Umasideg ken ni Cristo ken Saanka nga Umasideg nga Agmaymaysa
Ti kasayaatan a wagas a mapadur-asyo iti lubong ket ti panangisaganayo iti lubong para ken ni Cristo babaen iti panangawisyo iti amin a sumurot Kenkuana.
Iti nabiit pay, adda naawatko a surat manipud iti managsaludsod a balasitang. Insuratna: “Diak dumur-as. … Diak sigurado no asinoak, ngem mariknak nga addaak ditoy para iti maysa a naindaklan a banag.”
Naaddaankayo kadin iti kasta nga agsuksukisok rikna, a mangpanpanunot no am-ammonakayo ti Nailangitan nga Ama ken no kasapulannakayo? Patpatgek nga agtutubo, paneknekak a ti sungbatna ket wen! Adda plano ti Apo para kadatayo. Insagananakayo ti Apo para iti daytoy nga aldaw, itan, nga agbalin a pigsa ken puersa para iti pagsayaatan iti nabileg nga aramidna. Kasapulandakayo! Saanto nga agbalin daytoy a naindaklan no awankayo!
Babaen kadagiti sagrado a kasasaad, ti ipatpategtayo a propeta, ni President Russell M. Nelson, naminsan nga impalagipna kaniak ti dua a simple a kinapudno a pundasion iti naindaklan ken nagloriaan nga aramidyo.
Idi nakatugawak a kaabayko ti asawak idi yasideg ti propetatayo ti tugawna kadakami a dandani agdekket dagiti tumengmi, ket kinitanak kadagiti asul a matana. Diak sigurado no nagbitek a napartak ti pusok wenno nagsardeng iti apagdarikmat idi awagannak a Young Women General President. Dinamagna ti saludsod nga ut-utobek agingga ita, “Bonnie, ania ti kapatgan a banag a masapul a maammuan dagiti [agtutubo]?”
Inutobko iti apagkanito ket kinunak, “Masapul a maammuanda no siasinnoda.”
“WEN!” inyebkasna, “ken masapul a mammuanda ti panggepda.”
Ti Nadiosan a Pakabigbigantayo
Maysaka a maipatpateg, maay-ayat nga anak ti Nailangitan nga Ama. Ipatpategnaka unay nga awan kurangna gapu ta intedna ti Anakna, ni Jesucristo, a mangsubbot kenka ken kaniak.1 Di agbalbaliw ti ayat ti Mangisalakan kadatayo—uray no mapaaytayo! Awan ti makabalin a mangisina kadatayo iti ayat ni Cristo.2 Makatulong ti pananglagip kadaytoy nga ayat iti pananglapped iti pannakattikaw ti lubong a manggandat a mangpakapuy iti panagtalek iti nadiosan a pakabigbiganyo ken mangkullaap kadakayo iti potensialyo.
Iti maysa a komperensia ti FSY, naam-ammok dagiti dua a babbalasitang a mangikarkarigatan. Dinakamat ti agpada a babbalasitang a nagtalekda iti patriarchal blessingda tapno sarakenda manen ti ayat ken pannarabay ti Apo mismo kadakuada. Sapulenyo ti patriarchal blessing-yo, pagpagenyo ti tapok no kasapulan, ngem adalenyo daytoy a masansan. No awanankayo pay, mangalakayo iti maysa—iti kabiitan. Ammuenyo a dagus no ania ti kayat nga ibaga ti Dios kadakayo itan maipapan iti kinasiasinnoyo.
Ti Agnanayon a Panggeptayo
Ti maikadua a kinapudno nga insarita ni President Nelson kadatayo ita ket ti mangammo iti panggeptayo. Daytoy ti naindaklan ken natan-ok a pagrebbengantayo.
Adun a tawen ti napalabas, agarup lima ti tawen ti anakko a ni Tanner idi umuna nga agay-ayam iti soccer. Naragsakan unay isuna!
Idi simmangpetkami iti pagay-ayaman, naamirismi a ti grupona ket agus-usar iti maitutop a goal iti soccer—saan a bassit a goal no di ket nakadakdakkel a net a kasla di maitutop kadagiti lima-ti-tawenna.
