Dakkel a Panagayat ti Apo iti Amin nga Aldawko
Kasano ti reaksiontayo kadagiti panagsagabatayo? Mariknatayo kaditi ti panagyaman gapu ta ad-adda a nakapokustayo kadagiti paraburtayo ngem kadagiti problematayo?
Ti pandemia a COVID-19 ti maysa kadagiti adu a pannubok ken karit a napasaran dagiti annak ti Dios iti intero a pakasaritaan ti lubong. Iti rugi daytoy a tawen, narigat a pannubok ti napasaran ti ay-ayatek a pamiliak. Ti pandemia ken dadduma pay a gapu ti nangyeg iti patay ken leddaang iti pamiliami gapu iti ipupusay ti sumagmamano a patpatgenmi. Iti laksid ti medikal a pannakataming, panagayuno ken kararag, iti uneg laeng ti lima a lawas pimmusay ti kabsatko a lalaki a ni Charly ken ti kabsatko a babai a ni Sussy, ken ti kayongko a ni Jimmy.
No dadduma, napanunotko no apay a nagsangit ti Mangisalakan idi nakitana ni Maria a nagladingit gapu iti ipapatay ti kabsatna a Lazaro, nupay ammona nga adda bilegna a mangbiag ken ni Lazaro ken iti mabiit usarenna daytoy a bilega mangispal iti gayyemna manipud iti patay.1 Nasdaawak iti asi ken pannakipagrikna ti Mangisalakan ken Maria; naawatanna ti saan a mailadawan a ladingit ni Maria iti ipapatay ti kabsatna a Lazaro.
Mariknatayo met dayta nakaro a ladingit no mapadasantayo ti temporario a pannakaisina kadagiti ipatpategtayo. Addaan iti naan-anay a pannakipagrikna ti Mangisalakan kadatayo. Dinatayo babalawen iti kinaawan ti panagsakbay, wenno kurang a panangkitatayo iti agnanayon a panagdaliasattayo, Ketdi, Isu makipagrikna iti panagladingit ken panagsagabatayo.
Kayat ti Nailangitan nga Ama ken ti Anakna, a ni Jesucristo, nga agragsaktayo.2 Insuro ni Presidente Russell M. Nelson: “Ti rag-o a mariknatayo ket bassit ti pakainaiganna iti paspasamak iti biagtayo ken amin a banag nga adda pakainaiganna iti pokus ti biagtayo. No ti pokus ti biagtayo ni Jesucristo ken ti ebangheliona, … mariknatayo ti rag-o ania man ti mapaspasamak—wenno di mapaspasamak—iti biagtayo.”3
Idi agtutuboak a misionario, malagipko ti nasingpet a misionario a dinaydayawko a nakaawat iti naliday a damag. Natay ti nanang ken adingna gapu iti maysa a nakas-ang nga aksidente. Indiaya ti mision president ti opsion nga agawid iti balayda tapno makipamunpon. Nupay kasta, kalpasan ti panagsaritada iti telepono iti amana, pinili ti misionario nga agbati ket leppasen ti misionna.
Di nagbayag, idi agserserbikami iti maymaysa a zone, nakaawatkami iti kompanionko iti maysa a tawag a tinakaw dagiti mannanakaw ti bisikleta a kukua daytoy a misionario ken binagkongka daytoy. Masapul a mapanda ken ti kompanionna iti kaasitgan nga ospital, ket nakipagkitaami iti kompanionko kadakuada. Iti dalanmi a mapan iti ospital, maladladingitanak para iti daytoy a misionario. Napanunotko a malidlidayan ti espirituna ket sigurado, a kalpasan daytoy nasaem a padas, kayatna itan ti agawiden.
Nupay kasta, idi simmangpetkami iti ospital, nakitak daytoy a misionario a nakaidda, agur-uray a maopera—ken umis-isem. Napanunotko, “Kasano nga umis-isem iti kastoy a pasamak?” Bayat panagpaimbagna iti ospital, siraragsak a nangted kadagiti polieto ken kopia ti Libro ni Mormon kadagiti doktor, nars, ken dadduma pay a pasiente. Uray addaan kadagitoy a pannubok, dina kinayat ti nagawid. Ketdi, nagserbi agingga iti maudi nga aldawna iti mision nga addaan pammati, kired, pigsa, ken regta.
Iti rugi ti Libro ni Mormon, imbaga ni Nephi, “Ket adu dagiti nakitak a panagsagaba iti panaglabas dagiti aldawko, nupay kasta, naikkannak iti dakkel a parabur ti Apo iti amin nga aldawko.”4
Pinanunotko ti adu a pannubok a napadasan ni Nephi, adu kadagitoy ti nainayon iti sinuratna. Dagiti pannubokna ti mangtulong kadatayo a mangawat nga addaantayo amin iti aldaw ti rigat. Maysa kadagitoy a pannubok ti napasamak idi nabilin ni Nephi nga agsubli iti Jerusalem a mangala iti gambang a pinanid nga ik-ikutan ni Laban. Sumagmamano a kakabsat ni Nephi ti bassit ti pammatina ken binaotda pay ni Nephi iti sarukod. Napadasan pay ni Nephi ti pannubok a natukkolna ti baina ket di nakaala iti taraon para iti pamiliana. Idi agangay, idi nabilin ni Nephi a mangbangon iti bapor, inumsi dagiti kakabsatna ket nagkedkedda a tulongan. Ti laksid dagitoy ken ti adu a dadduma pay a pannubok iti unos ti biagna, binigbig latta ni Nephi ti kinaimbag ti Dios.
