen iti dadduma, ket ti pannakilangentayo iti simbaan timaysa a kasayaatan a mapadasantayo, para kadatayo ken dagiti kakaduatayo ken annaktayo. No awan dagitoy a pannakilangen, nangruna dagiti annak ken napudno a nagannak, ipakita ti panagsukisok a marigatan dagiti nagannak a mangpadakkel kadagiti annakda iti pammatida.10
II.
Agingga ita, nagsaritaak maipapan iti sapasap a simbaan. Ita dakamatek dagiti rason para iti panagkameng, idadar-ay, ken pannakiraman iti naisubli a Simbaan ni Jesucristo dagiti Santo iti Ud-udina nga Aldaw.
Siempre, paneknekanmi a nalawag nga isuro dagiti nasantuan a kasuratan, kadaanan ken kabaruan, ti naggapuan ken panagkasapulan iti Simbaan nga iturturong babaen ken addaan ti bileg ti Apo, ni Jesucristo. Paneknekanmi pay a naipasdek ti naisubli a Simbaan ni Jesucristo tapno isuro ti pakabuklan ti doktrinana ken babaen ti bileg ti priesthoodna maannong dagiti ordinansa a kasapulan tapno makastrek iti pagarian ti Dios.11 Dagiti miembro a saan a makimismisa ken agpannurayda laeng iti bukodda nga espiritualidad ket isinada ti bagbagida kadagitoy a napateg a kasapulan ti ebanghelio: ti bileg ken bendision ti priesthood, ti pakabuklan ti naisubli a doktrina, ken dagiti motibasion ken gundaway a maaramat dayta a doktrina. Pukawenda ti gundawayda a maikari iti agnanayon a panagadu ti pamiliada para iti kinaagnanayon.
Maysa pay a pagimbagan ti naisubli a Simbaan ket tulongannatayo a dumur-as a naespirituan. Ti panagdur-as kayatna a sawen ti panagbalbaliw. Iti naespirituan nga awag ket panagbabawi ken panagkagumaan nga umasideg iti Apo. Iti naisubi a Simbaan addaantayo iti doktrina, dagiti pamay-an, ken naipaltiing a katulongan a tumulong kadatayo nga agbabawi. Ti panggepda ket saan a pannusa, a kas iti gapuanan iti criminal court. Siaayat dagiti konseho ti kinakameng iti Simbaan a tulongandatayo a maikari iti asi ti pammakawan a naaramid a posible babaen ti Pannubbot ni Jesucristo.
Manmano a makaipaay ti bukod nga espiritualidad iti motibasion ken urnos para iti saan a managimbubukod a serbisio nga ipaay ti naisubli a Simbaan. Dagiti napipintas a pagarigan daytoy ket dagiti agtutubo a lallaki ken agtutubo a babbai ken dagiti senior a mangtallikud iti panagadalda wenno dagiti aramidenda iti panagretiroda tapno umawat kadagiti pagrebbengan kas missionary. Agtrabahoda kas missionary kadagiti ganggannaet iti dida ammo a luglugar a saanda a pinili. Kasta met kadagiti napudno a miembro a makiraman iti saan a managimbubukod a serbisio nga aw-awagantayo iti “aramid iti templo.” Saan koma a posible ti kasta a serbisio no awan ti Simbaan a mangisponsor, mangurnos, ken mangiturong iti daytoy.
Ti pammati iti relihion ken serbisio iti Simbaan dagiti miembrotayo ti nangisuro kadakuada no kasano ti panagtitinnulong iti aramid para iti pagimbagan ti dakdakkel a komunidad. Saan a mapasamak dayta a klase ti padas ken panagdur-as iti indibidualismo a maar-aramid iti agdama a kagimongantayo. Iti heograpiko nga organisasion dagiti lokal a ward, makipulapol ken makipagtrabahotayo kadagiti tattao a mabalin a ditayo napili, tattao a mangisuro ken mangsubok kadatayo.
Mainayon iti panangtulong kadatayo nga agsursuro kadagiti naespirituan a kababalin kas iti ayat, pannakipagrikna, pammakawan, ken panaganus, makaited pay daytoy kadagiti gundaway nga agsursuro no kasano a makipagtrabaho kadagiti tao nga addaan iti nagduduma a pagtaudan ken pagayatan. Daytoy a pagimbagan ti nakatulong iti adu kadagiti miembrotayo, ken adu nga organisasion ti naparaburan iti pannakiramanda. Nabigbig dagiti Santo iti Ud-udina nga Aldaw gapu iti kabaelanda a mangidaulo ken makikaykaysa kadagiti nagtutunos a panagkagumaan. Nagtaud daytoy a tradision gapu kadagiti natured a pioneertayo a nangsakup iti Intermountain West ken impasdekda ti ipatpateg a tradisiontayo iti saaan a managimbubukod a panagtitinnulong para iti pagsayaatan ti kaaduan.