Naaddaan iti kaipapanan ti ay-ayam kaniak idi nakitak a napan ni Tanner iti puesto ti goalie. Nasdaawak unay. Maawatanna ngata ti panggepna iti panangguardia iti net?
Nangrugin ti ay-ayam, ket kasta unayen ti panagbuyami iti ay-ayam ta nalipatanmi payen ni Tanner. Pagammuan ta adda maysa iti kalabanda a nakaala iti bola ket kinugtaranna a nagturong daytoy iti direksion ni Tanner. Kimmitaak iti puesto ni Tanner a mangnamnama a nakasagana isuna nga agtakder iti puestona ken depensaanna ti goal. Adda maysa a banag a nakitak a saanko a ninamnama.
Iti maysa a paset ti ay-ayam, nasinga ni Tanner ket nangrugi nga ilagana ti kanigid nga imana kadagiti abut ti net. Kalpasanna inaramidna met ti kasta iti kannawan nga imana. Ken insarunona ti kannigid a sakana. Kamaudiananna iti kannawan a sakana. Naminpinsan a naisinggalut ni Tanner iti net. Nalipatanna ti panggepna ken no ania ti naitalek kenkuana nga aramidenna.
Uray no saan a nagbayag ti karera ni Tanner iti soccer, naadalko kenkuana dayta nga aldaw diakto pulos malipatan. Masansan a masingatayo no apay nga addatayo ditoy lubong ket maibaw-ingtayo dagiti pigsatayo iti di masinunuo. Maysa kadagiti kabibilgan nga igam ni Satanas ti panangsingana kadatayo kadagiti naimbag ken nasaysayaat a rason a mabalin a mangkullaap ken mangyadayo kadatayo manipud iti mismo nga aramid a nangawag kadatayo iti daytoy a lubong.3
Agnanayon a panggeptayo ti umasideg ken ni Cristo ken sireregta a mangikappeng Kenkuana iti naidaklan nga aramidna. Kas kasimple iti panangaramid iti insuro ni President Nelson: “Ania man nga oras nga agaramidtayo iti ania man a banag a mangtulong iti asino man … a mangaramid ken mangtungpal kadagiti katulaganda iti Dios, tumultulongtayo a mangummong iti Israel.”4 Ket no makitinnulongtayo iti aramidna a kaduatayo Isuna, ad-adda a maam-ammo ken maayattayo Isuna.
Agtultuloytayo nga umas-asideg iti Mangisalakan babaen iti pammati, naipateg a panagbabawi, ken panagtungpal kadagiti bilin. No ibegkestayo ti bagbagitayo Kenkuana babaen dagiti katulagan ken ordinansa, mapno ti biagtayo iti panagtalek,5 pannakasalaknib,6 ken nauneg ken manayon a rag-o.7
Bayat ti yaasidegtayo Kenkuana, makitatayo dagiti dadduma iti babaen dagiti matana.8 Umasidegkayo ken ni Cristo. Umasidegkayo itan, ngem saankayo nga agmaymaysa nga umasideg!9
Ti ebanghelio ni Jesucristo saan laeng a nasayaat; kasapulan daytoy para iti amin. “Awan ti sabali a pamuspusan wenno wagas a pakaisalakanan ti tao, babaen laeng ken ni Cristo.”10 Kasapulantayo ni Jesucristo! Kasapulan ti lubong ni Jesucristo.11
Laglagipenyo a ti kasayaatan a wagas a panangpadur-as iti lubong ket ti panangisaganayo iti lubong para ken ni Cristo babaen iti panangawis iti amin a sumurot Kenkuana.
Adda nabileg nga estoria iti Libro ni Mormon a mangisalaysay iti pannakilangen ti nagungar a Mangisalakan kadagiti Nephite. Mapanunotyo kadi no anianto ti kayarigan dayta?
Bayat ti panangibaga ni Cristo a masapul nga agsublin iti Ama, “intaliawna manen dagiti matana iti ummong.”12 Nakitana ti panagluada, ammona a kayatda a dawaten ti panagbayagna pay.
