Ikarkararagko nga Usarennatayo
Dagiti babassit nga aramid ket sangsangkamaysa a mangparnuay iti dakkel nga epekto, mangpadaeg kadagiti adu a nadumaduma a banag nga ar-aramidentayo kas disipulo ni Jesucristo.
Naaramid daytoy a biskuit iti phyllo a masa ken pagyamananmi dagiti pistasio. Inaramid ti pamilia Kadado iti adun a dekada, nga agtagikua iti tallo a panaderia iti Damasco, Siria. Idi bimtak ti gubat, napasardeng ti barikada dagiti taraon ken abasto a makagteng iti paset ti siudadda. Nangrugi a mabisinan da Kadado. Iti kangitingitan daytoy naupapay a kasasaad, nangrugi ti Latter-day Saint Charities ken dagiti natutured a kameng ti Rahma Worldwide a nangipaay iti inaldaw a napudot a taraon ken gatas para kadagiti babassit nga ubbing. Kalpasan ti narigat a panawen, rinuguian ti pamilia ti panagbiagda—kas met ti panaderiada—manen iti baro a pagilian.
Iti nabiit pay, dimteng ti kahon ti biskuit kadagiti opisina ti Simbaan nga addaan iti mensahe: “Iti nasurok a dua a bulan, nakaalakami iti taraon manipud iti kusina ti Rahma–Latter-day Saint [Charities]. No awan daytoy nataykam koma iti bisin. Awatenyo koma daytoy … a taraon manipud iti pagtagilakuak kas tanda ti panagyaman. Kiddawek iti Dios a Mannakabalin-amin a bendisionannakayo … iti amin nga aramidyo.”1
Maysa a biskuit iti panagyaman ken pakalaglagipan. Para kadakayo daytoy. Para iti amin a nagkarkararag kalpasan a nabuyada daytoy iti damdamag, ti amin a nagboluntario idi karigatna wenno dagiti nasayaat a nangted ti kuarta iti humanitarian fund; a nagtalek a para iti pagimbagan daytoy, agyamankami.
Nadiosan a Pagrebbengan a Mangaywan iti Napanglaw
Sakup ti nadiosan a bilin ti Simbaan ni Jesucristo ti mangaywan iti napanglaw.2 Maysa kadagiti adigi iti aramid ti pannakaisalakan ken pannakaitan-ok.3 No ania ti pudno idi panawen ni Alma ket pudno la unay iti panawentayo ita: “Ket iti kasta, iti narang-ay a kasasaadda, dida pinapanaw ti asino man a lamulamo, wenno mabisin, wenno mawaw, wenno masakit, wenno ti saan pay a nataraken; ken dida inturong ti puspusoda iti kinabaknang; ngarud nawayada iti amin, iti nataengan ken iti ubing, iti adipen ken iti nawaya, iti lalaki ken iti babai, iti man ruar ti simbaan wenno iti uneg ti simbaan, iti awan ti panagraemna kadagiti tao a kas kadagiti makasapul.”4
Agtignay ti Simbaan iti daytoy iti naduduma a wagas, a karaman dagiti:
-
ti panagministertayo babaen iti Relief Society, Priesthood quorums, ken dagiti klase;
-
panagayuno ken panagusar kadagiti daton iti panagayuno;
-
dagiti talon ti pagimbagan ken pagaramidan iti de lata;
-
dagiti sentro ti panagsangaili para kadagiti imigrante;
-
panangtulong kadagiti adda iti pagbaludan;
-
dagiti aramid ti Simbaan a panangtulong kadagiti tao;
-
ken ti JustServe app, a mangiparis kadagiti agboluntario iti gundaway ti panagserbi.
Wagas amin dagitoy a nabuangay babaen iti priesthood, ditoy a dagiti babassit nga aramid ket sangsangkamaysa a mangparnuay iti dakkel nga epekto, mangpadaeg kadagiti adu a nadumaduma a banag nga ar-aramidentayo kas disipulo ni Jesucristo.
Adda Sungbatan dagiti Propeta para iti Intero a Daga
Adda bilin dagiti propeta para iti intero a daga, saan lang a para kadagiti kameng ti Simbaan. Isalaysayko ti padasko no kasano a personal ken napasnek ti panangtungpal ti Umuna a Panguluen iti daytoy a bilin. Iti panagadu ti pagkasapulan, binilin datayo ti Umuna a Panguluen a padakkelen ti panagtulongtayo iti naisangsangayan a wagas. Interesadoda kadagiti kadakkelan nga agdama a mapaspasamak ken kabassitan a detalye.
Iti nabiit, inyegmi kadakuada ti maysa kadagiti protective medical gowns a dinait ti Beehive Clothing para kadagiti ospital a mausar bayat iti pandemic. Kas maysa a medikal doktor, interesado unay ni President Russel M. Nelson. Saan laeng a kayatna a makita daytoy. Kayatna nga ipadas daytoy—kitaenna ti punyos ken kaatidog ken ti panakaisiglotna iti likudan. Kalpasanna, sipapasnek a kinunana kadakami, “No makitayo dagiti tattao a naidutok kadakayo, agyamankayo kadagiti panagayunoda, dagiti ayunoda, ken panagministerda iti nagan ti Apo.”