Bayat ti panagballasiw ti pamiliana iti taaw nga agturong iti naikari a daga, sumagmamano iti pamilia ni Nephi ti “nangrugi a nagragragsak,” nagsao iti narasaw ken nanglipat a ti pannakabalin ti Apo ti nangtaginayon kadakuada. Idi binabalaw ni Nephi ida, nasair ti riknada ket pinungoda iti tali tapno saan a makagunay. Isarita ti Libro ni Mormon a dagiti kakabsatna “kasta unay ti kinasabrakda [kenkuana]”; ken ti pungupunguan ken palaypalayna “ket limteg, ket nakasaksakit.”5 Ket nagladingit ni Nephi gapu iti kinatangken ti panagpuspuso dagiti kabsatna ken no dadduma mariknana a maabak gapu iti panagsagabana.6 “Nupay kasta,” impakdaarna, “nagtalekak iti Diosko, ket nagdaydayawak kenkuana iti nagmalem; ket saanak a nagdayamudom iti Apo gapu iti panagsagabak.”7
Patpatgek a kakabsatko, ania ti reaksiontayo kadagiti panagsagabatayo? Agdayamudomtayo kadi iti sango ti Apo gapu kadagitoy? Wenno, kas ken ni Nephi ken ti sigud a gayyemko a misionario, managyamantayo kadi iti sao, panunot, ken aramid gapu ta ad-adda a nakapokustayo kadagiti paraburtayo ngem kadagiti problematayo?
Ti Mangisalakantayo, ni Jesucristo, nangted kadatayo iti pagwadan bayat ti panagserbina iti daga. Iti panawen ti rigat ken pannubok, adda dagiti banag a mangyeg kadatayo iti dakdakkel a talna ken pannakapnek ngem iti panagserbi iti padatayo a tao. Isarita ti Libro ti Mateo no ania ti napasamak idi naammuan ti Mangisalakan a ti kasinsinna, ni Juan Bautista, ket pinugotan ni Ari Herodes tapno mapagustuan ti anak a babai ni Herodias:
“Dimteng dagiti adalan ni Juan, innalada ti bangkayna ket intanemda. Kalpasanna, impadamagda ken ni Jesus ti napasamak.
“Idi naammuan ni Jesus, nagbangka a napan iti maysa a lugar nga awan matagtagitao. Ngem idi nadamag dagiti tattao, pinanawanda dagiti il-ilida ket nagnagnada a simmurot kenkuana.
“Dimsaag ni Jesus iti bangka, idi makitana dagiti adu a tattao, naasian kadakuada ket inagasanna dagiti masakitda.
“Idi mumalemen, napan dagiti adalanna kenkuana ket kinunada, Sumipngeten ket awan matagtagitao ditoy. Pagawidem dagiti tattao tapno mapanda kadagiti barbarrio ket gumatangda iti kanenda.
“Saan a masapul a pumanawda, kinuna ni Jesus kadakuada, ikkanyo ketdi ida iti kanenda.”8
Impakita ni Jesucristo kadatayo a bayat ti panawen ti pannubok ken rigat, mabigbigtayo ti rigrigat dagiti dadduma. Babaen iti pannakipagrikna, mabalintayo a tulongan ken itag-ay ida. Ket no aramidentayo daytoy, maitag-aytayo met babaen ti panagserbitayo a kas ken ni Cristo. Imbaga ni Presidente Gordon B. Hinckley: “Ti kasayaatan a solusion nga ammok iti panagdanag ket aramid. Ti kasayaatan nga agas iti kinaawan namnama ket panagserbi. Ti kasayaatan nga agas iti pannakabannog ket ti karit a panangtulong iti tao nga ad-adda pay a nabannog.”9
Babaen iti Simbaan ni Jesucristo, adu ti gundawayko a nagministro ken nagserbi iti padak a tao. Kadagidi a panawen a nariknak a pinalag-an ti Nailangitan nga Ama dagiti dagensenko. Propeta ti Dios iti daga ni Presidente Russel M. Nelson; isu ti naindaklan a pagwadan no kasano nga agministertayo iti dadduma bayat dagiti narigat a pannubok. Ikaykaysak ti pammaneknekko iti pammaneknek ti adu a dadduma pay a Santo, a ti Dios ti managayat a Nailangitan nga Amatayo. Nariknak ti awan patinggana nga ayatna bayat dagiti aldaw a panagrigatko. Maawatan ti Mangisalakantayo, ni Jesucristo, dagiti saem ken sagabatayo. Kayatna a palag-anen dagiti dagensen ken liwliwaennatayo. Surotentayo koma ti pagwadanna babaen iti panagserbi ken panagminister kadagti addaan iti nadagdagsen a dagensen ngem kadatayo. Iti nagan ni Jesucristo, amen.