Dinamagna: “Adda kadi masakit kadakayo? Yasidegyo ida. Adda kadi kadakayo ti lugpi, wenno bulsek, … umel, wenno marigatan iti uray ania a kita? Yasidegyo ida ta agasak.”13
Gapu iti dakkel a kaasi, awan itedna a pagpatinggaan ken inawaganna amin a “marigatan iti uray ania a kita.” Magustuak nga awan iti dakkel unay wenno bassit unay nga agasan ni Jesucristo.
Ammona dagiti intayo panagsagaba kasta met nga awaganna nga umasideg dagiti mariribukan, malmaldaang, nabannog, natangsit ken ti saan a maawatan, ti malidlidayan wenno dagiti “marigatan iti uray ania a kita.”
Ket ti amin “napanda … ; ket inagasanna ida a saggaysa. …
“… Ket inaramidda amin, kadakuada a naagasan ken kadakuada nga awan sakitna, nagrukbabda iti sakaananna.”14
Tunggal basaek daytoy, saludsodek iti bagik: Asinonto ti yasidegko ken ni Cristo? Asinonto ti yasidegmo kadi?
Mabalin kadi a kumitatayo manen iti aglawlaw, kas ti inaramid ni Jesus, tapno masigurado nga awan ti malibtawan ket maawis ti tunggal maysa nga umasideg tapno mangam-ammo Kenkuana?
Ibinglayko man ti maysa a pagarigan no kasano ti kasimple daytoy. Ti gayyemko a ni Peyton nga agtawen iti 15, addaan iti panggep a tun-oyen a mangbasa ti lima a bersikulo ti nasantuan a kasuratan iti tunggal pammigat iti inaldaw, ngem dina inaramid daytoy a bukbukodna. Iti panangkitana manen, inawis ni Peyton dagiti nagannak ken kakabsatna, uray pay ti lima-ti -tawenna nga adingna a lalaki. Daytoy kasla simple nga aramid ti insursuro ni Cristo idi inyawisna ti, “Yasidegyo ida.”
Naited daytoy nga awis ti Apo agingga ita. Dakayo a babarito ken babbalasitang, rugianyo itan, iti bukodyo a pagtaengan. Agkararag ken dawatenyo kadi iti Nailangitan nga Ama no kasano a matulonganyo dagiti nagannakyo bayat ti panagtultuloyyo nga umasideg ken ni Cristo? Kasapulandakayo a kas met laeng iti panagkasapulanyo kadakuada.
Kalpasanna kitaenyo manen dagiti kakabsat, gagayyem, ken kaarrubayo. Asinonto ti yasidegyo ken ni Cristo?
Impakdaar ti Mangisalakantayo, “Adtoy siak ti silaw; nangaramidak iti pagulidananyo.”15I Mariknatayto ti ayat ken talna ti Mangisalakan no makikaysatayo Kenkuana iti panangisalakan ti pamilia ti Dios, gapu ta inkarina, “Siasino man a sumurot kaniak maaddaan iti silaw ti biag, ket dinto magna iti kasipngetan.”16
Anian a nagdayag a panawen a makiraman iti panggep ni Cristo!
Wen, adtoykayo para iti naindaklan a banag. Makikaykaysaak ken ni President Nelson, a nagkuna: “Kasapulannakayo ti Apo a mangbalbaliw iti lubong. No awaten ken surotenyo ti pagayatanna para kadakayo, makitayonto ti bagiyo a mangipatpatungpal iti imposible!”14
Situtured a paneknekak nga ammo ti Apo no asinokayo ken ay-ayatennakayo! Sangkamaysa, nga Itandudotayo amin ti panggepna agingga iti naindaklan nga aldaw a panagsubli ni Cristo Mismo itoy a lubong ket awaganna ti tunggal maysa kadatayo nga “umasideg.” Siraragsaktayo nga aguummongto a sangkamaysa, gapu ta datayo dagiti umasideg ken ni Cristo, ken saantayo nga umasideg nga agmaymaysa. Iti nagan ni Jesucristo, amen.