Humanitarian Report
Iti panangiturong ni President Nelson, ipadamagko no kasano ti panagtignay ti Ti Simbaan ni Jesucristo dagiti Santo iti Ud-udina nga Aldaw kadagiti bagyo, ginggined, pannakayakar dagiti refugee—ken uray iti pandemic—agyamankami iti kinasayaat dagiti Santo ti Ud-udina ng Aldaw ken iti adu a gagayyem. Ngem nupay no ti nasurok a 1,500 COVID–19 a proyekto ti kadakkelan a nagpokusan a tinulongan ti Simbaan iti napalabas nga 18 a bulan, timmulong pay ti Simbaan iti 933 a natural a didigra ken dagiti krisis ti refugee iti 108 a pagilian. Ngem saan a maibaga ti statistics ti intero ng estoria. Palubosandak nga ibinglay ti uppat a pagarigan a mangiladawan ti kabassitan a padas a maar-aramid.
South African COVID Relief
Adu a tawenen ti napalabas sipud natay ti nagannak ti sangapulo-ket-innem a tawenna a ni Dieke Mphuli iti Welkom, South Africa, a naibilin a mangaywan iti tallo a kakabsatna. Kanayon a narigat para kaniana iti agsapul iti makaanay a taraon, ngem nagbalin pay a narikrikut gapu iti panagkurang ti abasto ken quarantine iti COVID. Masansan a mabisinanda, no maaddaanda ket babaen iti asi dagiti kaarruba.
Maysa nga aldaw idi Agosto 2020, nasdaaw ni Dieke idi adda nagkatok iti balayda. Idi linuktanna nakitanna ti dua a ganggannaet—maysa a mangibagi ti Simbaan manipud iti area office iti Johannesburg ken maysa nga opisial manipud iti South Africa Department ti Social Development.
Nagkadua dagitoy tapno mangiyeg iti taraon kadagiti agkasapulan a sangakabbalayan. Nabang-aran ni Dieke idi nakitana dagiti cornmeal ken dadduma a taraon, a nagatang babaen iti pondo ti humanitarian ti Simbaan. Makatulong dagitoy kenkuana tapno maaywanan ti pamiliana iti sumagmamano a lawas inggana a mangrugi ti tulong ti gobierno.
Maysa kadagiti rinibu a padas ti estoria ni Dieke a napasamak iti intero a lubong bayat iti pandemia ti COVID, agyamankami kadagiti nakonsagraran a kontribusionyo.
Tulong kadagiti Afghan iti Ramstein
Nakitatayon dagiti nabiit pay a ladawan iti damdamag—rinibu nga evacuees ti naitayab manipud iti Afghanistan. Adu ti simmangpet kadagiti air bases wenno temporario a lugar iti Qatar, iti Estados Unidos, Alemania, ken Espania sakbay nga agtultuloyda kadagiti pakadestinuanda. Agkasapulanda la unay, ket nagtignay ti Simbaan para iti abasto ken dagiti agboluntario. Iti Ramstein Air Force Base iti Germany, nangipaay ti Simbaan kadagiti nagadu a donasion iti diapers, baby formula, taraon, ken sapatos.
Nadlaw dagiti sumagmamano a Relief Society sisters nga adu a babbai nga Afghan ti mangus-usar kadagiti bado dagiti assawada tapno pang-abbong iti ul-uloda gapu ta nadadael dagiti abbongda iti riribuk iti Kabul airport. Kas iti pannakigayyem ti aniaman a relihion wenno kultura, nagguummong dagiti sisters iti Ramstein First Ward tapno agdaitda iti kadawyan nga aruaten ti Muslim para kadagiti babbai nga Afghan. Kinuna ni Sister Bethani Halls, “Nangngegmi a kasapulan dagiti babbai ti kawes iti panagkararag, ket agdadaitkami tapno [komportableda] iti panagkararagda.”5
Saranay iti Ginggined iti Haiti
Ipakita daytoy sumaruno a pagarigan a saan a masapul a nabaknangka wenno nataengan tapno agbalin a ramit para iti kinaimbag. Aggapu ti sangapulo-ket-walo ti tawenna a ni Marie “Djadjou” Jacques iti Cavaillon Branch iti Haiti. Idi nagginggined iti napigsa iti asideg ti ilida idi Agosto, maysa ti balayda kadagiti rinibu a narpuog a pasdek. Kasla imposible nga iladawan ti kinaliday ti mapukawan iti pagtaengan. Ngem imbes nga sumuko iti kinaliday, timmulong ni Djadjou.