Kaaduan nga aramid nga agpaay iti tao ken makatulong iti tao ti kasapulan a maipatungpal babaen iti panagtitipon ken panangtarawidwid kadagiti pamataudan ti tao iti nasaknap. Ar-aramiden daytoy iti naisubli a Simbahan babaen iti dadakkel nga aramid nga agpaay iti tao iti intero a lubong. Mairaman ditoy dagiti abasto wenno suplay iti edukasion ken medisina,, panangpakan kadagiti mabisin, panangaywan kadagiti refugee, panangtulong a mangbaliw iti epekto dagiti adiksion, ken dadduma pay. Nabigbig dagiti miembro ti Simbaan gapu kadagiti proyektoda iti Helping Hands no adda dagiti didigra. Agbalintayo a paset dagitoy a panagkagumaan gapu ta kamengtayo ti Simbaan. Agbaybayad pay dagiti miembro iti daton iti panagayuno a pangtulong kadagiti nakurapay.
Mainayon iti rikna ti kappia ken rag-o babaen ti pannarabay ti Espiritu, magustuan dagiti miembro a dumardar-ay iti Simbaan dagiti bunga ti agbibiag iti ebanghelio, kas dagiti bendision ti panagtungpal iti Word of Wisdom ken ti material ken naespirituan a bendision a naikari iti panagtungpal iti linteg ti apagkapullo. Addaantayo pay iti bendision ti balakad dagiti naparegta a lider.
Kapatgan ti amin daytoy dagiti awtoritatibo nga ordinansa a kasapulan iti kinaagnanayon, mairaman ti sakrament nga awatentayo iti tunggal aldaw ti Sabbath. Ti kangrunaan nga ordinansa iti naisubli a Simbaan ket isu ti agnanayon a katulagan ti kallaysa, nga mamagbalin a posible ti panagpaadu ti nagloriaan a relasion ti pamilia. Insuro ni Presidente Russell M. Nelson daytoy a prinsipio iti kastoy a nakallalagip a wagas: Kinunana: “Saantayo a mabalin a tarigagayan ti dalantayo nga agturong iti sidong ti Dios. Masapul a tungpalentayo dagiti paglintegan a nakaibatayan [dayta a bendision].”12
Maysa kadagita a paglintegan ti panagdaydayaw iti simbaan iti tunggal aldaw ti Sabbath.13 Yasidegnatayo iti Dios ti panagdaydayaw ken panangyaplikartayo kadagiti agnanayon a pagbatayan ken padakkelenna ti kabaelantayo nga agayat. Inladawan ni Parley P. Pratt, maysa kadagiti sigud nga Apostol iti daytoy a dispensasion idi inlawlawag ni Propeta Joseph Smith dagitoy a pagbatayan: “Nariknak a ti Dios ti pudno a nailangitan nga Amak; a ni Jesus ti kabsatko, ken imortal ti asawa ditoy saklotko, agnanayon a kadua: maysa a naanus, agserserbi nga anghel, naited kaniak a kas liwliwa, ken maysa a balangat ti gloria para iti agnanayon ken awan inggana. Iti ababa, kabaelak itan ti agayat nga addaan iti espiritu ken addaan met iti pannakaawat.”14
Kas panggibus, ipalagipko iti amin a ditayo mamati a maipatungpal laeng ti kinaimbag babaen iti maysa a simbaan. Iti ruar ti simbaan, makitatayo ti minilmilion a tattao nga agsisinnuporta ken agar-aramid iti adu a kinaimbag. Kas maysa a tao, makiramraman dagiti Santo iti Ud-udina nga Aldaw iti adu kadagitoy. Makitatayo dagitoy a trabaho kas parangarang ti agnanayon a kinapudno a “ti Espiritu mangted ti lawag iti tunggal tao nga umay ditoy lubong.”15
Iti laksid dagiti naimbag nga aramid a magapuanan uray awan ti simbaan, ti pakabuklan ti doktrina ken makaisalakan ken makaitan-ok nga ordinansa ket adda laeng iti naisubli a Simbaan. Mainayon pay, ti pannakimisa ti mangted iti pigsa ken tibker ti pammati a sumangbay manipud iti pannakilangen kadagiti dadduma pay a mamati ken makikaykaysa nga agdaydayaw kadagiti agpasnek nga agtalinaed iti dana ti katulagan ken agbalin a nasaysayaat a disipulo ni Cristo. Ikararagko nga agbalintayto amin a natibker kadagitoy a padas iti Simbaan bayat ti panagkalikagumtayo iti agnanayon a biag, ti kaindaklan a sagut ti amin a sagut ti Dios, iti nagan ni Jesucristo, amen.