“Ad-adda ti Panagayatmo Kaniak Ngem Dagitoy?”
Ania a bambanag ti maaramidmo iti biagmo a mangipakita nga umuna nga ayatem ti Apo?
Idi Nobiembre 2019, binisitami iti gayyemko ti Holy Land. Iti kaaddami idiay, nirebyu ken inadalmi ti nasantuan a kasuratan maipapan ti biag ni Jesucristo. Maysa a bigat, nagtakderkami iti igid ti amianan a laud ti Baybay ti Galilea iti maysa a lugar a mabalin a nagkitaan da Jesus ken dagiti disipulona kalpasan ti Panagungarna.
Kalpasan ti Panagungar ni Jesus, kas mabasatayo iti Juan kapitulo 21, nangdaklis da Pedro ken ti dadduma a disipulo iti agpatnag a di nagballigi.1 Iti kabigatanna, nakitada ti lalaki a nakatakder iti igid ti baybay a nangibaga kadakuada nga ipuruak ti iketda iti bangir ti bilog. Iti siddaawda, namilagruan a napno iti ikan ti iket.2
Dagus a nabigbigda ti lalaki a ti Apo, ket nagdarasda a kimmablaaw Kenkuana.
Idi guyodenda ti iket iti igid, napno iti ikan, kinuna ni Jesus, “Umaykayo, mamigatkayo.”3 Impadamag ni Juan “idi ngarud makapamigatda, kinuna ni Jesus ken ni Simon Pedro, Simon, anak ni Jonas, ad-adda ti panagayatmo kaniak ngem dagitoy?”4
Idi nakatakderak iti dayta met la nga igid ti baybay, naamirisko a ti saludsod ti Mangisalakan ti maysa iti kapapatgan a saludsod a madamagna kaniak iti maysa nga aldaw. Dumani mangngegak ti timekna nga agsalsaludsod, “Russell, ad-adda ti panagayatmo kaniak ngem dagitoy?”
Mapanunotyo kadi no ania ti itudtudo ni Jesus idi damagenna ni Pedro, “Ad-adda ti panagayatmo kaniak ngem dagitoy?”
Inaigtayo daytoy a saludsod iti bagitayo iti aldawtayo, nalabit a salsaludsodennatayo ti Apo maipanggep iti pannakakomikomtayo ken ti adu a nasayaat ken dakes nga impluensia a makibalubal iti pasnek ken orastayo. Nalabit a damdamagenna ti tunggal maysa kadatayo no ad-adda ti panagayattayo Kenkuana ngem ti bambanag daytoy lubong. Nalabit a saludsod daytoy maipapan iti no ania a talaga ti ipategtayo iti biag, asino ti suroten, ken no kasano ti pannirigantayo iti relasiontayo kadagiti miembro ti pamilia ken kaarruba. Nalabit a damdamagenna no ania ti mangparag-o ken mangparagsak kadatayo.
Dagiti banag kadi daytoy lubong ti mangted kadatayo iti rag-o, ragsak, ken talna nga indiaya ti Apo kadagiti disipulona ken idiayana kadatayo? Isu laeng ti makaited iti pudno a rag-o, ragsak, ken talna babaen ti panagayattayo Kenkuana ken panangsurot iti pannursurona.
Kasano a sungbatak ti saludsod “Ad-adda ti panagayatmo kaniak ngem dagitoy?”
No matakuatantayo ti nabukbukel a kaipapanan daytoy a saludsod, agbalintayo a nasaysayaat a miembro ti pamilia, kaarruba, makipagili, miembro ti Simbaan, ken annak ti Dios.
Iti edadko, adun ti napanak a pamumpon. Siguradoak nga adu kadakayo ti nakakitan iti nakitakon. No rambakan ti biag ti pimmusay a miembro ti pamilia wenno gayyem, manmano nga agsarita ti speaker maipapan ti kadakkel ti balay ti tao, ti bilang dagiti kotse, wenno dagiti balanse iti bangko. Gagangay a dida isarita maipapan dagiti social medial post. Iti kaaduan a pamumpon a dinar-aayakon, ipokusda ti relasion ti ipatpategda, serbisio iti dadduma, leksion ken padpadas iti biag, ken ti ayatda para ken ni Jesucristo.
Maawatandak koma. Diak ibagbaga a biddut ti kaadda ti napintas a balay wenno kotse wenno dakes ti agusar iti social media. Daytoy ti ibagbagak nga iti udina, bassit ti pateg dagita a banag no idilig iti panagayat iti Mangisalakan.
No ayaten ken surotentayo Isuna, adda pammatitayo Kenkuana. Agbabawitayo. Surotentayo ti pagwadanna ken agpabuniag ken umawat iti Espiritu Santo. Agibturtayo agingga iti udina ken agtalinaed iti dana ti katulagan. Pakawanentayo dagiti miembro ti pamilia ken kaarruba babaen ti panaglipat iti gura nga im-imetantayo. Agpasnektayo nga agtungpal kadagiti bilin ti Dios. Agpasnektayo nga agtulnog. Agaramid ken agtungpaltayo kadagiti katulagan. Dayawentayo dagiti amma ken innatayo. Iwaksitayo dagiti dakes nga impluensia ti lubong. Isaganatayo ti bagitayo para iti Maikadua a Yaayna.
Iti “Ti Sibibiag a Cristo: Ti Pammaneknek dagiti Apostol,” mabasatayo: “Agsublinto [ni Jesus] iti maysa nga aldaw iti daga. … Agturayto kas Ari dagiti Ar-ari ket agturay kas Apo dagiti Appo, ket agparintumengto ti tunggal tumeng ket agsaonto ti tunggal dila kas pagdaydayaw iti sanguananna. Agtakderto ti tunggal maysa kadatayo tapno ukomennatayo a mayannurot kadagiti aramidtayo ken tarigagay ti puspusotayo.”5
Kas maysa kadagiti Apostol a nagpirma iti dokumento a “Ti Sibibiag a Cristo”, maibagak iti panangammok a ni Jesus “ti silaw, ti biag, ken ti namnama ti lubong”6 mangted kaniak iti dakdakkel a tarigagay nga ad-adda ng agayat Kenkuana iti inaldaw.