Associated Press
Nakitana ti nataengan a kaarrubada nga agrigrigat ket rinuguianna ti nangaywan kenkuana. Tinulonganna pay ti dadduma a nagdalus iti aglawlaw. Uray no nabanbannog, nakitipon kadagiti dadduma a kameng ti Simbaan nga agibunong kadagiti taraon ken hygiene kits. Ti pakasaritaan ni Djadjou ti maysa kadagiti nabileg a pagtuladan ti panagserbi nga inaramid dagiti agtutubo bayat iti panagreggetda a mangsurot ti ehemplo ni Jesucristo.
Panangtulong kadagiti Nalayus iti Germany
Iti sumagmamano a lawas sakbay ti ginggined, sabali pay a grupo ti agtutubo ti mangmangted iti kapadana a panagserbi iti ballasiw ti Atlantic. Kakaruan dagiti layus a napasamak iti Europa idi Julio iti adu a dekada.
Idi naatiananen ti danum, maysa nga agtagilako iti igid ti karayan iti ili ti Ahrweiler, Germany, ti napan nangkita iti nadadael ket kasta unay ti siddaawna. Daytoy napakumbaba a lalaki, napasnek a Katoliko, ket nagkararag a mangibaon koma ti Dios iti mangtulong kenkuana. Iti kinabigatan, simmangpet ni President Dan Hammon iti Germany Frankfurt Mission a kaduana ti maysa a bassit a grupo dagiti misionario a nakaarwat iti amarillo a Helping Hands vests. Dimanun ti danum iti 10 feet (3m) kadagiti pader ti agtagilako, a nangibati iti adu a pitak. Pinala dagiti nagboluntario dagiti pitak, inikkatda ti carpet ken drywall, ken impanda iti kalsada para iti pannakadalusda. Nakipagtrabaho met ti naragsakan unay nga agtagilako iti sumagmamano nga oras, nasdaaw a nangibaon ti Apo iti grupo a katulonganna kas sungbat ti kararagna—iti uneg ti 24 nga oras!6
“Ngarud, ikarkararagko nga Usarennatayo”
Maipapan iti panagtulong ti SImbaan, imbaga ni Elder Jeffrey R. Holland: “Masungbatan dagiti kararag … masansan … babaen iti panagusar ti Dios ti sabali a tattao. Ita, Ikarkararagko nga Usarennatayo. Ikarkararagko a datayo ti sungbat ti kararag ti tattao.”7
Kakabsat, babaen kadagiti panagministeryo, donasion, oras, ken ayatyo, nagbalinkayo a sungbat kadagiti adu a karkararag. Ket adu pay ti maaramid. Kas nabuniagan a kameng ti Simbaan, sakuptayo iti katulagan a mangaywan kadagiti agkasapulan. Saan a kasapulan ti kuarta wenno adayo a luglugar ti panagreggettayo;8 kasapulanda ti pannarabay ti Espirtu Santo ken natallugod a puso a mangibaga iti Apo: “Adtoyak, ibaonnak.”9
Ti Naparaburan a Tawen ti Apo
Naisurat itiLucas 4 a napan ni Jesus iti Nazareth, a sadiay ti dimmakelanna, ken timmakder iti sinagoga tapno agbasa. Asideg daytoy iti panagrugi ti mortal a panagserbina, ken inadawna ti teksto manipud iti libro ni Isias:
“Adda kaniak ti Espiritu ti Apo, ta pinulutannak a mangikasaba iti naimbag a damag kadagiti napanglaw; imbaonnak a agasan ti napakumbaba a puso, mangiwaragawag iti pannakwayawaya dagiti balud, ken pannakakita manen dagiti bulsek, iti pannakaruk-at dagiti maparparigatan.
“Tapno maiwarnak ti maanamungan a tawen ti Apo.…
“… Ita nga aldaw naidanon iti lapayagyo daytoy a surat.”10
Paneknekak a matungtungpal ti nasantuan a kasuratan iti panawentayo met. Paneknekak nga immay ni Jesucristo tapno agasanna dagiti napakumbaba a puso. Ti ebangheliona ti mangagas kadagiti bulsek tapno makakitada. Ti Simbaanna ti mangikasaba iti pannakaruk-at dagiti balud, ken igagaed dagiti disipulona iti intero a lubong ti mangwayawaya kadagiti marigrigatan.
Palubosandak a mangileppas babaen iti panangulit ti saludsod a dinamag ni Jesus iti Apostolna a ni Simon Pedro: “Ay-ayatennak kadi?”11 Ti anag ti ebangheliona ket makita no kasano ti panangsungbattayo iti dayta a saludsod ken “panangaywan kadagiti karnerona.”12 Awisek ti tunggal maysa kadakayo nga addaan iti panangraem ken panagayat ken ni Jesucristo ti Maestrotayo, nga agbalinkayo a paset ti nangayed a panagministrona, ken ikarkararagko nga usarennatayo. Iti sagrado a nagan ni Jesucristo, amen.