Paneknekak a sibibiag ti Nailangitan nga Ama ken ni Jesucristo. Paneknekak nga ay-ayatendatayo. Isuro ti scriptures a “Ta kasta la unay ti panagayat ti Dios iti lubong; nga intedna ti Anakna a Bugbugtong, tapno amin a mamati kenkuana saan a mapukaw, no di ket adda biagna nga agnanayon.”7 Isuro pay ti nasantuaan a kasuratan a ni Jesus “nagayat unay iti lubong a nangtedanna iti bukodna a biag, tapno kas iti kaadu ti mamati makapagbalinda nga annak ti Dios.”8
Ay-ayatennatayo unay ti Nailangitan nga Ama ta insaganana ti plano ti pannakaisalakan a ti Mangisalakan ti kapatgan a tao. Ket ay-ayatennatayo unay ni Jesus nga iti dakkel a Konseho iti Langit, dinamag ti Nailangitan nga Ama, “Asino ti ibaonko?” Ni Jesus, nga isu ti Inauna ti amin nga espiritu nga anak ti Ama, simmungbat, “Adtoyak, ibaonnak.”9 Kinunana iti Ama, “Ama, maaramid ti pagayatam, ket kukuam ti gloria iti agnanayon.”10 Nagboluntario ni Jesus nga agbalin a Mangisalakan ken Mannubbottayo tapno agbalintayo kas Kadakuada ken agsubli iti sidongda.
Isuro pay dagitoy dua a nasantuaan a kasuratan a tapno agsubli iti sidongda nasken a mamatitayo. Nasken a mamatitayo ken ni Jesus ken iti plano ti Dios iti ragsak. Tapno mamati ket ayaten ken suroten ti Mangisalakantayo ket tungpalen dagiti bilin, uray iti baet dagiti pannubok ken rigat.
Nariribuk ti lubong ita. Adda pannakaupay, panagsusupiat, pannakaburibor, ken pannakasinga.
Nakita ni President Dallin H. Oaks, iti panagsaritana idi 2017, ti sumaganad: “Dagitoy ti mapannubok a panawen, a napnuan iti dadakkel a parikut: gubat ken damdamag ti gubat, posible nga epidemia dagiti makaakar a sakit, gawat, layus, ken global warming.”11
Ditayo mapukaw ti ayat ken namnamatayo ken Jesus, nupay maipasangotayo kadagiti napalaus a karit. Dinatayto pulos lipaten ti Nailangitan nga Ama ken ni Jesus. Ay-ayatendantayo.
Itay napalabas nga Oktubre, sinuruannatayo ni President Russell M. Nelson iti pateg ti panangipangrunatayo nga umuna ti Nailangitan nga Ama ken Jesucristo iti biagtayto. Insuronatayo ni President Nelson a ti maysa a kaipapanan ti balikas nga Israel bay-an nga agballigi ti Dios.”12
Sinaludsodna ti tunggal maysa kadatayo: “Siaayat ka kadi a mangpaballigi iti Dios iti biagmo? Siaayat ka kadi a mangpabalin iti Dios a kapatgan nga impluensia iti biagmo? Palugodam kadi dagiti balikasna, bilinna, ken katulaganna a mangimpluensia iti aramidem iti inaldaw? Ad-adda kadi nga unaem nga ipangpangruna ti timekna ngem iti sabali? Siaayat ka kadi a mangaramid iti nasken nga iparamidna kenka ngem iti ania man a sabali pay nga ambision? Siaayat ka kadi a mangpasakup iti pagayatam iti pagayatanna?”13
Nasken a kanayon a laglagipentayo nga agpannuray ti pudno a ragsaktayo iti relasiontayo iti Dios, ken Jesucristo, ken iti tunggal maysa.
Maysa a wagas a pangipakitaan iti ayattayo ti pannakikadua iti pamilia, gagayyem, ken kaarruba a mangaramid iti babassit a banag a makapagsisinnerbi a nasaysayaat. Aramidenyo dagiti banag a mamagbalin itoy lubong a nasaysayaat a lugar.
Ania a bambanag ti maaramidmo iti biagmo a mangipakita nga umuna nga ayatem ti Apo?
No ayatentayo dagiti kaarrubatayo kas panagayatna kadakuada, marugian a pudno nga ayatentayo dagiti adda iti lawlawtayo.14
Damagek manen, kasano a sungbatanyo ti saludsod ti Apo “Ad-adda ti panagayatmo kaniak ngem dagitoy?”
No panunotenyo daytoy a saludsod, kas inaramidko, ikararagko a masungbatanyo kas inaramid ni Pedro idi, “Wen, Apo; ammom nga ay-ayatenka,”15 sa ipakitayo daytoy babaen ti panagayat ken panagserbi iti Dios ken dagiti amin nga adda iti lawlawyo.
Paneknekak a nagasattayo nga adda ebanghelio ni Jesucristo a mangtarabay kadatayo iti wagas a panagbiag ken panaglilinnangentayo. Kenkuana, matakuatantayo a napateg unay Kenkuana ti tunggal anak a babai ken lalaki ti Dios.
Paneknekak a ni Jesucristo ti patpatgentayo a Mangisalakan. Isu ti Bugbugtong nga Anak ti Dios. Ket iburayko daytoy a pammaneknek a sipapakumbaba iti nagan ni Jesucristo, amen.